Mariko 8
8
Yezu aliisa babaandu biikana bine
(Mat 15.32-39)
1Khu shifukhu shishindi, lituuli lye babaandu ni lyaba nga lyabusaane, Yezu walaanga baleekelwa beewe, wabaloma ari, 2“Shiisa shamambiile babaandu bano, khulwekhuba babeele ni nase khumala bifukhu bitaru, nga imbaawo sheesi baliilekho ta. 3Ise n'inoma ndi imbasibule busa khukhwilayo ingo nga bali ntsala, kane bayekhelele bakwe mu ntsila. Khulwekhuba balala bamiile aleeyi.”
4Kila baleekelwa beewe bamureeba bari, “Mu mubiimbi muno unyala wamisa waheena biilyo bye khuliisa babaandu boosi bari?”
5Yezu wabareeba ari, “Muli ni kimikaati kyeenga?”
Nabo belamo bari, “Kili musaafu.”
6Kila Yezu alakila lituuli lye babaandu khukhwikhala asi; wabukula kimikaati tsana musaafu, wakiloombela ikhabi. Nga wamalile khukiloombela ikhabi, wakimenyulamo wakiwa baleekelwa beewe khukikabila babaandu. Baryo bakikabila babaandu khuulya. 7Nalundi baaba ni bunyeeni bufwiiti buri. Yezu n'amala khubuloombela bunyeeni ubwo ikhabi, walakila baleekelwa beewe khubukabila babaandu.
8Boosi baalya khukhwolisa ni bekura; lwanyuma babusanisa bubuya bubwolisa bibiipo musaafu. 9Babaandu babaalya abe boola babaandu nga biikana bine. 10Yezu n'amala khubasibula, waniina mu likhoŋolo ni baleekelwa beewe baatsya mu shisiintsa shishilaangibwa shiri Dalamanusa.
Bafarisaayo bakana she kamakaanga
(Mat 12.38-42; 16.1-4)
11 #
Mat 12.38; Luk 11.16 Bafarisaayo beetsa isi Yezu bananikha khukhabisana ni naye, nga bamunuutsilisa bari abokese khabonelo khukhwaama mwikulu. Khuno khwaba khumukhakilisa. 12#Mat 12.39; Luk 11.29Yezu wekhiliisa kumwoyo kila aloma ari, “Shiina kila kumuboolo kwe babaandu bano, kuweentsa she khabonelo khe kamakaanga? Ilala imbaboolela ndi, imbaawo khabonelo khe kamakaanga khakane khokesanisibwe isi muli ta.”
13Niye wabalekha awo watsya. Kila enjila mu likhoŋolo lundi watsya shanjelekha we nyaantsa.
Kamamela ke Bafarisaayo ni ka Herode
(Mat 16.5-12)
14Baleekelwa ba Yezu abe bebiliile khusuta kimikaati kikibamala, nga mu likhoŋolo mulimo kumukaati mutweela kwonyene. 15#Luk 12.1Kila Yezu abareewula nga aloma ari, “Muli ni khumanya shino: ni mwiliinde; ni mwiliinde kamamela ke Bafarisaayo ni kamamela ka Herode.”#8.15 Kamamela kokesanisa tsisaambo tsa Herode ni Bafarisaayo tsitsaba tse khukhwonakisa babaandu babaandi.
16Kila bashikutakho bonyene nga baloma bari, “Alikho aloma aryo bari khulwekhuba sikhwasutile kimikaati ta.”
17Ne Yezu n'amanya shino wabaloma ari, “Shiina kila mulikho mukanikha khu bye khulekha khusuta kimikaati ta? Simunyala mwamanya sheesi indikho imanyisa ta? Shiina kila kimyoyo kyenywe kikhawamba bibiindu mangu ta? 18#Yer 5.21; Ezek 12.2; Mrk 4.12Mukhaba nga babafwa tsimoni babakhabona, namwe nga bamiinyi mu maru babakhawulila ta. Shiina kila mwibilila mangu muryo? 19Nga ni namenyulaka kimikaati kiraano mwakabila babaandu biikana biraano, mwabuusa bubuya bubwolisa bibiipo byeenga?”
Bamwiilamo bari, “Khwabuusa bibiipo liikhumi na bibili.”
20Wabareeba lundi ari, “Ne ni namenyulakamo kimikaati musaafu mwakabila babaandu biikana bine, mwabuusa bubuya bubwolisa bibiipo byeenga?”
Bamwiilamo bari, “Bibipo musaafu.”
21Kila abareeba ari, “Ari isho sishikila mwamanya sheesi indi khulomakho ta?”
