IMAMAT 25
25
Tahun pepituken
(Ul 15:1-11)
1Ngerana TUHAN man Musa i das Deleng Sinai merentahken ia #Kel 23:10-11 2mereken peraturen-peraturen enda man bangsa Israel. Adi enggo kam seh ku taneh si ibereken TUHAN, tep-tep tahun si pepituken arus maka ola isuani taneh e, guna mereken kehagan man TUHAN. 3Enem tahun dekahna banci isuanindu jumandu. 4Tapi tahun pepituken arus maka jadi tahun pengadi-ngadin man jumandu, tahun si iendesken man TUHAN. Ola suani jumandu, ola ranggasi pe peken anggurndu.
5Ola perani si turah-turah bana, ola perani buah anggur si la iranggasi, erkiteken tahun e kap tahun pengadi-ngadin man taneh e. 6Aminna gia taneh e la iusahai i bas tahun e, cukup nge nakandu iberekenna, bage pe nakan budakndu, kalak upahenndu, ntah pe kalak si deban si tading ras kam, 7asuh-asuhenndu, ras rubia-rubia si meliar si lit i jumandu. Kerina si turah i juma si la iusahaindu banci ipan.
Tahun Penangtangen
8Kira pitu kali pitu tahun, e me empat puluh siwah tahun. 9E maka tanggal sepuluh bulan siwah e me Wari Penangtangen, suruh sekalak ngembus tanduk ermomo ku kerina negeri. 10Alu bage iserapkenndu tahun pelima puluhken janah ermomo kerna kebebasen man kerina penduduk. I bas tahun e, kerina erta si enggo idayaken arus maka iulihken man empuna si gelgel, ntah man kesusurenna. Asa kai kalak si enggo idayaken jadi budak arus maka iulihken man keluargana. 11La banci kam merdang, ntah pe mperani gandum si turah-turah bana, ntah pe pepulung buah anggur si la iranggasi. 12Sada tahun e arus maka jadi tahun si badia man bandu; ulih taneh si la iperjumai ngenca banci ipanndu.
13I bas tahun e arus maka iulihken man empuna kerina taneh warisen si enggo idayaken. 14E maka adi ndayaken ntah nukur taneh kam sapih-sapih kalak Israel arus maka bujur-bujur perbahanenndu. 15Ergana arus itetapken rikutken perkiran piga tahun nari taneh e banci mereken ulihna ngayak Tahun Penangtangen si rehna. 16Adi tahunna melala denga ganjangen ergana, tapi adi piga-piga tahun nari ngenca murahen ergana, sabap si idayaken e ulih taneh e. 17Ola tipu temanndu kalak Israel tapi mbiar lah man TUHAN Dibatandu.
Persoalen i bas tahun pepituken
18Patuhi undang-undang ras perentah TUHAN, maka selamat kam nggeluh i bas negeri e. 19Taneh e mereken ulihna, e maka cukup nge man bandu kai atendu ipanndu, janah mejuah-juah kam ngianisa.
20Tapi banci jadi lit kalak nungkun, “Kai kin ipan i bas tahun pepituken e, adi la lit juma si erdangi dingen labo lit ulihna si iperani?” 21Ipasu-pasu TUHAN taneh e i bas tahun peenemken, maka ulih taneh e bias man nakan dua tahun. 22Sanga ierdangindu jumandu i bas tahun pewaluhken, ipanndu denga kai si iperanindu i bas tahun peenemken. Bias nakanndu, seh iperanindu ka kai si ierdangkenndu i bas tahun e.
Ngulihken erta warisen
23Labo kam empuna taneh e, e maka ola dayaken ngayak sun; sabap Dibata nge si tuhuna empuna, janah kam seri ras pertandang ibereken makesa.
24Adi taneh idayaken arus maka iakui hak empuna si tangtangna guna nebusisa. 25Adi lit kalak Israel mesera akapna, janah terpaksa idayakenna tanehna, keluargana si ndeherna lah nebusisa. 26Kalak si la lit kade-kadena nebusisa, banci jadi enggo bayak ia, janah cukup i bas ia jine guna nebusisa mulihken. 27Adi bage jadina, arus maka igalarina man kalak si enggo nukursa ndube, buena asa ganti rugi guna tahun-tahun si tading denga ngayak Tahun Penangtangen si rehna. Kenca bage banci ia mulihken ku tanehna e. 28Tapi adi la ngasup ia nebusisa, taneh e tetap ikuasai si nukursa ndube seh ngayak Tahun Penangtangen si rehna. I bas tahun e, taneh e iulihken man empuna ndube.
