Lûk 11
11
Jisos o/tángê kyi-kim ne Nshwam efé
(Mátyuu 6:9-13; ne ké7:7-11)
1Nkéré obónge, Jisos o/mû mu o-fâ nshwam ké kyikit kyibónge. Ké nkéré o/man, ḿgbán emen obónge o-sét ǎ o/fu, Otu Kyítá, tángê bě eringe nyí byidakûfé nshwam, wǎ eringe nyí Jǒn o/mû o/tángê bǎmgbán emen.
2Jisos o-sét kámbé o/fu, kû n̂g efé nshwam něen, ba/fu,
Kyítá,
kyi/bát dyizîn eyên ńdyí dyinong dyikyú ne ofê,
kyi/bát Butu eyên bubyí kyíjí wááng.
3Kû bě ekye byiryíng ḿbyí byimu byi-ryuu ng kángkáng dyicí.
4Pwoo bě byibî eten,
ké ebóng, be byimu byi-pwoo ng nang yeě nang yeě mú o/chi bě byibî.
*Da bě emîng byi-nung ké okan*.
5Ne Jisos o-raa ne bǎmgbán emen o/fu, â onet obónge ké burwám enen o/dim o-ca ké kyise-ocín emen ne kyirê-buchú o-da-kíbî ǎ dyifyi o/fu, ocín, pwoo mě byirim-berêt byichât. 6Ocín ejí obónge mú mu ké bukwóp-bucen oo/ribi kántîk ké kyise ejí, nké nang onyin-byiryíng mú nda ǎ ekye o*fí*. 7Â ocín eyên ámu o/waa ké kafâ-kyise o-faa ǒ o/fu, *da mě ekye afaníkong* nn/fín dyifyi, me ne bwǎn ejí bii/rí sáre. Mm*man to ebûu nensang n-kye ǒ nang chwǒm*.
8Jisos o/fu, me mu n-sét ng běn ké ntûntû n/fu, nang o/mû oo*ba/chi o-bûu nensang o-kye ǒ berêt ámu* ké bubwô ḿbú nyǐ mu ocín eyên* o-man o-bûu o-kye ǒ kángkáng byěm ḿbyí amu a-ryuu ng, ké nǎ, wo a*fí a-mîng ng ǎ dyifyi ekíbî*.
9Jisos o/chîraa o-ca kashú o/fu, me mu n-sét ng běn kâng n/fu, bí ne a/chi a-koo. Kyé, ne a/chi a-já. Murung, ne dyifyi dyi/chi dyi-bâa dyi-tî ǒ. 10Ké ebóng, nang yeě nké o/bí, o/chi o-koo. Nang yeě nké o/kyé, o/chi o-já. Nang yeě to nké o/kíbî ké dyifyi, dyi/chi dyi-bâa dyi-tî ǎ. 11Ben mú bamu banchí-bwǎn, onet mu kô ké burwám enen mú â wǎn eyên o/bí o/fu, wo akye ǎ kakworê, a-yip efyi a-kye ǎ dí. 12Nang o/bí to o/fu, wo akye ǎ dyícě-ekwa, a-yip ng onang a-kye ǎ dí. 13Â ben mú ba*fí ba-nwa ng* bamu ba-nyît ng byěm ḿbyí byinong ḿbyí badakye bwǎn enen, kyi-cen n nǎ kâng ne Bonchí enen mú mu kyíbóng oo*kye nang yeě mú mu o-bí ng o/fu, okye ǎ Busun-Osówo*.
Jisos ne Bézíbul
(Mátyuu 12:22-30; Mâk 3:20-27)
14Jisos o/mû mu o-ró ng kyibî-bucí ńkyí kyi/chi onyinchéng obónge o*fí o-man n eraa*. Ké nkéré kyibî-bucí ánkyi kii/byí ǎ ké byiko, onyinchéng ámu o-kpet eman eraa. Bujê-banet ḿbé ba/mû ányi ba-waa ocím ké dyishí fúú. 15Nké kyicê-banet kyikíri kyi/fu, Otu-Byibî-Barím mú odabángê Bézíbul nké mu o-kyâ ǎ busa ámbu ḿbú mu o-ró ng bací ámbe o-twóp ng kyíjí.
