Marako 11

Yesu Odonyo Yerusalem bala Abaka

(Matayo 21.1-11; Luka 19.28-40; Yokana 12.12-19)

1Kakame kinoko kede Yerusalem, di pwodi kitie tetu bomban me Betepage kede Betania, i moru me Olibeti, Yesu oko cwano josiao mege are anyim, 2di ewaco ne gi be, “Wun otunu i calo kame tie anyim ca. Cucuto di itienu donyo iye, ibinunu udo atin me punda di kotweo, kalikame pwodi ngatamoro owanano; gonyenu di ikounu kele. 3Ka ngatamoro openyo wu be, ‘Pinyo komio itienu timo kamano?’, wacenu be, ‘Rwot en kame mite, doko da eyaro mino kodwoke susunyo.’ ”

4Gin kiko ot di kiko udo atin me punda di kotweo i nget ekeko i dog egudo, di kiko gonye. 5Jo kame oudo cungo kuno oko penyo gi be, “Wun itienu timo nyo, kom gonyo atin me punda no?”

6Gin kiko dwoko ne gi kop kame Yesu oudo owaco, di jo nogo oko yei ne gi ot. 7Gin kiko kelo atin me punda nono but Yesu, kiko peto igoen gi ingee, di Yesu oko bedo iye. 8Jo atot oko peto igoen gi i yongayo, apat mege opeto boke kame kitongo ki poti. 9#Sabuli 118.25-26Jo kame oudo telo anyim kede jo kame oudo lube ki cen oko cako lelemo be, “Osana!#11.9 Osana dwong mere be, lak wa nan. Etie kede winyo, ngat kame bino i nying Rwot! 10Etie kede winyo Ajakanut kame tie bino, en ajakanut ka papa wa Daudi! Osana i malo twal!”

11Yesu oko donyo Yerusalem, di eko ot donyo i tempulo eko donyo ngingio jame dedede rimaro. Do kite kame piny oudo oyuto kede, omio en eko ot Betania kede josiao mege tomon kiwie are.

Yesu Olamo Yat Epigi

(Matayo 21.18-19)

12Oru mere di kitie dwogo ki Betania, kec oudo oneko Yesu. 13Di pwodi etie tenge, en eko neno yat epigi kame pote oumo, eko ot kuno pi neno ka oudo etwero udo anyakini mogo iye. Do kakame etuno kede i dude, en eko udo yat nono di tie kede pote kenekene, pien kare me nyak gi oudo pwodi likame otuno. 14En eko waco ne yat nono be, “Likame ngatamoro bobo bino camo anyakini ni!” Josiao mege owinyo di ewaco kop noni.

Yesu Ooto i Tempulo

(Matayo 21.12-17; Luka 19.45-48; Yokana 2.13-22)

15Kakame kituno kede Yerusalem, Yesu oko donyo i tempulo di eko cako riamo jo kame oudo tie cato kede wilo jame ooko; eko rereto imesai me jo kame oudo seso sente, kede gibedo me jo kame oudo cato amam. 16Likame en eko yei ne ngatamoro tero gimoro ngolo kede tempulo. 17#Isaya 56.7; Yeremia 7.11Di do en eko pwonyo gi be, “Mam kowandiko i iwandik kacil be, ‘Kobino lwongo oda be ot me ilega me atekerin dedede?’ Do wun itiekunu loke edoko kapwono me joyak!”

18Kakame jodongo me josaseredoti kede jopwony me Iswil owinyo kede kop noni, kiko cako mono epone me neko Yesu; gin oudo kitie kede lworo i kome, pien ekodet lung oudo ouro pwony mere.

19Di piny oyuto, Yesu kede josiao mege oko yai ki bomba.

Pwony kame oyai ki kom Yat Epigi

(Matayo 21.20-22)

20Oru mere odiko di kitie ot i yongayo, kiko neno yat epigi nono di etieko tuo cako ki wie tuno kiton i aliasin. 21Petero oko yutuno gikame oudo otimere, en eko waco ne Yesu be, “Apwony, neningo yat kame ilamo nono otieko tuo!”

22Yesu oko dwoko ne gi be, “Bedunu kede yei i kom Rubanga. 23#Matayo 17.20; 1 Jokorinti 13.2Ateteni awaco ne wu be, ngat kame waco ne moru ni be emukere di eko ot poto i nam abongo gung i cunye, do di eyei be gikame ewaco nono bino timere, kobino timo ne. 24Pi mano, awaco ne wu be, gi dedede kame ikwaunu i ilega, bedunu kede yei be itiekunu udo gi, di en eko bino bedo meru. 25#Matayo 6.14-15Doko kame itie ilega, di oudo itie kede kop moro arac kede ngatamoro, ber isasiro en, tetekeny Papa ni kame tie malo da ko sasiro in ki gikareco.” 26(“Do kalikame wun isasirunu jo apat, Papa wu me i malo da likame bino sasiro wu.”)

Peny i kom Akarunikin ka Yesu

(Matayo 21.23-27; Luka 20.1-8)

27Gin bobo kiko dok Yerusalem. Kakame oudo Yesu tie ot kede i tempulo, jodongo me josaseredoti, jopwony me Iswil, karacel kede joadongo me piny oko ot bute. 28Gin kiko penye be, “Akarunikin mene en kame in itimo kede gigi? Ngai en komi akarunikin me timo gi?”

29Yesu oko dwoko ne gi be, “Ango ayaro penyo wu peny acel, do ka imianu adwokini mere, ada ako bino waco ne wu akarunikin kame ango atimo kede gi nogi. 30Ber wacanu; akarunikin kame bin Yokana batiso kede jo oudo owok kibut Rubanga, arabo kibut dano?”

31Gin kiko cako piem ken gi ken gi be, “Odwokenu benyo? Ka owacunu be, ‘Ewok ki malo’, en ebino penyo wa be, ‘Do pinyo komio likame ikounu yei en?’ 32Do owacenu benyo, be ewok kibut jo?” Gin oudo kilworo ekodet me jo, pien jo dedede oudo ngeo kiber be Yokana obedo enabi. 33Di do gin kiko dwoko ne Yesu be, “Wan girwa okwia.”

Yesu oko waco ne gi be, “Akadi ada likame abino waco ne wu akarunikin kame ango atie timo kede gi nogi.”

Pilihan Saat Ini:

Marako 11: BILKDC13

Sorotan

Berbagi

Salin