Mark añgw’a téndé 10
10
ÈLUKW’A GYÔÑ (10)
Méntôla.
1Yésu a many’ôkaté, a lwa moñgo mwa Yudé, na mu mwa Yordan munè. Nloñgyè mwa batu mwa son’aminè pi’añgw’a gyi, a hèlè bañgô aminè, ètè y’añgw’a pékaka.
2Ya baFarisi ba ya pi’añgw’a gyi, ba humw’añgô bôsina bw’i nyékaka añgô té: A bé hôñgôlôlô té mutu a ñkwègyèkyè mwagyi wé? 3A hugyè bañgô té: Mosès a yizè bihi té na wé? 4Bañgô té: Mosès a himè té mutu a tèndèkyè ndèn’a méntôla, b’a ñkwègyè mwagyi. 5Ya Yésu a ñgo té: Mosès a gyika bihi gyambô mènè bôsina ménléma myabihi mya gya bugyi. 6Ndé itasé gya héhé, Nzambé a yèbè ndômana na mwétô; 7bôsina mènè ndômana a bé gyikaka hañgwè na nyañgwè, a bètèmè na mwagyi, 8ôkaté bahagyè baba ba bé gyaka nyô èko. Bañgô ndèka batu baba aminè, ndé ba ya nyô èko. 9Mutu a kô patṽèkyè èmpa ya Nzambé a dumañga.
10Sônda ba kwéya ô’lôñkwè, bayôkwè ba humw’añgô aminè gyambô mènè gyoko; 11y’añgw’a ñgo na bañgô té: Mutu a ñkwègyè mwagyi, b’a ba mwétô ipinè, a péka bôkali, a hèlè wa bôhô bôbé. 12Ètè mènè èko, mwétô a manya na mômi, a ba iwaté ndômana, n’ègy’a péka bôkali.
Yésu a sômè basiki.
13Ya ba ya hèlèky’añgô bana basiki i nonoko té a nanamakyè bañgô; ndé bayôkwè ba himpa batu ba y’i hèlèkyè bañgô. 14Sônda Yésu a ñkwènè yumènè, y’añgw’a ñkanya, a ñgo na bañgô té: Gyikakany bana basiki ba yakyè pia ma gyi; bya kô himpakyè bañgô, bôsina batu ba yué nta bañgô, bañgô bé kwéyaka ô’kaka gya Nzambé. 15Mômpô, ma ñgo na bihi té: Mutu ndèka non’i kwéyaka ô’kaka gya Nzambé nta musiki, mwa gyi kwéya ôkaté. 16Y’añgw’a nanè bañgô ñhôkô ô mamama, a hakyè bañgô mabo ô myôlô, a sômè bañgô.
Bôkumani bwa héhé té bwa bé bôhihi.
17Sônda Yésu a kôpwa ñgyèndo, mutu a ya ñhula pi’añgw’a gyi, a tua ô ha makô mègyi, a humw’añgô té: Ñhèlé mwa mpè, gyañgô gyambô gya mpè gya ma pékakyè i gyaka na ndôñga ya mbèy‐mbèy bé ndé? 18Yésu a ñgo n’ègyi té: Ô bañga mè boñ né ndé? Mutu moko a bé boñ, Nzambé ôkay. 19Ô yéba mahéya ma Nzambé: ndèka bôma mutu; ndèka péka makali; ndèka yiba; ndèka yéla mutu gyambô; ndèka péka mutu bôbé; kumèkyè hoñgwè na nyoñgwè. 20Ya mutu mènè a ñgo n’ègyi té: Ñhèlé, ma kolo mambô mènè mahagyè yiñkaka musiki. 21Ya Yésu a ta añgô, b’a non’añgô. Y’añgw’a ñgo n’ègyi té: Èmp’èko ya buk’obè: Lwak’i hômpaka mabomo mobè mahagyè; ihômpô gy’ô bé kwak’ôkaté, wèkyè gyañgô maténdé, nè ô bé gyaka na bôkumani pi’kô; ôkaté ô bé hiñkyèkyè mè. 22Sônda mutu mènè a yôka gyambô mènè, y’añgw’a lumama, a lwa ñkwènè kyèy bukyé, bôsina bw’añgw’a gya na mabomo bukyé.
23Yésu a lwa ta mapôpôkô, a ñgo na bayôkwè bègyi té: Bakumani ba bé bugyi i kwéyaka ô’kaka gya Nzambé, bugyi bunènè mômpô! 24Bayôkwè ba ñkyèkyè mambô mènè. Ndé Yésu a ñgo aminè té: Bana bamè, a bé bugyi bukyé i kwéyaka ô’kaka gya Nzambé. 25A bé lampilampi té samô a yékakyè ô’pôkô gya bôlèñgwè, n’i yékaka té ñkumani a kwéyakyè ô’kaka gya Nzambé. 26Ya ba ñkyèkyè bono aminè, ba lwa soho bamènè a bamènè té: Ndé yumènè, a bé yôñgaka bé nza? 27Ya Yésu a ta bañgô, a ñgo na bañgô té: Gyambô gyité, batu ba kôkyé i péka gyañgô, ndé Nzambé añgô bé na piñzô i pékaka gyañgô; bôsina Nzambé a ba piñzô i pékaka mambô mahagyè.
