Yoohani 21

ɄYeesu ahubhaloleshela abhasundwe bhaakwe hu Galilaaya

1Lwa gaashila ɨgo, ʉYeesu ahahwilolesya nantele hwa bhasundwe bhaakwe panshɨnjɨ pa nsʉmbi ɨyɨ Tibeeliya, hu mukowa ʉgwɨ Galilaaya. 2ɄSiimoni Peeteli, ʉToomasi ʉyo bhahali bhahunʼkwizya itaawa ɨlyɨnjɨ Lipasa, ʉNasanaeeli ʉyo ahafumile mwi‑ibooma ɨlyɨ Kaana ɨlyo lili hu Galilaaya, abhaana bhabhɨɨlɨ abha Zebedaayo na bhasundwe bhabhɨɨlɨ abhanjɨ bhahali peeka. 3ɄSiimoni Peeteli ahabhabhʉʉzya abhamwabho ahaga, “Ɨmbala ahwele ɨnswɨ.” Bhope bhahamʼmwamula bhahaga, “Natɨ tibhala peeka naawe.” Ɨpo bhahabhala, bhahatʉʉha mu waato, bhaheela ʉsiku wonti, leelo saga bhaheela ɨnswɨ nkɨ‑ɨmo. 4Nashampwi nagamazansha, ʉYeesu ahɨmɨɨlɨla panshɨnjɨ mu nsʉmbi, leelo abhasundwe bhaakwe saga bhahamanyaga huje yʉ Yeesu. 5Ɨpo ʉYeesu ahabhakwizya na hubhabhʉzɨɨlɨzye ahaga, “Amwɨ, bhamanyani bhaanɨ, wɨlɨ muzyajile ɨnswɨ zyozyonti?” Abheene bhahamʼmwamula bhahaga, “Ndaadi.” 6ɄYeesu ahabhabhʉʉzya ahaga, “Ponyi ɨnyeelo ambali yɨ lɨɨlo ʉwɨ waato, namwɨ munza huzyaje ɨnswɨ.” Ɨpo bhahaponya ɨnyeelo mu nsʉmbi, leelo bhahapootwa akwesanje hu nongwa ya huzyaje ɨnswɨ ɨnyinji tee. 7Ʉnʼsundwe ʉla ʉyo ʉYeesu ahanʼgɨɨne tee ahamʼmʉʉzya ʉPeeteli ahaga, “Ʉnʉ yʉ Mwɨnɨ ʉYeesu!” ɄSiimoni Peeteli lwa wʉmvwa huje yʉ Mwɨnɨ, ahakwata ʉmwenda gwakwe ʉgwo ahawuuye hu habhaazyo lwa‑ahandile ahwele ɨnswɨ, ahahwiponya mu nsʉmbi. 8Abhasundwe abhanjɨ bhaala bhahabhala panshɨnjɨ yɨ nsʉmbi nʉ waato, ʉhwu bhakwesanga ɨnyeelo ɨyo yahali ɨmemile ɨnswɨ. Saga bhahali patali na panshɨnjɨ, leelo bhahali ɨmeeta ɨmya yeeka lwene.

9Lwa bhaafiha panshɨnjɨ yɨ nsʉmbi, bhahagwaga ʉmwoto. Pa mwanya pa mwoto guula pahali nɨ nswɨ nɨ ntogito. 10ɄYeesu ahabhabhʉʉzya abhasundwe bhaakwe ahaga, “Ɨnzi leeti ɨpa ɨnswɨ nyishe ɨzyo muzyajile.” 11Ɨpo ʉSiimoni Peeteli ahabhala pa waato, ahakwesanjila panshɨnjɨ ɨnyeelo ɨla ɨyo yahali ɨmemile ɨnswɨ. Mu nyeelo muula zyahalɨɨho nɨ nswɨ ɨngoosi ɨmya yeeka na mashʉmi gasaanu na zitaatu (153). Poshe ɨnswɨ zyahali nyinji tee, hwope ɨsho ɨnyeelo saga yahadumuushe. 12ɄYeesu ahabhabhʉʉzya abhasundwe bhaakwe ahaga, “Ɨnzi mulye ɨshalye ɨsha shampwi.” Saga ahalɨɨho ʉnʼsundwe ʉyo ahalɨnjɨle humʼmʉzɨɨlɨzye huje, “Wɨlɨ, aawe we naanu?” Saga bhahamʼmʉzɨlɨzɨɨzye, pɨpo bhahamɨɨnye huje yʉ Mwɨnɨ. 13ɄYeesu ahabhala na hweje ɨntogito, ahabhapeela abhasundwe bhaakwe. Nantele, aheega zyope ɨnswɨ na‑abhombe shɨɨsho. 14Ʉlwo lwahali lwa taatu ʉYeesu hubhɨnzɨle abhasundwe bhaakwe hu habhaazyo lwa‑azyʉshɨle afume hu bhafwe.

