Baɗitari 21
21
Saratu Ku Yaɓəla Ishaku
1Antə MTHLAKU ku mwari adzə Saratu apatə tsa ku pəla akwa saka na təramta, ka hara alari apatə tsa ku hara alari alkawalari. 2Antə Saratu ku kətə hur ka yaɓəla ɓzər sal aka Ibrahim akwa halhalkurərni, tsu akwa sakatə Hyel pəla alari ni. 3Antə Ibrahim vətə thləm aka ɓzərni natə Saratu yaɓəla alari ni abbər Ishaku. 4Sakatə Ishaku ka vir ncisu ka yarni, antə Ibrahim thlamta alari kaciya apatə Hyel ku tsawa alari. 5Tsuwa Ibrahim ka məvari aru pal sakatə mdə yaɓəla alari ɓzərni Ishaku. 6Antə Saratu pəla, “Hyel ku hara tə I ku kumshi. Tsuwa kəlara mdə na ku nggata ata kər ata dlar ra akwa kumshi ni.” 7Antə Saratu jaktə pəla, “Waci wan ata mzhi pəla aka Ibrahim abbər Saratu ata sə hamnya uwa aka maɗankyar ja? Amma nggədza I ku yaɓəla alari ɓzər sal akwa halhalkurərni!”
8Antə ɓzəngkyar ni ku kəla ka hara ola, tə mdə ku kəli ni ata uwa. Antə vir tə mdə kəli ni ni, Ibrahim ɗəmhə susəmər kucali na ola.
Saratu Ku Kədləmta Hagar Ka Ishmayel
9Vir laga Saratu wutə Ishmayel na ɓzər Hagar na ngkwar Masar ni akwa kumshi Ishaku na ɓzərni, 10antə tsa pəla aka Ibrahim abbər, “Kədləmta mwala mafa ngəni ka tsa təra ka ɓzərni ni. Kamnyar ɓzər mwala mafa ngəni aɗi ata sə ndzi ata kəra kifər nga ka Ishaku na ɓzərna wa.”
11Antə su ngəni ku ɓzamtə ɗəffa Ibrahim ka duna, kamnyar wala Ishaku ni ma ɓzərni. 12Amma Hyel pəla aka Ibrahim, “Ga aɗiya damitədzi ata kəra ɓzəngkyar ni ka mwalar ngə na mafa ni wa. Ar nga kəlara su tə Saratu ku pəla ala ga, ka gə hara. Kamnyar atar Ishaku antə mda ata sə jika kəkayeri ar nga. 13Tsuwa ar ɓzər mwala mafa ni, I ata hara ka kəkayeri arni hara hang ka ndzi dur na ola, kamnyar wala tsa ma tsa ɓzər nga.”
14Antə Ibrahim ku thlatə səɓəla ɗəpari ɗəɗəpə mbing, ka kətə buradi ka yimi akwa zamzamiya, ka na aka Hagar, tsa puta alari ata pathlaha mwala ni, ka na alari ɓzərni ni, ka vu ni akwa laku. Antə mwala ni ku təra, ka ləkwa kadla akwa mtakər Beyersheba.
15Sakatə yimi na akwa zamzamiya ni ku kuri, antə tsa zhar ɓzər ni akira nfu laga raka, 16ka təra ka ra ndzəndzi catu kazhar ɓzərni, ata vəi laga apa cijukur ar shi afa. Kamnyar tsa pəla, “I aɗi ata mzhi nggitə wul mtər ɓzər ni wa.” Sakatə mwala ni ku ndzəndzi cijuwa kazhar ɓzərni antə mwala ni haptə kurakari akwa tuwa ka shimwi.
17Aghəla nda tsuwa təng Hyel nggatə ɓzər ni akwa tuwa, antə Hagar nggatə kuraka mdərthlentərhyel amtazi akwa kəga ni ka pəla alari, “Man akwa damitə ngə ri Hagar? Ga aɗiya thlivər wa, kamnyar Hyel ku nggatə kuraka ɓzər ni akwa vəi tə tsa ata. 18Thlata, ka gə ra kətə ɓzər ni, ka ra fəfahə ni ka tsiya ga, kamnyar I ata hara ka tsa ndzi dur na ola.” 19Antə Hyel kəlar ncari antə tsa wutə jiɓə laga na ka yimi. Antə tsa mwari ka nghyantə zamzamiya ni ka yimi, ka mwari ka nar yimi ni aka ɓzər ni.
20Tsuwa Hyel ku ndzi ata vəi duku ka ɓzərni, antə tsa ku kəla. Tsa ndzi akwa Mtakər Paran, ka ndzi muzəmaku. 21Tsa ndzi akwa mtaku na kula mda akwa Paran, antə mama'ni ku kəta alari mwala na ngkwar Masar.
Ibrahim Ka Abimelek Ku Mbwi Ndər Akwa Beyersheba
22Akwa saka ndaga antə Abimelek ka Fikol na olər soja arni, ku mwari adzə Ibrahim ka pəla alari, “Yeru ku nggaɓəla abbər Hyel ata vəi duku ka ga akwa shanga su. 23Antə kulini, kahyel ali akwa thləma Hyel abbər ga aɗi ata səm mdəkurərna, wala ar maɗa'na, wala ar kəkayeri arna wa. Ka gə hara ɓɗakkur ali, ka aka tsəɗiyirna vəi tə gə ka ndzəndzi akwa kulini ni, tsu apatə I ku hara ala gə ɓɗakkur.”
24Antə Ibrahim pəla, “I ata kahyel.”
25Antə Ibrahim ku hamta tuwarni aka Abimelek ata kəra jiɓə laga na ka yimi natə buɗayeri ar Abimelek ku dlutsa. 26Antə Abimelek pəla, “I aɗi səndə mdə na hara su ngəni wa. Ga aɗi pəla ali wa, tsuwa ma ashina wa I aɗi nggatə su ata kər wa.”
27Apani antə Ibrahim fatə təmayeri laga kəga thla, ka hamta aka Abimelek, antə japwa ɗa ku mbwi alkawal. 28Antə Ibrahim fwaɓəla mbəkəl təma pal pal murfa akwa ciɓər ni, ka pwi ɗa shiɗa. 29Antə Abimelek pəla aka Ibrahim abbər, “Man karapur su ngəni ri, tə gə famta maɗa' təma ngəni murfa ka pwi ɗa shiɗa ni?”
30Antə Ibrahim pəla, “Dlu maɗa' təma ngəni murfə ni, kamnyar ka tsa ndzi seɗa abbər I an la jiɓa ngəni ni.” 31Kamnyar ngəni antə mdə ku kəga vəi ndaga Beyersheba, kamnyar anda antə japwa ɗa ku mbwi alkawal na ka kahyel.
32Aghəla tə da kuri mbwi alkawal na ka kahyel ni akwa Beyersheba, antə Abimelek ka Fikol na olər sojayeri arni ku ngka akwa tsəɗiyir mjir Filistiya. 33Antə Ibrahim ku nci nfur mbula ahar Beyersheba anda, ka kəga thləma MTHLAKU, Hyel na ba saka madi, akwa vəngkər səli. 34Antə Ibrahim ku ndzəndzi akwa tsəɗiyir Filistiya ni ka fəi anda.
Pilihan Saat Ini:
Baɗitari 21: KNB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.