Yowano 10

Nguli ya mulishani

1Yeshu wambile ngayi, “Mwa shikuma nikumitongweza ngayi, muntu ou ukubula kwingina mu mulaka wa bambelele na shipana, ngoboni ha kukandama na nzila yashenge, nengi mwizi na mukakupukula. 2Ngoboni ou kwingina na shipana niye mulishani wa bambelele. 3Mukakulama ukumushinkwilila ku shipana, kami bambelele ba kuyuvwa lizu lyendi. Ukwihana bambelele bendi na mazina wabo, kami ukubatutwisha. 4Oho watutwishakale bambelele bendi nimwabo, ukuya kumbili yabo, pe bambelele ba kumukonka ndaba ba kulimuka lizu lyendi. 5Kukonka muyeni bafwako, ngoboni bakatina kukwendi, ndaba kulimuka lizu lya muyeni bafwako.”

6Yeshu wabatongwezele eye nguli, ngoboni kaliha bayuvwishile ebye ambile kukwabo.

Yeshu niye Mulishani Wamuwahe

7Niho Yeshu ambile kukwabo kami ngayi, “Mwa shikuma nikwamba kukwenu ngayi, ami shipana sha bambelele. 8Nimwabo baya bezile kumbili yami bengile bezi na bakakupukula, ngoboni bambelele kaliha babayuvwile. 9Ami nili shipana. Muntu nimwendi ukwinginina mumwami ukapuluka. Ukengina na kututika, ukawana kwakubuyila. 10Mwizi wezanga tuhu na kuyiba na kuziha na kunongesha. Amiboni nezi ngayi bekale na wumi, bekale nawo wawingi.

11“Ami mulishani wamuwahe. Mulishani wamuwahe ukufwa ndaba ya bambelele. 12Ngoboni mukamulimo wa ndando, kaliha niye mulishani mwine bambelele, nohobene ndi uku mona mbinzi heza, ukushiya bambelele na kwituka. Mbinzi ukulwisha litanga, pe ukupanzanisha bambelele. 13Mukamulimo wa ndando ukwituka ndaba nengi wa ndando, kulama bambelele wufwako. 14Ami nili mulishani wamuwahe, nikulimuka bambelele bami, kami bambelele bami ba kundimuka. 15#Mat 11:27; Luka 10:22. Nehi Tate akundimuka nami kami nikulimuka Tate, pe nikufwa ndaba ya bambelele. 16Nili na bambelele bashenge baya babula kwinga ba nou mulaka nanibo kami niku fwanina ku baleta, bakayuvwa lizu lyami, pe bakenga litanga limo na mulishani umo.

17“Tate uku haka ndaba nikupana wumi wami ngayi niwutambule kami. 18Kowa muntu ukunyangula wumi, ngoboni nikuwutula mu shifungo shami. Nili na ngovu za kuwu tula na za kuwu bwesha kami. Nizo ndayano natambulu kuli Tate.”

19Kwekalile kami kulitapa mukati ka Bayunda, ndaba ya mazu awa. 20Babengi mukati kabo bambile ngayi, “Uli na mayimbwe, kami napempele. Shumangani mu kumuyuvwilila?”

21Bamina bambile ngayi, “Mazu awa akwamba kaliha mazu a muntu wa mayimbwe. Mayimbwe akutwesha kutonesha meho a tushishitwa ndi?”

Yeshu ukukaniwa

22Shengile shikati sha mupepo oho kwekalile Shimbo Shakuzilika Litala lya Nyambi mu Yelushalema. 23Yeshu wendelenga mu Litala lya Nyambi, mu mazezelo a Sholomoni. 24Niho Bayunda bakungulukilile kukwendi, pe bambile ngayi, “Shikati sha kukuma hati ukatushiya mu wulube? Ndi obe Kilishitu tutongweze shintwantwa.”

25Yeshu waba kumbwile ngayi, “Namitongwezele, ngoboni mwabulile kukulupila. Milimo eye nikutenda mu lizina lya Tate niyo yikumpaka, 26ngoboni kukulupila mufwako, ndaba kaliha muli bambelele bami. 27Bambelele bami ba kuyuvwa lizu lyami, nikubalimuka, kami ba kunkonka. 28Nikubapana wumi wa mwaya myaka, pe kukanonga bafwako. Kowa muntu ukabafumisha mu liboko lyami. 29Tate ou wabampanine ukupitakana nimwabyo, kowa muntu ukutwesha kubafumisha mu liboko lya Tate. 30Ami na Tate twenga umo.”

31Niho Bayunda kami batolele mamanya ngayi bamupuhe. 32Yeshu wambile ngayi, “Namimoneshe milimo yayingi yayiwahe ya kuli Tate, haya mukumpuhila mamanya mulimo wuti?”

33 # Bal 24:16. Bayunda bamukumbwile ngayi, “Kaliha tukukupuhila mamanya ha mulimo wawuwahe unatende, ngoboni ndaba ya lihandu lyobe. Obe uli muntu tuhu, ngoboni ulinakwamba ngayi uli Nyambi!”

34 # Nyi 82:6. Yeshu waba kumbwile ngayi, “Kwatikitiwile mu ndayano zenu ngayi Nyambi wambile ngayi, ‘Muli ba nyambi?’ 35Tukulimuka ngayi byatikitiwa byenga bya kupwisha mwaya myaka. Nyambi watumbile baya bantu apanine lizu lyendi ngayi banyambi, 36haya mukwamba nahiti kukwendi ou ahatile Tate na kumutuma mu kaye ngayi uli na ku handula? Haya mu ku mpana nahiti mulandu ngayi nili na ku handula hakwamba ngayi, ‘Nili Mwana Nyambi?’ 37Hinga munkulupila ndi nikubula kutenda milimo eye akushinga Tate ngayi niyitende. 38Ngoboni ndi nikuyitenda, hinge munabulu kunkulupila, kulupilenu milimo ngayi mwanga mulimuke na kukulupila ngayi Tate uli mumwami na nami nili mumwendi.” 39Nohobene bashingile kami kumukwata, ngoboni wapohomokele mu maboko wabo.

40 # Yowa 1:28. Yeshu wayile kami mu nciza ya Yondana kuya azubilishilenga Yowano ha kutatika, niko akekalile. 41Bantu babengi bayile kukwendi, pe bambile ngayi, “Yowano kaliha watendele bikomokesho, ngoboni byuma nimwabyo biya ambile Yowano ha nou muntu, binengi bya kupwisha.” 42Pe bantu babengi kuyo bakulupilile mumwendi.

Pilihan Saat Ini:

Yowano 10: LLK

Sorotan

Berbagi

Salin