ɄYeesu ayanga nʉ Peeteli

15Lwa bhaamala alye, ʉYeesu ahamʼmʉzɨɨlɨzya ʉSiimoni Peeteli ahaga, “Wee Siimoni mwana wa Yoohani, wɨlɨ, ʉngɨɨne anɨ tee ashile ɨsho abhamwenyu ɨbha sha bhangɨɨne?” ɄPeeteli ahamʼmwamula ahaga, “Ena Mwɨnɨ, aawe ʉmɨɨnye huje ɨʼgɨɨne.” ɄYeesu ahamʼmʉʉzya ahaga, “Sʉnga shinza abhantu bhaanɨ ɨbho bhali nanshi abhaana ngoole.”

16ɄYeesu ahamʼmʉzɨɨlɨzya ʉPeeteli ʉlwa bhɨɨlɨ ahaga, “Wee Siimoni mwana wa Yoohani, wɨlɨ, ʉngɨɨne?” ɄPeeteli ahamʼmwamula ahaga, “Ena Mwɨnɨ, aawe ʉmɨɨnye huje ɨʼgɨɨne.” ɄYeesu ahamʼmʉʉzya ʉPeeteli ahaga, “Sʉnga shinza abhantu bhaanɨ ɨbho bhali nanshi ɨngoole.”

17Ahamʼmʉzɨɨlɨzya ʉlwa taatu ahaga, “Wee Siimoni mwana wa Yoohani, wɨlɨ, ʉngɨɨne?” Ɨpo ʉPeeteli ahazugumila hu nongwa ya‑aje ʉYeesu ahamʼmʉzɨɨlɨzya ʉlwa taatu, “Wɨlɨ, ʉngɨɨne?” Ahamʼmwamula ahaga, “Wee Mwɨnɨ, aawe ʉmɨɨnye gonti. Ʉmɨɨnye huje ɨʼgɨɨne.” ɄYeesu ahamʼmʉʉzya ahaga, “Sʉnga shinza abhantu bhaanɨ ɨbha ɨbho bhali nanshi ɨngoole. 18Lyoli ɨhubhʉʉzya aawe, lwa wahali nʼsahaala, wahalʉbhɨɨye akwate amenda gaaho wʉmwene na‑abhale hwonti hwonti ʉhwo ʉhwanza. Leelo lwa wahayibha ʉgogolʉʉshe, wahayibha ʉgolosya amakhono gaaho nantele ʉmuntu ʉwɨnjɨ ahayibha ahukwatizya amenda gaaho na‑abhale naawe ʉhwo saga ʉsʉngwa abhale.” 19ɄYeesu ahayanjile ɨsho abhonesye idala ɨlyo ʉPeeteli ahayifwa huje amʼmwamishe ʉNgʉlʉbhɨ. Hu habhaazyo ʉYeesu lwa wayanga amazwi ɨgo, ahamʼmʉʉzya ʉPeeteli ahaga, “Mbɨnjɨlɨzyaje.”

20Ɨpo ʉPeeteli ahashebhela hwisinda, ahanʼnola ʉnʼsundwe ʉyo ʉYeesu ahanʼgɨɨne, ahali ahubhabhɨnjɨɨlɨla. Ʉnʼsundwe ʉyo ya yʉʉla ahakhɨɨye pa pɨɨpɨ nʉ Yeesu hu habhaazyo ɨho bhali alye ɨshalye ɨsha lyabheela. Nantele, ya yʉʉyo ahamʼmʉzɨlɨzɨɨzye ʉYeesu huje, “Wee Mwɨnɨ, weenu ʉyo ahayihusambushila hwa bhalʉgʉ?” 21ɄPeeteli lwa wanʼnola ʉnʼsundwe ʉla, ahamʼmʉzɨɨlɨzya ʉYeesu ahaga, “Wee Mwɨnɨ, wɨlɨ, heenu ɨho hahayifumila hwa nʼsundwe ʉyo?” 22ɄYeesu ahamʼmwamula ahaga, “Nkashele ɨhwanza huje ʉnʉ abhe mwʉmi afishe lwa nahayiweela, yeenu ɨgo gahutaamya? Aawe mbɨnjɨlɨzyaje.” 23Ɨnongwa ɨzyo zyahanyampaana hwa bhasundwe abhinji huje ʉnʼsundwe ʉyo saga anza‑afwe dumu. Leelo ʉYeesu saga ahayanjile hwa nʼsundwe ʉyo huje saga anza‑afwe dumu, leelo ahajile, “Nkashele ɨhwanza huje ʉnʉ abhe mwʉmi afishe lwa nahayiweela, yeenu ɨgo gahutaamya?”

24Ʉnʼsundwe ʉyo ya yʉʉyo ahasimishiziizye ɨnongwa ɨzi na huzisimbe mu shitaabu ɨshi. Natɨ timɨɨnye huje ɨzyo ahayanjile zyɨ lyoli.

ɄYeesu ahabhombile ɨnongwa ɨzyɨnjɨ ɨnyinji

25Zilɨɨho ɨnongwa ɨzyɨnjɨ ɨnyinji ɨzyo ʉYeesu ahali abhomba, leelo saga zyahasimbwilwe. Nkashele zyonti zyasimbwaga, ɨsɨɨbha huje ɨnsi yabhanga sinta fwasi abhute ɨvitaabu vyonti ɨvyo.

Pilihan Saat Ini:

Yoohani 21: SBK

Sorotan

Salin