Yohane 4
4
Yesu kɛ Samariayoo lɛ
1 #
Yoh 3.22-26
Agbɛnɛ, be ni Yesu na le akɛ Farisifoi lɛ enu akɛ eena kaselɔi, ni eebaptisi mɛi babaoo fe Yohane, 2tsɛbelɛ lɛ Yesu lɛ diɛŋtsɛ ebaptisiii; shi moŋ ekaselɔi lɛ ni baptisiɔ lɛ, 3eje Yudea ni eyiŋ etee Galilea ekoŋŋ. 4Shi ja etsɔ̃ Samaria. 5#Jɛn 48.22; Yos 24.32 Agbɛnɛ ebashɛ Samaria maŋ ko ni atsɛɔ lɛ Sikar ni bɛŋkɛ shikpɔŋ kukuoo ko ni Yakob kɛhã ebi Yosef lɛ masɛi. 6Shi Yakob nubu lɛ yɛ jɛi. Ni akɛni gbɛnyiɛmɔ lɛ etɔ Yesu hewɔ lɛ, eho eshwata shi yɛ nubu lɛ he. [Ebashɛ jɛi] aaafee ŋmɛlɛ nyɔŋma kɛ enyɔ mli. 7Ni Samariayoo ko ba nuyɛɛ. Yesu kɛɛ lɛ akɛ, “Hã mi nu lɛ eko manu.” 8No mli lɛ ekaselɔi lɛ etee maŋ lɛ mli amɛyaahe niyenii. 9#Ezra 4.1-5; Neh 4.1, 2 Kɛkɛ lɛ Samariayoo lɛ kɛɛ lɛ akɛ, “Te tɛŋŋ ni bo Yudanyo lɛ obaa mi Samariayoo lɛ nu ni onuŋ?” (Ejaakɛ Yudafoi kɛ Samariabii enuuu tsene kome naa nu.) 10#Yoh 7.33, 39 Yesu here nɔ ni ekɛɛ lɛ akɛ, “Eji ole Nyɔŋmɔ nɔkeenɔ lɛ kɛ mɔ ni kɛɔ bo akɛ, ‘Hã mi eko manu lɛ’ kulɛ, bo moŋ oooba lɛ ni eeehã bo wala nu.” 11Yoo lɛ kɛɛ lɛ akɛ, “Nuŋtsɔ, obɛ nɔ ni okɛaayɛ, ni bu lɛ mli kwɔ hu; nɛgbɛ ona wala nu lɛ yɛ mɔ? 12Ani ofe wɔtsɛ Yakob ni hã wɔ nubu lɛ, ni lɛ diɛŋtsɛ enu mli nu, kɛ ebii kɛ ekooloi lɛ?” 13#Yoh 6.58 Yesu here nɔ ni ekɛɛ lɛ akɛ, “Mɔ fɛɛ mɔ ni nuɔ nu nɛɛ lɛ, kumai baaye lɛ ekoŋŋ; 14#Yoh 6.27-35 shi mɔ ni nuɔ nu ni mi mahã lɛ lɛ, kumai yeŋ lɛ dɔŋŋ kɛaatee naanɔ; shi moŋ nu ni mahã lɛ lɛ aaatsɔ̃ nu hiŋmɛi ni baa kɛyaa naanɔ wala mli yɛ emli.” 15Yoo lɛ kɛɛ lɛ akɛ, “Nuŋtsɔ, hã mi nu nɛɛ eko, koni kumai akaye mi, ni miba biɛ mibayɛ nu dɔŋŋ.” 16Yesu kɛɛ lɛ akɛ, “Yaa ni oyatsɛ owu, ni okɛ lɛ aba biɛ.” 17Yoo lɛ here nɔ ni ekɛɛ akɛ, “Mibɛ wu” Yesu kɛɛ lɛ akɛ, “Ojogbaŋŋ okɛɛ akɛ, ‘mibɛ wu’ lɛ; 18ejaakɛ ogbã hii enumɔ, ni mɔ ni ogbãa amrɔ nɛɛ tete, jeee owu ji lɛ; no lɛ owie anɔkwa.” 