JOHN 12

Mary Eyet Jesus Nsɔŋ-urua Aran Ke Bethany

(Mt 26.6-13; Mk 14.3-9)

1OSUK usen itiokiet ndien edikem ini Passover, Jesus edi ke Bethany, ebiet emi Lazarus oduŋde do, kpa owo emi Enye akanamde eset ke mkpa. 2Ntem ke mmɔ enam udia enɔ Enye do; Martha onyuŋ ada mbet, edi Lazarus edi kiet ke otu mmɔ emi etiede ye Enye. 3Ekem Mary ada ata nsɔŋ-urua edifuɔŋ aran spikenard, ke udop pound kiet, eyet Jesus ukot. Onyuŋ ada idet esie ɔkwɔhɔre Enye ukot: ndien ufɔk ɔyɔhɔ ye edinem ufuɔŋ aran oro. 4Edi Judas Iscariot, owo mbet Esie, emi edidade Enye ɔnɔ, ɔdɔhɔ ete, 5Nsinam mikanyamke edifuɔŋ aran emi ibɔ okuk ikie ita, ida inɔ mme ubuene? 6Edi enye idɔhɔke ntem koro enye ekerede mme ubuene; edi ɔdɔhɔ koro enye edide inɔ, onyuŋ akamade ekpat okuk, onyuŋ ososio se isinede ke esit. 7Ntem ke Jesus ete, Ekpɔŋ enye; yak enye onim emi ebeŋe usen eke edibukde Mi. 8Koro mbufo emenyene mme ubuene ye mbufo kpukpru ini; edi mbufo inyeneke Mi kpukpru ini. 9Ntre ke akwa otu mme Jew efiɔk ete Enye do; ndien mmɔ edi, idige ke ntak Jesus ikpɔŋ, edi man mmɔ enyuŋ ekut lazarus, emi Enye akanamde eset ke mkpa. 10Edi ikpɔ oku eduk odu, ete iwot Lazarus ŋko, 11koro oto ke ntak esie ediwak mme Jew edaha ebuɔt idem ye Jesus.

12Ke ndaŋ-nsiere ke adaŋemi akwa otu owo eke ekedide usɔrɔ ekopde ete Jesus ɔmɔŋ edi ke Jerusalem, 13mmɔ eda ndak eyop ewɔŋɔ eka ekosobo ye Enye, enyuŋ efiori ete,

Hosanna:

Itoro enyene Enye emi edide ke enyiŋ Jehovah,

Kpa Edidem Israel.

14Edi ke ini Jesus okutde abak ass, Enye ɔdɔk odoro ke esit: nte ewetde ete,

15Kufehe, Adiaha Zion:

Sese, Edidem fo ke odoro

Ke abak ass edi.

16Mbet Esie ifiɔkke se ŋkpɔ emi ɔwɔrɔde ke idaha oro: edi ke ini ema ekɔnɔ Jesus ubɔŋ, adaŋoro mmɔ eti ete ema ewet ŋkpɔ emi ebaŋa Enye, enyuŋ enam ŋkpɔ emi enɔ Enye. 17Ntem ke otu owo emi ekedude ye Enye ke ini Enye okotde Lazarus ɔwɔrɔ ke udi anam enye eset ke mkpa, etiŋ se mmɔ ekekutde. 18Ke ntak emi ŋko udim owo eka ekesobo ye Enye, sia mmɔ ekopde ete Enye akanam idiɔŋɔ emi. 19Ntem ke mme Pharisee eneme ke otu idem mmɔ ete, Ese do, mbufo ikemeke ŋkpɔ: sese, ererimbot ama adaha etiene Enye.

20Ndusuk mme Greek enyuŋ edu ke otu mmɔ emi ekedɔkde edi ndituak ibuot nnɔ Abasi ke usɔrɔ; 21mmɔ etiene Philip, emi otode ke Bethsaida ke Galilee, ekebup enye ete, Ɔbɔŋ owo, nnyin iyom ndikut Jesus. 22Philip aka ekeneme ɔnɔ Andrew; Andrew asaŋa ye Philip aka eketiŋ ɔnɔ Jesus. 23Jesus ɔbɔrɔ mmɔ ete, Ekem ini emi Eyen Owo edinyenede ubɔŋ. 24Ke akpanikɔ ke ndɔhɔ mbufo, Adaŋa nte mkpasip ibokpot miduɔhɔ isine ke esit isɔŋ ikpa, enye osuk odu ke idem esie ikpɔŋ; edi enye ama akpa, oŋwum ekese mfri. 25Owo eke amade uwem esie ɔduɔk uwem esie; edi owo eke asuade uwem esie ke ererimbot emi eyemum uwem esie onim tutu osim uwem nsinsi. 26Edieke owo ekededi anamde ŋkpɔ ɔnɔ Mi, yak enye etiene Mi; ndien ebiet eke Ami ndude, asaŋutom Mi edidu do ŋko. Edieke owo anamde ŋkpɔ ɔnɔ Mi, Ete Mi eyekpono enye. 27Ukpɔŋ otimere Mi ke idem ke emi, ndien ndidɔhɔ nso? Ete, nyaŋa Mi sio ke ubɔk ini emi? Edi mma nsim ini emi ke ntak emi. 28Ndɔhɔ nte, Ete, nɔ enyiŋ Fo ubɔŋ.

