Mark 9

1Gwan jan num go iya: Fareba mbi jan ḛ ne no, nda ge no ge sego sok mbe go ma, a̰me ge num buwal zige ma mbo suu to, zḛḛ ge go num kuwa Dok kee muluk ge na ne ge pool ɓaŋlaŋ.

Diir eyaya ge Zeso ne

Mat 17.1-13; Luk 9.28-36; 2Pi 1.16-18

2Guwa̰ ge dwam kale menengal go, Zeso wan Piyer, Jak mage Yohana, mbo ge num ge njal a̰me ge haal pagal digi yà, gezi yà hini caɗ ge nda ge ɓase ma ta. Ge sok mbe go, ne diir mbo ya eya ge num ndwa zì. 3Ne ba̰a̰ ma seŋe saal taɗag, seeya cicim ge go ndu a̰me ge no ge suwa pagal, ge mbyaɗ usi ba̰a̰, wa haɗ saal taɗag ge ne pe go to. 4Àa tan ta ge Eli mage Moyiz wa ya siɗigi fare ge Zeso. 5Ge sok mbe go, Piyer hee fare, jan Zeso go: Rabbi, ndwa go Ba ge hateya, a kwaɗa ge nè kaɗ go go, nè ɗùu gur ma taa, ɗu ge mo pe, ɗu ge Moyiz pe, ɗu ge Eli pe me. 6A ndwa go, be seɗ fare ge na janna to, ge dape, voo wa̰a̰ ne gḛḛ ɓanna ge na ka̰a̰m ge zi ma. 7Guwa̰, pḭḭ a̰me mbo ya kulbi num se, ge pḭḭ mbe zì ya, àa za̰a̰ ka̰a̰l a̰me janna go: Ndu mbe no, a mbi Van ne, mbi laa wa̰a̰ ne gḛḛ, ḛ ke tèmel ne fare janna ma pagal. 8Boo go helo, nda ge ame hateya ma ndil sok ge maa ziya ɗe, nda ge zi ma to, ɗaŋɗe, Zeso gaa ya ne hini ɗu mḛḛya ge num ziya.

9Sok ge àa ka ndee ge njal pagal digi ya se go, Zeso hoɗ num na wa ge kaŋ ge num kuwa ya pagal go, ne kaa ge num jin̰a ne zum ge ndu a̰me ta to, ɗiŋ ge go mbi, Van ge Ndu ne, gale ta̰a̰ ne ɓiya ge nda ge swày ma buwal zì. 10Àa koy fare mbe cɔgwaɗ, ɗaŋɗe, àa ka ele ta ge ta buwal zì go: Tanna ge nda ge swày ma buwal zì, ge ne sḛ jin̰a ne no, ne pe wanna gyana de? 11Guwa̰, àa ele ne fare mbe no go: Ge dape, nda ge hate eeya ge Moyiz ne ma wa ka janna go, Eli mbo mbo ya zḛḛ gale ne ɓiya de? 12Gwan ge num janna go: A fareba, Eli mbo mbo ya zḛḛ gale ne ɓiya ndwa nuusi kaŋ ma peɗ ge maa byalam go. Mbi ele ḛ go, ge dape, Njaŋeya ge Dok ne ma wa jan fare ge mbi pagal go, Van ge Ndu ne mbo za̰a̰ yal ma gḛḛ, nda sen ne me de? 13Ɗaŋɗe, mbi jan ḛ go, Eli mbo ya, àa kê ne yal ge maa laa ɓyareya pagal no tem, dinna ge Njaŋeya ge Dok ne ma wuwage fare ma ge ne pe go.

