JOHN 13

Jesus Eyet Mbet Esie Ukot

1KE ini usɔrɔ Passover mitɔŋɔke kaŋa, Jesus ɔfiɔk ete ekem ini nte Imɔ idikpɔŋde ererimbot emi inyɔŋ itiene Ete; ndien ke erima emi Enye amade ikɔt Esiemɔ emi edude ke ererimbot, Enye ama mmɔ tutu akpatre. 2Ndien ke ini udia mbubreyo, ke Satan ama okotop ekikere esin ke esit Judas Iscariot eyen Simon ete, ada Enye ɔnɔ; 3sia Jesus ɔfiɔkde ete Ete amayak kpukpru ŋkpɔ esin Imɔ ke ubɔk, Imɔ ikonyuŋ ito Abasi, inyuŋ inyɔŋ itiene Abasi, 4Enye adaha ke itie-udia, osio ɔfɔŋ-idem Esie onim ŋkaŋ kiet, onyuŋ ada ukwɔhɔre-idem awaŋ ke ŋkuk. 5Ndien Enye ɔtɔhɔ mmɔŋ esin ke akpaŋkpaŋ, onyuŋ ɔtɔŋɔ ndiyet mbet Esie ukot nnyuŋ nda ukwɔhɔre-idem emi Enye awaŋde ke ŋkuk ŋkwɔhɔre mmɔ ukot. 6Ntre ke Enye edisim Simon Peter. Enye oro obup Jesus ete, Ɔbɔŋ, nte ɔmɔŋ eyet mi ukot? 7Jesus ɔbɔrɔ enye ete, afo ufiɔkke se erinam Mi ɔwɔrɔde ke emi; edi eyefiɔk usuk-usuk. 8Peter ete Enye, Uduyetke mi ukot. Jesus ɔbɔrɔ enye ete, Edieke mmenyetke fi, afo usuaŋake ŋkpɔ ye Ami. 9Simon Peter ete, Enye, Ɔbɔŋ, kuyet mi ukot ikpɔŋ edi, yet mi ubɔk ye ibuot kɔrɔ do. 10Jesus ete enye, Owo ama ekeyere mmɔŋ, enye inyeneke nditɔŋɔ ntak nyere, ibɔhɔke ndiyet ukot esie, edi asana ofuri-ofuri: ndien mbufo emesana, edi idige kpukpru mbufo. 11Koro Enye ɔdiɔŋɔ owo eke edidade Enye ɔnɔ; oro esin Enye ɔdɔhɔ ete, idige kpukpru mbufo esana.

12Ntre ke Enye ama ekeyet mmɔ ukot, onyuŋ esine ɔfɔŋidem Esie, ɔsuhɔre etetie, Enye ete mmɔ, Nte mbufo emefiɔk se ŋkanamde mbufo? 13Mbufo ekot Mi Andikpep ye Ɔbɔŋ, ndien emetim ekot, koro ndide se edɔhɔde. 14Edieke ami ndien, emi ndide Ɔbɔŋ ye Andikpep, ŋkeyetde mbufo ukot, mbufo nde ekpeyet kiet eken ukot. 15Koro mmɔnɔ mbufo uwut-ŋkpɔ nte, mbufo nde enam kpa nte Ami ŋkanamde mbufo. 16Ke akpanikɔ ke ndɔhɔ mbufo, asaŋutom ikponke ikan ete-ufɔk, isuŋutom inyuŋ ikponke ikan andidɔŋ enye utom. 17Edieke mbufo efiɔkde mme ŋkpɔ emi, ɔfɔfɔn ɔnɔ mbufo ke mbufo enamde mmɔ. 18Ntiŋke mbaŋa mbufo kpukpru; mmɔfiɔk mmɔ emi ŋkemekde: edi ŋkpɔ etie ntem man osu nte ewetde ete, Adia-udia Mi osio ukot atiga Mi. 19Ntɔŋɔ adaŋemi nditiŋ nnɔ mbufo, ke ini ŋkpɔ emi miwɔrɔke isu kaŋa, man ke ini ediwɔrɔde osu, mbufo ekponim ke akpanikɔ ete Ami ndi Enye. 20Ke akpanikɔ ke ndɔhɔ mbufo, Owo eke adarade isuŋ ekededi eke ndidɔŋde adara Mi; ndien owo eke adadare Mi adara Enye emi ɔkɔdɔŋde Mi.

