ƗMbombo ɨzya Bhasontwa 8

ɄSauli ahwanda hushilavye ɨshibhanza

1-2Abhantu bha bhahanʼtinihaga ʉNgʉlʉbhɨ, bhahanʼsyɨla ʉSiteefano. Bhahazonda haani pi‑ifuuto lyakwe.

Isiku liliila lya bhahanʼgojile ʉSiteefano, abhantu abha hu shibhanza ɨsha pa Yelusaleemu bhahanda alabhe haani, bhonti bha bhahamʼmwɨtɨɨshe ʉYeesu bhahanyampaana abhale hu mukowa ʉgwɨ Yudeeya nʉ gwɨ Samaliya. Abheene abhasontwa bha Yeesu bhahasyalile pa Yelusaleemu. 3ɄSauli wope ahanda hushinangaanye ɨshibhanza. Ahatʉʉhaga shila nyumba, ahabhadendemulaga abhalume na bhashɨ, nantele ahabhakʉngaga mu hoobhe.

ɄFilipo alʉmbɨɨlɨla mu Samaliya

4Abhantu ɨbho bha bhahanyampɨɨne, bhahanda alʉmbɨɨlɨle ɨNongwa ɨNyinza ɨzya Yeesu hwa bhantu poponti pa bhahabhalaga. 5ɄFilipo#8:5 ɄFilipo ahali ʉmo mwa bhaavwi bhaala pʉnga (7). Bhaazya ɨMbombo ɨzya Bhasontwa 6:5. ahiishila mwi‑ibooma limo lya lyahali hu mukowa ʉgwɨ Samaliya, ahabhalʉmbɨɨlɨla ɨnongwa ɨzya Mʼfyʉli. 6Abhantu lwa bhʉmvwa amazwi ga Filipo, na‑alole amayele ga‑ahabhombaga, ɨpo bhahanʼtejelezyaga tee. 7Ahefwaga amapepo aminji hwa bhantu abhinji, gahabheepaga sha gadwegana. Ahabhaponiaga abhinji bha bhahafwiye hundwɨmo, na bha bhahalemɨɨye amanama. 8Ɨpo mwi‑ibooma ʉmwo mwahabha nʉ luseshelo tee.

ɄPeeteli nʉ Siimoni ʉnʼnozi

9Ɨshi mwi‑ibooma ɨlyo mwahali nʉ muntu ʉmo wa‑ahalʉbhɨɨye abhombe amayele ga gaswijizya agɨ lozi. Itaawa lyakwe ahali yʉ Siimoni. Ahabhaswijizyaga abhantu bhonti abhɨ mukowa ʉgwo ʉgwɨ Samaliya hu lozi waakwe, nantele ahahwibaadaga huje, ʉmwene muntu nʼgoosi. 10Abhantu bhonti, abhapɨɨna na bhatabhazi, bhahanʼtejelezyaga na‑aje, “Ʉmuntu ʉnʉ, yʉʉyo likhone lya Ngʉlʉbhɨ lya bhayiga, Ikhone Igoosi.” 11Abhantu bhahanʼtejelezyaga hu nongwa ya‑aje, ɨnsiku ɨnyinji ahabhaswijizyaga hu mbombo zyakwe ɨzyɨ lozi.

12Leelo ʉFilipo lwa wabhalʉmbɨɨlɨla ɨNongwa ɨNyinza ɨzyɨ wumwɨnɨ ʉwa Ngʉlʉbhɨ nɨ zya Yeesu ʉKilisiti, bhahazyɨtɨhaga. Abhalume na bhashɨ bhahozewaaga. 13ɄSiimoni wope ahamʼmwɨtɨha ʉYeesu, ahoozewa, ahanda hunʼnondolezye ʉFilipo. Ahaswiga lwa wagalola amayele amagoosi nɨ vimanyishizyo ɨvyo ʉFilipo ahabhombaga.

14Abhasontwa bha Yeesu abha mu Yelusaleemu lwa bhʉmvwa huje, abhantu abha hu Samaliya#8:14 abhantu abha hu Samaliya ABhayahuudi bhahabhasyonshelaga na hubhaviitilwe tee aBhasamaliya. Bhaazya izwi Bhasamaliya hu Ngalulanyo ɨyɨ Mazwi aMajenu hu malishilo wɨ shitaabu ɨshi. bhope bhɨtɨɨshe ɨNongwa ɨNyinza ɨzya Yeesu, bhahanʼsonteelezya ʉPeeteli nʉ Yoohani ʉhwo. 15Lwa bhaafiha, bhahabhapuutila abhantu ɨbho hwa Ngʉlʉbhɨ huje, bhamʼmwambɨɨlɨle ʉMʼpepo ʉMʼfinjile, 16pɨpo saga ahali ʉmuntu nka weeka mwɨ‑ɨbho ʉyo ʉMʼpepo ahamʼmwishiiye, bhahoziiwe lwene hwi‑itaawa lya Mwɨnɨ ʉYeesu. 17Ɨpo ʉPeeteli nʉ Yoohani bhahabhabhɨɨshɨla ɨnyoobhe hubhapuutile, bhope nka bhahamʼmwambɨɨlɨla ʉMʼpepo ʉMʼfinjile.

