Luke 6

Ahomgyeda ho Asɛm

(Matthew 12.1-8; Mark 2.23-28)

1 # Deut 23.25 Na ɔbaa dɛ okoduaa eburow kwa mu ahomgyeda, na n’esuafo no pempaan eburow mbɛtsem no bi posae wɔ hɔn nsamu wee. 2Na Farisiifo no mu binom see dɛ, Ɔyɛ dɛn na hom reyɛ dza ɔmmfa kwan mu dɛ wɔyɛ no ahomgyeda yi? 3#1 Sam 21.1-6 Na Jesus buae see hɔn dɛ, Ana hom nnkenkaan iyi mpo, dza David, aber a ɔkɔm dzee ɔnoara na hɔn a wɔka no ho no, ɔyɛe no? 4#Lev 24.9 Mbrɛ ɔkɛhɛɛn Nyankopɔn fie, na ɔkɛfaa kyerɛpaanoo no dzii, na ɔmaa hɔn a wɔka no ho no so bi wɔ ber a ɔmmfa mbra mu dɛ obiara dzi gyedɛ asɔfo no nkotsee no? 5Na ɔsee hɔn dɛ, Nyimpa Ba no yɛ ahomgyeda no no wura.

Banyin bi a ne Nsa Adwe no

(Matthew 12.9-14; Mark 3.1-6)

6Na ɔbaa dɛ ahomgyeda kor bi so mu, ɔkɔr nhyiamudan mu kɛkyerɛkyerɛe; na nyimpa bi wɔ hɔ a ne nsa nyimfa adwe. 7Na akyerɛwfo nye Farisiifo no tsɛɛw no dɛ ɔbɛyɛ edur ahomgyeda no, ama woeenya biribi akɔtoa no. 8Na ɔno dze, nna onyim hɔn adwen, ntsi ɔsee nyimpa a ne nsa adwe no dɛ, Soɛr gyina finimfin. Na ɔsoɛree gyinae. 9Na Jesus see hɔn dɛ, Miribisa hom asɛm, Ana ɔfa mbra mu dɛ ahomgyeda wɔbɛyɛ dza oye, anaa wɔbɛyɛ omuo? Wɔbɛgye nkwa, anaa wɔbɛsɛɛ? 10Na ɔhwɛɛ hɔn nyina hyiae, na ɔsee no dɛ, Tsen wo nsa. Na ɔyɛɛ dɛm, na ne nsa no sanee yɛɛ mu. 11Na ebufuhyew hyɛɛ hɔn nyina ma, na wotutuu egyina wɔ adze a wɔdze bɛyɛ Jesus ho.

Jesus Yi Asomafo Duebien no

(Matthew 10.1-4; Mark 3.13-19)

12Na ɔbaa dɛ nda no mu no, ɔkɔr koko bi do kɔsɔree; na ɔsɔɔr anafua no nyina bɔɔ mpaa kyerɛɛ Nyankopɔn. 13Na adze kyee no, ɔfrɛɛ n’esuafo no, na ɔpaa hɔn mu duebien a ɔfrɛɛ hɔn asomafo no. 14Simon a ɔtoo no Peter, nye no nua Andrew, James, John, Filip nye Bartholomew, 15Matthew, Tomas, Alfaeus ba James, Simon a wɔfrɛ no Zealot no, 16nye James ne ba Judas, nye Judas Iskariot a oyii no mae no.

Jesus Ma Nkyerɛkyerɛ na Ɔsa Yarba

(Matthew 4.23-25)

17Na ɔnye hɔn sianee begyinaa beebi a hɔ taa, nye n’esuafo kuw kɛse no nye ɔman no mu nyimpadodow pii a wofi Judea nyina, Jerusalɛm, Taere nye Sidon mpoano a wɔbae betsiee no no, na wɔbɔhwehwɛɛ ayarsa no; 18na hɔn a esunsum fi rehaw hɔn no, na ɔsaa hɔn nyina yarba. 19Na nyimpadodow no nyina hwehwɛɛ dɛ wɔdze hɔn nsa bɛka no, osiandɛ tum fii no mu bae bɛsaa hɔn nyina yarba.

Nhyira na Ndom

(Matthew 5.1-12)

20Na ɔmaa n’enyi do wɔ n’esuafo no do, na ɔsee dɛ,

Nhyira aka hom ehiafo,

na hom na Nyankopɔn ahenman no yɛ hom dze.

21 Nhyira aka hom a ɔkɔm dze hom sesei yi,

na wɔbɛma hom amee.

Nhyira aka hom a hom rusu sesei yi,

na hom bɛserew.

22 # 1 Pet 4.14 Nhyira aka hom ber a nyimpa bekyir hom, na woeyi hom edzi efi mu, na wɔayaw hom, na wɔatow hom dzin akyen dɛ dzin bɔn wɔ nyimpa Ba no ntsi. 23#2 Mbe 36.16; Ndwu 7.52 Da no hom ndzi dɛw, na hom ndzi ehurusi: na hwɛ, hom akatua so wɔ sor: na dɛmara na hɔn egyanom dze yɛɛ nkɔnhyɛfo no.

24 Na hom ahonyafo, hom ndue!

Osiandɛ hom enya hom awerɛkyekyer dada.

25 Hom a hom amee sesei yi, hom ndue!

Na ɔkɔm bɛdze hom.

Hom a hom serew sesei yi, hom ndue!

Na hom bedzi nkɔmbɔ na hom esu.

