Yoohani 20

Azyʉshe hwa Yeesu

(Mataayo 28:1-8; Maalʉko 16:1-8; Luuka 24:1-12)

1Nashampwi nagamazansha lwa husɨɨle ashe pi‑isiku ɨlya Pamulʉngʉ, ʉMaliya ʉwa hu Magidaala ahabhala pa nkʉngwa ya Yeesu. Ahalyaga iwe ɨlyo bhahakwinshiiye ʉlyango ʉgwɨ nkʉngwa libhungulusiiwe. 2Ɨpo ahashɨmbɨla paala, ahabhala hwa Siimoni Peeteli na hwa nʼsundwe ʉla ʉyo ʉYeesu ahanʼgɨɨne tee. Ahabhabhʉʉzya ahaga, “Abhantu bhamo bhagwefwizye ʉmʼvimba gwa Mwɨnɨ weetu mu nkʉngwa, nantele saga timɨɨnye ʉhwo bhagubhɨɨshɨle!” 3ɄPeeteli nʉ nʼsundwe ʉwɨnjɨ ʉla bhahasogola na‑abhale hu nkʉngwa. 4Bhonti bhabhɨɨlɨ bhahali bhashɨmbɨla, leelo ʉnʼsundwe ʉwɨnjɨ ʉla ahonjeezya ashɨmbɨle ashile ʉPeeteli na‑atagaalile afishe pa nkʉngwa. 5Lwa waafiha, ahabhʉndama, ahagodezya mu nkʉngwa na‑alole ikɨbha ɨlyo bhahanʼsyɨlɨɨye ʉYeesu, leelo saga ahatʉʉshɨle muuhati. 6Ɨpo ʉSiimoni Peeteli ahamʼmɨnjɨɨlɨla, ahafiha paala, ahatʉʉha mu nkʉngwa na hulyaje ikɨbha ɨlyo bhahanʼsyɨlɨɨye ʉYeesu. 7Nantele ahahaaga na henda ɨho bhahamʼpinyile ʉYeesu hwi‑itwe. Ahenda ɨho saga hahali peeka ni‑ikɨbha ɨlyo bhahanʼsyɨlɨɨye ʉYeesu, leelo hahali hapintiilwe paayo, panshɨnjɨ. 8Ɨpo ʉnʼsundwe ʉwɨnjɨ ʉla ʉyo ahatalile afishe paala, wope ahatʉʉha mu nkʉngwa. Aheenya na hwɨtɨshe ɨgo ahʉmvwɨzye. 9Leelo afishe hu habhaazyo ɨho, abhasundwe bha Yeesu bhahali bhasɨɨle huzyaganye ɨNsimbo ɨMfinjile huje ʉYeesu akhondɨɨye azyʉshe afume hwa bhafwe. 10Ɨpo abhasundwe ɨbho bhahaweela ʉhwo bhahali bhakhala.

ɄYeesu ahunʼnoleshela ʉMaliya ʉwa hu Magidaala

(Mataayo 28:9-10; Maalʉko 16:9-11)

11Leelo ʉMaliya ʉwa hu Magidaala ahasagala na hwɨmɨɨlɨle hwʉnzɨ hu nkʉngwa, ahali alila. Lwa‑ali alila, ahabhʉndama na‑agodezye mu nkʉngwa. 12Ahabhalola abhantumi bhabhɨɨlɨ ɨbho bhahali bhakwɨte amenda amazelu, bhakhɨɨye ɨpo pahali nʉ mʼvimba gwa Yeesu. Ʉnʼtumi weeka ahakhɨɨye hwi‑itwe nʉ wɨnjɨ ahakhɨɨye hu manama. 13Abhantumi ɨbho bhahamʼmʉzɨɨlɨzya bhahaga, “Wee maayɨ, yeenu ʉlila?” Wope ahabhaamula ahaga, “Abhantu bhamo bhagwefwizye ʉmʼvimba gwa Mwɨnɨ waanɨ, nantele saga ɨmɨɨnye ʉhwo bhagubhɨɨshɨle!”

14ɄMaliya lwa wayanga amazwi ɨgo, ahashebhela hwisinda, ahanʼnola ʉmuntu ʉmo ayɨmɨlɨɨye papaala. Fwandi ʉmuntu ʉyo ahali yʉ Yeesu, leelo ʉMaliya ahali saga ahumʼmanya. 15ɄYeesu ahamʼmʉzɨɨlɨzya ahaga, “Wee maayɨ, yeenu ʉzonda? Wɨlɨ, ʉhumʼmwanza weenu?” ɄMaliya ahali asɨɨbha huje ʉmuntu ʉla ahali mʼmomvi wa mwi‑itotoobhe, ɨpo ahamʼmwamula ahaga, “Wee mwɨnɨ, nkashele weewe ʉgwefwizye ʉmʼvimba gwakwe, ɨhulaabha ʉmbʉʉzye ʉhwo ʉbhɨɨshɨle, nanɨ ɨnza‑abhale hugweje.” 16ɄYeesu ahanʼkwizya itaawa lyakwe ahaga, “Wee Maliya!” Ɨpo ʉMaliya ahashebhela hwisinda na hunʼnole ʉYeesu, ahayanga mu njango ɨyɨ Shiebulaniya ahaga, “Labooni!” Itaawa ɨli hwa huje, Mʼmanyizyi. 17ɄYeesu ahamʼmʉʉzya ahaga, “Ʉgandi huhate, pɨpo ɨnsɨɨle abhale hu mwanya hwa Daada. Leelo bhalaga ʉbhabhʉʉzye abhasundwe bhaanɨ huje ɨmbala hu mwanya hwa Daada, ʉyo yʉ Daada weenyu, hwa Ngʉlʉbhɨ waanɨ ʉyo yʉ Ngʉlʉbhɨ weenyu.” 18Ɨpo ʉMaliya ʉwa hu Magidaala ahabhala hwa bhasundwe bha Yeesu, ahabhabhʉʉzya ɨnongwa ɨzi, ahaga, “Enya, anɨ ɨnʼnolile ʉMwɨnɨ!” Ɨpo ahabhabhʉʉzya gonti ɨgo ʉYeesu ahanʼnajiziizye.

