Marako 10
10
Yesu Opwonyo kop kame mako Gonyo Nyom
(Matayo 19.1-12; Luka 16.18)
1Di Yesu oko yai ki kuno eko ot i adul me Yudea, en eko ngolo ecilet me Yorodan. Jo atot bobo oko cokere bute, en eko pwonyo gi bala kite kame lem oudo enare timo kede sek.
2Iparisayon mogo oko bino bute pi kino doge di kiko penye be, “Iswil wa yei ne dano riamo dako mere?”
3Yesu oko lunyo penyo gi be, “Nyo kame bin Musa ociko ne wu?”
4 #
Iswilia 24.1-4; Matayo 5.31 Gin kiko dwoko be, “Musa bin oyei ne icuo wandiko baluwa me gonyo nyom di en eko riamo dako mere.”
5Yesu oko dwoko ne gi be, “Musa bin owandiko Iswil gi piru pien pwonyo wun tek. 6#Ageini 1.27; 5.2Do i agege, i kare me cwec, iwandik kacil waco be, ‘Rubanga ocweo gi icuo kede dako. 7#Ageini 2.24Pi manoni, icuo bino weko papa mere kede toto mere, di en eko ribere kede dako mere, 8gin jo are go kiko doko kom acel.’ Aso, udo likame doko kitie jo are. 9Pi mano, gikame Rubanga otieko ribo karacel, kur ngatamoro poki.”
10Di do kidok i ot, josiao oko bobo penyo Yesu i kom kop noni. 11#Matayo 5.32; 1 Jokorinti 7.10-11En eko waco ne gi be, “Icuo kame riamo dako mere di eko nyomo dako ace, udo etimo adote. 12Iepone nono da, dako kame pokere kede cware di en eko ot nyomere kede icuo ace, udo eda etimo adote.”
Yesu Omio Idwe Atino Winyo
(Matayo 19.13-15; Luka 18.15-17)
13Jo oko donyo kelo idwe atino but Yesu me wek eket cinge i kom gi, do josiao oko donyo cokocoko gi be kiweki. 14Do kakame Yesu oneno kede kamano, cunye oko wang, di en eko waco ne josiao mege be, “Wekunu idwe atino bin buta, kur igengunu gi, pien Ajakanut ka Rubanga tie pir jo kame cal bala gin. 15#Matayo 18.3Ateteni awaco ne wu be, ngat kalikame gamo Ajakanut ka Rubanga bala atin atitidi, likame ebino donyo iye.” 16En eko tingo gi i kore, eko keto cinge i wi gi, di eko mino gi winyo.
Icuo Kobaro
(Matayo 19.16-30; Luka 18.18-30)
17Di Yesu oudo tie yai ot, icuo moro oko ringini oko riondiko i nyime, di oko penye be, “Apwony aber, atim nyo me wek aud kuo kame bedo nakanaka?”
18Yesu oko penye be, “Pinyo komio in ilwonga be ngat aber? Likame tie ngat aber kwanyo Rubanga kenekene. 19#Yai 20.12-16; Iswilia 5.16-20Mam in ingeo cik gi: ‘Kur ineko, Kur itimo adote, Kur ikwalo, Kur imio ijura me abe, Kur isero, Wor papa ni kede toto ni?’ ”
20Loca oko dwoko be, “Apwony, ango abedo gwoko cik go dedede cako di pwodi ango eponga.” 21Yesu oko ngine di oko bedo kede amara bute, di oko waco ne be, “In idong kede gi acel kame ipoore timo; oti icat jame dedede kame itie kede, di iko mino jocan sente kame iudo, di iko bino bedo kede abar i malo, di do iko bino luba.” 22Kakame icuo nono owinyo kede kop no, en eko jul di eko ot tenge di cunye owang, pien oudo ebaro twatwal.
23Yesu oko ngoloro josiao mege di en eko waco ne gi be, “Ebino tin bedo tek benyo ne jo kobaro donyo i Ajakanut ka Rubanga.”
24Kop noni oko neko kom josiao. Do Yesu bobo oko waco ne gi be, “Idwe na, donyo i Ajakanut ka Rubanga tin tek benyo! 25Eyoyot ne aguragura donyo ki wang piso kalamo ngabar donyo i Ajakanut ka Rubanga.”
26Man oko medo neko kom josiao, kiko penyo Yesu be, “Ngai do kame twero udo alako?”
27Yesu oko ngino gi di eko waco be, “Man likame twerere kibut dano, do weko kibut Rubanga, pien kibut Rubanga gi dedede twerere.”
28Di Petero oko cako waco ne be, “Neningo, wan oweko gi dedede di oko lubi.”
29Yesu oko waco ne gi be, “Ateteni awaco ne wu be, ngat kame weko paco mere, imiegu kede amiegu mege, amotoko toto kede papa mere, idwe mege kiton poti mege pira kede pi ejiri, 30ebino udo gi nogi dedede tien tol acel i kare kanataman; ebino udo ude, imiegu kede amiegu mege, joatoti, idwe kede poti karacel kede itidil da, di en eko bino udo kuo kame bedo nakanaka i kare koyaro bino. 31#Matayo 20.16; Luka 13.30Do jo atot kame nataman tie me agege bino bedo me ajikini, kede jo kame nataman tie me ajikini bino bedo me agege.”