Yezu awonesa umubofu i Besusaida
22Yezu ni baleekelwa beewe ni boola i Besusaida, abawo babamureerera umusaani uwabafwaala tsimoni. Bekontselela Yezu bari amutiilekho. 23Yezu wahamba umusaani uyo kumukhono, wamuyila besyeenda barura mu shifwo isho baatsya mu shifo shishindi. Yezu n'amala khumuwakha kamare khu moni, ni khumurakho kamakhono, wareeba umusaani tsana ari, “Ari ulikho ubonakho shishiindu shoosi?” 24Umusaani wenyusa tsimoni wamoka, kila aloma ari, “Indikho imbona babaandu nga bakyeenda, ne bafwanana nga kimisaala.”
25Yezu indi lundi watiila khu moni tsy'omusaani tsana; kumulundi kuno umusaani wamoka bulayi. Tsimoni tseewe tsaaba nga tsawonesewele, aryo wabona buli shiindu bulayi bubweene. 26Yezu wamusiibula khutsya ingo, ne wamulomela khulekha khutsya mu shaalo ni khulekha khuboolelakho babaandu ta.
Yezu niye naanu
(Mat 16.13-20; Luk 9.18-21)
27Lwanyuma Yezu ni baleekelwa beewe beloosela baatsya boola ambi ni shiriimba shishilaangibwa Kayisaliya Filipi. Ni baaba nga bali khu ntsila batsya, Yezu wabareeba shireebo ari, “Ise babaandu banomakho bari indi naanu?”
28 #
Mrk 6.14,15; Luk 9.7,8 Bamuloma bari, “Babaandu balala baloma bari iwe niye Yohana Umubatisa; babaandi bari iwe niye Eliya; ne babaandi bari iwe uli mutweela khu baŋoosi.”
29 #
Yoh 6.68,69 Kila Yezu abareeba ari, “Ne inywe muloma ise indi naanu?”
Petero wamwilamo ari, “Iwe niye Kristu.”#8.29 Kristu shimanyisa shiri “Umuwonesi.”
30Yezu wabakhonyakilila ari balekhe khuboolelakho umuundu yeesi bilomo bino bibimuwambakho ta.
Yezu akanikha khu khutaambisibwa khweewe
(Mat 16.21-28; Luk 9.22-27)
31Abweene awo Yezu warakikha khuleekela baleekelwa beewe bibiindu bibiitsya khumukholikhakho. Wababoolela ari, “Umwaana w'Omuundu ali ni khutaambisibwa mu saambo tsingali, basaayi bakhulu balimwikaana, ni baleekeli be kamakaambila ka Musa, lwanyuma bamwiire. Ne lwanyuma lwe bifukhu bitaru, alilamukha khukhwaama mu bafu.” 32Bibiwamba khu lomo yino, Yezu wabasontsoola sheesi aba amanyisa. Ne Petero wamwisa andulo wananikha khumubiiyisa khulwe khuloma aryo. 33Ne Yezu ni ishebukha wabona baleekelwa babaandi, kila abiiyisa Petero ari, “Yiila inyuma wase Sitaani! Khulwekhuba isaambo isi iwe wambaasamo shiili iya Wele ta, ne ili isaambo yeesi babaandu bambaasamo.”
34 #
Mat 10.38; Luk 14.27 Yezu walaanga lituuli lye babaandu ni baleekelwa beewe khukhwiitsa is'ali, kila abalomela ari, “Noola umuundu yeesi akana khuuba umulondeleli wase, ni eyikaane umwene, etyuukhe kumusalaba kweewe anondelele. 35#Mat 10.39; Luk 17.33; Yoh 12.25Khulwekhuba uyo yeesi ukana khuwonesa bulamu bweewe, alibufwilwa; ne uyo ufwilwa bulamu bweewe khulwase nalundi khulwe Kamakhuuwa Kamalayi, alibuwonesa, 36Mafuurisa shiina keesi umuundu afunamo, khulwe khuwula shiibala shoosi, ne wafwiilwa bulamu bweewe? 37Shiina sheesi umuundu anyala wahanayo khusikula bulamu bweewe? 38Umuundu yeesi uwambibwa kamaŋaanyu khulwase ni khulwe bilomo byase, mu muboolo kuno kwe babaandu babakharya Wele ta, nalundi baboonaki, ni musaambo niyo indweela Umwaana w'Omuundu naye aliwambibwa kamaŋaanyu khulw'omundu uyo, n'aliitsa mu shiriifwa sha Paapa, atweela ni bamalayika beewe bakhosefu.”
Pilihan Saat Ini:
Mariko 8: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
