Matyu 16
16
To panagadeng dito Parisiyu se̍ Sadusiyu ka nakaskasdaaw
Mar. 8:11-13; Luk. 12:54-56
1Ket dito Parisiyu se̍ Sadusiyu, nawe̍ da sinintir nge̍ Je̍sus, nga inadeng da igina nga mangipasingen kuma igida ka pagilasinan gapu iya pannakabalin nga gayat e̍ Apu Diyus. 2Ngem kinunen ne̍ Je̍sus igida, [“Emmu nu mettin ya pananglasin iya langa niya abac lawa, ta no manindaraga iya isusurneb niya sinag, kunen nu nga, ‘Napaw-is ya timpu na no damlag,’ kunen nu. 3Ket no degdeggang se̍ gumicbet ya abac lawa iya agsapa, kunen nu met nga, ‘Agenneg no deddan,’ kunen nu. Agten iyan ngarud ya kinalaing nu nga mangilasin iya langa niya abac lawa, ngem ape̍ ngarud nga madi kayu malasin diya pakasingnan iya ita nga timpu?]
4“Ay, diya toltoley ita nga timpu! Diya agsapsapul ka pagilasinan nga mangipanecnec, ket diyan nas dake̍c se̍ diya pimanaw e̍ Apu Diyus tasun makitipun da ka sabali yin. Ngem awan lugud maipasingen igida nga pagilasinan da, malacsid ngas ito pagilasinan maipanggep ito mammadtu nga Hunas,” kunen na. Ket iya agten iyan, pinanawan na dan.
To maiyarig ka dake̍c nga pangpablad
Mar. 8:14-21
5Ket dimelmang nge̍ Je̍sus se̍ dito adalan na ito baybayin. Ket nale̍panan met dito adalan ya nagbalun ka tinapay. 6Ket e̍ Je̍sus, kinunen na igida, “Annadan nu ngarud ya pangpablad nga uwed kadiya Parisiyu se̍ Sadusiyu,” kunen na met.
7Ket nagtetebbaran ngarud dito adalan to kinagi ne̍ Je̍sus maipanggep iya pangpablad, ket kinunen da, “Ay! Awan ngamin balun tida nga tinapay,” kunen da.
8Ngem e̍ Je̍sus, emmu na to kinagkagi da, ket kinunen na, “Ay, nakapsut ya panamati nu! Ape̍ nga iyan ya pagtetebbaran nu, nga awan naitarey nu nga tinapay? 9Awan kad pekkem kustu nga pannakalasin nu? Madi kayu kad malagip dito lima nga bukel nga tinapay nga naipakan kadito lima nga ribu nga toley, se̍ dito piga nga lacba nga inurnung nu nga nabuna itun? 10Se̍ nale̍panan nu kad pe̍ dito pitu nga bukel nga tinapay nga naipakan kadito eppat nga ribu nga toley, se̍ dito piga nga lacba nga nabuna nga tinapay nga inurnung nu itun? 11Ape̍ ngarud nga madi kayu pekkem malasin ya kaipapennan nito kinagic, nga bekken met nga maipanggep ka tinapay? Baliwac ngarudin: Annadan nu lugud ya pangpablad nga uwed kadiya Parisiyu se̍ Sadusiyu,” kunen na met.
12Ket iya agten iyanin, naawatan da ngarudin, nga bekken nga ya pangpablad nga uwed ka tinapay to kagkagiyen ne̍ Je̍sus nga annadan da kuma, no di lugud ya panursuru dito Parisiyu se̍ Sadusiyu.
To pannakaawat ne̍ Pe̍dru maipanggep iya Kristu
Mar. 8:27-30; Luk. 9:18-21
13Ket ito nakadateng de̍ Je̍sus iya edyan nga uwed iya sakup niya ili nga Se̍sarya Pilipus, nagsalsaludsud nge̍ Je̍sus kadito adalan na, nga kinunen na, “Nagan na ya pangipagarupan diya toley iya Anac nga Naipatoley?” kunen na.
14Ket kinunen da, “E̍ Juan nga Mammautisar ka kanu, kunen diya duduma. Ngem uwed da met duduma nga agkunen nga to mammadtu nga E̍lyas ka kanu. Se̍ uwed da pe̍ agkunen nga to mammadtu nga He̍re̍myas ka kanu, winno isa pekkem kanu kadito mammadtu itun pekkem,” kunen da.
