यूहन्ना 13

यीशु रा चेले री जाघा धोऊणी

1फसह रे पर्बा का पहिले, जेबा यीशु जाणु कि मेरी सह घड़ी पूजी कि संसारा छाडी करे बापू सेटा बे नाहूं, तेबा आपणे लोका जोह संसारा में थी, जेड़ा प्रेम सह संसारा में डाहंदा थी, अन्त तणी तेडा ही प्रेम डाहंडअ रहू। 2जेबा शैतान शिमोना रे शोहरू यहूदा इस्करियोत रे मना में यह पाई छेकू, कि सह रोटी रे वक्ते ढ़ाकणे बझयाल़णअं, 3यीशु, यह जाणी करे कि बापू सब कुछ मेरे हाथे दिना दा साहा होर हाऊं परमेश्वरा सेटा बे आउअद आसा होर परमेश्वरा सेटा बे नाहंदा, 4रोटी खाणे का उठी करे आपणे झिकड़े खोली, होर गाची नी करे आपणी पीठी में बान्ही। 5तेबा पराता में पाणी भरी करे चेले री जाघा धोऊंदअ लागअ होर जोह गाची पीठी में बान्हीं दी थी, तेसी संघे टूशतअ लागअ 6जेबा सिमोन पतरसा सेटा बे आउअ, तेबा पतरसे तेऊबै बोलू, हे परमेश्वर, कि तूह मेरी जाघा धोऊंदा? 7यीशु तेऊबै उतर दिना, जोह हाऊं ऐबरे करा, तूह ऐबरे तेऊ नांई ज़ाणदअ, पर तेता बाद जाणना। 8पतरसे तेऊबै बोलू, तूह मेरी जाघा ऐबरे नांई धोए! यह शूणी करे यीशु तेऊबै बोलू, अगर हाऊं ताह नांई धोए, तेबा तांई संघे मेरा जुगे -जुगे तणी कोई साझा नांई। 9सिमोने पतरसा तेऊबै बोलू, हे परमेश्वर, मेरी जाघा ही नांई, पर हाथ होर मुड़ा भी धो। 10यीशु तेऊबै बोलू, जोह नीई छेकू तेऊरी जाघा रे सिबाए होर किछी धोऊण री जरूरत नांई आँधी, पर सह बिलकुल शुद्ध साहा; होर तमे शुद्ध साहा, पर सभे रे सभे शुद्ध नाँई। 11सह आपणे ढाकण आले जाणा थी, ऐतकी तणी तेऊ बोलू, कि तमे सभे रे सभे शुद्ध नांई आंधे।

12तेबा तेऊ त्यारी जाघा धोई छेकी, होर आपणे झिकड़े बान्हीं करे भी बेठअ, तेबा तयाबे बोलू, कैह तमे समझी कि मांई तमे संघे कैह करू? 13तमे महा बे गुरु होर परमेश्वर बोला, होर ठीक ही बोला, किबेकि हाऊं सहे साहा। 14अगर मांई परमेश्वर होर गुरु होई करे थारी जाघा धोई, तेबा तमा भी एकु दूजे री जाघा जरूरी धोई लोडी। 15किबेकि मांई तमाबे नमूना रिहाऊ कि जेड़ा मांई तमे संघे करू, तमे भी तेडा करे करा। 16हाऊं तमाबे सच-सच बोला, दास आपणे मालका का बढ़अ नांई हूँदअ, होर नाह भेजुदअ आपणे भेजणअ आले का। 17तमे याह गला जाणा, होर यह अगर त्या पैंदे चेले तेबा तमे धन्य हूँण। 18हाऊं तमा सभी रै बारे में बोला; जूणा मांई चुनीदे, त्या हाऊं जाणा, पर यह ऐतकी तणी साहा कि पवित्र शास्त्रा रा लिखुदा पूरा हो, जोह मेरी रोटी खांदा, तेऊ महाबे लात चुआकी। 19ऐबा हाऊं तेऊरे हूँणे का पहिले चतेंगी दींदा कि जेबा यह होए तेबा तमे बुशाह करा कि हाऊं सह साहा। 20हाऊं तमाबे सच-सच बोला कि जोह मेरे भेजिदे ग्रहण करा, सह महा ग्रहण करा; होर जोह महा ग्रहण करा, सह मेरे भेजणे आले ग्रहण करा।

