Luka 21
21
Yoo okulafo lɛ onia lɛ
(Marko 12.41-44)
1Yesu wo ehiɛ nɔ ni ena niiatsɛmɛi ni amɛkɛ amɛnikeenii miiwo onia adeka lɛ mli. 2Shi ena yoo okulafo ohiafo ko hu ba ni ekɛ pesewai enyɔ bawo mli. 3#2 Kor 8.12 Ni ekɛɛ, “Anɔkwale mikɛɔ nyɛ akɛ, nɛkɛ yoo okulafo nɛɛ, ekɛ pii ewo mli fe mɛi lɛ fɛɛ; 4ejaakɛ mɛnɛɛmɛi fɛɛ lɛ, nɔ ni amɛna ni eteke nɔ lɛ eko amɛkɛbawo nikeenii lɛ amli nɛɛ, shi mɔ nɛ lɛ, ehia mli nii ni ekɛkwɛɔ ehe nɔ lɛ fɛɛ ekɛbawo mli nɛɛ.”
Sɔlemɔ we lɛ fitemɔ he gbalɛ
(Mateo 24.1-2; Marko 13.1-2)
5Ni be ni mɛi komɛi wieɔ Sɔlemɔ we lɛ he, bɔ ni akɛ tɛi fɛɛfɛji kɛ keenii ewula lɛ lɛ, ekɛɛ, 6#Luk 19.44 “Enɛɛmɛi fɛɛ ni nyɛnaa nɛɛ, gbii aaaba ni ashiŋ emli tɛ kome yɛ ekroko nɔ ni atsiŋ atswaŋ shi.”
Amanehului ashishijee
(Mateo 24.3-14; Marko 13.3-13)
7Ni amɛbi lɛ akɛ, “Tsɔɔlɔ, no hewɔ lɛ, mɛɛ be nii nɛɛ aaaba mli? Ni mɛɛ okadi abaana kɛ eshɛ be ni ebaaba mli lɛ?” 8Ni ekɛɛ, “Nyɛkwɛa jogbaŋŋ, koni akalaka nyɛ; ejaakɛ mɛi pii aaaba yɛ migbɛi mli ni amɛaakɛɛ, ‘Mi ni’, kɛ ‘Be lɛ eshɛ etã’. Shi nyɛkanyiɛa amɛsɛɛ. 9Ni kɛ nyɛnu tai kɛ atuatsemɔi ahe lɛ, nyɛtsui akafãa; ejaakɛ ja nɛkɛ nii nɛɛ ba mli dã, shi kɛ̃lɛ naagbee lɛ shɛko bianɛ.” 10Kɛkɛ ni ekɛɛ amɛ akɛ, “Maŋ baate shi awo maŋ, ni maŋtsɛyɛli hu aaate shi awo maŋtsɛyeli; 11ni shikpɔŋ hosomɔi ni naa wa aaaba hei srɔtoi fɛɛ, kɛ hɔ̃ji kɛ gbele helai, ni gbeyei nibii kɛ okadii wuji aaajɛ ŋwɛi aba.
12 #
Luk 12.11
“Shi dani enɛɛmɛi fɛɛ aaaba lɛ, amɛaamɔmɔ nyɛ ni amɛaawa nyɛ yi ni amɛkɛ nyɛ aaahã ni akojo nyɛ yɛ kpeehei lɛ ni awo nyɛ tsuŋ, ni amɛaakpala nyɛ kɛatee maŋtsɛmɛi kɛ lumɛi ahiɛ yɛ migbɛi lɛ hewɔ. 13Ni no aaahã nyɛ hegbɛ ni nyɛye odase. 14#Mat 10.19 No hewɔ lɛ, nyɛhiɛ ahia nɔ ni nyɛkasusu nɔ ni nyɛkɛajie nyɛnaa he nyɛto; 15#Bɔf 6.10 ejaakɛ mahã nyɛ naabu kɛ nilee ni nyɛhenyɛlɔi lɛ fɛɛ nyɛŋ naa adamɔ ni amɛnyɛŋ naa amɛku hu. 16Shi fɔlɔi tete kɛ nyɛmimɛi kɛ wekumɛi kɛ shieŋtsɛmɛi aaaŋɔ nyɛ ahã, ni amɛaahã agbe nyɛteŋ mɛi komɛi; 17#Mat 10.21-22 ni mɛi fɛɛ aaanyɛ nyɛ yɛ migbɛi lɛ hewɔ. 18#Luk 12.7 Shi nyɛyiteŋ tsɔi kome nɛkɛ elaajeŋ. 19#2 Kron 15.7; Heb 10.36 Hiɛmiamɔ nyɛkɛaahere nyɛsusumai lɛ.”
