Lûk 10
10
Jisos o/twóm Bajam-Bǎmgbán Emen Bachât Esim Diǐkpú ne Afee
1Ké nkéré Otu Kyítá oo/raa byiraa ḿbyín, o/fîm bǎmgbán emen bakíri ashí bajam bachât esim diǐkpú ne bafee. O-twóm kámbé ashí afee afee o/fu, babwóp ǎ kashú ba-ca ké kángkáng eshê ne ké kángkáng byikit ḿbyí nyǐ oyén oo/kpá byiko o/fu, nyǐ o/chi o-ca. 2O-sét kámbé o/fu, byiryíng byi/jê ḿbyí badafuu, nké banet ḿbé badafuu kámbyí ba*da/jê*. Fé n̂g nshwam kâng ba-kye oyén-byiryíng efuu, eringe nyí odatwóm banet-bǎmkpóngé ba-ba-fuu byiryíng emen. 3Ca n̂g, me mu n-twóm m běn wǎ bwǎn-ebû ḿbé mbe ké burwám ne ekpang. 4*Da n̂g echi ba-yip kaambam ńké badafé akpuga* nang kiimbam ńkyí badarém akpuga* nang abe*. *Da n̂g echi ba-bwom ké bukwóp ba/fu, ba-ta ng onet kyiraa*. 5Nang ebóng kyise nké ba/nung, bwóp n̂g kpá kashú ba-fu, bunyîn-dyityém bukyú ne banet ḿbé mbe ké kyise ńkyín. 6Â onet mú mu o-ryuu ng bunyîn-dyityém mu ké kyise ánkyi, bunyîn-dyityém enen bu/chi bu-kyú ne nyǐ. Nké â o*fí* bu/chi bu-bwa esim bu-kâm běn ben bayén. 7Kyú n̂g ké kyise ánkyi kyibónge, ba-ryí i nang ebóng chwǒm ńkyí ba/kye běn, ké ebóng, onet-bǎmkpóngé ba-kpêe ng ǎ akpuga emen. *Da n̂g echi ba-kûnung ké byise ba-byí i*. 8Â ba/nung ké oshê, nké banet ba/koo běn kanong, ryí n̂g nang ebóng chwǒm ńkyí ba/kye běn. 9Chi n̂g banet ḿbé mbe ba-rwôm m ké oshê ámu erwôm ebe e-man. Ba-sét banet ḿbé mbe ké oshê ámu ba/fu, Butu ḿbú Osówo bu/firi běn fáráng. 10Nké â ba/nung ké oshê mú banet ba*da běn ekoo kanong* cen n̂ ké byiká-oshê ebe ba-sét kámbé ba/fu, 11nang ecing-oshê enen nyí e/lák bě ké byiká, byi-pâ ng kányí byi-pwó běn wǎ ekó ekuri. Nké zîim m̂ ńkyín ba/fu, Butu ḿbú Osówo bu/firi běn fáráng. 12Me mu n-sét ng běn ntûntû n/fu, ké Dyicí-Mpan, Osówo o/chi o-ri banet ḿbé Sódom bafip o-shwôm banet-oshê ámu.
Eshê nyí e*da/bángê ne Jisos*
(Mátyuu 11:20-24)
13Jisos o-raa o/fu, kyi/chi kyi-bên kanong kanong ne ben mú bamu ké Korázin. Kyi/chi kyi-bên to kanong kanong ne ben mú bamu ké Bét-Sáda. Ké ebóng, â akat nyí me nn/chi ké eshê ńnyín, nké m/mû n/chi kányí ké Táya ne Sádon, kyi/mû kii*bwon ne banet ebe ba-kpet ebwá ekâa-byídí* ba-pwó atông ké byiko* ba-tông ba/fu, byiko bii/kpú kámbé* ba-mîng byibî echi*. 14Nké ké Dyicí-Mpan, Osówo o/chi o-ri banet ḿbé Táya ne Sádon bafip o-shwôm běn ben. 15Wo to kâng, ǎ oshê mú badakó Kapánum. Wo a/mû a-kú a-bâ eyip byiko eyên a-jâ kyíbóng? Osówo o/chi o-twóp ǒ ké kyikit-busông eri.