ɄYeesu ahubhaloleshela abhasundwe bhaakwe

(Mataayo 28:16-20; Maalʉko 16:14-18; Luuka 24:36-49)

19Lyabheela isiku liliila, abhasundwe bha Yeesu bhahali bhabhʉngɨɨne mu nyumba ɨmo na‑agalile amalyango hu nongwa ɨya hubhoogope abhalongozi bha Bhayahuudi. Poshe amalyango gahali magalile, nalinaali ʉYeesu ahatʉʉha na hwɨmɨɨlɨle paahati yaabho, ahabhalamuha ahaga, “Ʉtengaanu wubhe peeka naamwɨ.” 20Ɨpo ahabhalolesya abhasundwe bhaakwe amabhazi aga mu makhono na hu lubhazu lwakwe. Abhasundwe lwa bhanʼnola ʉMwɨnɨ, bhahasha tee. 21ɄYeesu ahabhalamuha nantele ahaga, “Ʉtengaanu wubhe peeka naamwɨ. Nanshi ɨsho ʉNgʉlʉbhɨ ahansonteleziizye anɨ, shɨɨsho nanɨ ɨhubhasonteelezya amwɨ mu nsi.” 22Ɨpo ahabhapuutila ʉmwoyi, ahabhabhʉʉzya ahaga, “Ambɨɨlɨli ʉMʼpepo ʉMʼfinjile. 23Nkashele muhubhakhobhoshela abhantu ɨmbiibhi zyabho, ʉNgʉlʉbhɨ wope ahubhakhobhoshela. Leelo nkashele saga muhubhakhobhoshela ɨmbiibhi zyabho, ʉNgʉlʉbhɨ wope saga ahubhakhobhoshela.”

ɄYeesu ahwilolesya hwa Toomasi

24Ʉnʼsundwe ʉmo mu bhasundwe bha Yeesu ʉyo itaawa lyakwe ahali yʉ Toomasi, ʉyo bhahali bhahunʼkwizya itaawa ɨlyɨnjɨ Lipasa, saga ahali peeka na bhasundwe abhanjɨ hu habhaazyo ʉYeesu lwa‑ahubhaloleshela. 25Ɨpo abhasundwe abhanjɨ bhaala bhahamʼmʉʉzya bhahaga, “Atɨ tinʼnolile ʉMwɨnɨ.” Leelo ʉmwene ahabhaamula ahaga, “Anɨ saga ɨmbajiiye ahwɨtɨshe huje lyoli munʼnolile ʉMwɨnɨ, nkashele saga ɨngalolile nasʉʉti amabhazi agɨ masumaali mu makhono gaakwe na hu lubhazu lwakwe na humʼpalamansye nʉ tuyoobhe twanɨ.”

26Ʉlʉngʉ gweka lwa gwashila, abhasundwe bha Yeesu bhahabhʉngaana peeka nantele mu nyumba. Isiku ɨlyo wope ʉToomasi ahali peeka nabho. Amalyango bhahagaliiye, nalinaali ʉYeesu ahafumila pa pazelu, ahɨmɨɨlɨla paahati yaabho, ahabhalamuha ahaga, “Ʉtengaanu wubhe peeka naamwɨ.” 27Ɨpo ahamʼmʉʉzya ʉToomasi ahaga, “Wee Toomasi, ɨnzaga ʉmpalamansye amakhono gaanɨ na hayoobhe haaho. Nantele, ʉmpalamansye nɨ nyoobhe zyaho hu lubhazu lwanɨ. Ʉsahabhe nɨ nsyoho, leelo ʉyɨɨtɨshe.” 28ɄToomasi ahamʼmwamula ahaga, “Aawe ʉli Mwɨnɨ waanɨ, nantele ʉli Ngʉlʉbhɨ waanɨ!” 29ɄYeesu ahamʼmwamula ahaga, “Ʉyɨtɨɨshe, pɨpo ʉndolile. Bhasayiiwe ɨbho bhanɨtɨɨshe peeka na huje saga bhandolile.”

Ɨnsiini ɨyɨ shitaabu ɨshi

30ɄYeesu ahabhombile amayele aganjɨ aminji pitagaalila lya bhasundwe bhaakwe ɨgo saga gasimbwilwe mu shitaabu ɨshi. 31Leelo amayele ɨgo galɨɨho mu shitaabu ɨshi, gasimbwilwe huje mwɨtɨshe huje ʉYeesu yʉ Mʼfyʉli, Mwana wa Ngʉlʉbhɨ na huje hwi‑idala ɨlya humʼmwɨtɨshe, muwaaje ʉwʉʉmi ʉwa wiila na wiila.

Pilihan Saat Ini:

Yoohani 20: SBK

Sorotan

Salin