19Yoo lɛ kɛɛ lɛ akɛ, “Nuŋtsɔ, mina akɛ gbalɔ ji bo. 20#Deut 12.5 Gɔŋ nɛɛ nɔ wɔtsɛmɛi lɛ sɔle yɛ, ni nyɛ lɛ nyɛkɛɛ akɛ Yerusalɛm ji he ni sa akɛ asɔle yɛ.” 21Yesu kɛɛ lɛ akɛ, “Awo, he mi oye akɛ ŋmɛlɛtswaa lɛ miiba ni jeee gɔŋ nɛɛ nɔ, ni asaŋ jeee Yerusalɛm ni nyɛaaja Tsɛ lɛ yɛ. 22#2 Maŋ 17.29-41; Yes 2.3 Nyɛ lɛ, nyɛleee mɔ ni nyɛjaa; wɔ lɛ, wɔle mɔ ni wɔjaa, ejaakɛ walaheremɔ lɛ, Yudafoi lɛ aŋɔɔ ejɛ. 23Shi kɛ̃lɛ ŋmɛlɛtswaa lɛ miiba ni eshɛ momo, be ni anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli, ejaakɛ jalɔi ni tamɔ mɛnɛɛmɛi Tsɛ lɛ taoɔ. 24#2 Kor 3.17 Nyɔŋmɔ lɛ Mumɔŋ, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.” 25#Yoh 1.41 Yoo lɛ kɛɛ lɛ akɛ, “Mile akɛ Mesia ni atsɛɔ lɛ Kristo lɛ miiba; kɛ eba lɛ, eeegba wɔ nii fɛɛ.” 26#Yoh 9.37 Yesu kɛɛ lɛ akɛ, “Mi ni mikɛ bo wieɔ nɛɛ, mi ni.”
27Kɛkɛ ni ekaselɔi lɛ ba, ni amɛhiɛ fee amɛ yaa akɛ ekɛ yoo miiwie, shi kɛ̃lɛ mɔ ko biii lɛ akɛ, “Mɛni obiɔ lɛ?” Aloo “Mɛni wiemɔ okɛ lɛ wieɔ?” 28Agbɛnɛ yoo lɛ shi enugbɛ lɛ, ni eyiŋ etee maŋ lɛ mli, ni eyakɛɛ mɛi lɛ akɛ, 29“Nyɛbaa nyɛbakwɛa nuu ko ni ejaje nii fɛɛ ni mifee etsɔ̃ɔ mi, akɛ jeee Kristo lɛ ni lo?” 30No hewɔ lɛ, amɛjɛ maŋ lɛ mli amɛba eŋɔɔ.
31Shi no mli lɛ ekaselɔi lɛ kpa lɛ fai amɛkɛɛ, “Rabi, ye nɔ ko.” 32#Yoh 4.34 Ni ekɛɛ amɛ akɛ, “Miyɛ ŋmaa ni miyeɔ, ni nyɛleee.” 33No hewɔ lɛ, ekaselɔi lɛ kɛɛkɛɛ amɛhe akɛ, “Ani mɔ ko ebahã lɛ nɔ ko eye?” 34Yesu kɛɛ amɛ akɛ, “Miŋmaa ji akɛ mafee mɔ ni tsu mi lɛ suɔmɔnaanii, ni magbe enitsumɔ lɛ naa. 35#Mat 9.37; Luk 10.2 Ani nyɛkɛɛɛ akɛ, ‘Eshwɛ nyɔji ejwɛ ni abelekuumɔbe lɛ shɛɔ?’ Naa, miikɛɛ nyɛ akɛ, nyɛwoa nyɛhiɛ nɔ ni nyɛkwɛa ŋmɔji lɛ bɔ ni amɛgba futaa momo ni sa kpamɔ. 36Ni mɔ ni kpaa lɛ naa enyɔmɔwoo, ni ebuaa yibii anaa etoɔ naanɔ wala, koni mɔ ni duɔ lɛ kɛ mɔ ni kpaa lɛ fɛɛ anya shi kome. 37Ejaakɛ enɛ mli ni wiemɔ ni awie akɛ, ‘Mɔ ko duɔ ni mɔ ko kpaa’ lɛ baa mli yɛ. 38Mi lɛ mitsu nyɛ koni nyɛyakpa nɔ ni jeee nyɛ nyɛgbo he deŋme; mɛi krokomɛi egbo he deŋme, ni nyɛba amɛdeŋmegbomɔ lɛ mli.”
