Luke 7
7
Ɔhamupanyin N’akowaa N’ayarsa
(Matthew 8.5-13)
1Na owiee ne nsɛm no nyina ka wɔ nkorɔfo no asomu no, ɔkɛhɛɛn Karpernaum.
2Nna asogyafo do ɔhamupanyin bi n’akowaa a ɔsom no bo kɛse yar ma ɔreyɛ ewu. 3Na ɔtsee Jesus ne nka no, ɔsomaa Jewfo mpanyin bi wɔ no hɔ kɛserɛɛ no dɛ ɔmbra mbɛgye n’akowaa no nkwa. 4Na wɔbaa Jesus nkyɛn no wɔserɛɛ no enyiberdo see dɛ, Ɔsɛ dɛ ebɛyɛ dɛm adze yi ma no: 5osiandɛ ɔdɔ hɛn man, na ɔnoara na osii hɛn nhyiamudan yi. 6Na Jesus nye hɔn kɔree. Na ɔrebɛn fie no ho no, ɔhamupanyin no somaa n’anyɛnkofo bi wɔ no hɔ kɛsee no dɛ, Mo wura, mma nnhaw woho: na mennsɛ dɛ ebɛhɛn me hatsɛw ase; 7iyi ntsi na memmbu moho dɛ mesɛ dɛ meba wo nkyɛn no; dɛm ntsi ɔwo kasa ara, na m’akowaa no bɛtse apɔw. 8Na mo so meyɛ nyimpa a wɔdze me ahyɛ tum ase, na mowɔ nsordaafo wɔ m’ase, na mese yi dɛ, Kɔ a, ɔkɔ; na mese obi so, Bra a, ɔba, na mese m’akowaa dɛ, Yɛ yi a, ɔyɛ. 9Na Jesus tsee yinom no, no ho yɛɛ no nwanwa, na ɔsee nyimpadodow a wodzi n’ekyir no dɛ, Mese hom dɛ, Israel mu mpo munnhun gyedzi a ɔtse dɛm yi bi pɛn. 10Na hɔn a wɔsomaa hɔn no sanee kɔr fie kohun akowaa no dɛ no ho ayɛ no dzen.
Jesus Nyaan Okunafo bi ne Ba
11Na ɔbaa dɛ annkyɛr biara na ɔkɔr kurow bi a wɔfrɛ no Nain mu; na n’esuafo no nye nyimpadodow pii nye no kɔree. 12Na ɔbɛɛn kurow no n’abobow ekyir no, nna wɔso bi a oewu a ɔyɛ ne na ne ba kortsee, rupue, na ɔbaa no yɛ okunafo; na nyimpadodow pii fi kurow no mu ka no ho. 13Na Ewuradze hun basia no, ne yamu hyehyee no maa no, na ɔsee no dɛ, Mma nnsu. 14Na ɔdze ne nsa kɛkaa fundaka no, na hɔn a wɔso no no gyinae; Na ɔsee dɛ, Aberantsɛ, mese wo dɛ, Soɛr. 15Na nyia oewu no soɛree, na ɔhyɛɛ ase kasae. Na ɔdze no hyɛɛ ne na nsa. 16Na hu kaa hɔn nyina; na wɔhyɛɛ Nyankopɔn enyimnyam see dɛ, Nkɔnhyɛnyi kɛse asoɛr wɔ hɛn mu, na, Nyankopɔn abɔhwɛ ne man. 17Na no ho asɛm tahyee Judea nyina, nye asaase a etwa ho ehyia nyina mu.
John Onumanyi no N’asomafo
(Matthew 11.2-19)
18Na John n’esuafo kɛkaa yinom nyina ho asɛm kyerɛɛ no. 19Na John frɛɛ n’esuafo mu beenu, na ɔsomaa hɔn Ewuradze hɔ kebisaa no dɛ, Ana ɔwo nye nyia ɔreba no, anaa yɛrotweɔn obi so? 20Na mbarimba no baa ne nkyɛn no, wɔsee dɛ, John Onumanyi no asoma hɛn wo hɔ dɛ, Ana ɔwo nye nyia ɔreba no, anaa yɛrotweɔn obi so? 21Na dɔnhwer kor no ara mu ɔsaa dodowara hɔn nyarba, na oyii hɔn haw nye esunsum fi fii hɔn do, na ɔmaa enyifurafo pii hun adze. 22#Isa 35.5, 6; Isa 61.1 Na obuaa hɔn dɛ, Hom nkɔ nkɛka dza hom ehu na hom atse yi nkyerɛ John, dɛ enyifurafo hu adze, mbubuafo nantsew, akwatafo ho san, etsitsifo tse asɛm, ewufo nyan, na wɔka asɛmpa kyerɛ ehiafo. 23Na nyia mennkɛyɛ no fintsidua no, nhyira aka no.
24Na John n’abɔfoe no kɔree no, ɔhyɛɛ ase bisaa nyimpadodow no wɔ John ho dɛ, Ebɛnadze na hom kɔr sar no do kɔhwɛe? Ndzɛmbir a mframa rihim no a? 25Na ebɛnadze na hom puei kɔhwɛe? Nyimpa a ofura tam papa a? Hwɛ, hɔn a wofura atam hyerɛpɛɛ, na wɔyɛ anomu dɛw no, wɔwɔ ahemfie. 26Na ebɛnadze na hom puei kɔhwɛe? Nkɔnhyɛnyi a? Nyew, mese hom dɛ, nyia ɔkyɛn nkɔnhyɛnyi mpo a. 27#Mal 3.1 Oyi nye nyia wɔakyerɛw no ho dɛ,
Hwɛ, morosoma mo bɔfoe ma oeedzi w’enyim kan a
Obesiesie wo kwan edzi w’enyim.