16Bakíri ba/mû mbe ba-ryuu ng ba/fu, mbé ba-kan n Jisos, ne ba-bí ǎ kâng ba/fu, ochi akat abónge nyí a/chi a-tông a/fu, nyǐ o-chi i onet mú Osówo o/kúng ǎ butu. 17Nké Jisos o/nyît okabe ebe ne o-raa ne mbé o/fu, oshê nang orá nké o/pap, o-kyii ké byikim ké byikim, ḿbyí mbyi byi-nwa ng ne barî, oshê ámu o/chi o-róng. Nang kyikû-dyibóng to nké kyi/pap kyi-kpet enwa ne barî kii*ba/chi kyi-bwom*. 18Â butu ḿbú Sátan bu/pap ké byikim ké byikim ḿbyí mbyi byi-nwa ng ne barî, butu emen bu-cen n nǎ ne bu-bwom. Ben bamu ba-raa ng ba/fu, me mu n-ró ng byibî-bací, ké nǎ, Bézíbul nké mu o-kyâ mě busa ḿbú mu n-chi i éné. 19Â busa ḿbú me mu n-ró ng byibî-bací bu/fím ne Bézíbul, aa ḿbú banet ḿbé enen mbe ba-ró ng byibî-bací bu/fím nyá. Banet enen nké ba/chi ba-sét běn ba/fu, ben baa/róng. 20Nké â me ké ntûntû ké busa ḿbú Osówo nké mu n-ró ng byibî-bací, ńkyín kyi/tông kyi/fu, Butu ḿbú Osówo boo/ribi bu-kâm běn.
21Â okân-onet o/bwom ne byěm-bunwa emen kángkáng mu o-bám m kyise emen, byěm emen byi-kyú u kerededet. 22Nké â onet mú mu o-shwane e o-shwôm ǎ o/ba ǎ ekye bunwa o-kpógê ǎ, o-wuri ng kángkáng byěm-bunwa ḿbyí byi/mû byi-chwáp ng oyén-kyise ámu, o-kyii to kángkáng byěm emen ḿbyí o/mû o/bam o-koo ne banet bakíri.
23Nang yeě nké o*fí ne me* ké ntûntû, o-chi i onet-ociring ejí. Nang yeě nké o*fí o-chwáp ng mě m-kpaa n-tî kyikit kyibónge* onet ámu ké ntûntû, mu o-byiryi ng obyiryíng.
Mbwa Esim mú Kyibî-Bucí
(Mátyuu 12:43-45)
24Â kyibî-bucí kyi/byí onet ké enyam-byiko, kyi-cen n ké biǐjúnjwóm-byikit, kyi-kyé ng kyikit ńkyí kyidakyú kyi-jáng. Â bucí ámbu bu/kyé kyikit bu*da/ri* bu-raa ne byiko emen bu/fu, n/chi m-bwa esim ké kyise ejí ńkyí n/dim m-mîng. 25Ne bu-bwa esim kâng bu-ba-ri ké baa/jwoo kyise ánkyi kpárádádát ba-nap byěm ba-tî kerededet. 26Bu-byí kâng kyíjí bu-da-kpî bábe-byibî-bací káchâtkányi bakíri ḿbé ba/bên atyém ba-shwôm kámbú. Bací ámbe ashí amúmú ba-ba-nung ba-kyú ké kyise ánkyi. Nkuli kyikû-dyikpen ńdyí onet ámu dyi/chi dyi-bên dyi-shwôm nkéré mú nyǐ o/mû kpákpá.
Bunyîn-Dyityém ḿbú Ntûntû
27Ké nkéré Jisos oo/raa ńkyín, onyinyi obónge mú o/mû ké burwám-banet ámbe o-raa ne nyǐ o/fu, bunyîn-dyityém mbu ne onyinyi mú o/fwon ǒ, ne o-nen ǒ a-kán.
28Nké Jisos o/faa o/fu, nkyi éné, nké bunyîn-dyityém mbu chwóó to ne banet ḿbé mbe ba-jwo ng byiraa-Osówo, ne ba-chi i to eringe nyí byi/sét.