बिश्बास घात फेरा बे इशारा

(मत्ती 26.20-25; मरकुस 14.17-21-21; लूका 22.21-23)

21या गला बोली करे यीशु आत्मा में ब्याकुल होऊ होर यह गुआही दिंनी, हाऊं तमाबे सच-सच बोला कि तमा मेज़ा का एकु हाऊं ढाकणे बझयालणअं। 22चेले बहेम होऊ, कि सह कासके बारे में बोला, एकु दूजे फेरा बै हेरदे लागे। 23तेऊरे चेले मेज़ा का एक जासू संघे यीशु प्रेम ढाहंदा थी, यीशु री हिका फेरा बै झुकी करे बेठअ थी। 24सिमोने पतरसे तेऊ फेरा बे ईशारा करी करे तेऊका पुछु, खोज़ तूह, कासके बारे में बोला? 25तेबा तेऊ हेडे ही यीशु री हिका फेरा बे झुकी करे तेऊका पुछु, हे परमेश्वर, सह कुण साहा?

26यीशु उतर दिना, जासूबे हाऊं ऐऊ रोटी रे टूकड़े डूबाई करे देलअ सह साहा। होर तेऊ टुकड़अ दबाई करे शिमोन इस्करियोती रै शोहरू यहूदा बै दींनअं। 27रोटी रअ टुकड़अ माँगदे ही तेउ मे शैतान समाऊ।

तेबा यीशु तेऊबै बोलू, जोह तूह करा, ऐभरी कर। 28पर बेशणे आले मेंज़ा का कोही नांई ज़ाणु कि तेऊ यह गल तेऊबै किबे बोली 29यहूदा सेटा बटु होर झोली रहंदा थी, तेबा एखे चेले समझू की यीशु तयाबे बोलू, हामा जोह पर्बा बे जो कुछ लोडी, तेता लआ होर गरीबा बे कुछ दान देआ। 30तेबा सह रोटी रअ टूकड़ नी करे तेभरी बागा बे नाठअ; होर यह राच्का वक्त थी।

नऊंईं आज्ञा

31जेबा सह बागा बे नाठअ तेबा यीशु बोलू, ऐबा मणशा रै शोहरू री महिमा होई, होर परमेश्वरा री महिमा तेऊमें होई, 32होर परमेश्वरे भी आपू में तेऊरी महिमा करणी होर तेभरी करणी। 33हे बालको, हाऊं थोड़ी देर तमा सेटा साहा तेहुकी तमा हाऊं लोढ़णअं, जेड़ा मांई यहूदी बै बोलुदा थी, तेडा ही ऐबा तमाबे हाऊं बोला। 34हाऊं तमाबे एक नऊंईं आज्ञा दींदा कि एकु दूजे संघे प्रेम डाहा; हेरा मांई तमे संघे प्रेम डाहू, तेडा ही तमे भी एकु दूजे संघे प्रेम डाहा। 35अगर आपु में प्रेम डाहले, तेबा ऐडा ज़ाणना कि तमे मेरे चेले साहा।

पतरसा रे नांई रा इशारा

(मत्ती 26.31-35; मरकुस 14.27-31; लूका 22.31-34)

36सिमोने पतरसे तेऊबै बोलू, हे परमेश्वर, तूह कई नाहंदा? यीशु उतर दिंना, ज़खे हाऊं नाहंदा तखे तूह महा पीछे नांई इछी सकतअ; पर ऐता बाद महा पीछ इहलअ। 37पतरसे तेऊबै बोलू, हे परमेश्वर, ऐबरे हाऊं ताह पीछे किबे इछी सकतअ? हाऊं तअ ताह पीछे आपणे प्राण भी दींणे बे त्यारअ साहा । 38यीशु उतर दिंना, कैह ताह महा पीछ आपणे प्राण भी दींणे? हाऊं ताहबे सच-सच बोला कि मुर्गे नांई बाशणअं तेबरे तणी ताह चीण बारी मेरा नांई करणा।

Pilihan Saat Ini:

यूहन्ना 13: ISJNT

Sorotan

Berbagi

Salin