Matiye 18
18
ƊƏW TO NJENETƆJI
Na ɓa to dəw gə to ɓəəl ya̰ wa?
Mrk 9.33-50; Lug 9.46-50
1Dɔ kar-ɛ gə əng ja, ngan njenendoje ꞌɗəm gə rɔ Jeju gə ɗaa dəji-e na: Na ja ɓa to dəw gə to ɓəəl ya̰ mə ɓeko̰ gə dara wa? 2Be ɓa, Jeju ɓar ngon gə njɛ̰ ila-a horo-je gə dana ngaɓa təl un tar pa ar-je na: 3M-pa tar gə tɔgərɔ ja m-ar-si, to gə ꞌmbəl-je mə-si ar-ɛje to gə kar gə nganje gə njɛ̰-njɛ̰ be ang nama, a kandə-je mə ɓeko̰ gə dara ang magə. 4Ngaɓa dəw gə ɗa rɔ-ɛ njɛ̰ baa to gə ngon gə ar nee nama nj-ɛ nee ɓa a to dəw gə to ɓəəl ya̰ mə ɓeko̰ gə dara. 5Cibi dəw gə uwa ngon gə njɛ̰ kara to gə ye gə ar nee gə rɔ-ɛ gə gə ri-m nama, ꞌma ja uwa-m gə rɔ-ɛ gə əng. 6Ngaa to gə ɓo dəw gə to jigi tuga koso lə ngon gə njɛ̰ kara horo nganje gə njɛ̰-njɛ̰ gə ꞌta kagə ꞌne nama, kar ꞌtɔ ər kusu ne gɔb-e gə, d-ila mə babo gə d-ar-ɛ n-njuwi man le, to nokarə lə-a ja cibi.
7Tuji to kar dəwje gə dɔ nangə nee mba ɗəw gə dəw a koso dan neɗa gə kṵra̰y gə. Ɗəw gə dəw a koso ne dan neɗaje gə kṵra̰y gə le a to ja, ngaa tuji uba dəw gə to ɗəw koso dan neɗa gə kṵra̰y gə! 8To gə ɓo ji-i ose gɔl-i ɓa to ɗəw koso dan neɗa gə kṵra̰y gə lə-i nama may kar ꞌgangə ila kɔrɔ; mba kinga kaji gə ji-i kara ose gə gɔl-i kara, may unda ye gə kar aw gɔl-i gə joo ose ji gə joo to gə maj-ɛ ja ɓa aw ne kəm pər gə a to gə ndɔ gə ndɔ. 9To gə ɓo kəm-i to ɗəw koso dan neɗa gə kṵra̰y gə nama ɔr-ɛ ila-a kɔrɔ əw. May ya̰ mba kinga təbə kəm-i kara, unda kar kəm-i ga̰ joo kɛm ɓa d-un-i d-ila-i dan pər gə a kṵy ang gə.
10Oje gə maj-ɛ, əwje rɔ-si dabəje ngon kara dasəra horo nje gə d-o-je gə ne ang gə mba m-pa m-ar-si to gə, anjije lə-je gə dara d-a lo gə kəm Bɔy gə isi mə dara jaga ja. 11Mba ꞌma gə Ngon lə dəw m-ɗe mba kaji nje gə d-igi.#18.11 Bar-ɛ gə nee godo mə mbede gə ꞌɗa gə ndo̰ tar gərɛk ngaɓa mə mbedeje gə kɛm gə ꞌɗa gə tar pəra̰se tɔ.
Gusutar gə ɔji dɔ ngon badəm gə igi
Lug 15.4-7
12To gə dəw kara badəmje lə-a tɔl kara, ɗaa ꞌye gə kara igi, se n-a kiya̰ nje gə dɔg ji nay kara gə gir-e gə ji nay kara dɔ ər gə mba kaw sangə ꞌye gə igi le ang wa? Əjije kəne to gə ban wa? 13To gə ɓo n-təl n-inga badəm lə-a gə kara le nama, tɔgərɔ ja m-pa m-ar-si, rɔ-ɛ ləl-e ya̰ dɔ-ɛ gə unda nje gə dɔg ji nay kara gə gir-e gə ji nay kara gə d-igi ang. 14Ɗəw kara baa, to gə Bɔ-sijee gə isi dara kara njigi kar nje gə d-o-je gə ne ang nee le mar-ɛ kara baa ja kara igi ang.