26 Aber a nyimpa nyina ka hom ho asɛm pa no, hom ndue! Na dɛmara na hɔn egyanom yɛe maa nkɔnhyɛfo atorfo no.

Hom Ndɔ Hom Atamfo

(Matthew 5.38-48; 7.12a)

27 Na meka kyerɛ hom a hom ritsie yi dɛ, Hom ndɔ hom atamfo, hom nyɛ hɔn a wɔtan hom yie, 28hom nhyira hɔn a wɔdom hom, na hom nsɔr mma hɔn a wɔbɔ hom adapaa. 29Na nyia ɔbɔ w’aso fakor mu no, dan fakor so ma no; na nyia ɔfa wo nkatado no, mma nnsiw no w’asetar ho kwan. 30Obiara a ɔserɛ wo no, ma no; na nyia ɔfa w’adze no, mma mmbisa no bio. 31#Mat 7.12 Na dza hom pɛ dɛ nyimpa yɛ ma hom no, hom so nyɛ dɛmara mma hɔn. 32Na sɛ hom dɔ hɔn a wɔdɔ hom a, ebɛn ndaase na hom nya? Na ndzebɔnyɛfo mpo dɔ hɔn a wɔdɔ hɔn. 33Na sɛ hom yɛ yie ma hɔn a wɔyɛ hom yie a, ebɛn ndaase na hom nya? Na ndzebɔnyɛfo so yɛ dɛmara. 34Na sɛ hom dze fɛm hɔn a hom enyi da do dɛ hom nsa bɛka efi hɔn hɔ bio a, ebɛn ndaase na hom nya? Ndzebɔnyɛfo so dze fɛm ndzebɔnyɛfo dɛ hɔn nsa bɛka no bio. 35Na mbom hom ndɔ hom atamfo, hom nyɛ papa, na hom mfa mfɛm dɛ hom enyi nnda biribi do, na hom akatua bɔdɔɔ so, na hom ayɛ nyia ɔwɔ sorsor no ne mba, osiandɛ ɔnodze, ɔyɛ adɔyɛ ma etsiafo nye emumuyɛfo. 36Hom nyɛ mbɔbɔrhufo, dɛ mbrɛ hom Egya so yɛ mbɔbɔrhunyi no.

Mma Mmbu Atsɛn

(Matthew 7.1-5)

37 Mma hom mmbu atsɛn, na wonnkobu hom atsɛn; mma hom mmbu fɔ, na wonnkobu hom fɔ; hom mfa nkyɛ, na wɔdze akyɛ hom; 38hom mma, na wɔama hom: esusudze pa a wɔahohom do na wɔawosow no ma ebu do na wɔdze bogu hom bo mu; na esusudze kor a hom dze susu no, wɔdze bosusu ama hom bio.

39Na obuu hɔn bɛ so dɛ, Ana onyifurafo botum akyerɛ onyifurafo kwan? Hɔn beenu nyina nnkɔtɔ mona mu anaa? 40Osuanyi nnkyɛn ne kyerɛkyerɛfo, na obiara a oedzi mu no bɛyɛ dɛ ne kyerɛkyerɛfo. 41Na ɔyɛ dɛn na ehwɛ duaba a ɔwɔ wo nua enyiwa mu, na ennhwɛ mpuna a ɔwɔ woara w’enyiwa mu no? 42Anaadɛ ebɛyɛ dɛn etum ase wo nua dɛ, Onua, ma minyi duaba a ɔwɔ w’enyiwa mu, na wankasa w’enyiwa mu mpuna dze innhu? Ɔwo dabrabanyi, dzi kan yi mpuna fi wankasa w’enyiwa mu: nna ibohu no yie eyi duaba a ɔwɔ wo nua enyiwa mu no.

Dua Biara na N’aba

(Matthew 7.16-20; 12.33-35)

43 Dua pa biara nnyi hɔ a ɔsow aba prɔwee na dua prɔwee so nnyi hɔ a ɔsow aba pa. 44#Mat 12.33 Na dua biara wɔdze n’aba hu no. Na nyimpa nntsetsew adɔmba wɔ nsoɛ do, na eso wɔnntsetsew wenyinaba wɔ kɔkrɔw do. 45#Mat 12.34 Nyimpa pa fi n’akoma mu ndzepa korabea na oyi adze pa pue, na nyimpa bɔn fi ne ndzɛmba bɔn korabea na oyi dza omuo pue: na ofi dza abor do wɔ akoma mu no na ano ka.

Fapem Ahorow Ebien no

(Matthew 7.24-27)

46 Na ɔyɛ dɛn na hom frɛ me Ewuradze, Ewuradze, naaso hom nnyɛ dza mese? 47Obiara a ɔba mo hɔ, na otsie m’asɛm, na ɔyɛ no, mebɛkyerɛ hom nyia ɔnye no sɛ: 48ɔtse dɛ nyimpa a osii dan, na otui ma ɔdɔe, na ɔtoo fapem wɔ ɔbotan do; na nsu yirii no, esutsen pemee boor dan no, naaso oenntum annwosow no, osiandɛ woesi no yie. 49Na nyia otsie na ɔnnyɛ no, ɔtse dɛ nyimpa a osii dan wɔ asaase enyi, na onnyi fapem; ɔno na nsu yirii faa ho no, ɔhwee ase ntsɛmara, na dan no sɛɛe koraa.

Pilihan Saat Ini:

Luke 6: MFANBRPC

Sorotan

Berbagi

Salin