Zonna ge van jiyale ge no ge on̰om ge sone na zì ne

Mat 17.14-21; Luk 9.37-43

14Sok ge Zeso mage na nda ge ame hateya ge taa ma dee ya ge maa ka̰a̰m gegene ma ta zì guwa, àa kuwa ɓase ma mḛḛya nɔnɔg ge num ziya. Àa ge nda ge hate eeya ge Moyiz ne ma wa ya ka pee ta fare. 15Sok ge ɓase ma kuwa Zeso gaw, àa kee ajab, àa chiya ge ne ndwa zì yà mbo kun ne. 16Ele na nda ge ame hateya ma go: Ḛ ge num pee ta go, ge ma̰ fare pagal de? 17Ndu a̰me gwan ge ne janna ge ɓase ma buwal zì ya go: Ba ge hateya, mbi gene mo ya mbi van ge no ge on̰om ge sone ge na zì. On̰om ge sone mbe tele ne be faa wa. 18Ge sok ge diige ge deɗ ne go, dol ne ge suwa se, van wa ka zam hore gigib, ka sul na kin̰a, mbo ya twagre digi zayndaŋ me. Mbi kaɗe mo nda ge ame hateya ma no go, num yin̰a ne zum, num pool be mbyaɗ ge yan ne to. 19Zeso jan num go: Nda ge be hoɗ fareba ma, mbi gaa kaɗ ge ḛ dagre ɗiŋ mbo diya ga de? Mbi in ḛ dṵṵl ma mbo diya ga me de? Ḛ gene mbi van mbe ya. 20Àa gene ne ne ya. Sok ge on̰om mbe kuwa Zeso gaw, deɗ van mbe keeya, van mbe deɗ se, ka viŋri tene ge suwa zì, ne wa ka zam hore gigib. 21Zeso ele ne ba go: Tuguɗi mbe see ne ma̰ del de? Gwan ge ne janna go: Ge ne jiyale ya day. 22Ɗaɗag, on̰om mbe ka dol ne ge ol zì de, ge mam se jwag me de, ndwa ban ne gezi. Ɗaŋɗe, kaɗɗa mo ge pool ge kee a̰me, kuwa i a̰se, mo chiya i kṵwa̰ me. 23Zeso jan ne go: Ge dape, mo wa jan go, kaɗɗa mbi ge pool kee ano mbe no de, mbi jan mo ne no, kaŋ ma peɗ kee kee ge ndu ge hoɗ fareba ya pe. 24Avun cab, van ba oy digi ge ka̰a̰l ndaal, jan go: Mbi hoɗ fareba ya go, chiya mbi kṵwa̰, mbi tuguɗi ge hoɗ fareba ge ambi zì. 25Sok ge Zeso kuwa ɓase ma ya chiya ya ge maa ta, ngwabe on̰om ge sone mbe jan ne go: Mo on̰om mbe ge tele van be faa wa mage za̰a̰ fare, mbi hoɗ mo mbi wa no: Wuwa zum ge van mbe zì, daa gwan gwan-na waɗ ne zì to baɗ. 26Ge sok mbe go gaw, on̰om mbe ee luuluu, ee van ndaɗɗa, waɗ zum ge ne zì. Van gaa dolla twagreya zayndaŋ ge mojo̰o̰ ndu ge suu suu go. Kaŋ mbe ge kee, ee nda gḛḛ janna go, van mbe suu suu. 27Ɗaŋɗe, Zeso wan ne tok, ne sḛ ɗege ya digi mḛḛya. 28Sok ge wuwa zok diŋ yà, ne nda ge ame hateya ma ele ne hini jan go: Ge dape i wa mbyaɗ yan on̰om mbe no zum to de? 29Jan num go: On̰om ge mbuɗuɗum ge go mbe pe no, àa yan ne zum ge kaɗeya ta ɗeŋew.

Zeso wuwage na swày mage na tanna

Mat 17.22-23; Mrk 8.31-33; Luk 9.43-45

30Zeso mage na nda ge ame hateya ma ɗege ge sok mbe go, àa kale mboya ge Galile pagal, ne sḛ be ɓyare go ndu a̰me ɗu ne kuwa sok ge na no go to, 31ge dape, ka hate na nda ge ame hateya ma. Sok hate num go, ka jan num go: Àa mbo ɓyan mbi, Van ge Ndu ne ge nda duwana ma tok go, nda mbe ma mbo hun mbi. Dwam taa guwa̰ ge mbi swày ne go, mbi mbo tan digi ge nda ge swày ma buwal zì. 32Ɗaŋɗe, nda ge ame hateya mbe ma be ka wan fare janna mbe pe to, àa ka chiya voo ge ele ne fare me.

A huɗi ge mbiya kaɗ nda ge ame hateya mandwa zḛḛ ne de?

