Luka 19
19
Yesu kɛ Zakeo
1Yesu yabote Yeriko ni eefoŋ. 2Ni nuu ko yɛ jɛi ni atsɛɔ lɛ Zakeo, ni toohelɔ nukpa ji lɛ, ni ena nii hu. 3Ni eetao Yesu ena ni ele lɛ, shi mɛi pii lɛ ahewɔ lɛ enyɛɛɛ, ejaakɛ gbɔmɔ kpitioo ji lɛ. 4Ni esha foi kɛtsɔ̃ hiɛ, ni eyakwɔ agbãmitso koni ena lɛ, ejaakɛ jɛi gbɛ ebaatsɔ̃. 5Ni be ni Yesu shɛ jɛi lɛ, ewo ehiɛ nɔ ni ena lɛ, ni ekɛɛ lɛ akɛ, “Zakeo, ohe afee oya ni okpeleke shi, ejaakɛ owe lɛ sa akɛ mato ŋmɛnɛ.” 6Ni ehe fee oya ni ekpeleke shi, ni ehere lɛ atuu. 7#Luk 15.2 Ni be ni mɛi na lɛ, amɛ fɛɛ amɛwie huhuuhu amɛkɛɛ, “Eyato nuu eshafeelɔ ŋɔɔ.” 8#Ɛks 22.1 Shi Zakeo ho damɔ shi ni ekɛɛ Nuŋtsɔ lɛ akɛ, “Nuŋtsɔ, naa, miiŋɔ minii fã make ohiafoi, ni kɛji mikɛ yaka naafolɔmɔ eshɔ̃ mɔ ko nɔ ko yɛ edɛŋ lɛ, miiku mabɔ he toi ejwɛ mahã lɛ.” 9#Luk 13.16 Yesu kɛɛ lɛ akɛ, “Ŋmɛnɛ yiwalaheremɔ eba shĩa nɛɛ, akɛni lɛ hu Abraham bi ji lɛ lɛ. 10#Luk 5.22; 1 Tim 1.15 Ejaakɛ Gbɔmɔ Bi lɛ ba nɔ ni elaaje lɛ taomɔ kɛ eyiwalaheremɔ.”
Menai nyɔŋma lɛ he abɛ lɛ
(Mateo 25.14-30)
11 #
Mat 25.14-30
Shi be ni amɛboɔ nii nɛɛ toi lɛ, ebu abɛ ko eshi nɔ, ejaakɛ ebɛŋkɛ Yerusalɛm ni amɛsusu akɛ amrɔ lɛ nɔŋŋ Nyɔŋmɔ Maŋtsɛyeli lɛ baapue. 12#Mar 13.34 No hewɔ lɛ, ekɛɛ, “Ablade ko dom etee maŋsɛɛ shɔŋŋ ni eyaŋɔ emaŋtsɛyeli ni eku esɛɛ eba. 13Ni etsɛ etsuji nyɔŋma, ni ejie menai nyɔŋma ehã amɛ, ni ekɛɛ amɛ akɛ, ‘Nyɛtsɔ̃mɔa he kɛyashi maba.’ 14#Yoh 1.11 Shi emaŋbii lɛ nyɛ lɛ, ni amɛtsu bɔfoi kɛnyiɛ esɛɛ ni amɛyakɛɛ akɛ, ‘Wɔsumɔɔɔ ni mɔ nɛ abaye wɔnɔ maŋtsɛ.’
