Matyu 15
15
Diya ug-ugali dito Parisiyu
Mar. 7:1-13
1Ket iya name̍nsan, uwed da Parisiyu se̍ manursuru iya Linteg nga nawe̍ ito edyan ne̍ Je̍sus. Naggayat didi ka He̍rusale̍m. Ket kinunen da e̍ Je̍sus, 2“Ape̍ nga madi tungpalen diya adalan mu diya ug-ugali nga nipatawid dito am-ama tida? Madi da ngarud tungpalen, ta madi da met agbeggu nga kustu age̍ da nga mangan,” kunen da.
3Ket kinunen ne̍ Je̍sus igida, “Ket no dakayu met, ape̍ ngarud nga ya bilin ne̍ Apu Diyus mettas ya madi nu nga tungpalen, tasun matungpal kuma diya bukud nu was nga ug-ugali? 4Ta nibilin met ne̍ Apu Diyus nga, ‘Dayawem ya amam se̍ ya inam.’ Se̍ kunen pe̍ ne̍ Apu Diyus nga, ‘Ya agkagi ka dake̍c maikuntra iya ama na winno ina na, ket masapul nga mapatey,’ kunen na met. 5Ngem dakayu, isursuru nu met nga gennung nga no uwed mabalin nga itulung niya isa nga toley kadiya naganac igina, madi kanu nga kapilitan nga dayawen na da gapu iya tulung na, no kunen na ngas met igida nga, ‘Maipaay e̍ Apu Diyus yani.’ 6Ket iya agten iyan, pinagbalin nu met nga awan sirbi niya kagi ne̍ Apu Diyusin, tasun matungpal kuma ya ugali nu mettas. 7Ay, dakayu nga aginlilinteg! Pudnu met to padtu nito Isayas itun maipanggep dakayu ito kinunen na,
8‘Didi nga toltoley,
daydayawen dac met kadiya balbalikas da,
ngem bekken met nga iyaken
ya tutu nga ipatpateg da.
9Awan mettas mamaay na
ya panagdayaw da iyaken,
ta ya isursuru da nga tungtungpalen toley,
diyan nas al-alagaden
nga tumaud ngas ka toley,’”
kunen na.
Diya mangrugit iya nakem toley
Mar. 7:14-23
10Ket pinaadenni ne̍ Je̍sus itun diya toltoley, ket kinunen na igida, “Dumngeg kayu kuma iyaken, ket utuben nu nga nalaing yani: 11Bekken nga ya maipauneg iya musung niya toley ya makaparugit iya nakem na, no di lugud diya rumwar iya musung na. Yan nga agtaud igina, itu ngarud mettas ya mangrugit igina,” kunen na.
12Ket dito adalan ne̍ Je̍sus, imadenni da ngarud igina itun, ket kinunen da, “Napasakitan met dito Parisiyu ito kinagim,” kunen da.
13Ket kinunen ne̍ Je̍sus igida, “Amin nga mula nga bekken nga nimula niya nailangitan nga Amac, mabagut nad mettas. 14Itu nga ipamoya nu was diyan nga Parisiyu. Arig da ngas nga kulap nga mangge̍pe̍d. Ket no kulap ya mangge̍pe̍d iya pada na nga kulap, misacdul da nga duwa nga maipisuc ka ebbut,” kunen na.
15Ket to Pe̍dru, kinunen na e̍ Je̍sus, “Ipalawag mu kay dakami to pangngarig mu,” kunen na.
16Ket kinunen met ne̍ Je̍sus, “Madi kayu kad pekkem makaawat? 17Madi kayu kad pekkem maawatan nga ya orey nagan na nga maikam-ut, mawe̍ iya bessug se̍ mairuwar nad mettas nga maipay iya kasilya? 18Ngem ya banag diya kagi nga rumwar iya musung toley, tumaud met iya tarigagay na, ket itu win ya makaparugit iya nakem niya toley. 19Ta diya gayat iya tarigagay niya toley, itu diyan diya pagtaudan diya dake̍c nga panpanunut, se̍ ya pumatey, pannakitipun ka bekken na nga asawa, pannakikamalala, panagtakew, se̍ ya panangpabasul nga sibubusid, se̍ ya panamadpadake̍c. 20Ngarud, diyan met diya mangrugit iya nakem niya toley. Ngem no ya pannangan niya toley nga madi pekkem nakatungpal ito ugali nga panagbeggu, bekken met nga mangrugit iya nakem niya toley,” kunen na.
