Mark añgw’a téndé 11
11
ÈLUKW’A GYÔÑ N’ÈKO (11)
Yésu a kwéya Yérusalèm. A huñwana Bétani.
1Sônda ba hinya kuna na Yérusalèm, ba gya pia Bètfagé na Bétani, ô’bété gy’Ôliv, Yésu a lèkyè bayôkwè bègyi baba, 2a ñgo na bañgô té: Lwakany pia mpôka ya pia bôhô bwabihi. Sônda bihi bé pwak’ôkaté, bya bé ñkwènèkyè kwakwa mwa âné a siñgama, mutu mwa ta hakama añgô ô’kô. Suñgwakany añgô, bya ya mè n’ègyi. 3Ndé ba humwa bihi té: Bya péka nè né ndé? ñgokany té: Tata a bé n’ègyi isṽè, a bé hugyèkyè bihi añgô kwakwa. 4Ya ba lwa, ba kobè mwa âné a siñgama ô ha itulu, pia hèñgyè; ba suñgw’añgô. 5Ibaté batu ô nloñgyè mwa batu mwa gy’ôkaté, ba humwa bañgô té: Bya suñgwa mwa ân’ôté né ndé? 6Ya ba soho nta Yésu a lèkyè bañgô, batu ba ñkwègyè bañgô. 7Ba lwa na mwa âné pia Yésu a gyi, ba haky’añgô méñhalô myañgô ôkwa ñkoñgo, Yésu a hul’ôkaté. 8Ya batu bukyé ba nañgyè méñkanda myañgô pèy a pèy, n’ibaté bétaka bya myélé bya ba léna makuba. 9Ôkaté batu ba tèmè bôhô na ba mpia ba pôtañga té: Ôzana! Boñ pia Mutu a ya bôsina bwa gyino gya Tata! 10Boñ bôsina bwa kuma ya tasé èté, kuma ya kokw’ahô David! Ôzana ôkatw’ikô!
11Yésu a pwa Yérusalèm, a kwéya ô’lôñkw’a Nzambé inènè. Sônd’añgw’a higy’i ta mambô mahagyè, a pwa aminè, a lwa Bétani na bayôkwè bègyi gyôñ na baba, bôsina bw’iko gya lwa.
Yésu a sèmè mwélé mwa figé.
12Na kwagyi, sônda bañgw’añgô ba manya Bétani, a yôka za; 13a ñkwènè mwélé mwa figé mwa tèmè ôpama, mwa gya na bôkay, y’añgw’a lṽ’i taka ndé a bé ñkwènèkyè bébuma ôkaté; ndé sônd’añgw’a pwa ôkaté, a ñkwènè bôkay a bôkay, bôsina sônd’imènè i gya èhô ya myélé mya figé mya bôta. 14Y’añgw’a soho na mwélé mwa figé té: Manyaka mwéhé, mutu mwa gyi gya aminè bébuma byobè. Bayôkwè ba yôka gyambô mènè.
Yésu a yila batu ô’lôñkw’a Nzambé inènè.
15Sônda ba pwa Yérusalèm, Yésu a kwéya ô’lôñkw’a Nzambé inènè; y’añgw’a tasé yila batu bahagyè ba hômpa ôkaté, a tugyè bétabulu bya batu ba sèñgyè badolo na masi ma batu ba hômpa manduma; 16mu himè té mutu a mutu a lénañgakyè na mpapi ô’lôñkw’a Nzamb’inènè.
17A hèlè bañgô té: Gya b’ôñkwèli té: Èlôñkw’amè ya bé bañgôbwèkyè té èlôñkwè ya makaka mahagyè ma bé yak’i bondoko. Ndé bihi, bya kaôgyè yañgô èlôñkw’a bayibi. 18Sônda baprèt banènè na batèndi ba méndèni ba yôka mambô mènè, ba haka pékô i bômak’añgô. Ndé ba loñgw’añgô, bôsina batu bahagyè ba ñkyèkyè ihèlé gyègyi. 19Mia mahagyè, sônd’iko gya lwa, Yésu na bayôkwè bègyi ba many’ô mpôka.
Yésu a soho bôsina bwa mwélé mwa figé mw’añgw’a sèmè.
20Bwia boko, na kwagyi, sônda ba yékana, ba ñkwènè mwélé mwa figé mwa yôma na méñkañga myahagyè. 21Ya Pièr a yébwa gyambô gya Yésu a soho, a ñgo n’ègyi té: Ñhèlé, taka, mwélé mwa figé mw’ô sèmè mwé yôma. 22Yésu a ñgo na bañgô té: Bukwèkyany Nzambé! 23Mômpô, ma ñgo na bihi té: Ndé mutu a ñgo n’ibété gyité té: Manyak’ôsaté, lwak’i tuaka ô nzôa, ndé mwa péké ikyèkyè ô nléma mwègyi, ndé a bukwè té gyambô gy’añgw’a mu soho gya bé pékôbwèkyè, ôkaté gya bé pékôbwèkyè mômpô. 24Bôsina mènè, ma ñgo na bihi té: Mambô mahagyè ma bya humwa, sônda bya bondoñgo na Nzambé, bukwèkyany té byé kwa mañgô, ôkaté bya bé kwaka mañgô mômpô. 25Sônda bya bondo, ndé bya bé na gyambô n’iwaté mutu, ñkwègyèkyany añgô, i gyaka té Hañgw’abihi a bé pi’kô, n’añgô bé ñkwègyèkyè bihi mambô mabébé mabihi. 26Ndé bya gyi ñkwègyè batu, Hañgw’abihi a bé pi’kô, n’añgô mwa gyi ñkwègyè bihi mambô mabébé mabihi.
Piñzô a Yésu ya yiñka pia wé?
27Ba huñwana Yérusalèm. Sônda Yésu a lwa gyôñga ô’lôñkw’a Nzamb’inènè, baprèt banènè, batèndi ba méndèni na bébôtô ba ya pi’añgw’a gyi, 28ba ñgo n’ègyi té: Yañgô piñzô y’ô péka na yañgô mambô maté bé ndé? A w’obè yañgô bé nza? 29Ya Yésu a hugyè bañgô té: Na mè, ma bé humwaka bihi gyambô; nyakwakany mè gyañgô, ôkaté ma bé tandaka bihi ñgyañga mwa piñzô mwa ma péka na yañgô mambô maté. 30Batèm a Yôan a yiñka pia wé, ndé pi’kô, ndé pia batu? Nyakwakany mè gyañgô. 31Ya ba soho bamènè a bamènè té: Ndé mina nyakwa té: A yiñka pi’kô, ôkaté a bé ñgoko na bèhè té: Bya gya ndèka bukw’añgô né ndé? 32Ndé mina nyakwa té: A yiñka pia batu‐Ba loñgo batu, bôsina batu bahagyè ba bukwè té Yôan a gya nyañgw’a ñkañga. 33Ya ba ñgo na Yésu té: Bèha ñgyébé. Na Yésu a ñgo na bañgô té: Na mè, ma gyi tanda bihi ñgyañga mwa piñzô mwa ma péka na yañgô mambô maté.
Pilihan Saat Ini:
Mark añgw’a téndé 11: KOQ1938
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
historical text maintained by the British and Foreign Bible Society
