Mariko 9
9
1Yezu weloosela wabalomela ari, “Ilala, ilala, imbaboolela indi, iliwo batweela khuubo babemikhile ano, babakhalibonakho khufwa ta, khukhwolisa ni balibona Buyiinga bwa Wele, nga bwiitsa ni kamaani.”
Khumweekhamweekha khwe mbonekha ya Yezu
(Mat 17.1-13; Luk 9.28-36)
2 #
2 Pet 1.17,18 Lwanyuma nga abirerewo bifukhu bisesaba, Yezu watsya ni Petero, Yakobo ni Yohana, wabayila khu lukiingi luleeyi, baaba iyo bonyene. Nga bali ibweene iyo, Yezu wakalusibwa shifwani sheewe nga babona. 3Bikwaro byeewe byekyela biwaanga tselelele, nga bimweekhamweekha. Mbaawo khu shiibala shishiindu shishinyala shasiinga bikwaaro byaaba biwaanga nga ibyo ta. 4Khaangukho abonekhawo Eliya ni Musa nga balikho bakanikha ni Yezu.
5Kila Petero aloma Yezu ari, “Umuleekeli, nga shilayi ifwe khuuba nga khuli ano! Khayo khwombakhe bisari bitaru, nga shitweela shishoowo, shishindi sha Musa, ni shishindi sha Eliya.” 6Petero aloma aryo khulwekhuba abe bye khuloma byamukoraanile, khulwe shiriiso shikali.
7 #
Mat 3.17; Mrk 1.11; Luk 3.22 Lwanyuma abonekhawo namufweeli, ni shishiniini sha namufweeli mweene shabafuusilisa. Kila likono lyaama mu namufweeli yuno nga liloma liri, “Uyuno ali Umwaana wase umukanwa, ni mulondelele byeesi ababoolela.” 8Khaangukho bari balola iyi ni neeyi, balekha khubona umuundu yeesitsana nga ali ni nabo ta, akhali Yezu yenyene.
9Ne Yezu ni baleekelwa beewe ni baaba nga beekha asi khukhwaama khu lukiingi, wabakhonyakilila ari balekhe khuboolelakho umuundu yeesi bibiindu byeesi baabona ta, khukhwolisa nga Umwaana w'Omuundu walamukhile khukhwaama mu bafu. 10Nabo baliinda shimoonyo isho, balekha khushisalanisa ta, ne nga bereeba she khulamukha khukhwaama mu bafu sheesi shimanyisa.
11 #
Mal 4.5; Mat 11.14 Baleekelwa bataru tsana ba Yezu bamureeba bari, “Shiina kila baleekeli be Kamakaambila ka Musa baloma bari Eliya ashiile khunyoowa khukhwiitsa?”
12 #
Sir 48.10
Yezu wabelamo ari: “Ilala Eliya ali ni khunyoowa khukhwiitsa khuŋoonaŋoona bibiindu byoosi. Ni bibyaronebwa bikhosefu si biloma kh'Umwaana w'Omuundu biri, ali ni khutaambisibwa lukali naabi nalundi bamwikaane? 13Ne imbaŋaŋasa ndi Eliya wamala khaale khukhwiitsa, ne nga bibyaronebwa bikhosefu ni biloma, bamubirisa buubi.”
Yezu awonesa umusoleeli
(Mat 17.14-21; Luk 9.37-43)
14Yezu n'akobola ni baleekelwa beewe bataru, babona lituuli lye babaandu likali. Abe baleekeli be Kamakaambila ka Musa balikho bakhaandisana ni nabo. 15Babaandu boosi ni baabona Yezu beyaanga, kila batima khu mwakaanila.
16Yezu wabareeba ari, “Abe mulikho mukhaandisana khu shiina ni nabo?”