15“Ni eba mli akɛ, be ni enine eyashɛ maŋtsɛyeli lɛ nɔ ni eku esɛɛ eba lɛ, efã akɛ atsɛ tsuji lɛ ni ekɛ shika lɛ hã lɛ kɛba, koni ena nɔ ni amɛteŋ mɔ fɛɛ mɔ ena yɛ hetsɔ̃ɔmɔ lɛ mli. 16Klɛŋklɛŋ mɔ lɛ ba ni ebakɛɛ, ‘Nuŋtsɔ, omena lɛ efɔ menai nyɔŋma ewoŋ.’ 17#Luk 16.10 Ni ekɛɛ lɛ akɛ, ‘Aekoo tsulɔ kpakpa! Akɛni oye anɔkwa yɛ nɔ ko bibioo mli hewɔ lɛ, ye maji nyɔŋma anɔ.’ 18Ni mɔ ni ji enyɔ lɛ ba ebakɛɛ, ‘Nuŋtsɔ, omena lɛ efɔ menai enumɔ ewoŋ.’ 19Ni lɛ hu ekɛɛ lɛ akɛ, ‘Bo hu ye maji enumɔ anɔ.’ 20Ni mɔ kroko hu ba ebakɛɛ, ‘Nuŋtsɔ, naa, omena lɛ ni mifi miwo mama naa kɛto lɛ nɛ; 21miyashe bo gbeyei, ejaakɛ yiwalɔ ji bo, okɔɔ nɔ ni okɛfɔ̃ko shi, ni okpaa nɔ ni oduko.’ 22Shi ablade lɛ kɛɛ akɛ, ‘Tsulɔ fɔ̃ŋ, bo diɛŋtsɛ odaaŋ wiemɔ mikɛaakojo bo! Ni ole akɛ yiwalɔ ji mi, ni mikɔɔ nɔ ni mikɛfɔ̃ko shi, ni mikpaa nɔ ni miduko lɛ, 23mɛɛ hewɔ mɔ ni okɛ mishika lɛ eyawooo shikatoohe lɛ, koni kɛ miba lɛ, ni mibahe minii kɛ ehekpa?’ 24Ni ekɛɛ mɛi ni damɔ emasɛi lɛ akɛ, ‘Nyɛshɔ̃a mena lɛ yɛ edɛŋ, ni nyɛkɛhãa mɔ ni yɔɔ menai nyɔŋma lɛ.’ 25Ni amɛkɛɛ lɛ akɛ, ‘Nuŋtsɔ, eyɛ menai nyɔŋma.’ 26#Luk 8.18; Mat 13.12 ‘Eyɛ mli nakai, shi miikɛɛ nyɛ akɛ, mɔ fɛɛ mɔ ni yɔɔ nɔ ko lɛ, lɛ nɔŋŋ aaahã; shi mɔ ni bɛ nɔ ko lɛ, nɔ ni eyɔɔ lɛ tete aaashɔ̃ yɛ edɛŋ.’
27“Shi nakai mihenyɛlɔi lɛ ni sumɔɔɔ akɛ miye amɛnɔ maŋtsɛ lɛ, nyɛkɛ amɛ abaa biɛ ni nyɛbagbea amɛ yɛ mihiɛ nɛɛ!”
Yesu Yerusalɛm botemɔ
(Mateo 21.1-11; Marko 11.1-11; Yohane 12.12-19)
28Ni be ni ewie nɛkɛ lɛ, eho eyi hiɛ kɛmiiya Yerusalɛm. 29Be ni ebɛŋkɛ Betfage kɛ Betania yɛ gɔŋ ni atsɛɔ lɛ Mugɔŋ lɛ he lɛ, etsu ekaselɔi lɛ ateŋ mɛi enyɔ, 30ekɛɛ, “Nyɛyaa akrowa ni tua nyɛhiɛ lɛ mli, ni kɛ nyɛbote mli lɛ nyɛaana tejibi ni mɔ ko tako enɔ pɛŋ ŋmɔ shi yɛ jɛi; nyɛfɛnea lɛ ni nyɛkɛ lɛ abaa. 31Ni kɛji mɔ ko bi nyɛ akɛ, ‘Mɛɛba nyɛfɛneɔ lɛ?’ lɛ, nyɛkɛa lɛ akɛ, ‘Ehe miihia Nuŋtsɔ lɛ.’ ” 32Ni mɛi ni atsu lɛ yiŋ amɛtee, ni amɛyana tamɔ bɔ ni ekɛɛ amɛ lɛ. 33Shi be ni amɛfɛneɔ tejibi lɛ, mɛi anɔ ni ji lɛ bi amɛ akɛ, “Mɛɛba nyɛfɛneɔ tejibi lɛ?” 34Ni amɛkɛɛ, “Ehe miihia Nuŋtsɔ lɛ.” 35Ni amɛkɛ lɛ ba Yesu ŋɔɔ, ni amɛkɛ amɛtadei shwie tejibi lɛ nɔ, ni amɛwo Yesu amɛta nɔ. 36Ni be ni eyaa lɛ, amɛkɛ amɛtadei ha gbɛ lɛ nɔ. 37Ni be ni ebɛŋkɛ he ni akpelekeɔ Mugɔŋ lɛ yɛ lɛ, ekaselɔi asafo muu lɛ fɛɛ bɔ̃i nyamɔ ni amɛkɛ gbee ni wa jie Nyɔŋmɔ yi, yɛ hewalɛ nitsumɔi fɛɛ ni amɛna lɛ hewɔ, 38#Luk 2.14; Lal 118.26 amɛkɛɛ,
“Ajɔɔ maŋtsɛ ni baa yɛ Nuŋtsɔ lɛ gbɛi mli lɛ!
Hejɔlɛ yɛ ŋwɛi,
ni anunyam yɛ ŋwɛi flooflo!”
39Ni Farisifoi lɛ ateŋ mɛi komɛi jɛ asafo lɛ mli kɛɛ lɛ akɛ, “Tsɔɔlɔ, kã okaselɔi lɛ.” 40Ni ehere nɔ ekɛɛ amɛ akɛ, “Miikɛɛ nyɛɛ akɛ, kɛji mɛnɛɛmɛi aaamua amɛnaa lɛ, no lɛ tɛi aaabolɔ.”
41 #
Ɛks 8.11; Yoh 11.35 Ni be ni eshɛ etã ni ena maŋ lɛ, efo eshwie enɔ, 42#Deut 32.29 ni ekɛɛ, “Eji yɛ ogbi nɛɛ nɔ lɛ ona ole nii ni hi hã ohejɔlɛ lɛ kulɛ! Shi agbɛnɛ akɛtee bo. 43Shi gbii miiba, ni ohenyɛlɔi lɛ aaatsa bu awo ohe, ni amɛaabɔle bo kpula ni amɛaasa oyi yɛ he fɛɛ he, 44#Luk 21.6 ni amɛaaŋɔ bo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli, ejaakɛ oyooo oduromɔ saramɔbe lɛ!”
Yesu tsuu Sɔlemɔ we lɛ he
(Mateo 21.12-17; Marko 11.15-19; Yohane 2.13-22)
45Ni Yesu tee Sɔlemɔ we lɛ ni ebɔ̃i mɛi ni hɔ̃ɔ nii kɛ mɛi ni heɔ nii yɛ jɛi lɛ shwiemɔ, 46#Yes 56.7; Yer 7.11 ekɛɛ amɛ akɛ, “Aŋma akɛ, ‘Miwe lɛ Sɔlemɔ we ni’; shi nyɛ lɛ nyɛkɛfee ojotswalɔi abu.” 47#Luk 21.37 Ni etsɔ̃ɔ nii daa nɛɛ yɛ Sɔlemɔ we lɛ; shi osɔfonukpai lɛ kɛ mlatsɔɔlɔi lɛ kɛ maŋ lɛ mli hiɛnaanɔbii lɛ miitao ehiɛ amɛkpãtã; 48#Yes 56.7; Yer 7.11 shi amɛnaaa bɔ ni amɛaafee, ejaakɛ maŋ muu lɛ fɛɛ kpɛtɛ lɛ ni amɛboɔ lɛ toi.
Pilihan Saat Ini:
Luka 19: NEGAB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Ga Language © Bible Society of Ghana, 2020.