Mat 18.1-9; 5.29-30; Mrk 10.35-45; Luk 9.46-50

33Zeso mage na nda ge ame hateya ma deɗ-ɗa ge suwal Kapernawom diŋ, sok ge àa wuwa ya ge zok diŋ, Zeso ele na nda ge ame hateya ma go: Ḛ ka pee ta daa ge vin̰a zì ya, ge ma̰ fare pagal de? 34Àa kaɗ wa daal, ago àa ka pee ta ge vin̰a zì ya go, ne huɗi sḛ mbiya kaɗ ga̰a̰l ne maa buwal zì de? 35Ge sok mbe go, kaɗ se, kwate na nda ge ame hateya ge wol pɔgwa zi ma ya ge na ta, jan num go: Kaɗɗa ndu a̰me ɓyare go na kaɗ ge nda ndwa zḛḛ, ne kaa ndu ge gaa nda pe dwab mage ndu ge kee tèmel hon na ka̰a̰m ne peɗ. 36Wan van jiyale a̰me ya ɗu, ee ne mḛḛya ge maa tuwal zì. Guwa̰ ge bu ne ge na ta zì go, jan num go: 37Ndu ge mbo ame van jiyale a̰me ya ɗu dinna ge ne sḛ mbe no go, ge na diŋ, ge mbi pe, ago ame mbi sḛ ge mbi pagal. Ndu ge ame mbi ya, be ame mbi sḛ ɗeŋew to, ame Ba ge teme mbi ya waɗme.

38Yohana jan ne go: Ba ge hateya, i kuwa ndu a̰me ɗu ka yan on̰om ge sone ma zum ge mo dḭḭl, i ɓyare tele ne no, ge dape, kàre nè pe to. 39Zeso jan ne go: Ḛ daa gwan tele ne to. Ago ndu a̰me ge kee kaŋ ajab ge mbi dḭḭl, daa gwan jan fare a̰me ge sone ge mbi pagal guwa̰ avun cab to. 40Ago, ndu ge sal tèmel ge ḛ kee ne no to, a ge nè pe go. 41Fareba mbi jan ḛ ne no: Ndu ge diige, ge mbo hon ḛ mam njoɗɗa ya kob ɗu, ge dape ḛ ge Krist, ndu ge Dok taa ne ma ne, mbo seɗ tok kon̰a mbḛḛ.

42Ge nda jabso ge ho fareba ge mbi ta ma buwal zì, ndu ge mbo ee a̰me ya ɗu deɗɗa ge sone zì, ne nde-nde ge àa vwal njal ga̰a̰l ge ne ka̰a̰l zì, àa dol ne ge mam ga̰a̰l nuwam se yà. 43Kaɗɗa sok a̰me ge mo duul ta ge kaŋ ge ee mo ne deɗɗa, koo ne kaa mo tok, kṵṵ ne gezi. A kwaɗa ge mo pe go mo seɗ ndwa ge fareba tok duul, ge go mo kaɗ ge mo tok ma jwàg, mo wa mbo waɗ ge sok njoɗ yal zì yà, sok ge ol piri to go. 44[A sok ge chabso ge zam nda ma suu zì to ne, kaɗ sok ge ol piri zì to ne me.]#9.44 Varseya 44 mage 46 mbe ma no, a seɗ num ge maktub ge Dok ne, ge a ee pe njaŋe num ge tok ma zì to. 45Kaɗɗa sok a̰me ge mo duul ta ge kaŋ ge ee mo ne deɗɗa, koo ne kaa mo ko, kṵṵ ne gezi. A kwaɗa ge mo pe go mo seɗ ndwa ge fareba ko duul, ge go mo kaɗ ge mo ko ma jwàg, mo wa mbo waɗ ge sok njoɗ yal zì, sok ge ol piri to. 46[A sok ge chabso ge zam nda ma suu zì to ne, kaɗ sok ge ol piri zì to ne me.]#9.46 Varseya 44 mage 46 mbe ma no, a seɗ num ge maktub ge Dok ne, ge a ee pe njaŋe num ge tok ma zì to. 47Kaɗɗa mo sok a̰me ge mo duul ta ge ee mo ne deɗɗa, koo ne kaa mo ndwa ee mo deɗ ge sone zì ne, zagle ne gezi. A kwaɗa ge mo pe ge mo mbo kaɗ dagre ge Dok ge ne muluk zì ndwa lee ɗu, ge go mo kaɗ ge mo ndwa ma jwàg, mo wa mbo waɗ ge sok njoɗ yal zì yà. 48A sok ge chabso ge zam nda ma suu zì to ne, kaɗ sok ge ol piri zì to ne me. 49Ago, àa mbo ɗiyage ndu ge diige ge ol, go mbe no, mbo kaɗ dinna ge kaŋ ge no ge nuwam ge na ndwa zì go. 50Nuwam kaŋ ge kwaɗa ne, ɗaŋɗe, kaɗɗa nuwam ban camam ge na ne ya, a ge da ta ɗoo, ḛ wa mbo gwan ge ne camam ya iya de? Nuwam go ge ḛ buwal zì, go mbe no, ḛ kaa halas ge ta ta me.

Pilihan Saat Ini:

Mark 9: kiaGRB

Sorotan

Berbagi

Salin