To panamati nito babey nga iKanaan
Mar. 7:24-30
21Ket pimanaw nge̍ Je̍sus antuni nin, nga nawe̍ iya sakup diya siyudad nga Tiru se̍ Sidun. 22Ket itun, uwed met isa nga babey nga iKanaan nga aged-edyan antuni, nga nawe̍ ito edyan ne̍ Je̍sus. Ket kinunkunen na ka nabileg, “Kaasiyan nac kay, Apu, nga kapututan nito Ari Dabid! Kackaasi met nga unay ya anac ku nga babey, ta naluganan ka sairu,” kunen na.
23Ngem madi met negkim nge̍ Je̍sus. Ket imadenni ngarud dito adalan na igina, nga nipacpakaasi da igina nga kinunen da, “Pagtalawem kay ngasin, ta mip-ipuyut ngas met dactida nga pumpumkaw,” kunen da.
24Ket kinunen ne̍ Je̍sus, “Diya naiyaw-awan nga karne̍ru nga kapututan nito Israe̍l ngas met diya nakaibonac,” kunen na.
25Ket to babey, nawe̍ met nagparintumeng iya sangu ne̍ Je̍sus, nga kinunen na, “Tulungan nac kay, Apu!” kunen na.
26Ket nagpangngarig nge̍ Je̍sus nga kinunen na, “Bekken met nga rumbeng nga maalac ya kanen diya anac tasun maipadtu nga mipakan kadiya asu,” kunen na.
27Ket kinunen nito babey, “Bo a, Apu. Ngem orey diya asu, makakan da met kadiya mucmuc nga maiterkag nga gayat iya lamisaan niya apu da,” kunen na.
28Ket kinunen ne̍ Je̍sus ito babey, “Ay, manang! Nabileg met ya panamatim! Maariman ngarud ya adeng mu,” kunen na. Ket tutu met nga nalaingan to anac nito babey iyan mettas nga kanitu.
To panangpalaing ne̍ Je̍sus ka adu nga toley
29Ket pimanaw nge̍ Je̍sus antuni, nga nanalan iya pingit nito Baybay ka Galilya. Nanang-at ka tageytey antuni, se̍ nagtugew win. 30Ket adu nga unay diya toltoley nga nawe̍ iya edyan na, nga nitarey da diya lugpi, diya piley, diya kulap, diya umel se̍ adu pekkem nga duduma nga nipen da iya sangu ne̍ Je̍sus, ket pinalaing na da. 31Ket nasdaaw ngarud dito toltoley ito nasingen da nga nakakagi yin dito umel, nalainganin dito piley, nakadalanin dito lugpi, se̍ nakasingen nin dito kulap. Ket nagdaydayawin dito toltoley e̍ Apu Diyus nga Diyus mettas diya iIsrae̍l.
To panangpakan ne̍ Je̍sus ka nasuruc nga
eppat nga ribu nga toley
Mar. 8:1-10
32Ket e̍ Je̍sus, pinaadenni na itun dito adalan na, ket kinunen na, “Maasiyan nac kadidi nga toltoley, ta tellu nga algew dan nga nakibulubulun iyaken nin, ket awan met kanen dan. Madic gabay da nga pagawiren nga sibibisin, ta kaynun no agkapsut da iya dalan,” kunen na.
33Ket kinunen dito adalan na igina, “Awac ngarud idi nga away ya pamettan tida ka ipakan tida nga makagdas iya agten idi nga kaadu diya toley?” kunen da.
34Ket inemmu ne̍ Je̍sus igida nga kinunen na, “Piga diya tinapay nga uwed dakayu?” kunen na.
Ket kinunen da, “Pitu nga bukel nga tinapay, se̍ uwed pe̍ e̍teng nga lames nga be̍be̍teng,” kunen da.
35Ket iya agten iyan, nibilin ne̍ Je̍sus kadito toltoley nga agtugew dan. 36Ket inalac na dito pitu nga tinapay, se̍ dito lames. Ket kalpasan niya panagyaman na e̍ Apu Diyus, pinisepisey na da, se̍ na ne̍cde̍ kadito adalan na. Ket dito adalan, niwaras da kadito toltoley. 37Ket nangan da nga amin, ket nabsug da met. Ket kalpasan na, inurnung dito adalan dito nabuna nga napisey, ket napnu met ya pitu nga lacba. 38Ket ya bilang dito nangan itun, ket eppat nga ribu nga lalaki, nga bekken pekkem nga naibilang dito babey se̍ eb-ebbing.
39Ket ito pinagawir ne̍ Je̍sus dito toltoley yin, naglugan ito bangka ngin nga nawe̍ enna sakup niya Magadan.
Pilihan Saat Ini:
Matyu 15: YBT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 1990 New Tribes Mission, Sanford, FL 32771-1487, USA.
Printed in the Philippines.