Ntre ke uyo oto ke enyɔŋ ete, Mma ŋkɔnɔ enyiŋ Mi ubɔŋ, nyenyuŋ ntɔŋɔ ntak nnɔ enye ubɔŋ. 29Otu owo emi edade do ekop, edɔhɔ ete, Enyɔŋ atuak: mmɔ efen ete, Angel eketiŋ ikɔ ye Enye. 30Jesus ɔbɔrɔ mmɔ ete, Uyo oro ikedige kabaŋa Mi edi ekedi kabaŋa mbufo. 31Ekem ini ikpe ererimbot emi: ke emi emɔŋ edisio ɔbɔŋ ererimbot emi eduɔk 32Ndien Ami, ke ema emen Mi ekpɔŋ isɔŋ, nyedudi kpukpru owo etiene Mi. 33Enye etiŋ ntre ndiwut oruk mkpa eke Enye edikpade. 34Ntem ke otu owo ebɔrɔ Enye ete, Nnyin ima ikop nte edɔhɔde ke ibet, ete Christ eyesuk odu ke nsinsi: ndien Afo anam didie ɔdɔhɔ ete, Enyene ndimen Eyen Owo ke enyɔŋ? anie edi Eyen Owo emi? 35Mmɔdo Jesus ɔbɔrɔ mmɔ ete, Uŋwana eyesuk odu ye mbufo ke ekpri ini. Esaŋa ke adaŋemi mbufo enyenede uŋwana, mbak ekim edisim mbufo; koro owo eke asaŋade ke ekim ifiɔkke ɔtɔ nte enye akade. 36Ke ini mbufo enyenede uŋwana, ebuɔt idem ye uŋwana, man mbufo ekabare edi nditɔ uŋwana. Jesus eketiŋ ŋkpɔ emi, onyuŋ adaha okodibe mmɔ. 37Edi okposuk edi oro Enye akanamde adaŋa uwak-uwak mme idiɔŋɔ ke iso mmɔ, mmɔ ibuɔtke idem ye Enye: 38man ikɔ emi prophet Isaiah ɔkɔdɔhɔde osu ete,

Ɔbɔŋ, anie okonim mbuk nnyin ke akpanikɔ?

Ubɔk Jehovah ama onyuŋ ayarare ɔnɔ anie?

39Ke ntak emi mmɔ ikemeke ndinim ke akpanikɔ; koro Isaiah ɔtɔŋɔ ntak ɔdɔhɔ ete,

40Enye okotibi mmɔ enyin, onyuŋ ɔsɔŋ mmɔ esit;

Mbak mmɔ edida enyin mmɔ ekut usuŋ, enyuŋ eda esit mmɔ ekere ŋkpɔ,

Enyuŋ ekabare, ndien nnam udɔŋɔ okure mmɔ.

41Isaiah eketiŋ ikɔ emi koro enye okutde ubɔŋ Esie; enye ama onyuŋ etiŋ ŋkpɔ abaŋa Enye. 42Edi kpa ke otu mme andikara ediwak owo ebuɔt idem ye Enye; edi ke ntak mme Pharisee mmɔ iyarakere iwut, mbak edibin mmɔ esio ke synagogue. 43Koro mmɔ emama ubɔŋ eke otode owo akan ubɔŋ eke etode Abasi.

44Edi Jesus ofiori ɔkpɔsɔŋ ete, Owo eke ɔbuɔtde idem ye ami ibuɔtke idem ye Ami, edi ɔbuɔt ye Enye emi ɔkɔdɔŋde Mi: 45ndien owo eke okutde Mi okut Enye emi ɔkɔdɔŋde Mi. 46Mmedi nte uŋwana ke ererimbot, man owo ekededi eke ɔbuɔtde idem ye ami okusuk odu ke ekim. 47Ndien edieke owo ekededi okopde mme ikɔ Mi, onyuŋ etrede ndimum mmɔ ŋkama, ami mbiereke ikpe nnɔ enye: koro ŋkedige ndibiere ikpe nnɔ ererimbot, edi ŋkedi ndinyaŋa ererimbot. 48Owo eke esinde Mi, onyuŋ etrede ndibɔ ikɔ Mi nda, enyene andibiere-ikpe esie: ikɔ eke ŋketiŋde, kpa ikɔ oro edibiere ikpe ɔnɔ enye ke akpatre usen. 49Koro Ami mmeŋketiŋke ŋkpɔ ke uyo Idem Mi; edi Ete emi ɔkɔdɔŋde Mi ke Idem Esie ɔkɔnɔ Mi item abaŋa se ŋkpɔdɔhɔde ye se ŋkpetiŋde. 50Ndien mmɔfiɔk nte item Esie edi uwem nsinsi: mmɔdo mme ŋkpɔ eke etiŋde, ntiŋ kpa nte Ete ɔkɔnɔde Mi uyo.

Pilihan Saat Ini:

JOHN 12: ENA

Sorotan

Berbagi

Salin