Yowano 11

Lufu lwa Lazalo

1 # Luka 10:38-39. Kwekalile muntu umo wakolelenga, lizina lyendi Lazalo waku Mbetani mu munzi wa Maliya na Mata. 2#Yowa 12:3. Ou Maliya niye wayitilile mazi a lukumba ha mawulu a Mwene na kuwakunkumuna na huki zendi. Mpanzendi Lazalo niye wakolele. 3Niho bampanzendi batumine mazu kuli Yeshu na kumutongweza ngayi, “Mwene, muhoni wobe uya wahaka uli na kukola.”

4Oho Yeshu ayuvwile ebye, wambile ngayi, “Ou wulweli kumuziha wufwako, ngoboni wakupana maleema kuli Nyambi, ngayi Mwana Nyambi mwanga ayemeziwe.”

5Yeshu wahakile Mata na mukonzo wendi na Lazalo. 6Ngoboni oho ayuvwile ngayi Lazalo ukukola, wonzele matena abili ku mwanya ekalile. 7Oho aya matena apitile wambile ku bandongesha bendi ngayi, “Tuyenunga tuboke ku Yundeya.”

8Bandongesha bendi bambile kukwendi ngayi, “Mulongeshi, munapiti tuhu shikati shashishe oho Bayunda bashinga kukupuha mamanya, haya niko kami unakushinga kuya ndi?”

9Yeshu wakumbwile ngayi, “Kati mutena kaliha wekala na bikati likumi na bibili ndi? Muntu nimwendi ukwenda ku mwaana, kupukala wufwako, ndaba uku mona lumuni lwa kano kaye. 10Ngoboni muntu nimwendi ukwenda wushiku, ukupukala, ndaba lumuni wufwalwo.” 11Oho amanishile kwamba ebye, niho ambile kukwabo ngayi, “Muhoni wetu Lazalo unalangana tulo, ngoboni nikuya na kumupindula.”

12Bandongesha bendi bambile kukwendi ngayi, “Mwene, ndi nalangana tulo, ukunyongomana.”

13Yeshu watoyelenga bya lufu lwa Lazalo, ngoboni bandongesha bendi bahanganikile ngayi wambilenga bya kulangana tulo twa kukatala. 14Niho Yeshu ambile shintwantwa kukwabo ngayi, “Lazalo unafu, 15pe ndaba yanenu, niku wahilila aha nabula kwikalako, ngayi mwanga mukulupile. Haya tuyenunga kukwendi.”

16Niho Tomashi (ou watumbiwile Mbuyu) ambile ku baminendi bandongesha ngayi, “Tuyenunga na mulongeshi ngayi mwanga tukafwe hamo nendi!”

Yeshu niye ku shanguka na wumi

17Oho Yeshu akumine, wawanine ngayi Lazalo wekalakale matena anaa mu shinzimbi. 18Mbetani hengile hahepi na Yelushalema, mukala ukushinga kulingana makilomita ahatu, 19pe Bayunda babengi bezile kuli Mata na Maliya na kubabengezeka ndaba ya lufu lwa mpanzabo.

20Oho Mata ayuvwile ngayi Yeshu ulinakwiza, wayile na kumushimbawila. Ngoboni Maliya wekalile mu litala. 21Niho Mata ambile kuli Yeshu ngayi, “Mwene, shinga niko wekala kuno, shinga mpanzami kufwa wufwako. 22Ngoboni hinge wuluno nikulimuka ngayi nimwasho ukalomba kuli Nyambi, Nyambi ukakupanasho.”

23Yeshu wambile kukwendi ngayi, “Mpanzobe ukushanguka.”

24Mata wamukumbwile ngayi, “Nikulimuka ngayi ukashanguka ha mutena wa kukotoka.”

25Yeshu wambile kukwendi ngayi, “Ami ku shanguka na wumi. Ou ukukulupila mumwami, ukayoya hinge ndi ukufwa. 26Kami ou ukuyoya hinga akulupila mumwami, kukafwa wufwako. Unakulupili ebye ndi?”

27Wambile kukwendi ngayi, “Ingoi, Mwene, ninakukulupili ngayi obe Kilishitu Mwana Nyambi ou ukeza mu kaye.”

Yeshu ukulila

28Oho Mata amanishile kwamba ebye, wabokele na kwihana mukonzo wendi Maliya na kumuyebetela ngayi, “Mulongeshi unezi, uli na kukwihana.” 29Oho Maliya ayuvwile ebye, wanguwangu wemanine, wayile kuli Yeshu. 30(Hashikati shiyo, Yeshu shilolo akume mu munzi, ngoboni wekalile kuyo Mata amuhanganine.) 31Bayunda baya bekalile mu litala na kubengezeka Maliya, oho bamonene eshe akatukile wanguwangu na kututikila ha munkanda bamukonkele. Bahanganikile ngayi ukuya ku shinzimbi na ku lililako.

