Mark 7

Pee ta ge kaŋ keeya ge maa baŋ ma way ma pagal

Mat 15.1-9; Luk 11.37-41

1Dwam a̰me go ɗu, Farisi ma ɓanna ge nda a̰me ge hate eeya ge Moyiz ne ma ɗege ge Jerusalem ya, àa mbo ya ge Zeso ta. 2Ge sok mbe go, àa kuwa ne nda ge ame hateya a̰me ma zam dupḛ be usi maa tok ma ge mojo̰o̰ maa hada ee go to. 3Ago Farisi ma ɓanna ge Yahuɗ ma peɗ, be ge àa usi maa tok ma gezi kɔn̰al yaɗaɗ to ɗe, àa zam kaŋ zam to, ge dape, àa mḛḛ maa ko ge kaŋ keeya ge maa baŋ ma way ma pagal. 4Sok ge àa gwan ge sok kee suk ma ya, àa gale haɗ ta kɔn̰al yaɗaɗ ɓiya, àa wa ɗege zam kaŋ zam go. Àa ka hon kaŋ keeya ge maa baŋ ma way ge ɗogle ma hormo waɗme, dinna ge kob ma, kṵṵri ma ɓanna ge seɗe ge fool kàal ma usiya ma go. 5Ge sok mbe go, Farisi ma ɓanna ge nda ge hate eeya ge Moyiz ne ma ele ne go: Ge dape, mo nda ge ame hateya ma wa ka mboya ge nè baŋ ma kaŋ keeya ma pagal to de? Ge dape, àa wa ka zam kaŋ be usi maa tok ma ge mojo̰o̰ nè hada ma ee go to de? 6Zeso gwan ge num janna go: Ezay jin̰a fare ge ka̰a̰l ge nda ge zwagre Dok wa ma way mbe ge ḛ pagal tem, nda ge mbuɗi nda ndwa ma! Dok jin̰a go:

«Pe rusu mbe uware mbi ge na wa wala boo,

Ɗaŋɗe, ne dul wa kaal ge mbi.

7Àa uware mbi bàŋ kay,

Ago àa hate eeya ge nda duwana ma way ma,

Dinna ge mojo̰o̰ num mbi wa yuwaleya ma ne go.»#Eza 29.13.

8Go no, ḛ n̰a wa yuwaleya ge Dok ne ya gezi, ḛ gaa mḛḛ ḛ ko go ge hateya ge nda duwana ma way ma ne pagal. 9Gwan jan num go: Ajo̰o̰ ḛ ha̰a̰le ta ya koy kaŋ keeya ge ḛ baŋ ma way ma, ḛ seŋe wa yuwaleya ge Dok ne ya ḛ guwa̰. 10Ago Moyiz jin̰a go: «Ho̰ mo ba mage mo na̰ hormo. Ndu ge mbo sal na ba koo na na̰ ya, a ngaɗ go àa hṵṵ ne gezi.»#Waz 20.12; 21.17. 11Ɗaŋɗe ḛ sḛ ma ɗe, ḛ hate nda go: Kaɗɗa ndu jan na ba koo na na̰ ya go: Kaŋ ge mbiya mbi mbaa mo ge ne, a Korba̰, ndwa go a bobo ge mbi ee ne ge Dok pe ne. 12Kaɗɗa ḛ n̰a ne ya keeya mbe go, ne sḛ seɗ vin̰a ge mbaa na ba koo na na̰ to, 13go mbe no, ḛ ho̰ ga̰a̰l kaŋ keeya ge ḛ baŋ ma way ma, ḛ kee tèmel ge eeya ge ḛ baŋ ma way ma ne pagal, ḛ n̰a fare ge Dok ne ya deɗ-ɗa se. Ḛ gwan kee kaŋ ge ɗogle ge go mbe ma pe go gḛḛ, ndwa ɗeŋre eeya ge ḛ baŋ ma way ma ne digi.