Yesu Owaco kop me To mere Tien me Adek
(Matayo 20.17-19; Luka 18.31-34)
32Yesu kede josiao mege oudo tie i yongayo me ot Yerusalem, en oudo etelo ne gi yongayo. Josiao mege oko uro adikinicel, kede jo koudo lubo gi da oko bedo kede lworo. En doko eko tero josiao tomon kiwie are tenge kargi ken gi, di en eko cako tatamo ne gi kop i kom gikame oudo oyaro timere ne 33di ewaco ne gi be, “Winyunu, wan otienu ot Yerusalem, di jo ko bino mino Wot ka dano i cing jodongo me josaseredoti kede jopwony me Iswil. Gin kibino ngolo ne kop me to, di kiko mine i cing jo kalikame Iyudayan, 34di gin kiko bino timo ne tim me anywar; kibino ngulo lau i kome di kiko dane di kiko neke da, do ingei ceng me adek en ebino yaruno.”
Gikame Yakobo kede Yokana Okwao kibut Yesu
(Matayo 20.20-28)
35Yakobo kede Yokana, kame oudo obedo awobe ka Sebedayo oko bino but Yesu di kiko waco ne be, “Apwony, wan omito be itim ne wa gikame oyaro kwani.”
36Yesu oko penyo gi be, “Nyo inonono kame imitunu be ango atim ne wu?”
37Gin kiko waco ne be, “Kame idonyo i deyo ni, mi ngat acel kikom wa bed i badi tetu cam kede ngat ocelu i badi tetu ngodal.”
38 #
Luka 12.50
Do Yesu oko waco ne gi be, “Wun likame ingeunu gikame itienu kwano. Benyo, itwerunu wuda mato ikopo me can kame miero ango amati? Arabo, itwerunu yei udo batisimu kame miero batiso ango kede?”
39Gin kiko dwoko ne be, “Wan otwero.” Yesu oko waco ne gi be, “Ateteni ibinunu mato ikopo me can kame miero ango amati, doko da kobino batiso wu kede batisimu kame miero batiso ango kede. 40Do ango likame atie kede akarunikin me mino ngatamoro bedo i bada tetu cam amotoko tetu ngodal. Do kabedo nogi tie pi jo kame kotieko iiko ne gi.”
41Kakame josiao icegun tomon owinyo kede kop noni, kiko lilo kede Yakobo kede Yokana. 42#Luka 22.25-26Yesu oko lwongo gin dedede bute, di eko waco ne gi be, “Wun ingeunu be jo kame poore pugo jo kalikame Iyudayan pugo gi tetek, doko da jodongo gi tie kede akarunikin i kom gi. 43#Matayo 23.11; Marako 9.35; Luka 22.26Do man likame epone kame miero ebed kede i diere wu. Do ngat kame mito bedo dano kame pire dwong kikom wu, miero ebed ngatic wu, 44doko ngat kame mito bedo dano me agege i diere wu, miero ebed epasoit me jo icegun. 45Pien Wot ka dano da likame obino pi jo timo ne tic, do en ebino pi timo tic ne jo icegun kede pi jalo kuo mere pi lako jo atot.”
Yesu Ocango Emuduk kame Nyinge Batulumayo
(Matayo 20.29-34; Luka 18.35-43)
46Gin kiko tuno Jeriko. Esawa kame Yesu kede josiao mege oudo tie yai kede ki Jeriko karacel kede ekodet adwong me jo, emuduk moro kame oudo maro kwac kame nyinge Batulumayo wot ka Timayo oudo tie bedo i nget yongayo. 47Kakame ewinyo kede be Yesu me Nasaret oudo inonono, en eko cako lelemo be, “Okwe Yesu Wot ka Daudi, mi kisa maki keda!”
48Jo atot oko donyo cokocoko en di kiwaco ne be elingi, do en eko meede ameda ilelem di ewaco be, “Okwe Wot ka Daudi, mi kisa maki keda!”
49Yesu oko cungo di eko waco be, “Lwongenu ebin.” Kikano gin kiko lwongo emuduk nono di kiwaco ne be, “Dii cunyi, yai malo, en etie lwongi.”
50En eko uco egoe mere me adoka, eko lepun malo di eko ot but Yesu.
51Yesu oko penye be, “Imito be atim ni nyo?” Emuduk nono oko dwoko be, “Apwony, mi wanga nen piny.”
52Yesu oko waco ne be, “Ot do; yei ni ocangi.” Cucuto wange oko cako neno piny di do en eko cako lubo Yesu.
Pilihan Saat Ini:
Marako 10: BILKDC13
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Baibuli I Leb Kumam © Bible Society of Uganda, 2013.