18ɄSiimoni lwa waalola huje, abhantu bhaala bhahumʼmwambɨɨlɨla ʉMʼpepo ʉMʼfinjile hwi‑idala ɨlya‑abhɨɨshɨlwe ɨnyoobhe na bhasontwa, ahalɨnga humʼpeele ɨmpɨɨya ʉPeeteli nʉ Yoohani, ahabhalaabha ahaga, 19“Mumpeele nanɨ ikhone ɨlyo huje, ʉmuntu wowonti ʉyo nahayihumʼmɨɨshɨla ɨnyoobhe, wope ahamʼmwambɨlɨlaje ʉMʼpepo ʉMʼfinjile.”

20ɄPeeteli ahamʼmʉʉzya ahaga, “Aawe peeka nɨ mpɨɨya zyaho, ʉyagaje! Ʉsɨɨbha aje, ʉbhajiiye akale ɨmpeesya ya Ngʉlʉbhɨ nɨ mpɨɨya! 21Aawe saga ʉli nka pamo apa‑abhombe mu mbombo ɨnɨ, alɨngaane na‑aje, ʉmwoyo gwaho saga nʼgolosu pa maaso ga Ngʉlʉbhɨ. 22Ɨshi, laata ɨmbiibhi zyaho ɨzyo, ʉlaabhe ɨnkʉmbʉ hwa Mwɨnɨ huje, aʼkhobhoshele hu nsɨɨbho zyaho ɨzyo. 23Ɨndolile huje, ʉli nɨ jɨɨla haani, ɨmbiibhi zyaho ziʼkhatiliiye.” 24Ɨpo ʉSiimoni ahaamula huje, “Amwɨ mumpuutile hwa Mwɨnɨ huje, lisahanaaje nka limo mwɨ‑ɨgo ga mwayanga!”

25ɄPeeteli nʉ Yoohani lwa bhaafumya ʉsimishizi na‑alʉmbɨɨlɨle izwi lya Mwɨnɨ, bhahanda aweele hu Yelusaleemu. Mwi‑idala bhahalʉmbɨlɨlaga ɨNongwa ɨNyinza ɨzya Yeesu mu vipanga vivinji ɨvya Bhasamaliya.

ɄFilipo ayanga nʉ nʼgoosi ʉmo ʉwa hu Syopiya

26Isiku limo, ʉnʼtumi wa Mwɨnɨ ʉNgʉlʉbhɨ ahamʼmʉʉzya ʉFilipo huje, “Ʉbhale ambali ntende ashilile idala liila lya lishilila mu lʉʉgwa afume hwi‑ibooma ɨlyɨ Yelusaleemu abhale hwi‑ibooma ɨlyɨ Gaaza.” 27Ɨpo ʉFilipo ahasogola, ahanda ashʉʉle, ahakhomaana nʉ muntu ʉmo ʉwa mu nsi ɨyɨ Syopiya ʉyo ahali nʼsayulwe.#8:27 Ʉnʼsayulwe ahali nʼnume ʉyo ahasayuliilwe huje agandi apaape abhaana. Bhahamʼmombɨɨye ɨsho, pɨpo ahali abhomba ɨmbombo mu nyumba ya mwɨnɨ ʉwɨ shishɨ. Ʉyo ahali nʼgoosi wa‑ahasʉngaga ɨvintu ɨvyɨ mpɨɨya ɨngoosi ɨvya Kandake. Kandake hwa huje ʉmwɨnɨ ʉnʼshɨ ʉwɨ nsi ɨyɨ Syopiya. Ʉnʼsayulwe ʉyo ahabhalile hu Yelusaleemu ahumʼpuute ʉNgʉlʉbhɨ. 28Lwa‑aweela hu khaaya, ahakhɨɨye mwi‑igaali#8:28 Igaali lyahali na makangaalu gabhɨɨlɨ, nantele lyahabhʉsyaga abhantu bhabhɨɨlɨ awe bhataatu peeka nʉ‑ʉla wa‑alongozya. Leelo, ɨfalaasi zya zyahalidendemulaga. lyakwe, ahabhazyaga mu shitaabu sha Yesaaya ʉnʼkuwi wa Ngʉlʉbhɨ ʉwɨ mandɨ.