28Ya Pièr a tas’i ñgo n’ègyi té: Ndé bèhè, bèha gyika bémpa byahô byahagyè, bèha hiñky’obè. 29Yésu té: Mômpô, ma ñgo na bihi té, nloñgyè mwa batu bahagyè ba gyika bélôñkwè, bana ba nyañgwè, bakagyi, banyañgwè, bahañgwè, bana, na makuba, bôsina bwamè na bôsina bwa Ntandô mwa Mpalè, 30ndèka mutu ôkaté a bé gyaka mia maté ndèka kwa bélôñkwè, bana ba nyañgwè, bakagyi, banyañgwè, bana, na makuba, békusi ñkama, na ményuku, a kuky’i kwaka mia ma bôhô ndôñga ya mbèy‐mbèy. 31Ndé batu bukyé ba pia bôhô ba bé huñwaka mpia, na batu bukyé ba pia mpia ba bé lwaka bôhô.
Yésu a tanda iwé gyègyi n’iyômwé gyègyi (èkus’a ñhatô).
32Ba gya ô pèy, ba béta pia Yérusalèm. Yésu a tèmè bôhô, bayôkwè ba loñgo bukyé; n’ibaté batu ba hiñky’añgô, na bañgô ba loñgo boñgo. Y’añgw’a lwa na bayôkwè gyôñ na baba mw’èyumbu, a tas’i tanda bañgô mambô m’añgw’a ya kun’i ñkwèné, a ñgo té: 33Mina béta Yérusalèm; pimènè, ba bé siñgyèkyè Mwana mutu pia baprèt banènè na batèndi ba méndèni; ôkaté ba bé lénaka té a wakyè, ba siñgy’añgô pia makaka mapinè, 34mañgô ma bé gyôkwèky’añgô, ma tutw’añgô matèy ô nyô, ma paz’añgô, ma kuky’i bôm’añgô. Ndé mia mahatô, a bé yômwaka.
Ñhumwa mwa bana ba Zébédé.
35Ya Yakobu na Yôan, bana ba Zébédé, ba hinya pia Yésu a gyi, ba ñgo n’ègyi té: Ñhèlé, bèha nono té ô pékakyè bèhè gyambô gya bèhè bé humwak’obè ôsaté. 36Añgô té: Yañgw’èmpa ya ma pékakyè bihi bé ndé? 37Ya ba ñgo té: Himèkyè té, sônd’ô bé gyaka nèni, bèha béñgyèky’obè, ôté a gyakyè ôbw’a hañgwè, n’iwaté ôbw’a mwagyi. 38Ndé Yésu a hugyè bañgô té: Bya ñgyébé èmpa ya bya humwa. Bya bé na piñzô i ñwaka kopè wa ma ñwa, ni kwaka batèm wa ma kwa wé? 39Ba ñgo té: Bèha bé pékaka. Yésu té: Bya bé ñwaka mômpô kopè wa ma ñwa, ni kwaka batèm wa ma kwa; 40ndé gyambô gy’i gyaka ñsi èpèy y’ôbw’a hañgw’amè ndé y’ôbw’a mwagyi, habé mè a hugyè batu yumènè: batu ba wèbwè masi mènè, bañgô bé hulaka mañgô. 41Ibaté bayôkwè gyôñ ba yôka gyambô mènè, ya ba tasé ñkanya na Yakobu bañgw’a Yôan. 42Ndé Yésu a bañga bañgô, a ñgo na bañgô té: Bya yéba té batu ba kuma ménèni mya makaka, ibaté batu ba péka bañgô béhagyi, bakumani ba kañga batu i kumèkyè bañgô. 43Gya gyi péka yumènè pia bya gyi, ndé mutu a non’i gyaka mut’inènè ô nloñgyè mwabihi, a pékakyè bihi béhagyi; 44na mutu a non’i gyaka bôhô ô nloñgyè mwabihi, a gyakyè nyéka mwa batu bahagyè. 45Bôsina Mwana mutu amènè mu ya ô héhé té, i gyaka té batu ba pékaky’añgô béhagyi, ndé a y’i péka batu béhagyi, a wè ndôñg’ègyi ntañgô mwa batu bukyé.
Yésu a haka Bartimé, ndzimi mwa Yérikô.
46Ya ba hulañga Yérikô. Sônda Yésu a many’aminè ôkaté bañgw’a bayôkwè bègyi na nloñgyè mwa batu munènè, mutw’intôba a gya bé ndzimi, gyino té Bartimé, mwana Timé, a gya ô’pôpôkô a pèy. 47A yôka té Yésu wa Nazarèt, añgô ba yéka nè, y’añgw’a pôtañga byôkyè, a ñgo té: Yésu, Mwana David, ñkwènèkyè mè kyèy! 48Batu bukyé ba pèm’añgô té: kañgaka mwé; ndé a pôtañga aminè na piñzô té: Mwana David, ñkwènèkyè mè kyèy! 49Ya Yésu a tèmè, a ñgo té: Bañgakany añgô. Ba bañga ndzimi, ba ñgo na mwañgô té: Hulèkyè nléma, b’ô tèmè, a bañg’obè. 50Y’añgw’a gyika iñgoy gyègyi ô héhé, a lwa na ñhula kwakwa pia Yésu a gyi. 51Ya Yésu a humw’añgô té: Ô nono ma pékaky’obè ndé wé? Ndzimi té: Ñhèlé, ma him’i ñkwènèkyè. 52Yésu a ñgo n’ègyi té: Lwaka, mabukwè mobè ma yôñgy’obè. 53Èsi mènè èko, a ñkwènè; a lwa hiñkyè Yésu pèy a pèy.
Pilihan Saat Ini:
Mark añgw’a téndé 10: KOQ1938
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
historical text maintained by the British and Foreign Bible Society