Ba/bí Jisos ba/fu, ochi Akat
(Mátyuu 12:38-42)
29Ké nkéré mú banet mbe ba-cít ng Jisos ba-câ byicê byimúmú, nyǐ o/chîraa o-ca kashú o/fu, bwǎn-bafî ba/bên kanong kanong. Mbé mbe ba-bí ng mě ba/fu, me nchi akat n-tông kámbé. Nké akat akíri a*fí nyí n/chi n-tông kámbé* kyi-cibi ne akat nyí Jóna*. 30Eringe nyí bǎmpém ḿbé Jóna o/pem ba/mû ekap nyí banet ḿbé oshê mú badakó Nyínyíve, éné to nké bǎmpém ḿbé Wǎn-Onet o/chi o-pem ba/chi ba-kyú ekap nyí bwǎn-bafî. 31Ké Dyicí-Mpan ándyi, onyinyi mú o/mû o/ryí butu, mú o/fím ké kyicê ńkyí busyísen o/chi o-bwom o-pan běn ben bwǎn-bafî mpan, ké nǎ, nyǐ o/fím oshê mú tíbítíbí o-bâ o/fu, nyǐ o-bâ ng ejwo byiraa ḿbyí Otu Sólómon mú o/mû ne bubong o/mû o-sét ng. Nké me mu n-sét ng běn ké ntûntû n/fu, onet mu nyín kántîk mú o/shwôm Otu Sólómon. 32Ké Dyicí-Mpan ándyi to, banet ḿbé Nyínyíve ba/chi ba-bwom ba-pan běn mpan, ké ebóng, byiko byi/kpú kámbé ba-mîng byibî ḿbyí ba/mû ba-chi i, ké nkéré mbé ba/jwo bǎmpém ḿbé Jóna. Nké me mu n-sét ng běn ké ntûntû n/fu, onet mu nyín kántîk mú o/shwôm Jóna.
Kiinwángé ńkyí Enyam-Byiko
(Mátyuu 5:15; ne ké6:22-23)
33Onet o*fí mú odamee otyuryíkáng o-yip kámú o-rôo* o-bwa o-yip nang dyicáng o-cít kámú*. Nké o-tî ng kámú ké kyikit ńkyí mbe ba-tî ng otyuryíkáng, eringe nyí â banet ba-kú ba-nung ng ké kyise, badari kiǐfáng. 34Achi eyên a-chi i otyuryíkáng mú enyam-byiko eyên. Â achi eyên nyi kanong, enyam-byiko eyên kángkáng e-kyú u ne kiinwángé. Nké â achi eyên a*fí kanong* enyam-byiko eyên kángkáng e-kyú u ké kyifip. 35Bám m̂ byiko enen kâng, eringe nyí kiinwángé ńkyí nkyi běn ké byiko kii*firi kyifip*. 36Â enyam-byiko eyên kángkáng e/firi ne kiinwángé ńkyí kyipang-enyam-byiko eyên nang kyibónge kyi*fí ké kyifip* enyam-byiko eyên e-san n byikit byimúmú, wǎ eringe nyí busan-otyuryíkáng buda ǒ esan ké byiko.
Jisos o/bîn Banet-Ncibi mú badakó Fárasyî ne Bantánge Byije-Músis
(Mátyuu 23:1-36; Mâk 12:38-40)
37Ké nkéré Jisos o/man byiraa ḿbyí mu o-raa ng, onet-ncibi mú badakó Fárasyî obónge o/kó ǎ o/fu, oda-ryí byiryíng ne nyǐ ké kyise emen. Ne Jisos o-dim kâng o-da-nung o-kyú me, o-kpet byiryíng eryí. 38Kyi/chi onet-Fárasyî ámu wǎ chwǒm-akat, ńkyí o/ri Jisos o*da/soo abwô ne o-kpet byiryíng eryí*. 39Otu Kyítá o-raa kâng ne nyǐ o/fu, ben kántîk kâng, ǎ banet-Fárasyî, bamu ba-soo ng esim-mmîk ne dyicáng nyí kyíjí. Nké kafâ enen kaa/sú ne kángkáng byibî-byěm. 40Enyam-banet, *chí Osówo obónge mú o/chi ńkyí nkyi kyíjí nké o/chi to ńkyí nkyi ké kafâ dí*. 41Nké fîm m̂ ḿbyí mbyi ké kafâ-bammîk ne acáng enen ba-kye banet-byikpu, ne kángkáng byěm byi/chi byi-firi běn kpárádádát.