29Ɨpo ʉMʼpepo ʉMʼfinjile ahamʼmʉʉzya ʉFilipo huje, “Bhala lubhilo, ʉlizʉmbɨɨlɨle igaali liila.” 30Lubhilo, ʉFilipo ahalishɨmbɨɨlɨla, ahalifishila. Ahamʼmwʉmvwa ʉnʼgoosi ʉla abhaazya mu shitaabu sha nʼkuwi ʉYesaaya, ahamʼmʉzɨɨlɨzya ahaga, “Amazwi ɨgo gʉ‑ʉbhaazya, bhʉlɨ, ʉhugaaganya?” 31Ahamʼmwamula ahaga, “Ɨngagaaganya nanshi bhʉlɨ bhʉlɨ, lwa saga alɨɨho ʉmuntu ʉwa hundangaanyizye amazwi ɨga?” Ahanʼkʉndɨɨlɨzya ʉFilipo huje, atʉʉshe mwi‑igaali lyakwe muula, bhakhale peeka huje, anʼnangaanyizye. 32ƗNsimbo ɨMfinjile ɨzyo ʉnʼsayulwe ʉla ahabhazyaga, ziyiga,

“Bhahanʼtwalile nanshi ɨngoole ya bhabhala huyibhoole.

Ahapʉʉmɨle myɨ nanshi ɨnyaana ngoole shɨ‑ɨpʉʉma

lwa bhahuyisyengula ʉwooya.

33Bhahanʼsyonshɨɨye na humʼmaazye huje, mʼmomba mbiibhi,

leelo saga ahatulile nahamo.

Saga alɨɨho ʉmuntu ʉyo agaamama ɨnongwa ɨzya bhaana bhaakwe,

pɨpo ʉwʉʉmi waakwe bhawefwizye mu nsi.”#Bhaazya Yesaaya 53:7-8.

34ɄNʼsyopiya ʉla ahamʼmʉʉzya ʉFilipo huje, “Ɨhulamba ʉmbʉʉzye, amazwi ɨgo ʉnʼkuwi wa Ngʉlʉbhɨ ahasimbile, ayanga hu nongwa zya naanu? Bhʉlɨ, ayanga zya mwene yʉʉyo, awe zya muntu ʉwɨnjɨ?” 35Ɨpo ʉFilipo ahandila mu mazwi gɨɨgo agɨ Nsimbo ɨMfinjile hunʼnʉmbɨɨlɨle ɨNongwa ɨNyinza ɨzya Yeesu.

36Lwa bhajendeelela ashʉʉle mwi‑idala, bhahafiha pa pahali na mɨnzɨ. ɄNʼsyopiya ʉla ahamʼmʉzɨɨlɨzya ʉFilipo huje, “Enya! Pali na mɨnzɨ ɨpa. Heenu ha hagandindila huje, ɨnoozewe?” 37ɄFilipo ahamʼmwamula ahaga, “Nkashele ʉhumʼmwɨtɨha ʉYeesu ʉKilisiti hu mwoyo gwaho gwonti, ʉgoozewa.” Ʉnʼgoosi ʉla ahamʼmwamula ahaga, “Ɨhwɨtɨha huje, ʉYeesu ʉKilisiti yʉ Mwana wa Ngʉlʉbhɨ.”#8:37 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 38Ʉnʼgoosi ʉyo ahɨmɨɨlɨsya igaali liila, bhahiiha bhonti bhabhɨɨlɨ mu mɨnzɨ, ʉFilipo ahamʼmwozya. 39Lwa bhazʉbha mu mɨnzɨ muula, lubhilo ʉMʼpepo wa Mwɨnɨ ʉNgʉlʉbhɨ ahanʼnyeetula ʉFilipo. Ʉnʼgoosi ʉla saga ahanʼnola ʉFilipo nantele, leelo ahajendeelela ashʉʉle sha‑ashiiye tee. 40ɄFilipo wope ahega ali mwi‑ibooma ɨlyɨ Asooto. Ahasogola ɨpo, ahashʉʉla sha‑ahubhalʉmbɨɨlɨla abhantu ɨNongwa ɨNyinza ɨzya Yeesu ʉKilisiti mu mabooma gonti aga mwi‑idala. Ɨpo ahafiha mwi‑ibooma ɨlyɨ Kayisaliiya.

Pilihan Saat Ini:

ƗMbombo ɨzya Bhasontwa 8: SBK

Sorotan

Salin