16Ne Jisos o-raa ne bǎmgbán emen o/fu, nang yeě nké o/fwôo atông o-jwo běn, onet ámu mu o-jwo ng mě to. Nang yeě nké o/né běn, o/né mě to. Nké nang yeě nké o/né mě, o/né to nyǐ mú o/twóm mě.
Bǎmgbán-Jisos ḿbé o/twóm Ashí Bajam Bachât Esim Diǐkpú ne Afee ba/fím ba-fyi
17Bǎmgbán-Jisos ámbe ashí bajam bachât esim diǐkpú ne afee ba-fím ba-fyi ne bunyîn-dyityém chwóó. Ba-sét Jisos ba/fu, Otu Kyítá, nang byibî-bací byi/mû mbyi byi-kyâ bě ofê ké nkéré mú be byi/nyán kámbyí ké dyizîn eyên.
18Jisos o-faa kámbé o/fu, me n/ri Sátan o/zûu kyíbóng o-ba-róng kyísí wǎ eringe nyí kasabang kadaróng. 19Fwôo n̂g atông ba-jwo. Me nn/kye běn busa, eringe nyí ben badacím efyi ne enang ne kángkáng busa ḿbú banet-ociring, nang chwǒm kii*chi běn*. 20Nké *da n̂g echi ba-jêe* ké ebóng, byibî-bací mbyi byi-kyâ běn ofê*. Nké jêe n̂g, ké ebóng, baa/sáng azîn enen kyíbóng.
Jisos o/jêe
(Mátyuu 11:25-27; ne ké13:16-17)
21Ké nkéré ámu, Busun-Osówo bu/chi Jisos o-firi ké bunyîn-dyityém, ne o-raa o/fu, Kyítá, wo mú amu oyén-bubóng ne esí. Me n/kó ǒ asǎma, ké ebóng, wo aa/yip ńkyí wo a/rôo ké bushú ḿbú banet ḿbé mbe ba-nyît ng byinyídíng ne ḿbé ba/kwâa byěm a-tông banet ḿbé ba*fí ba-nyît ng chwǒm*. Nkyi éné, ǎ Kyítá, wo a/chi ńkyín ké okabe mú eyên ne bunyîn-dyityém eyên.
22Bonchí ejí oo/kye mě kángkáng byěm. Onet o*fí mú mu o-nyît ng eringe nyí me mu* kyi-cibi ne Bonchí ejí*. Onet to o*fí mú mu o-nyît ng eringe nyí Bonchí ejí mu* kyi-cibi ne me* ne kyi-cibi to ne banet ḿbé me mu n-ryuu ng n/fu, me n-chi i kámbé ba-nyît ǎ*.
23Jisos o-pín kâng o-raa ne bǎmgbán emen kyísí kyísí o/fu, dyishí dyi/nwa běn! ńdyí baa/ri byěm ḿbyí bamu ba-ri ng něen. 24Me mu n-sét ng běn ké ntûntû n/fu, bamkpábé chwóó ḿbé badasét byiraa-Osówo ne batu to chwóó ba/mû mbe ba-ryuu ng ba/fu, mbé ba-ri ng byěm ḿbyí ben bamu ba-ri ng něen, nké ba*da/man eri*. Ba/fu to, mbé ba-jwo ng byiraa ḿbyí ben bamu ba-jwo ng něen, nké ba*da/man ejwo*.
Dyitím-Ekan kyi-kim ne Onet-Samérya mú o/cángê Dyityém
25Ne ntánge Byije-Músis obónge o-byí o-bâ, o/fu, nyǐ o-kan n Jisos nyǐ o-ri. Ne o-bí Jisos o/fu, ntánge byiraa-Osówo, me n-chi i nǎ ne n-já dyikpen ńdyí ne banyá.
26Jisos o-faa ǎ o/fu, ejá-Osówo nyí ba/sáng kyísí e/fu nǎ. Kyikû emen kyi/byí nǎ.
27Onyinchéng ámu o-faa ǎ o/fu, Osówo Óburúkpâbí o-man o-jê ǒ ne dyityém eyên kángkáng ne busun eyên kángkáng ne busa eyên kángkáng ne okabe eyên kángkáng. Ne orî-onet to o-man o-jê ǒ, wǎ eringe nyí enyam-byiko eyên nyi e-jê ng ǒ.