17Umuundu khukhwaama mu lituuli lye babaandu kila aloma ari, “Umuleekeli, indeerire umwaana wase is'uli, khulwekhuba alikho shisaambwa shiibi, shishikhamufukiilila wakanikha ta. 18Nga shisaambwa shino shamwinyukhiile, shimuwamba shamukhupa asi, watutuba lifulo imunwa, waluma kameeno womelakho, nalundi wabalikha. Inomele baleekelwa boowo ndi bashitimise shirure khu mwana wase, ne balekha khunyala ta.”
19Kila Yezu abelamo ari, “Inywe si muli ni khufukiilila ta! Kane imbe ni nanywe khukhwolisa imbuka shiina? Kane imbekhalilikhe khukhwolisa liina? Ni mureere ano umwaana uyo.”
20Bareera umwaana isi Yezu. Khaangukho shisaambwa ni shabona Yezu, shakhupa umwaana tsana asi, wapiringikhaka, wabalikha, watutuba lifulo imunwa.
21Yezu wareeba paapa w'omwaana ari, “Shino shamukholikhakho khumala imbuka shiina?”
Paapawe welamo ari, “Khukhwaama mu bwaana. 22Kimilundi kimikali kumutuuma mu mulilo ni mu meetsi, nga kukhakakho khumwiira. Ne abe noola iliwo sheesi unyala wakhola, n'ukhuwaambile shiisa ukhuyeete.”
23Yezu wamureeba ari, “Uri noola unyala? Imbaawo shishinyala shakhaasisa umuundu uli ni khufukiilila ta.”
24Khaangukho kila paapawe w'omwaana tsana alomela angaaki ari, “Ifukiilila! Ikhaba nga khufukiilila khwase khuli khukyeekhe, ne n'unjeete.”
25Ne Yezu n'abona nga lituuli lye babaandu likali lilikho libusana, wakhookhela shisaambwa shiibi khuutsya. Washilomela ari, “Shisaambwa shishikhakanikha ta, nalundi shimiinyi, ikhulakila khumururakho utsye. Nalundi ukheetsa welakho wamukobolatsakakho lundi ta.”
26Shisaambwa shiibi tsana shalila ni likono lye angaaki, shamukhola wabalikha, shamururakho, ne umusoleeli warama busa nga ali nga ufwiile. Ni babafuurisa bukali baloma bari, “Wafwiile.” 27Ne Yezu wamuwaamba kumukhono wamwinyusa, umusoleeli wenyukha wema.
28Nga Yezu ni baleekelwa beewe bamalile khukhwinjila mu ntsu, kila bamureeba bari, “Lwashiina ifwe khukhasikhanile khutimisa kusaambwa ukwo?”
29Yezu welamo ari, “Kusaambwa kwe saambo yino imbaawo isaambo iye khukutimisa ta, akhali nga waraambisile khuloomba.”
Yezu akanikha lundi khu bye khufwa khweewe
(Mat 17.22-23; Luk 9.43-45)
30Yezu ni baleekelwa beewe baama ibweene iyo belooselayo baatsya, nga babirira mu Galilaaya. Walekha khukana umuundu yeesi khumanya shino ta, 31khulwekhuba abe alikho aleekela baleekelwa beewe. Wabaleekela ari, “Umwaana w'Omuundu balimuwaanayo mu mikhono kye babaandu bamwiire. Ne lwanyuma lwe khumwiira, ilibirawo bifukhu bitaru alamukhe khukhwaama mu bafu.” 32Ne baleekelwa balekha khumanya sheesi Yezu aba amanyisa ta, ne baarya khumureeba.
Naanu ufuura khuuba angaaki?
(Mat 18.1-5; Luk 9.46-48)
33Ni boola i Kaperunaumu, benjila mu ntsu, kila Yezu abareeba ari, “Mubeele mulikho mukhaandisana shiina khu ntsila?” 34#Luk 22.24Ne boosi basila busa, khulwekhuba khu ntsila baaba balikho bakhaandisana oba naanu ufuura bukhulu mu nibo.
35 #
Mat 20.26,27; 23.11; Mrk 10.43,44; Luk 22.26 Yezu wekhala asi walaanga baleekelwa liikhumi na babili, wabaloma ari, “Noola umuundu yeesi akana khuuba unyoowa, ali ni khuuba niye uwakamayo nalundi ali ni khuuba umwakaanisi uwa boosi.”