21KE Jesus ama eketiŋ ntem; spirit otimere Enye, Enye onyuŋ ɔsɔŋ uyo ɔdɔhɔ ete, Ke akpanikɔ ke ndɔhɔ mbufo nte, Owo kiet ke otu mbufo eyeda Mi ɔnɔ. 22Mbet ese kiet eken, eyik mme Enye etiŋ abaŋa anie. 23Mbet kiet emi Jesus amade odu ke okpokoro, etie ebere Jesus ke ikpanesit. 24Simon Peter anam idiɔŋɔ ke ibuot, ete enye, Sian nnyin mme anie ke Enye etiŋ abaŋa. 25Ntre ke enye oro afiak ebere Jesus ke ikpanesit ntem, onyuŋ obup Enye ete, Ɔbɔŋ anie edi oro? 26Jesus ɔbɔrɔ ete, Edi enye emi ndidebide uyo nyak nnɔ enye. Ntre ke Enye ama ekedebi uyo, emen ayak ɔnɔ Judas, eyen Simon Iscariot. 27Ndien ke Judas ama ɔkɔbɔ uyo oro, ekem Satan oduk enye esit. Ntem ke Jesus ɔdɔhɔ enye ete, Wara nam se aduakde ndinam. 28Edi baba owo kiet ke okpokoro ifiɔkke ntak eke Jesus ɔdɔhɔde enye ntem. 29Koro ndusuk mmɔ ese ete, sia Judas akamade ekpat okuk, Jesus ɔnɔ enye uyo ete, Dep se iyomde inɔ usɔrɔ; midige, nɔ nditɔ-ubuene ŋkpɔ. 30Ndien ke enye ama ɔkɔbɔ uyo oro, enye ɔwɔrɔ idaha oro. Ndien edi okoneyo.

31Ke enye ama ɔkɔwɔrɔ, Jesus ɔdɔhɔ ete, Eyen Owo ɔkɔbɔ ubɔŋ ke emi, Abasi okonyuŋ ɔbɔ ubɔŋ ke idem Eyen. 32Abasi eyenyuŋ ɔnɔ Enye ubɔŋ ke Idem Esie, onyuŋ ɔnɔ Enye ubɔŋ ke idem idahemi. 33Ŋkpri nditɔ, nnyene ndidu ye mbufo kaŋa ke ekpri ini. Mbufo eyeyom Mi: ndien, kpa nte ŋkɔhɔde mme Jew nte, Mbufo ikemeke ndisim ɔtɔ nte ŋkade, ndɔhɔ mbufo suk ntre ke emi. 34Mmɔnɔ mbufo obufa ibet nte, Mbufo ema kiet eken; nte, mbufo nde ema kiet eken kpa nte ŋkamade mbufo. 35Mbufo ema ema kiet eken, kpukpru owo eyeda oro efiɔk ete mbufo edi mbet Mi.

36Simon Peter obup Enye ete, Ɔbɔŋ, Afo akaka mmɔŋ? Jesus ɔbɔrɔ ete, Ukemeke nditiene Mi ŋka ɔtɔ nte ŋkade ke emi; edi eyetiene Mi usuk-usuk. 37Peter ete Enye, Ɔbɔŋ, nsidi ntak eke mme-ndikemeke nditiene Fi ke idem idahemi? 38Nyeyak uwem mi nduɔk kabaŋa Fi. Jesus ɔbɔrɔ enye ete, Nte eyeyak uwem fo ɔduɔk kabaŋa Mi? Ke akpanikɔ ke ndɔhɔ fi, Ekikɔ idikpɔkke tutu afo akaŋ Mi utim ikata.

Pilihan Saat Ini:

JOHN 13: ENA

Sorotan

Berbagi

Salin