Baɗitari 22
22
Hyel Ku Ngkərtə Hamta Jiri Ar Ibrahim
1Aghəla tə suayeri ngəni ku təramta, antə Hyel ku ngkərtə Ibrahim. Tsa pəla alari, “Ibrahim!” Antə Ibrahim ndəra ka pəla, “Naam, nggədza ra.”
2Antə Hyel pəla, “Kətə ɓzər nga Ishaku, ɓzər ngə na duku ɗeng ni, natə gə hirhirni ni, kara mwari akwa tsəɗi Moriya, ka gə hamta ni saɗaka mbamba, ata kəra pal akwa nca garayeri tə I ata ncanta ala ga.”
3Səɓəla ɗəpari ɗəɗəpə mbing, antə Ibrahim thlatə ka putə libaru ata kwararni, ka fatə mji suɗa akwa nca buɗayeri arni, ka ɓzərni Ishaku. Antə tsa nthlətsə udzəmər hamta saɗaka mbamba ni, ka psi laku kamnyar mwari akwa vəi tə Hyel pəla alari ni. 4Akwa vir na makərkur, antə Ibrahim haptə ncari ka wutə vəi ni ciju anda. 5Antə tsa pəla aka buɗayeri ni, “Ndzəndzi giri azi kəga kwara ni. Ar yeru ka ɓzər ni, yeru ata ləkəma anda ka yeru vəngkər səli aka Hyel, kambəla yeru ngka adzə giri.”
6Antə Ibrahim ku kətə udzəm ar hamta saɗaka mbamba ni, ka vəngkər aka ɓzərni Ishaku. Antə arni tsa kətə u'u ka ingdla. Antə japwa ɗa ku təra ata kəma duku. 7Antə Ishaku pəla aka baba'ni Ibrahim abbər, “Baba!”
Antə Ibrahim ndər ka pəla, “Naam, nggədza ra ɓzərna.”
Antə Ishaku pəla, “Nggədza u'u, tsuwa nggədza udzəm, amma gam ar hamta saɗaka mbamba ni ama ri?”
8Antə Ibrahim pəla alari abbər, “Hyel ka kərari surni ata hamta ɓzər gam tə mda ata hara saɗaka mbamba ni kəgari, ɓzərna.” Antə japwa ɗa ku təra ata kəma duku.
9Sakatə da ku mzhitə vəi tə Hyel pəla alari ni, antə Ibrahim namtə bagaɗi, ka putə udzəm ni ata kər. Antə tsa mbwahə ɓzərni Ishaku, ka vətə ni ata bagaɗi ni, na ata kəra udzəm ni. 10Antə Ibrahim ndərar tsiyari, ka kətə ingdla ni ka tsa thlamta wulya ɓzərni ni kəgari. 11Amma mdərthlentərhyel ar MTHLAKU ku ndəra akwa vəi na amtazi ka pəla abbər, “Ibrahim! Ibrahim!”
Antə tsa pəla, “Naam, nggədza ra.”
12Antə tsa pəla, “Ga aɗiya tsəkwar ɓzərni wa, wala hara alari su laga wa. Kamnyar kulini I ku sənda abbər gə mdər thlivər Hyel, təng tə ga aɗi ngkata ali ɓzər ngə ni wa, ɓzər nga na duku ɗeng ni.”
13Antə Ibrahim haptə ncari, ka wul vəi na kalaktə ni, təng nggədza gam laga akwa dlədləku, ka təmbəlayerari nggəla akwa nca dlədləku ni.
Antə Ibrahim mwari, ka kəɓəla ni, ka si ka hamta saɗaka mbamba kəgari ata vəya ɓzərni ni. 14Antə Ibrahim ku vətə thləm aka vəi nda abbər “MTHLAKU ata hamtari.” An su hara tə har ba ashina mda ana pəla, “Ata kəra gar ar MTHLAKU tsa ata hamtari.”
15Antə mdərthlentərhyel ar MTHLAKU na amtazi kəga Ibrahim, kəga na suɗkur 16abbər, “MTHLAKU pəla, ‘I ku kahyel ka thləmi abbər təng tə gə na Ibrahim ku hara su ngəni, tə ga aɗi ngkata ali ɓzər nga na duku ɗeng ni wa, 17to jiri, I ata vədza ala gə barka. Tsuwa I ata hara ka kəkayeri ar nga ndzi hang apa sasəlkayeri na ata kutahyel, ka tsuwa apa wuyakər mnya manda. Kəkayeri ar nga ata səm dawayeri arɗa ka fatə kifər bərniyayeri arɗa. 18Tsuwa atar kəkayeri ar nga antə mjir duniya ata sə wutə barka, kamnyar ga ku kələngkər ali.’ ”
19Antə Ibrahim ku ngka adzə buɗayeri ni, antə da ku ngka ahar Beyersheba ata kəma duku. Antə Ibrahim ku ndzəndzi akwa Beyersheba.
Kəkayeri Ar Nahor
20Aghəla saka laga raka antə mji pəla aka Ibrahim abbər, “Nggədza Milka na mwalar ɓzərma' nga Nahor ku yaɓəla alari maɗankyar. 21Uz an yarakəmar Nahor, Buz an akwa nu ni, kambəla Kemuwel na baba' Aram. 22Na bwaduku tsuwa an Kesed, ka Hazo, ka Pildash, ka Yidlaf, ka Bethluwel.” 23Antə Bethluwel ku yaɓəla Rubeka. Milka yaɓəla shanga maɗashili ngəni ncisu ni aka Nahor na ɓzərma' Ibrahim. 24Tsuwa ngkwar kəyir Nahor na ka thləmari Reyuma ku yaɓəla alari maɗashili nfwar, natə da an Teba, ka Gaham, Tahash, ka Maaka.
Pilihan Saat Ini:
Baɗitari 22: KNB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.