42Kyi/bên kanong kanong ne ben banet-Fárasyî. Ben bamu ba-kyii ng byidóng-kasu wǎ eyím ne ashí-ose ne kángkáng byidóng-kasu byikíri ké byikit diǐkpú, ba-kye Osówo kyikit kyibónge, nké ben bamu ba-né ng kanong echi ne kyijé-Osówo etông. Ben ba/mû ba/chi ba-kûchi ḿbyín ba-cibi ne ḿbyí áku.
43Kyi/bên kanong kanong ne ben banet-Fárasyî. Ben bamu ba-ryuu ng byichí-ofê ké byise-ékwâbashi ḿbyí banet-Jûs, ba-ryuu ng ba/fu, bakû běn eta to kyiraa ne ofê ké bǎntím-busî. 44Kyi/bên kanong kanong ne ben banet-Fárasyî. Ben bamu wǎ akun nyí a*fí a-rángê e kyíjí wááng* nyí banet mbe ba-cen n ké nyǐ ba*fí ba-nyît ng*.
45Ntánge Byije-Músis obónge o-raa ne nyǐ o/fu, ntánge byiraa-Osówo, ńkyí amu a-raa ng něen, amu a-shú u bě to.
46Jisos o-faa o/fu, kyi/bên kanong kanong ne ben to bantánge Byije-Músis. Ben bamu ba-yip ng atû nyí aa*nwa etû* ba-tû ng banet, nké ben bayén baa*yip nang kafwa enen ba-chwáp kámbé atû ányi etû*. 47Kyi/bên kanong kanong ne ben. Ben bamu ba-kwa ng akun nyí bachíchí-bamkpábé ḿbé ba/mû ba-sét ng byiraa-Osówo, ḿbé banchí enen ḿbé kpákpá ba/ju. 48Ben bayén ba-kú ba-tông ng kâng ekap wááng ba/fu, ńkyí banchí enen ba/chi nkyi kyi-nyîn n běn, ké ebóng, mbé nké ba/ju bamkpábé ámbe, ne ben bamu ba-kwa ng akun ebe. 49Ké bubwô ḿbún, ba/sáng ké nwet mú badakó Byinyídíng-Osówo ba/fu, Osówo o/fu, n/chi n-twóm kámbé bamkpábé ḿbé badasét byiraa ejí, ne banet-byitwóm ejí. Mbé ba/chi ba-ju kyicê, ba-kye kyicê busông. 50Osówo o/chi o-kye banet ḿbé kyikim-nkéré ńkyí kántîk busông ké bubwô ḿbú bamkpábé ḿbé badasét byiraa-Osówo, ḿbé baa/ju, kyi-fím ké nkéré mú Osówo o/chi ejíí. 51Kyi-fím ké nkéré mú ba/ju Ébel tete kyi-ribi ké nkéré mú ba/ju Zákaryâ mú ba/ju ǎ ké otyém ne otyém mú kyikit ńkyí mbe ba-chi i kyifen-Osówo ne kiǐtí-kyise-kyifen-Osówo echi. Nkyi éné, me mu n-sét ng běn ké ntûntû n/fu, Osówo o/chi o-kye banet ḿbé kyikim-nkéré ńkyín busông ké ashí ebe kángkáng.
52Kyi/bên kanong kanong ne ben bantánge Byije-Músis. Ben baa/yip agbókóró nyí badakuu kyise ńkyí banet badakwâa ba-jwo kyikû-ejá-Osówo nyí ba/sáng kyísí, ba-tî kú. Ben bayén baa*ba/chi ba-nung ké nkyí* ne ba/bwa bamu ba-ku ng to banet ḿbé mbe ba-kan n ba/fu, mbé ba-nung ng ké nkyí.
53Ké nkéré mú Jisos o-kú o-byí i ké kyise ńkyí ba/mû ba/kó ǎ ba/fu, oda-ryí byiryíng, banet-Fárasyî ne bantánge Byije-Músis ba-kpet eshwôn ne nyǐ, ba-bí ng ǎ bǎmbím ké byěm chwóó, 54ba-kan n ba/fu, mbé ba-chi i ǎ o-róng ké ocím, mbé ba-kám ǎ ké kyibî-kyiraa ńkyí o/chi o-raa.
Pilihan Saat Ini:
Lûk 11: BKY
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Published by the Bible Society of Nigeria @ 1985
