IMAMAT 24
24
Minak lampu i bas perjumpan
(Kel 27:20-21)
1Isuruh TUHAN si Musa 2gelah ikatakenna man bangsa Israel peraturen-peraturen enda gelah ibabana minak saitun si mejilena guna lampu i Kemah Perjumpan, gelah banci tetap ratur ipegara. 3Isagani Harunlah lampu e tep-tep karaben, ras njaga gelah tetap gara ngayak pepagina ka. Lampu e itamaken i darat kire-kire e iadep-adepen TUHAN, i lebe-lebe ingan si badiana kal. Peraturen enda arus maka ipatuhi rasa lalap. 4Arus maka iurus Harun lampu si tangkena ibahan i bas emas murni e nari, dingen njagasa gelah tetap isagani alu ratur iadep-adepen TUHAN.
Roti persembahen man Dibata
5Buat sepuluh dua kilo tepung, e maka bahan lah sepuluh dua ngkibul roti. #Kel 25:30 6Aturken i babo meja si ilapisi emas murni i lebe-lebe TUHAN jadi dua baris, maka enem-enem sada baris. 7Circir kumenen ku tep-tep baris, jadi sada tanda maka roti e persembahen pangan man TUHAN. 8Arus maka ipersembahken roti e iadep-adepen TUHAN tep-tep wari Sabat. Enda me tugas bangsa Israel asa lalap. 9Roti e jadi sikerajangen Harun ras kesusurenna, janah arus ipanna i bas ingan si badia, erkiteken bagin e badia kal sabap pangan e ibuat i bas bagin si ipersembahken man TUHAN guna imam-imam. #Mat 12:4; Mrk 2:26; Luk 6:4
Sada usihen kerna ukumen si bujur dingen patut
10-11Lit me sekalak dilaki; bapana kalak Mesir nandena kalak Israel, Selomit gelarna. Selomit ndai anak si Dibri i bas suku Dan nari. Dilaki enda ndai rubati ras sekalak bangsa israel i bas ingan erkemah. Sanga ia rubat isumpahina Dibata, e maka ibaba kalak ia ngadap man Musa. 12E maka ipenjaraken Musa ia, nimai kai nina TUHAN si arus ibahan man bana.
13Nina TUHAN man Musa, 14“Baba ia ku darat ingan erkemah. Tep-tep kalak si megisa ia numpahi gelar Dibata iamparkenna lah tanna i babo takal kalak enda guna naksiken maka payo ia ersalah. Kenca bage kerina perpulungen menterisa alu batu seh mate. 15E maka kataken lah man kalak Israel, maka kasa kalak si numpahi Dibata, la banci lang itanggungna upah perbahanenna e, 16e me kap ibunuh. Kalak Israel ntah bangsa si deban si numpahi Dibata, arus maka kerina perpulungen e menterisa alu batu ngayak mate.
17Ise munuh arus ibunuh. #Kel 21:12 18Ise munuh asuh-asuhen kalak, arus maka isambarina asuh-asuhen si mate e. Palasna e me kesah sambar kesah.
19Ise nakiti kalak si deban, bagi si ibahanna e ka ibahan man bana. 20Adi ipenggelkenna sada tulan kalak tulanna pe arus ka ipenggelken sada. Adi pentang ibahanna sada mata kalak, ia pe arus ka ipentangken sada matana. Adi penggel ibahanna sada ipen kalak, ipenna pe arus ka ipenggelken sada. Kai gia ibahanna kecedan i bas kalak si deban arus maka ialoken ka mulihken man bana. #Kel 21:23-25; Ul 19:21; Mat 5:38 21Ise munuh asuh-asuhen arus maka isambarina e, tapi ise munuh jelma arus maka ia ibunuh. 22Kerina kam arus patuh ngikutken undang-undang enda, subuk kalak Israel ntah pe bangsa si deban si tading i tengah-tengahndu, erkiteken Aku kap TUHAN Dibatandu.” #Bil 15:15-16
23Kenca ikataken Musa enda ndai man bangsa Israel, ibaba kalak dilaki ndai ku darat ingan erkemah e, e maka ibenterina alu batu seh mate. Alu bage ilakoken bangsa Israel kai si iperentahken TUHAN arah Musa.
Pilihan Saat Ini:
IMAMAT 24: BTX
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Batak Karo Bible © Indonesian Bible Society, 2003.