28 Mese hom dɛ, hɔn a mbaa awo hɔn nyina mu biara mmpuei a ɔyɛ kɛse kyɛn John: naaso nyia ɔyɛ aketseaba koraa wɔ sor ahenman no mu no yɛ kɛse kyɛn no. 29#Mat 21.32; Luk 3.12 (Na nkorɔfo a wɔtsee nyina nye atowgyefo no, gyee Nyankopɔn no ndwuma no too mu na wɔdze John n’enuma no numaa hɔn. 30Naaso Farisiifo nye mbrakyerɛfo no dze, wɔpoow Nyankopɔn n’apam maa hɔnho, osiandɛ wɔamma oennuma hɔn.)
31Dɛm ntsi ɔsee dɛ, Ebɛnadze na medze ndɛ mber yi mu nyimpa bɔto ho, na wɔtse dɛ ebɛnadze mpo? 32Wɔtse dɛ mbofraba a wɔtsenatsena gua do, na wɔrefrɛfrɛ hɔnho se dɛ,
Yɛahɛn atɛntɛbɛn ama hom, na hom annsaw;
yeetwa ewuo na hom ennsu.
33 John Onumanyi no aba, onndzidzi, ɔnnom nsa, na hom se dɛ, Ɔwɔ sunsum bɔn. 34Nyimpa Ba no aba, odzidzi na ɔnom, na hom se dɛ, Hwɛ, nyimpa tumfur, nsahweam, atowgyefo nye ndzebɔnyɛfo nyɛnko! 35Naaso nyansa ne mba bu no bem.
Ɔbaa no a Ɔdze no Nyinsuwa Hohoor Jesus N’anan ho no
36Na Farisiifo no mu kor serɛɛ no dɛ ɔnye no nkedzidzi, na ɔkɔr Farisiinyi no ne fie kɛtsenaa edziban ho. 37#Mat 26.7; Mar 14.3; Joh 12.3 Na ɔbaa bi a ɔwɔ kurow no mu a ɔyɛ dzebɔnyɛnyi; tsee dɛ oridzidzi wɔ Farisiinyi no ne fie no, ɔdze ngohuam alabasta toaba ma bae, 38na obegyinaa n’ekyir wɔ n’anan ho sui, na ɔhyɛɛ ase dze ne nyinsuwa fɔɔw n’anan ho, na ɔdze ne tsinhwi pepae, na ɔfeew n’anan ho, na ɔdze ngohuam seraa ho. 39Na Farisiinyi a ohyiaa no edzidzi no hunii no, ɔkae wɔ ne tsirmu dɛ, Sɛ oyi yɛ nkɔnhyɛnyi a, nkyɛ obohu onyia kor a, anaa ɔbaa kor a ɔdze ne nsa aka no yi, dɛ ɔyɛ dzebɔnyɛnyi. 40Na Jesus buae see no dɛ, Simon, mowɔ asɛm bi ka kyerɛ wo. Na ɔsee dɛ, Kyerɛkyerɛfo, ka. 41Bosabɔnyi bi wɔ akafo beenu: baako dze sika denare ahaenum, baako so dze eduonum. 42Na wonnya bi nntua no, ɔdze kyɛɛ hɔn beenu nyina kwa. Dɛm ntsi hɔn mu woana bɔdɔ no dodow? 43Simon buae see dɛ, Mususu dɛ, nyia ɔdze dodow kyɛɛ no no a. Na ɔsee no dɛ, Ebua atsɛn pa. 44Na ɔdaan n’enyiwa wɔ ɔbaa no do see Simon dɛ, Ehu ɔbaa yi? Mebaa wo fie no, ɔwo amma me me nan ho nsu; naaso ɔnodze, ɔdze ne nyinsuwa afɔw me nan ho, na ɔdze ne tsinhwi apepa. 45Ɔwo ammfew m’ano, naaso ɔno dze, ofitsi dɛ mebaa ha yi, onngyaa me nan ho few. 46Ɔwo ammfa ngo annsera me tsirmu, naaso ɔno dze, ɔdze ngohuam asera me nan ho mpo. 47Dɛm ntsi mese wo dɛ no bɔn a ɔdɔɔ so no, wɔdze akyɛ no, osiandɛ no dɔ dɔɔ so; na nyia wɔdze kumaabi akyɛ no, ɔdɔ kumaabi. 48Na ɔsee no dɛ, Wɔdze wo bɔn akyɛ wo. 49Na hɔn a wɔnye no tse edzidzi no hyɛɛ ase kae wɔ hɔn mu dɛ, Woana nye oyi a ɔdze bɔn so kyɛ yi? 50Na ɔsee ɔbaa no dɛ, Wo gyedzi agye wo: kɔ asomdwee mu.
Pilihan Saat Ini:
Luke 7: MFANBRPC
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Mfantse Bible © Bible Society of Ghana, 2011.