Tar kɔr tar neɗa gə kṵra̰y dɔ dəw gə
15To gə ɓo ngon ko̰-i ɗa neɗa gə kṵra̰y nama, aw inga-a gə kar-ɛ ja ꞌpa tar-ɛ kəm-e gə. To gə ɓo n-o tar ta-i gə ɗaa, ꞌi le inga ngon ko̰-i le nam. 16Ngaa to gə ɓo n-mbadə ko tar ta-i gə ɗaa, təl aw sangə dəw kara ose dəwje j-o um-je dɔ-i gə ja cibi ɓa gə mba kar ꞌgɔlje ne tar nee le, kar dəwje gə joo ose munda nee le ꞌto njetar naj-ɛje#18.16 Ttt 19.15. 17To gə ɓo n-mbadə ko tar ta-je gə cibi nama aw pa Mbo̰ naa lə njetakagəje, a ɓo n-mbadə ko tar ta njetakagəje gə ja cibi nama o-e gə dəw gə njegərə Luba ang ngaɓa gə njembo̰ lar gədə ɓe nəm. 18Tɔgərɔ ja, m-pa m-ar-si, ne tɔ̰y gə a tɔ-je dɔ nangə nee nama d-a tɔ dara tɔ, a ɓo neje tɔ̰y gə a tudu-je dɔ nangə nee nama d-a tudu dara tɔ.
19Tɔgərɔ, m-təl m-pa m-ar-si ja cibi, ne gə ban-ban ja ɓa ndu dəwje joo asə naa kəne dɔ nangə nee, ɓa ꞌdəji nama, Bɔy gə isi dara a kar-je ja. 20Mba lo gə dəwje joo ose munda ꞌmbo̰ naa kəne gə ri-m, nama m-ga̰ horo-je gə.
21Be ɓa, Piyɛr ngɛsə ɗe mbɔr Jeju gə ngaɓa təl dəji-e na: Mbay, logə ngon ko̰-m ɗa sə-m neɗa gə kṵra̰y le, m-a kɔr tar dɔ-ɛ gə gɔl kandə wa? Se saar gɔl siri wa? 22Jeju təl ila-a kəne na: M-pa m-ar-i na: Gɔl siri baa ang, ngaa saar gɔl dɔg siri, lo siri.
Ngon njekula gə o kəmtondoo lə dəw ang
23To gə be ɓa, ɓeko̰ gə dara to ɗəw kara baa to gə mbay gə njigi kar njekulaje lə-a ꞌtura go nekingaje gə um ji-je d-ar-ɛ. 24Logə n-un kudu tura neje le ɗaa, ꞌɗe gə ngon njekula kara gə ɓangə lar to dɔ-ɛ gə to ɓəəl gə asə kuga ang. 25Ngaa ngon njekula nee le, ne kara gə a kuga ne ɓangə le godo, ɗaa ꞌɓəə-eje le un ndu ar-je na: D-uwa-a gə jene lə-a gə ngan-ɛ gə nekingaje lə-a tɔ̰y ja d-aw ꞌɗabə-je ɓo ꞌɗe d-uga ne ɓangə le. 26Ngon njekula le ce oso no gɔl ɓəə-eje gə burugə unda ꞌburamba ngaɓa pa na: Mbay, ila mə-i dɔ mar-ɛ gə, ɗaa m-a kuga ɓangə lə-i le tɔ̰y ja. 27Be ɓa mbay le o kəmtondoo lə ngon njekula lə-a, ɗaa ɔr ɓangə le dɔ-ɛ gə iya̰ ar-ɛ n-aw. 28Logə ngon njekula le aw, ɗaa inga njeba-ɛ lə-a kara gə ɓangə lar lə-a asə ye n-a kuga ɓəə-eje ang to dɔ-ɛ gə gubay. N-al n-uwa, n-um ji-a gɔb-e gə mbḭrḭ na: Uga ɓangə lə-m. 29Njeba-ɛ lə-a le təl oso nangə no gɔl-ɛ gə no na: Ila mə-i dɔ mar-ɛ gə ɗaa, m-a kuga ɓangə lə-i ja. 30Ngaa ngon njekula nee le mbadə kɔ̰y ja; cibi uwa njeba-ɛ lə-a aw ila kəy kula mba kar-ɛ uga ɓangə lə-a le gə no ja ɓa. 31Logə njeba-ɛje lə-a gə kɛm d-o ne gə n-ɗa le be ɗaa mə-je ləl-je ang ar ꞌtəl d-aw ꞌpa tar-ɛ tɔ̰y d-ar ꞌɓəə-jeje o. 32Be ɓa ꞌɓəə-ejeje le təl ula ɓar ngon njekula nee le ngaɓa pa ar-ɛ na: ꞌTo ngon njekula gə mə-i kṵra̰y, logə ꞌi ce oso no gɔl-m le ꞌma m-iya̰ go ɓangə gə to dɔ-i gə le tɔ̰y ja m-ar-i. 33Ɗaa asə ko kəmtondoo lə njemar-i to gə ꞌma m-ɗa ne sə-i ang wa? 34Mə ꞌɓəə-jeje le o̰-ɛ ya̰, ɗaa ar-je d-uwa-a d-ila-a kəy kula gə mba kar-ɛ n-təl n-uga ɓangə le ja ɓa. 35To gə be ja tɔ ɓa Bɔ-sijee gə dara a ɗa ne gə dəw gə mbadə kɔr tar dɔ ngon ko̰-ɛ gə gə mə nda.
Pilihan Saat Ini:
Matiye 18: lap
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2020, ATALTRAB. All rights reserved
