Lucas 15
15
Ang Nadula nga Karnero
(Mat. 18:12-14)
1Sang#Luc. 5:29-30. isa ka tion madamo nga mga manugsukot sang buhis kag iban nga mga makasasala ang nagpalapit sa pagpamati kay Jesus. 2Ang mga Fariseo kag ang mga manunodlo sang Kasugoan nagkulomuron, “Ini nga tawo nagabaton sang mga makasasala kag nagakaon pa gani upod sa ila.” 3Gani si Jesus nagsugid sa ila sining palaanggiran:
4“Abi kon ang isa sa inyo may 100 ka karnero kag madula ang isa sa ila, ano bala ang iya himuon? Bayaan niya ang nobentay nwebe sa halalban kag magalakat sia sa pagpangita sang isa ka karnero nga nadula tubtob makita niya ini. 5Kon makita niya ini malipayon gid sia sa pagpas-an 6kag sa pagdala sini pauli. Dayon tipunon niya ang iya mga abyan kag mga kaingod kag magasiling sa ila, ‘Magkalipay kamo upod sa akon kay nakita nakon ang nadula ko nga karnero!’ 7Nagasiling ako sa inyo, nga sa amo man nga bagay, may labi pa nga kalipay sa langit tungod sa isa ka makasasala nga nagahinulsol, sang sa nobentay nwebe nga matarong nga mga tawo nga wala nagakinahanglan sing paghinulsol.
Ang Nadula nga Sensilyo
8“Ukon abi ang isa ka babayi nga may napulo ka salapion nga pilak madulaan sang isa. Ano ang himuon niya? Magasindi sia sang suga, magasilhig sia sang iya balay, kag magapangita gid sia sing maid-id bisan diin tubtob nga makita niya ini. 9Kon makita na niya ini, tipunon niya ang iya mga abyan kag mga kaingod kag magasiling sa ila, ‘Magkalipay kamo upod sa akon, kay nakita ko ang nadula ko nga salapi!’ 10Sa amo man nga bagay, nagasiling ako sa inyo, ang mga anghel sang Dios nagakalipay tungod sa isa ka makasasala nga nagahinulsol.”
Ang Nadula nga Anak
11Dayon nagsiling pa gid si Jesus, “May isa ka amay nga may duha ka mga anak nga lalaki. 12Ang manghod nagsiling sa iya amay, ‘Tay, ihatag sa akon ang parti sang palanublion nga para sa akon.’ Gani ginpartida sang amay sa duha niya ka mga anak ang iya pagkabutang. 13Sa tapos ang pila ka adlaw ginbaligya sang manghod ang iya bahin sang pagkabutang kag naglakat nga dala niya ang kwarta. Nagkadto sia sa malayo nga lugar, sa diin gin-uyangan niya ang iya kwarta sa patuyang nga pangabuhi. 14Gin-urot niya gasto ang tanan niya nga kwarta. Dayon nag-abot ang daku nga tiggulotom sa sadto nga lugar kag nagpigado ang iya pangabuhi. 15Gani nagpamugon sia sa isa sang mga pumoluyo sa sadto nga lugar, nga nagpadala sa iya sa uma sa pagsagod sang mga baboy. 16Buot niya kuntani nga sudlan ang iya tiyan sang bahog sang mga baboy, pero wala sing may naghatag sini sa iya. 17Sang ulihi nakamarasmas sia kag nagsiling, ‘Ang tanan nga mga mamumogon sang akon amay may pagkaon nga nagasulobra lang, kag ako iya daw mapatay na sa kagutom. 18Magatindog ako kag magakadto sa akon amay kag magasiling sa iya, “Tay, nakasala ako batok sa Dios kag batok sa imo. 19Indi na ako takos nga pagatawgon pa nga imo anak. Kabiga ako nga isa sang imo mga mamumogon.” ’ 20Gani nagtindog sia kag nagpauli sa iya amay.
“Malayo pa sia sa ila balay sang makita sia sang iya amay. Ang tagipusoon sang iya amay napun-an gid sing kaluoy, gani nagdalagan sia kag ginhakos ang iya anak kag ginhalukan. 21Nagsiling ang anak, ‘Tay, nakasala ako batok sa Dios kag batok sa imo. Indi na ako takos nga pagatawgon pa nga imo anak.’ 22Pero ang amay nagtawag sang iya mga suloguon, ‘Dali kamo, dalha ninyo diri ang labing matahom gid nga bayu kag ipasuksok sa iya. Suksoki sang singsing ang iya tudlo kag sang sandalyas ang iya mga tiil. 23Dayon kuhaa ninyo ang pinatambok nga tinday sang baka kag ihawa ini, kay mahiwat kita sing punsyon kag magkinasadya! 24Kay ining akon anak napatay, pero karon nabuhi, nadula sia, pero karon nakita na.’ Kag nagsugod sila sa pagkinasadya.
25Sa amo man nga tion, ang anak nga magulang yadto sa uma. Sang nagapauli sia kag nagahinampot na sa balay, nabatian niya ang tinukar kag sinaot. 26Gani gintawag niya ang isa sang mga suloguon kag ginpamangkot, ‘May ano diri?’ 27Ang suloguon nagsabat, ‘Ang imo utod nagpauli kag si tatay mo nagpaihaw sang pinatambok nga tinday sang baka, tungod kay nakapauli sia nga wala man maano.’ 28Naakig gid ang magulang nga utod kag indi sia magsulod sa balay. Gani ang iya amay naggwa kag nag-uloulo sa iya nga magsulod. 29Pero ginsingganan niya ang iya amay, ‘Tan-awa bala, sa sulod sining mga tinuig nagpangabudlay ako sa imo nga daw suloguon mo kag bisan kaisa lang wala gid ako maglapas sang imo mga sugo. Ano ang ginhatag mo sa akon? Wala mo gani ako mahatagi bisan tinday lang sang kanding agod magkasadya ako upod sa akon mga abyan? 30Pero ining anak mo nag-uyang sang imo pagkabutang upod sa mahigko nga mga babayi, kag sang pagpauli niya gin-ihaw mo ang pinatambok nga tinday sang baka para sa iya!’ 31Nagsabat ang iya amay, ‘Anak ko, ikaw imo yari man pirme upod sa akon kag ang tanan nga akon imo. 32Pero dapat magkasadya kag magkalipay kita, tungod kay ang imo utod napatay, pero karon nabuhi, nadula sia, pero karon nakita na.’”
Pilihan Saat Ini:
Lucas 15: MBBHIL12
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Maayong Balita nga Biblia © Philippine Bible Society, 2012
