Matiye 19
19
KḬ GALILE KAW GƏ JERUJALƐM
Jeju pa tar cḭ naa lə jingaw je gə jene
Mrk 10.1-12
1Logə Jeju pa tarje nee le tɔ̰y ila nangə ɗaa, ɔdə dɔ nangə gə Galile, aw dɔ nangə gə Jude, tura man Jurədɛ̰ gə. 2Bula bo dəwje gə kobəre ꞌndole go-e, ɗaa n-aji-je gə lo-e gə ja.
3 Parijiyɛ̰je ꞌɗe ꞌdəji-e tar mba n-ɛ nena: Ɗəw to kar jingaw tɔbə jene lə-a ɔji dɔ ne gə ban-ban gə jene ɗa gə ləl ta kəm-e gə ang wa? 4Jeju təl ila-je kəne na: ꞌGərəje to gə lo kun kudu neje gə ja Luba gə Nje ɗa neje ɗa jingaw je gə jene ang wa? #19.4 Lgn 1.27 5Ngaɓa n-pa na: Gəl-e gə nee ɓa, jingaw a kiya̰ bɔ-ɛje je gə ko̰-ɛje ɗaa a mbo̰ naa gə jene lə-a, ꞌjeje joo kɛm d-a ɗe to darɔ gə kara baa.#19.5 Lgn 2.24 6Be ɓa, d-a to darɔ gə kara baa ɓo dəwje joo ang ngaa, may kar ne gə Luba tɔ naa gə le dəw tudu ang. 7Parijiyɛ̰je le ꞌtəl ꞌpa d-ar-ɛ na: Mba ɗi ɓa Moyiji un ndu mba kar jingaw ar jene mbede cḭ naa ngaɓa tɔb-ɛ ne wa?#19.7 Ttt 24.1-3 8Jeju ila-je kəne na: Mba məkədərə lə-si ɓa Moyiji un ne ɗəw mba kar ꞌtɔbəje ne jeneje lə-si; ɓo lo kun kud-e gə le to gə be ang baa. 9Ngaa m-pa m-ar-si: Na-na ɓa tɔbə jene lə-a, ɔji dɔ kila kuji ang ja baa, ngaɓa dəb-e nee le ta jene ɗangə nama ɓogo lo to.
10 Ngan njenendoje lə-a ꞌtəl pa d-ar-ɛ na: Ɓo p-ɛ gə be ɓa kar jingaw ɗa ne gə jene nama may ta jene ang. 11Jeju təl pa ar-je na: Dəwje tɔ̰y ꞌgərə gəl tar gə nee le ang, ngaa nje gə kɛm gə Luba ar-je ɗəb-e ja ɓa ꞌgərə. 12Mba dəwje gə kɛm le ꞌto mbakuduje mə ko̰-jeje gə nam ɓa d-uji-je ne to gə be, nje gə dəwje ɓa təl-je mbakuduje ngaɓa nje gə ye-je ja təl darɔ-je gə mbakuduje mba ɓeko̰ gə dara. Dəw gə asə njigi go tar gə nee le nama njigi.
Tar lə nganje gə njɛ̰-njɛ̰
Mrk 10.13-16
13Dəwje ꞌɗe gə nganje gə njɛ̰-njɛ̰ d-ar Jeju mba kar ila ji-a dɔ-je gə ngaɓa dəji Luba mba tar lə-je tɔ, ngaa ngan njenendoje d-ḭ gə je. 14Ɗaa Jeju pa na: Iya̰je nganje ar-je ꞌɗe rɔ-m gə ɓo ɔgəje-je ang, mba ɓeko̰ gə dara le to mba nje gə to to gə nganje be. 15N-ila ji-a dɔ-je gə ɗaa n-ɔdə lo-e gə nee n-aw.