Kaŋ ge haɗ ndu duwana fwaɗɗa

14Guwa̰, gwan tol ɓase ma ya, jan num go: Ḛ peɗ ḛ za̰a̰ mbi, ḛ kuwa fare mbe no gezi kwaɗa. 15Kaŋ ge haɗ ndu duwana seŋre ge Dok ndwa se, a be kaŋ ge mbo ge zum, waɗ ge ne wa zì to, ɗaŋɗe, a fare ge ndage no ge ne wa zì ya zum. 16Kaɗɗa ḛ ge tɔgwa ge za̰a̰ fare mbe ma, ḛ za̰a̰ num kwaɗa#7.16 Varseya ge 16 mbe no, nda seɗ ne ge Njaŋeya ge Dok ne ge wal ma zì gḛḛ to.. 17Sok ge Zeso n̰a ɓase ma, gwan mbo ge diŋ yà, ne nda ge ame hateya ma ele ne fare ge fare sḭḭ mbe pagal. 18Jan num go: Ḛ sḛ ma puy, ḛ wan fare mbe pe zane to no me de? Kaŋ ge ndu zam ne, haɗ ne seŋre to. Ḛ wan ano mbe no pe to ɗaŋ de? 19Ago, mbo ge ne dul wa zì yà to, ɗaŋɗe, mbo ge ne laa zì, ndu mbe gwan gaa mbo en ne njoo gezi yà. Ge fare mbe ma no ta, Zeso jin̰a zum waŋ go, kaŋ zam ma peɗ harcal ge zamma. 20Gwan jan num go iya: Kaŋ ge ndage no ge ndu duwana wa zì ya, a ne haɗ ne seŋre ne. 21Ago, a ge dul wa ge ndu duwana ne zì ya, dwaɗɗa ge sone ge ee ndu kaɗ: Gwale ge zam tene, chel kaŋ ma, hun swày ma, 22kee zina ma, kee ene ge bware pe ma, kee laa pisil ma, mbuɗi nda ndwa ma, kee batraŋ ma, kee ene ge mo sele kaŋ pe ma, jan fare ge sone kakatag ma, kee pagal ga̰a̰l ma, jan fare ge dàle ma, ndage ya zum no. 23Kaŋ ge sone mbe ma no peɗ, àa num ndage ne ge ndu duwana zì ya, àa haɗ ne seŋre ne me.

Gwale ge dwag ge ho fareba ge Zeso ta

Mat 15.21-28

24Zeso ɗege ge sok mbe go, mbo ge suwa ge Tir ne yà. Waɗ ge zok a̰me diŋ ɗu, ɓyare go ndu a̰me ɗu kaa ge ne kuwaya to, ɗaŋɗe, ne vin̰a ge kaɗ wayya ge nda duwana ma ndwa zḛḛ baba to. 25-26Gwale a̰me ɗu ge za̰a̰ fare ge Zeso ne faaya, ne van ge gwale kaa ge on̰om ge sone ge na zì. Mbo ya guu na ko ge Zeso ndwa se, jan ne go: Mbi kaɗe mo kaɗe, yin̰a on̰om ge sone ge mbi van ge gwale zì gezi nde. Ne sḛ mbe van Grek ne, too ge Siri go, ge suwa ge Fenesi ne go. 27Zeso jan ne go: N̰a nda jabso ge zok diŋ-ge ma, num zâ kaŋ zam huri ta ne gale ɓiya. Be kee kwaɗa ge go, àa hee kaŋ zam ge nda jabso way, àa dol juu #7.27 Juu a ndu ge kuwa Dok ge Yahuɗ ma way to ne.van ma ne to. 28Gwale mbe gwan ge ne janna go: Bagezok-goo, ge mojo̰o̰ mo jin̰a no go tem, ɗaŋɗe, juu van ge no ge taabul pe se ma, àa zam kaŋ zam ge fwage no ge nda jabso tok digi ma zam. 29Ge sok mbe go, jan ne go: Ge fare janna ge amo mbe no ta, guwa̰ mbo mo yà, on̰om ge sone ndage ya yà zum ge mo van ge gwale zì gezi. 30Sok ge guwa̰ ge na diŋ yà, seɗ na van ge gwale se fiiya cɔgwaɗ ge saŋal go, on̰om ge sone ndage ya zum ge ne zì.

Zonna ge ndu ge gisil ge ɗel taɗɗa ne

Mat 15.29-31

31Zeso gwan ɗege ge suwa ge Tir ne go, kale mboya ge suwal ge Sido̰ mage Dekapol ndwa go suwal ga̰a̰l ge wol ma pagal, mbo ya ge mangaɗam ga̰a̰l ge Galile ne wa go. 32Àa gene ne gisil a̰me ge ɗel taɗɗa ya ɗu, àa kaɗe ne go, ne ke kaɗeya ge ne pagal ndwa go ne wa seɗ zonna. 33Ge sok mbe go, wan ne ge ɓase ma buwal zì ya zum gezi caɗ, paa na tok van ma ge ne tɔgwa pul ma zì, guwa̰, kee watwa ge na tok go, taɗ ne ɗel ge ne me. 34Guwa̰ go, hee na ndwa pḭḭ digi, kan on̰om, jan go me: Efata, ne pe wanna go: «Hage tene gezi.» 35Ge sok mbe go gaw, ne tɔgwa ma hage, ne ɗel saa se, ɗege faaya gezi kɔn̰al yaɗaɗ me. 36Zeso hoɗ num na wa go, ne kaa ge num jin̰a fare mbe zum to. Ɗaŋɗe, sok ge a ka dwage num fare mbe janna go puy ɗe, num sḛ ma gwan ka dasare ne se janna zḛḛ zḛḛ ge nda ta. 37Àa ka kee ajab gḛḛ waɗeya ge ne kaŋ ngayya ge ne ka kee num ma pe peɗ. Àa ka janna go: Koo gisil ma, koo nda ge ɗel taɗɗa ma puy, ee num faa wa me ba!

Pilihan Saat Ini:

Mark 7: kiaGRB

Sorotan

Berbagi

Salin