15Ket kinunen manin ne̍ Je̍sus igida, “Ngem no dakayu? Nagan ku met iya panagkunen nu?” kunen na.
16Ket e̍ Pe̍dru to simungbat, nga kinunen na, “Ikew met ya Kristu, nga Anac mettas niya sibibiyag nga Diyus,” kunen na.
17Ket kinunen ne̍ Je̍sus e̍ Pe̍dru, “Nagasat ka ngarud, Simon, nga anac ne̍ Hunas. Ta bekken met nga toley ya nangipakaemmu ikew idi, no di lugud ya Amac nga uwed ka langit.
18“Ket idi pe̍ ya ibagac ikew: Pe̍dru ya nagan mu, nga kayat na nga kagiyen, batu. Ket ya pinas nga idi, itu yan ya pangibangunac nad iya bungguy ku nga igle̍siyac. Ket awan nad met makaabac idi, orey ya pannakabalin niya patey. 19Italec ku nad ikew ya maiyarig kadiya tulbec niya pagiturayan niya Nailangitan. Ket ya orey nagan na nga iparit mu idi nga lubung, itu met ya maiparit enna langitin. Se̍ ya orey nagan na nga ipalubus mu idi nga lubung, itu pe̍ yin ya maipalubus enna langit,” kunen na.
20Ket nibilin ne̍ Je̍sus nga siiinget kadito adalan na nga pulus nga awan kanu pangibagbagaan da nga igina ya Kristu.
To panangipakaemmu ne̍ Je̍sus iya ipapatey na,
se̍ maipanggep kadiya mayat nga sumurut igina
Mar. 8:31-9:1; Luk. 9:22-27
21Ket manipud itunin, nipalpalawag ne̍ Je̍sus kadito adalan na nga masapul nga mawe̍ ka He̍rusale̍m. Ket antuni, aglak-am nad kanu ka adu nga rigat gapu kadito panglakayen se̍ dito pangpangulu diya agsirsirbi iya Te̍mplu se̍ dito manursuru iya Linteg. Masapul nad met pe̍ nga mapatey, ket mapaungar nad mettas iya maikatlu nga algew.
22Ket e̍ Pe̍dru, niyadeyyu na met ka e̍teng nge̍ Je̍sus, nga deldellawen nan nga kinunen na, “Sapay kuma ta madi ngarud ipalubus ne̍ Apu Diyus yan ikew, Apu!” kunen na.
23Ngem e̍ Je̍sus, limaw-ing ngarud, ket kinunen na met e̍ Pe̍dru, “Umadeyyu ka iyaken, Satanas! Ta pakasulisugan naka met! Bekken met nga ya panpanunut ne̍ Apu Diyus yan nga uwed ikew, no di lugud ya panpanunut ngas toley,” kunen na.
24Ket kinunen ne̍ Je̍sus itun kadito adalan na, “No uwed mayat nga sumurut iyaken, masapul nga ipalikud na diya mismu nga tarigagay na, ket se̍ masapul nga anusan na ya arig nga panangagtu na iya krus na nga pakailansaan na, ket sumurut ngarud iyaken nin. 25Ta ya toley nga mangipangpangruna kuma iya biyag na, mapukaw nad mettas igina ya kaipapennan niya biyag na. Ngem ya mangipalikud iya panangipateg na iya biyag na gapu iyaken, masmac na nad ya kaipapennan niya biyag na. 26Tutu met yan, ta awan ngarud paglaingan niya isa nga toley, orey no matagikuwa na kuma diya amin nga uwed iya lubung ngi, ngem mapukaw nad met ya biyag na. Se̍ pulus nga awan mabalin nga e̍cde̍ niya toley nga katukad niya biyag na. 27Agten iyan ngarud, ta agparang nad ya Anac nga Naipatoley nga maibulun pe̍ igina diya anghe̍le̍s na, ket madaydayaw nad mettas gapu iya panangipadayaw niya Ama na igina. Ket itu nad ya panangsupapac na kadiya toltoley yin maikanatad kadiya winangel niya tunggal isa. 28Ket pudnu met nga uwed duduma dakayu idi ita, nga madi nad pekkem matey agingga nga madi da masingen ya panagparang niya Anac nga Naipatoley, nga agparang iya panangituray na,” kunen na.
Pilihan Saat Ini:
Matyu 16: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
