Matiye 17
17
Jeju mbəl rɔ-ɛ dɔ ər gə
Mrk 9.2-13; Lug 9.28-36
1Ndɔ misa̰ go-e gə ɗaa, Jeju ɔr Piyɛr je gə Jagə, gə Ja̰ gə ngon ko̰ Jagə n-aw gə je nganga̰ dɔ ər gə ndəw gə. 2N-mbəl rɔ-ɛ kəm-je gə: Ngo no-ɛ ndogo to gə kar be, ngaɓa kubuje lə-a kara nda kələw-kələw to gə lokarə be. 3Cibi Moyiji je gə Eli ꞌce d-ar d-o-je ngaɓa ꞌto̰ sə-a tam. 4Piyɛr un tar pa ar Jeju na: Mbayɓe, to may ya̰ kar j-isije lo gə nee gə; to gə ɓo ꞌi njigi nama m-a ɗa kəy lo munda kara a to kar-i, kara a to kar Moyiji, ngaɓa kara a to kar Eli tɔ. 5Logə Piyɛr aw pa tar be ja ɓi ɗaa, kil lə nji gə kasə rogo-rogo ɗe dəbə dɔ-je gə rigim. Ɗaa ndu dəw ɓar mə kil lə nji gə le na: ꞌNe gə nee le n-to Ngon njigi lə-m, gə n-to ngira rɔləl lə-m, oje tar t-ɛ gə. 6Logə ngan njenendoje d-o be ɗaa, ɓəəl unda-je badə gangə-je, ar ce d-oso dəbə kəm-je nangə. 7Ngaa Jeju təl ɗe, uwa-je gə ji-a ngaɓa pa na: ꞌƁəəl-je ang, ḭ-je taar! 8Logə d-ɔr dɔ-je taar ɗaa d-o Jeju gə kar-ɛ baa.
9Logə d-aw ɗisi dɔ ər dɔ-je gə nangə ɗaa, Jeju un ndu ar-je na: Ne gə oje nee le, a paje tar-ɛ kar dəw o ang saar mba kar ꞌma gə Ngon lə dəw m-a ndol horo nje gə d-uy gə.
10Ngan njenendoje dəji-e tar to gə be: Mba ɗi ɓa njekɔr gəl toronduje ꞌpa na may kar Eli ɗe kede ɓa wa? 11Jeju ila-je kəne na: Tɔgərɔ ja, Eli ɗe ngaɓa a gɔl neje tɔ̰y. 12Ngaa m-pa m-ar-si to gə Eli ɗe nam ja, ngaa ꞌgər-e ang ɗaa ꞌɗa sə-a ne gə mə-je njigi. Be ɓa ꞌma gə Ngon lə dəw kara m-a ko ꞌməsərə ji-je gə tɔ. 13To gə be ɓa Ngan njenendoje gərə to gə Jeju aw pa tar lə Ja̰ Njeɗabatɛm.
Jeju aji ngon gə njil gə kṵra̰y ula kəm-ɛ ndoo
Mrk 9.14-32; Lug 9.37-45
14Logə Jeju je gə ngan njenendoje lə-a ɗe dəb gə bula dəwje ɗaa, jingaw kara ɗe rɔ Jeju gə ngaɓa um məkəji-e nangə no-ɛ gə, ɗaa pa na: 15Mbay, o kəmtondoo lə ngon-m na to njeməngərə ngaɓa o ko̰ ne ya̰. N-aw n-oso pədə ose n-aw n-oso man taar-taar nəm tɔ. 16Be ɓa m-ɗe sə-a m-ar ngan njenendoje lə-i, ngaa d-asə kaj-ɛ ang. 17Jeju ila kəne na: ꞌToje dəwje nje məkədərəje, ꞌtoje njetula pa nja-je naa gə je, m-a ga̰ gə si saar ndɔ gə ɗa gə wa? Ose m-a kore uru-m dɔ si gə saar ndɔ gə ɗa gə wa? ꞌƊe-je gə ngon le ar-mje. 18Jeju ndangə njil gə kṵra̰y le gə singa ɗaa njil le ce mə ngon gə le ar-ɛ aji gə lo-e gə əng ja.
19Be ɓa, ngan njenendoje ꞌɗe mbɔr Jeju gə ngaɓa pa sə-a tar gə kar-ɛ baa na: Mba ɗi ɓa j-asə tɔbə ne njil gə kṵra̰y nee ang wa? 20Jeju pa ar-je na: Mba takagə lə-si njɛ̰ baa. Tɔgərɔ, m-pa m-ar-si, to gə ɓo takagə lə-si to yəm-yəm baa to to gə kandə kam nay gə ri-a na mutarədə ja kara, ꞌpaje ar-je ər gə ar na: Ɔdə gə nu nama n-a kɔdə; ne gə a kal dɔ-si kara kara a godo. 21Ngaa njil gə kṵra̰y gə be le a ce ɗəw gə lə dəji gə ɗəw tɔl mə ɓo.#17.21 Bar-ɛ gə nee le godo mə mbedeje gə ləw gə kɛm gə ꞌɗa ndo̰ tar gərɛk gə kɛm.
22Ndɔ kara, ngan njenendoje mbo naa dɔ nangə gə Galile ɗaa, Jeju pa ar-je na: ꞌMa gə Ngon lə dəw le d-a kuwa-m kula-m ji dəwje gə; 23kar-je d-a tɔl-m, ndɔ gə njekum gə munda lə-a ɗaa, m-a təl ndol gugu. Gə go tar gə nee le ɗaa mə ngan njenendoje ila kasə baragə.
Jeju uga lar gədə ɓe
24Jeju gə ngan njenendoje ce mə ɓe gə Kapɛrənom, njembo̰ lar mba kəy gə lə Luba ꞌɗe dəji Piyɛr tar na: Njenetɔji lə-si le uga lar mba kəy gə lə Luba ja wa? 25Piyɛr ila kəne na: Oyo, n-uga ja. Logə n-andə kəy ɗaa Jeju ja un tar kede pa na: Simo Piyɛr, ꞌi əji kəne ban wa? Na ɓa a kuga lar gədə ɓe ose ne ndu kar mbayje gə dɔ nangə ne wa? Ngan njeɓeje ose njembaaje wa? 26Piyɛr ila kəne na: Njembaaje. Jeju təl ila kəne na: Ɗaa ngan njeɓeje d-uga ang. 27Gəl-e gə nee ɓa mba kar j-a tuji mə lar gədə ɓeje le ang ɗaa, ɔdə aw ta man bo gə, aw ila kuwi, ɗaa kənji gə a kuwa dɔngɔr ja, cɛ̰ t-ɛ ɗaa a kinga sulay kəne kara. Ɗaa un ɗe uga ne dɔ ꞌma gə ꞌi.
Pilihan Saat Ini:
Matiye 17: lap
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2020, ATALTRAB. All rights reserved