32Maliya wakumine haya ha mwanya ekalile Yeshu, oho amumonene, wafunkamine kukwendi hamba ngayi, “Mwene, shinga niko wekala kuno, shinga mpanzami kufwa wufwako.”

33Yeshu wamonene Maliya halila na Bayunda kami baya ezile nabo hibalila, wayenene shikuma mu mutima na kukalikiza. 34Pe wabepwile ngayi, “Kati mwamufunda kuti?” Niho bakumbwile ngayi, “Mwene, yeka umone.” 35Yeshu walilile. 36Bayunda bambile ngayi, “Monenu eshe amuhakile!”

37Ngoboni bamo kukwabo bambile ngayi, “Kati ou muntu kaliha niye watoneshele kashishitwa ndi? Kati shinga kaliha watwesha kumuyavwa ngayi hinga afwa ndi?”

Yeshu ukushangula Lazalo

38Yeshu hinga ayena shikuma, wayile ku shinzimbi. Lyengile linzolongoma lyafwikiwile na limanya.

39Yeshu wambile ngayi, “Fwikululenuko limanya.” Mata, mpanza uya wafwile, wambile ngayi, “Mwene, shikati shino uli na kunuka, ndaba kufuma haya afwile kwapitakale matena anaa.”

40Yeshu wambile kukwendi ngayi, “Kati kaliha na kutongweza ngayi ndi ukukulupila ukamona wuwahe wa Nyambi?” 41Niho bafukulwile limanya ku shinzimbi. Yeshu watilaminine kuyilu, pe wambile ngayi, “Tate, nikukambilila ndaba unanyuvwu. 42Nalimuka ngayi wanyuvwanga shikati nimwasho, ngoboni namba eshe ndaba ya bantu aba banemana, mwanga ba kulupile ngayi obe wantumine.”

43Oho Yeshu ambile ebye, pe wabilikizile na lizu lyalinene ngayi, “Lazalo, fumamo!” 44Mufu wafuminemo, maboko na mawulu wendi amangiwile na makwiza amu shinzimbi na lupala lwendi lwazengiwile na likwiza.

Yeshu wambile kukwabo ngayi, “Mumangululenu, pe mulehenu aye.”

Bihanganiko bya kuziha Yeshu

(Mateo 26:1-5; Mako 14:1-2; Luka 22:1-2)

45Bayunda babengi baya bezile na kuzingula Maliya bamonene ebye Yeshu atendele, pe bamukulupilile. 46Ngoboni bamo bayile na kutongweza Bafwalishi ebye atendele Yeshu. 47Niho bakankombela ba bakulwane na Bafwalishi behanine bakankuta, pe balyambashanine ngayi, “Tukatenda bishini? Ndaba ou muntu ukutenda bikomokesho byabingi. 48Ndi etu kumulehesha tufwako, muntu nimwendi ukamukulupila. Pe Baloma bakeza na kunongesha Litala lya Nyambi na litunga lyetu!”

49Ngoboni umo wabo lizina lyendi Kayafwashi, ou wengile Mukulwane wa Bakankombela Nimwabo mwaka uyo, wambile ngayi, “Enu kulimuka shamina mufwako. 50Kati ku yuvwishisha mufwako ngayi shashiwahe kukwenu muntu umo afwile bantu kupitakana litunga nimwalyo linonge.” 51Kaliha wambile eshe mu shifungo shendi, ngoboni hinga enga Mukulwane wa Bakankombela Nimwabo mu mwaka uyo walubulwile ngayi Yeshu ukafwila mushobo wa Bayunda. 52Kami kaliha nibo tuhu, ngoboni ngayi akungulule bantu ba Nyambi benge umo, baya bapanzanine.

53Kufuma ha mutena uyo bahanganikile mwakuzihila Yeshu. 54Ndaba ya neshe Yeshu walehele kwenda mwaanancanana mukati ka Bayunda. Ngoboni wafumine na kuya ku litunga lyekalile hahepi na libelelengwa, ku munzi watumbiwile Efulemu, niko akekalile na bandongesha bendi.

55Oho Shimbo sha Bayunda sha Kupitilila shekalile hahepi, bantu babengi bafumine ku minzi kuya ku Yelushalema na kutenda shiheka sha kuliyelesha oho Shimbo sha Kupitilila shilolo shitendiwe. 56Bekalile na kushinga Yeshu, pe oho bakungulukile mu Litala lya Nyambi balyambashanine ngayi, “Kati enu mu kuhanganika nahiti? Kati kwiza ku shimbo wufwako ndi?” 57Ngoboni bakulwane ba bakankombela na Bafwalishi batongwezele bantu ngayi nimwendi muntu ukulimuka oku ali Yeshu, abatongweze ngayi bamukwate.

Pilihan Saat Ini:

Yowano 11: LLK

Sorotan

Berbagi

Salin