29Adi kalak ndayaken rumah i bas kuta si ertembok, lit hakna nebusisa mulihken i bas sada tahun mulai rumah e idayaken. 30Tapi adi la itebusina i bas si sada tahun e, bene hakna nukursa mulihken, janah rumah e enggo tetap jadi hak sinukursa e ras kesusurenna. Amin seh pe Tahun Penangtangen, rumah e lanai bo mulih man empuna ndube. 31Tapi rumah i kuta-kuta si la ertembok, e ipeseri ras juma-juma. E maka banci itebusi empuna, janah mulihken bana i bas Tahun Penangtangen. 32Amin ugapa pe, adi suku Lewi banci nebusi rumahna i bas tahun si apai pe adi rumahna e lit i bas kutana jine.
33Adi lit rumah i bas kuta-kuta Lewi idayaken kalak Lewi, amin pe labo itebusina mahan bana e mulih i bas Tahun Penangtangen, erkiteken rumah kalak Lewi si lit i bas kutana e me kap erta kalak Lewi si tetap i tengah-tengah bangsa Israel. 34Tapi taneh perjalangen sekelewet kuta kalak Lewi la banci idayaken; e kalak enda empuna rasa lalap.
Penampat man kalak si mesera
35Adi temanndu kalak Israel si tading ndeher ras kam jadi musil janah lanai ia ngasup muat keperlunna, sampati lah ia bagi kam nampati kalak upahenndu, maka banci ia tetap tading ndeher ras kam. #Ul 15:7-8 36Ola bahan erbunga man bana, tapi mbiarlah man Dibata, janah pelepas temanndu kalak Israel tading ndeher ras kam.
37Ola suruh ia nggalar bunga duit si ipinjamkenndu man bana, janah ola buat untungndu i bas pangan si idayakenndu man bana. #Kel 22:25; Ul 23:19-20 38E me perentah TUHAN Dibatandu si maba kam ndarat i taneh Mesir nari maka iberekenNa bandu taneh Kanaan, gelah ia jadi Dibatandu.
Penangtangen suruh-suruhen
39Adi temanndu kalak Israel si tading i deherndu jadi musil kal seh maka idayakenna bana man bandu jadi budakndu, la banci isuruhndu ia ndahiken dahin budak. #Kel 21:2-6; Ul 15:12-18 40Ia tading ras kam selaku kalak upahen dingen erdahin guna kam ngayak Tahun Penangtangen si rehna. 41I bas tahun e ia ras anak-anakna banci nadingken kam mulihken ku keluargana, ku taneh nini-ninina. 42Bangsa Israel budak TUHAN kap. TUHAN enggo maba ia i taneh Mesir nari, e maka la banci ia idayaken jadi budak. 43Ola kasar man bana, tapi mbiar lah man Dibatandu. 44Adi perlu kam budak, banci itukurndu i bas bangsa si deban i sekelewetndu. Banci pe itukurndu anak-anak bangsa si deban si tading i sekelewetndu. 45Banci pe itukurndu anak kalak pertandang si ringan i tengah-tengahndu. Anak-anak kalak si bage, si tubuh i bas negerindu banci jadi ertandu, 46banci pe jadi barang tading-tadingenndu, guna anak-anakndu, janah arus idahina dahin anakndu e kidekah geluhna. Tapi temanndu bangsa Israel la banci kasar perbahanndu man bana.
47Ntah mawen lit bangsa si deban si tading ras kam si enggo jadi bayak, sedang lit temanndu kalak Israel jadi musil; perban serana idayakenna bana selaku budak man bangsa si deban ndai ntah man keluarga bangsa si deban e. 48Kenca ia idayaken, lit denga hakna guna itebusi mulihken.
49Sekalak seninana ntah senina bapana, ntah senina sembuyak bapa ras ia, ntah kade-kade si deban si ndeher denga ras ia banci nebusi ia. Ntah pe adi enggo cukup duitna banci itebusina bana. 50Arus maka iarihkenna ras si nukur ia e. Arus ikira lit piga tahun nari mulai ia idayaken seh ngayak Tahun Penangtangen si reh. Erga tebusenna arus itentuken erpalasken upah kalak si ngemo. 51-52Arus iulihkenna sada bagin i bas erga pendayanna gelgel e sue ras buena tahun-tahun si tading, 53tempa-tempa ia isuruh jadi kalak upahen erpalasken upah tahunen. Tuanna la banci kasar man bana. 54Adi la ia itebusi rikutken cara si enda ndai, ia ras anakna arus maka ibebasken i bas Tahun Penangtangen si rehna. 55Sekalak kalak Israel la banci asa lalap jadi budak, sabap bangsa Israel e me kap budak TUHAN. IbabaNa ia ndarat i taneh Mesir nari. IA kap TUHAN Dibatana.
Pilihan Saat Ini:
IMAMAT 25: BTX
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Batak Karo Bible © Indonesian Bible Society, 2003.