36Wahaamba umwaana umufwiiti wamwiimisa akari abwe. Kila atiila kamakhono keewe khu mwana uyo waloma ari, 37#Mat 10.40; Luk 10.16; Yoh 13.20“Buli uyo yeesi uwakaanila akhaba umwaana umufwiiti nga yuno mu lisiina lyase, aba wantsakaanile ise. Na buli mundu uwuntsakanila ise, aba wakaaniile uyo uwanduma ise.”
Khuraambisa lisiina lya Yezu
(Luk 9.49-50)
38Yohana walomela Yezu ari, “Umuleekeli, khunyoolile umuundu nga atimisa kimisaambwa kimibi nga araambisa lisiina lyoowo, khwamwakamisa khulwekhuba s'ali mutweela khusi ifwe ta.”
39Ne Yezu wakobolamo ari, “Mukhamwakamisa ta; khulwekhuba imbaawo umuundu unyala khukhola bye kamakaanga mu lisiina lyase, ate ndi khangu akho wanganikhakho buubi ta. 40#Mat 12.30; Luk 11.23Uyo yeesi ukhali umusiku isi khuli ta, aba ali khu luwande lulwefwe. 41#Mat 10.42Khulwekhuba ilala ise mbaboolela inywe ndi, umuundu yeesi ukane abawatsake akhaba shikopo she kameetsi ke khunywa, khulwekhuba muli baloondeleli ba Kristu, alifuna kumukheemba.”
Khukila babaandi boneke
(Mat 18.6-9; Luk 17.1-2)
42Yezu weloosela waloma ari, “Umuundu yeesi n'akane akile mutweela khu bakyeekhe bano babafukiilila mus'iise boneke, shandibeele shilayi umwene uyo khubowebwa lusisi mumilo atuumibwe mu nyaantsa. 43#Mat 5.30Noola kumukhono kwoowo kukila iwe wakhola bibyonako, kukhalekho ukutuume. Khulwekhuba shiba shilayi iwe khukhwinjila mu bulamu nga uli ni kumukhono mutweela, khuminyisa n'uba ni kamakhono koombi ne watuumibwa mu mulilo kukukhasima ta. 44Ibweene iyo iliyo tsinyende tsitsikhafwa ta, ni kumulilo kukhasima ta.#9.44,46 Bibyaronebwa bibifuurisa bukhale, sibyongelakho khanyilili khano ta. 45Noola shikyele shoowo shikila iwe wakhola bibyonako, shikhalekho ushituume. Khulwekhuba shiba shilayi iwe khukhwinjila mu bulamu nga uli ni shikyele shitweela, khuminyisa n'uba ni bikyele bibili, ne watuumibwa mu kumulilo kukukhasima ta. 46Ibweene iyo iliyo tsinyende tsitsikhafwa ta, ni kumulilo kukukhasima ta. 47#Mat 5.29Noola imoni yoowo ikila iwe wakhola bibyonako, kirusemo ukituume. Khulwekhuba shiba shilayi iwe khukhwinjila mu Buyiinga bwa Wele nga uli ni moni indweela, khuminyisa n'uba ni tsimoni tsibili, ne watuumibwa mu mulilo kukukhasima ta. 48#Isay 66.24Ibweene iyo iliyo tsinyende tsitsikhafwa ta, ni kumulilo kukukhasima ta. 49Khulwekhuba buli mutweela balimutsukhakho kumulilo kumupyeluuse musaambo niyo ndweela nga n'upyeluusa isaayilo.
50 #
Mat 5.13; Luk 14.34,35 “Kumuunyu kumukhelekho kumulayi; ne itsamu n'iwamo, unyala khukisamo lundi? Ni mubaatsake nga kumukhelekho, nio munyalise khumenya mu lukoosi na buli mutweela.”
Pilihan Saat Ini:
Mariko 9: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