28Jisos o-raa o/fu, a/man efaa. Kûchi éné ne a/chi a-kpen.
29Nké ntánge Byije-Músis ámu o/mû mu o-ryuu ng o/fu, nyǐ o-tông ng o/fu, nyǐ o/man ebí kyiraa ánkyi, ne o-waa ányi o-bí Jisos o/fu, yeě mu orî-onet ejí. 30Ne Jisos o-faa ǎ o/fu, nkéré obónge, onyinchéng obónge o/fím ké oshê mú badakó Jerúsélem mu o-wâa ng oshê mú badakó Jéríku. Banet-kajii ba-ba-kâm ǎ ké bukwóp. Ba-bam ǎ byěm ba-koo. Ba-mín ǎ o-jwâa, o-firi wǎ oo/kpú. Ba-mîng ǎ ányi ba-dim. 31Nchi kyifen-Osówo obónge mú banet-Jûs o/mû mu o-wâa ng bukwóp ámbu to. O-ba-ri onyinchéng ámu, o-pyángê ké bukô o-shwôm. 32Ḿgbán-nchi kyifen-Osówo to obónge mú banet-Jûs o/mû mu o-bâ to ké bukwóp ámbu. O-ba-ri to onyinchéng ámu, o-pyángê to ké bukô o-shwôm. 33Nké ocinónet obónge kâng mú o/fím oshê mú badakó Samérya, mú o/mû mu o-bâ to ké bukwóp ámbu o/bari onyinchéng ámu byiko byi-kpú ǎ ne nyǐ. 34O-da-jebe ǎ o-ri. O-fé ǎ bukye ké byibáp. O-ta bakút o-sabe ǎ ké mbyí, o-bwá. O-yip ǎ o-twôom kyíbóng-kaanyam-atû emen. O-dim ne nyǐ ké kyikit ńkyí mbe ba-shee ng byiryíng, o-nen ǎ. 35Ké orî-dyicí, onyinchéng ámu o-fîm akpuga o-kye nshee byiryíng ámu. O-sét ǎ o/fu, kû ǎ etún. Ké nkéré mm/bwa esim, n/chi n-só ǒ nang ebóng chwǒm ńkyí a/bên ké dyishí emen.
36Ne ké nkuli kyikû, Jisos o-bí ntánge Byije-Músis ámu o/fu, ké okabe mú eyên, banet ámbe ashí achât, orá mú o/tông onyinchéng ámu mú ba/mín ǎ éné o/fu, mbé ba/fím ne barî.
37Mú ntánge Byije-Músis ámu o-faa o/fu, onet mú o/cángê dyityém ne nyǐ.
Jisos o-sét ǎ o/fu, wo ca to kâng a-kûchi éné.
Jisos o/dari Máta ne Méryi
38Ké nkéré mú Jisos ne bǎmgbán emen mbe ba-cen n ba-câ, ba/daribi ké oshê obónge. Onyinyi obónge mú odabángê Máta, mú mu ké oshê ámu, o-kó Jisos o/fu, oca ké kyise emen. 39Onyinyi ámu o/mû ne wǎn-boné mú onyinyi mú odabángê Méryi, mú o/kyú me kyísí ké byiká-Jisos, o-fwôo atông o-jwo byiraa ḿbyí Jisos o/mû o-tángê e. 40Máta o-kpet esa kafâ ké bǎmkpóngé ḿbé nyǐ mu o-chi i kǎnchí. Ne o-dim kâng o-ba-raa ne Jisos o/fu, Otu Kyítá wo a*fí a-kérê ng a/fu, wǎn-boné ejí oo/mîng mě ne kángkáng bǎmkpóngé o/fu, me nchi kǎnchí*? Sét ǎ o-ba-chwáp mě.
41Otu Kyítá o-faa ǎ o/fu, Máta, wo amu a-jang ng ekye byiko eyên afaníkong ké byěm chwóó. 42Nké chwǒm kyibónge nké nkyi kiǐtí. Méryi oo/fîm ochíchí-chwǒm ánkyi. Ne baa*ba/chi ba-koo ǎ kánkyí*.
Pilihan Saat Ini:
Lûk 10: BKY
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Published by the Bible Society of Nigeria @ 1985