39Ni Samariabii lɛ ni jɛ nakai maŋ lɛ mli lɛ ateŋ mɛi pii he enɔ amɛye yɛ yoo lɛ wiemɔ lɛ ni ekɛye odase akɛ, “Ekɛɛ mi nii fɛɛ ni mifee pɛŋ lɛ” hewɔ. 40No hewɔ lɛ, be ni Samariabii lɛ ba eŋɔɔ lɛ, amɛkpa lɛ fai akɛ ekɛ amɛ ahi shi; ni ehi jɛi gbii enyɔ. 41Ni mɛi pii ni fe tsutsubii lɛ saa he ye yɛ lɛ diɛŋtsɛ ewiemɔ lɛ hewɔ; 42ni amɛkɛɛ yoo lɛ akɛ, “Agbɛnɛ wɔmiihe wɔmiiye, jeee bo owiemɔ lɛ hewɔŋ dɔŋŋ; ejaakɛ wɔ diɛŋtsɛ wɔnu, ni wɔna wɔle akɛ, anɔkwale, mɔ nɛ ji je lɛ yiwalaherelɔ lɛ.”
Maŋtsɛ wenuu lɛ binuu lɛ tsamɔ
43 #
Mat 4.12
Gbii enyɔ sɛɛ lɛ eyiŋ kɛjɛ jɛi etee Galilea, 44#Mat 13.57; Mar 6.4; Luk 4.24 tsɛbelɛ lɛ diɛŋtsɛ eye odase akɛ gbalɔ ko hiɛ bɛ nyam yɛ lɛ diɛŋtsɛ emaŋ. 45#Yoh 2.23 Be ni eba Galilea lɛ, Galileabii lɛ ni na nii fɛɛ ni efee yɛ Yerusalɛm yɛ gbijurɔ lɛ nɔ lɛ here lɛ, ejaakɛ amɛ hu amɛtee gbijurɔ lɛ.
46 #
Yoh 2.1, 9 Kɛkɛ ni Yesu ba Kana yɛ Galilea, he ni ehã nu tsɔ̃ wain yɛ lɛ, ekoŋŋ. Ni maŋtsɛ wenuu ko yɛ Kapernaum ni ebi he miiye. 47Ni be ni enu akɛ Yesu ejɛ Yudea eba Galilea lɛ, etee eŋɔɔ ni eyatutɔ lɛ akɛ eba ni ebatsa ebi lɛ, ejaakɛ eeehe egbo. 48#Yoh 2.18; 1 Kor 1.22 Kɛkɛ ni Yesu kɛɛ lɛ akɛ, “Kɛ nyɛnaaa okadii kɛ naakpɛɛnii lɛ, nyɛheee nyɛyeee.” 49Maŋtsɛ wenuu lɛ kɛɛ lɛ akɛ, “Nuŋtsɔ, ba dani mibi lɛ agbo.” 50Yesu kɛɛ lɛ akɛ, “Yaa, obi lɛ yi ena wala.” Ni nuu lɛ he nɔ ni Yesu kɛɛ lɛ lɛ eye, ni eyiŋ etee. 51Shi be ni eyaa lɛ, etsuji kɛ lɛ bakpe, ni amɛkɛɛ lɛ akɛ, “Obinuu lɛ he ewa lɛ.” 52No hewɔ lɛ, ebi amɛ nɔ ŋmɛlɛtswaa nɔ ni ehe bɔ̃i lɛ waa, ni amɛkɛɛ lɛ akɛ, “Nyɛ shwane ŋmɛlɛ kome mli ni atridii lɛ tse yɛ enɔ.” 53Kɛkɛ ni tsɛ lɛ kɛna akɛ nakai ŋmɛlɛtswaa lɛ ni Yesu kɛɛ lɛ akɛ, “Obi lɛ he ewa lɛ” lɛ nɔ nɔŋŋ ni; ni ekɛ ewe lɛ fɛɛ he ye. 54#Yoh 2.11, 23 Enɛ ji okadi ni ji enyɔ ni Yesu fee, be ni ejɛ Yudea eba Galilea lɛ.
Pilihan Saat Ini:
Yohane 4: NEGAB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible in Ga Language © Bible Society of Ghana, 2020.