Yesu gba Yerusalɛm fitemɔ eto
(Mateo 24.15-21; Marko 13.14-19)
20“Shi kɛ nyɛna akɛ tai ebɔle Yerusalɛm lɛ, belɛ nyɛnaa nyɛlea akɛ efitemɔ lɛ eshɛ. 21No mli lɛ mɛi ni yɔɔ Yudea lɛ ajo foi aya gɔji lɛ anɔ, ni mɛi ni yɔɔ maŋ lɛ mli lɛ aje kpo, ni mɛi ni yɔɔ akrowai akaba mli. 22#Yer 5.29; Hos 9.7 Ejaakɛ oweletɔɔ gbii lɛ nɛ, koni nibii fɛɛ ni aŋma lɛ aba mli. 23Shi miihã yei ni hiɛ musu kɛ yei ni hãa fufɔ yɛ nakai bei lɛ amli lɛ kpoo! Ejaakɛ fimɔ babaoo baaba shikpɔŋ lɛ nɔ, ni mlifu hu baaba nɛkɛ maŋ nɛɛ nɔ. 24#Rom 11.25; Kpoj 11.2 Ni amɛaanyɔnyɔɔ yɛ klante naa, ni aaaŋɔ amɛ nom kɛaatee jeŋmaji fɛɛ mli, ni jeŋmaji lɛ aaanaanaa Yerusalɛm nɔ kɛyashi beyinɔ ni jeŋmaji abe lɛ aaashɛ.”
Gbɔmɔ Bi lɛ baa
(Mateo 24.29-31; Marko 13.24-27)
25“Ni okadii aaaba hulu kɛ nyɔɔŋtsere kɛ ŋulamii amli, ni jeŋmaji lɛ ahe aaajara amɛ yɛ shikpɔŋ lɛ nɔ, ni amɛaafee yeyeeye yɛ ŋshɔ gbɛɛmɔ kɛ ŋshɔkei akuumɔ hewɔ; 26ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛ nɔ lɛ agbɛkwɛmɔ hewɔ; ejaakɛ aaahoso ŋwɛi hewalɛi lɛ. 27#Dan 7.13 Kɛkɛ lɛ amɛaana Gbɔmɔ Bi lɛ ni eeba yɛ atatuŋ kɛ hewalɛ kɛ anunyam babaoo. 28#Fil 4.4, 5 Shi be ni nibii nɛɛ aaatsɔ̃ naa shi lɛ, no lɛ nyɛjajea nyɛhe nyɛdamɔa shi ni nyɛholea nyɛyitsei anɔ, ejaakɛ nyɛkpɔ̃mɔ lɛ miibɛŋkɛ.”
Agbãmitso lɛ he nikasemɔ
(Mateo 24.32-35; Marko 13.28-31)
29Ni ebu amɛ abɛ akɛ, “Nyɛkwɛa agbãmitso kɛ tsei fɛɛ; 30be mli beebe ni amɛfuɔ baa lɛ kɛ nyɛna lɛ, nyɛ diɛŋtsɛ nyɛle akɛ latsaabe eshɛ etã. 31Nakai nɔŋŋ hu, be ni nyɛaana akɛ nibii nɛɛ etsɔ̃ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ shi etã. 32Anɔkwale mikɛɔ nyɛ akɛ, nɛkɛ yinɔ nɛɛ hoŋ, kɛyashi beyinɔ ni nibii nɛɛ fɛɛ aaaba mli. 33#Luk 16.17 Ŋwɛi kɛ shikpɔŋ aaaho aya; shi miwiemɔi lɛ hoŋ eyaŋ.”
Nyɛsaraa
34 #
Mar 4.19
“Shi nyɛhiɛ ahia nyɛhe nɔ koni fufeemɔ kɛ dãatɔɔ kɛ yeyeeyefeemɔ yɛ wala nɛɛ mli nibii ahe akahe nyɛtsuii ni nakai gbi lɛ miibati nyɛ shi trukaa; 35#1 Tes 5.3 ejaakɛ ebaaba mɛi fɛɛ ni yɔɔ shikpɔŋ muu lɛ fɛɛ nɔ lɛ anɔ tamɔ tsɔne. 36#Mar 13.33, 35 No hewɔ lɛ, nyɛsaraa ni nyɛsɔlea be fɛɛ be, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ Gbɔmɔ Bi lɛ hiɛ nyɛdamɔ.”
37Shi kɛ je tsɛre lɛ Yesu tsɔ̃ɔ nii yɛ Sɔlemɔ we lɛ, ni kɛ je na lɛ, eyaa gɔŋ ni atsɛɔ lɛ Mugɔŋ lɛ nɔ eyawɔɔ. 38Ni maŋ muu lɛ fɛɛ teɔ shi leebi maaŋkpa kɛbaa eŋɔɔ amɛbaboɔ lɛ toi yɛ Sɔlemɔ we lɛ.
Pilihan Saat Ini:
Luka 21: NEGAB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Ga Language © Bible Society of Ghana, 2020.