Ngon basa̰ gə to njenekinga
Mrk 10.17-31
16Dəw kara ɗe inga Jeju ɗaa dəji-e na: Njenetɔji, se ne gə may gə ban ɓa m-a ɗa mba kinga ne təbə gə gə ndɔ gə ndɔ wa? 17Jeju ila kəne na: Mba ɗi ɓa ꞌdəji-m tar gə ɔji dɔ ne gə may wa? Luba ja gə kar-ɛ baa ɓa to dəw gə may. To gə ɓo ꞌi njigi mba kinga təbə nama, ꞌngom toronduje lə Luba. 18Ngon basa̰ le təl dəji-e na: Toronduje gə ɗa wa? Jeju təl ila kəne na: ꞌTɔl dəw ang; ꞌɓogo lo to ang, ꞌɓogo ang, ꞌɗa tar naji mbə ang 19kila ngon kuji dɔ bɔ-ije je gə ko̰-ije gə ngaɓa ꞌnjigi njeməri to gə darɔ-i be tɔ.#19.19 Cgɗ 20.12-16; Ttt 5.16-20 20Ngon basa̰ le pa ar-ɛ na: Toronduje gə nee le m-ila kuji kəne gə maj-ɛ ja tɔ̰y, a ɗi ɓa nay kar-m ɗa cibi wa? 21Jeju pa ar-ɛ na: To gə ɓo ꞌi njigi mba to dəw gə may pɛdə nama, aw odo neje lə-i tɔ̰y ꞌɗabə n-ndogo ɓo iya̰ lar-ɛ aw ar njendooje, ɗaa a kinga nebaw mə dara gə, ɓo ꞌɗe uwa go-m. 22Logə ngon basa̰ le o tarje gə Jeju pa nee ɗaa rɔ-ɛ ləl-e ang, ar ɔdə aw mba nekingaje lə-a bula ya̰.
23Jeju pa ar ngan njenendoje lə-a na: Tɔgərɔ ja, m-pa m-ar-si, to ngangə ya̰ gə njenekinga kar-ɛ andə mə ɓeko̰ gə dara. 24M-təl m-pa m-ar-si ja cibi to gə, a to ngangə ya̰ kar da gə ɓar-ɛ jambal nday kəm ɗəw libi gə, ngaa njenekinga kar andə ɓeko̰ gə dara le ngangə ya̰ ja cibi. 25Logə ngan njenendoje d-o tarje gə nee le ɗaa dum kəji lə-je ar ꞌpa na: Na ja ɓa a kasə kinga kaji wa? 26Jeju a-je ji ɗaa təl pa ar-je na: To ne gə dum dɔ dəwje ngaa Luba le ne gə dum dɔ-ɛ godo.
27Be ɓa, Piyɛr un tar dəji Jeju na: A o, sijee gə j-uba neje tɔ̰y j-iya̰ ɓa j-uwa go-i nee le, ɗi ɓa a to mba-si wa? 28Jeju ila-je kəne na: Tɔgərɔ, m-pa m-ar-si, ndɔ gə ꞌma gə Ngon lə dəw m-a kisi dɔ ngəndəng mbay rɔnduba gə lə-m dɔ kar gə neje tɔ̰y d-a təl to gə sigi le, sisəy gə unje go-m le, a kisije dɔ ngəndəngje gə dɔg gə gir-e gə joo mba gangə tar dɔ gəl kuji Ijirayɛlje gə dɔg gə gir-e gə joo. 29Dəw gə ɗa-ɗa gə mba-m ꞌma ɓa uba ne mə kəy lə-a iya̰, gə ngan ko̰-ɛje, gə ko̰ nan-ɛje, gə bɔ-ɛje, gə ko̰-ɛje, gə ngan-ɛ ose mə ndɔje lə-a nama a kinga mar-ɛ bula dɔ-ɛ gə ngaɓa a kinga təbə gə gə ndɔ gə ndɔ gə nenduba. 30Be ɓa, nje gə dɔngɔr bula d-a təl to nje gə dɔ gugu ngaɓa nje gə dɔ gugu d-a təl to nje gə dɔngɔr.
Pilihan Saat Ini:
Matiye 19: lap
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2020, ATALTRAB. All rights reserved
