Mark 8

Kaŋ zam ge Zeso ho̰ nda ge dudubu ndà ma

Mat 15.32-39; Mrk 6.35-44; 2Gg 4.42-44

1Ge dwam a̰me ge ɗogle go, ɓase ma gwan-na twageya nɔnɔg ge Zeso ta, kaŋ zam be kaɗ go karag ge ɓase mbe ma pe to. Zeso tol na nda ge ame hateya ma, jan num go: 2Mbi ɓyare ngay kuwa a̰se ge ambi ge ɓase mbe ma ta, ge dape, màno àa kee ya dwam taa ge mbi ziya be a̰me zam. 3Kaɗɗa mbi n̰a num mboya camal, àa seɗ pool ge mbo deɗ diŋ yà mà to, ago a̰me ge num buwal zige ma ɗege ge sok kaal ya. 4Ne nda ge ame hateya ma gwan ge ne janna go: Nda mbe ma no ɗem, nè kee mà pe gyana, nè wa seɗ kaŋ zam ge mbyaɗ num, ge sok babur mbe no go de? 5Zeso ele num go: Ḛ go ge dupḛ ma gyana ga de? Àa gwan ge ne janna go: I go ge dupḛ ma ɓỳala. 6Ge sok mbe go, hoɗ ɓase ma na wa go, num kaa maa pe suwa se. Guwa̰, hee dupḛ ge ɓỳala mbe ma, kee mersi hon Dok, siɗi num se, hon na nda ge ame hateya ma num, ndwa go num vaa ɓase ma. Àa ame, àa kee tem ge mojo̰o̰ ne jin̰a maa go. 7Àa kaa ge sini van a̰me ma kwaɗa lag, guwa̰ ge Zeso kê mersi ge num pe go, jan go: Ḛ ame, ḛ gwan vaa ɓase ma. 8Àa zam kaŋ zam mbyaɗɗa, ne nda ma kwate kaŋ zam pe ge gaa ma gwal pul ɓỳala. 9Nda ge kaa sok mbe go zam kaŋ ma, ɓase ge num way mbo guwa ge dudubu ndà go. Guwa̰ go, Zeso n̰a num mboya. 10Guwa̰ ge n̰a num go gaw, ndee ge faa go ɓanna ge na nda ge ame hateya ma, àa mbo ge suwa ge Dalmanuta ne yà.

Farisi ma ɓyare kaŋ ngayya a̰me ɗu ge Zeso ta

Mat 12.38, 39; 16.1-12; Luk 11.16, 29

11 Farisi ma zuɗ ge sok a̰me ya ɗu, àa ɗege pee ta ge Zeso. Sok ɓyare hee ne pe go, àa ele ne go, ne ke maa kaŋ ngayya a̰me ɗu ge ngay go ne pool mbe mbo ge Dok ta ya. 12Kan on̰om, jan go: Ge dape, nda ge doŋ pe mbe ge go ma wa ka eleya go, àa ke maa kaŋ ngayya a̰me ɗu de? Fareba, mbi jan ḛ ne no, àa mbo kee kaŋ ngayya a̰me ge nda ge doŋ pe mbe ge mà no ma pe to. 13Guwa̰ n̰a num, gwan ndee faa go, haa mbo ge mam wa lee gene yà. 14Nda ge ame hateya ma vyale ya be hee dupḛ ma ge maa tok go. Ɗaŋɗe, àa kaa ge dupḛ melaw ɗu ge maa pe faa go. 15Zeso hoɗ num na wa, jan num go: Ḛ koy ta kwaɗa ge jìn̰al hore ge Farisi ma way ta, ge gan ga̰a̰l Heroɗ ne ta me. 16Ge sok mbe go, ne nda ge ame hateya ma ka jan ta ge ta buwal zì go: Ne sḛ jan fare mbe ge nè no be dupḛ ge nè tok go to pe de? 17Kuwa fare ge àa jan ta ne no ge ta buwal zì, jan num go: Ge dape, ḛ wa ka jan ta go, ḛ be dupḛ de? Ḛ zane gale kuwa fare mbe go to no de? Ḛ wan ne pe to me de? Ḛ dul wa ma twagre twagre de? 18Ḛ ndwa ma kuwa sok kuwa ɗer ɓade? Ḛ tɔgwa ma za̰a̰ fare za̰a̰ ɗer ɓade? Ḛ pagal ma dwaɗ fare dwaɗ ɗer ɓade? 19Sok ge mbi ka siɗi dupḛ ge nuwan̰ ma se, ge nda ge dudubu nuwan̰ ma pe, ḛ kwate kaŋ pe ge gaa ma digi gwal pul gyana ga de? Àa gwan ge ne janna go: I kwate num digi gwal pul wol pɔgwa zi. 20Sok ge mbi ka siɗi dupḛ ge ɓỳala ma se, ge nda ge dudubu ndà ma pe, ḛ kwate kaŋ pe ge gaa se ma digi gwal pul gyana ga iya de? Àa gwan ge ne janna go: I kwate num digi gwal pul ɓỳala. 21Zeso jan num go: O̰o̰ kaɗɗa na mbe go ɗe, ḛ gale wan fare mbe ma pe go to no de?

Zonna ge ndu ge ɓaal ne

Mrk 10.46-52; Yoh 9.1-11

22Zeso mage na nda ge ame hateya ma ɗege mbo suwal Betsayda. Sok ge àa dee yà, nda a̰me ma gene ne ndu ge ɓaal ya, àa kaɗe ne go, ne taa ne ge na tok, ndwa go ne wa seɗ zonna. 23Zeso wan ndu ge ɓaal mbe tok, gene ne ge suwal guwa̰ zum yà. Guwa̰, kee watwa ge na tok wa go, kee ne, ne ndwa ma zì, kan na tok ma ge ne pagal, ele ne go: Mo kuwa sok go de? 24Hage na ndwa zum, jan go: Mbi kuwa nda go, ɗaŋɗe, àa dinna ge ɔwara ma go, àa ka mboya me. 25Gwan ee na tok ge ne ndwa ma go, ɓaal seɗ zonna, gaa kuwa sok ge zum yà kaal. 26Sok mbe go, jan ne go: Guwa̰ mbo ge mo yà, ne kaa ge mo wuwa ge suwal mbe zok buwal zì yà to.

Zeso Ba ge àa ka̰a̰ nùm ge ne pagal ne

Mat 16.13-28; Luk 9.18-27

27Zeso mage na nda ge ame hateya ma ka mbo dagre ge suwal van ge jiyale ge no suwa ge Sezare ge Filib ne ziya guguwa ma diŋ. Ge sok mboya go, ele num no go: Nda ele ta ge mbi pe go, mbi huɗi ne de? 28Àa gwan ge ne janna go: Nda a̰me ma jan go go, mo Yohana ba ge kee nda baptem ne, gegene ma go, mo Eli ne, ge ɗogle ma me ɗe, mo ɗu ge nda ge zwagre Dok wa ma buwal zige ne. 29Ele num go: Ḛ sḛ ma jan go mbi huɗi ne de? Piyer gwan ge ne janna go: Mo Krist, ndu ge Dok taa nee ne. 30Ge sok mbe go, mḛḛre num ndaa kaka go, ne kaa ge num jin̰a ndu a̰me fare ge na pe mbe zum to.

Zeso wuwage swày ge na ne

31Sok mbe go, Zeso ee pe hate na nda ge ame hateya ma fare, jan num go: Mbiya go, Mbi, Van ge Ndu ne, mbi za̰a̰ yal gḛḛ, Yahuɗ ma ga̰a̰l ge ɗeme num ma, ga̰a̰l ge nda ge kee tuwaleya ma way mage nda ge hate eeya ge Moyiz ne ma kuri ne gezi, ne see swày, ge dwam taa guwa̰, ne ta̰a̰ digi me. 32Ka jan num fare mbe ma no ge kɔn̰al go waŋ. Ge sok mbe go, Piyer wan ne ya zum gezi caɗ, jan ne go: «Ɓyare go mo jin̰a fare ge go mbe ma to.» 33Ɗaŋɗe, seŋe tene se, ndil na nda ge ame hateya ma, mḛḛre Piyer ol kekeŋ, jan ne go: Wa̰a̰ tene gezi yà kaal ge mbi, Saytan, ago mo dwaɗɗa ma be dwaɗɗa ge Dok ne ma ne to, ɗaŋɗe, àa dwaɗɗa ge nda duwana ma way ma ne. 34Guwa̰ go, tol ɓase ma ɓanna ge na nda ge ame hateya ma, jan num go: Kaɗɗa ndu ɓyare mbo ya ge mbi pe go, ne duwa tene to, ne he dṵṵl ge in na kaŋre, ne kàre mbi pe me. 35Ago, ndu ge diige ge mbo kaɗ-ɗa ka kwacware tene ge ndwa ge na ne, mbo ban ne gezi. Ɗaŋɗe, ndu ge diige ge mbo hon tene ya gezi ge mbi pe, ge Fare ge Kwaɗa ge ambi pe me, mbo seɗ ndwa ge fareba. 36Kaɗɗa ndu duwana seɗ kaŋ gan ge suwa pagal ma ya mɔɗwag, kaɗ go ne ban ndwa ge na ne gezi no, mbaa ne ge da de? 37Mbo hon da ge mbiya ɗoo, wa gwan seɗ ndwa ge na ne mbe ya de? 38Ago ndu a̰me ge mbo ngwabe tene ya, be kee sayda ge ambi, ge doŋ pe ge nda ge mbo laa ɓyareya ge Dok ne pagal to mage sone keeya ma buwal zì, mbi, Van ge Ndu ne, mbo wan ne ndwa ge daŋso waɗme ge dwam gwanna ge na ne ya go, ge pateya ge na Ba ne zì ɓanna ge malayka ge harcal ma.

Pilihan Saat Ini:

Mark 8: kiaGRB

Sorotan

Berbagi

Salin