Mariko 6
6
Babaandu be Nazareti bekaana Yezu
(Mat 13.53-58; Luk 4.16-30)
1Yezu n'ama awo watsya mu shiriimba she waabwe she Nazareti. Baleekelwa beewe bamuloondakho. 2Shifukhu sha Sabato ni shoola, Yezu watsya warakikha khuleekela mu ntsu iye khukhwisaayilamo. Babaandu bakali bamurekeeresa nga beyaanga naabi nga bereeba bari, “Bibiindu bino byoosi umusaani uyu abyaamisa waheena? Amisa waheena kamakhula ni kamaani ke khukhola bye kamakaanga bino? 3Uyuno s'ali umubeetsi nalundi umwaana uwa Mariya? Babandaaye si bali nibo Yakobo, Yosese, Yuda ni Simoni? Bakooko beewe si bamenya ni nafwe mu shiriimba shino?” Babaandu bamwikaana lweebyo byeesi aba nga akhola.
4 #
Yoh 4.44
Ne Yezu wabalomela ari, “Buli osi esi umuŋoosi atsya bamwisamo shiriifwa, khurusakho esi asaalikha si bamwisamo shiriifwa ta. Akhaba mu balebe beewe ni be mungo beewe nabo si bamwisamo shiriifwa ta.” 5Shino shakila Yezu walekha khukholelayo bye kamakaanga byoosi ta, khurusakho ndi ara kamakhono khu batsiina bafwiiti bari, wabawonesa. 6Shamwiyangisa naabi khubona ari babaandu si bali ni khufukiilila ta.
Yezu arumana baleekelwa liikhumi na babili
(Mat 10.5-15; Luk 9.1-6)
Yezu watsya nga aleekela mu byaalo bibibotokhelele. 7Lwanyuma walaanga baleekelwa beewe liikhumi na babili atweela, wabarumana ari batsye babilibili. Wabawa kamaani ke khutimisa kimisaambwa kimibi. 8Wabalakila khulekha khusuta shishiindu shoosi ta, nga batsya lukyeendo, akhali imiimbo iye khukhwitiila. Wabalomela khulekha khusuta biilyo, namwe iwootswa, namwe tsinusu ta. 9Wabalomela ari bakwaare tsisapata, ne balekhe khusuta bikwaaro bibili ta. 10Wababoolela lundi ari, “Nga mwatsiile ango w'omundu ne babakaanile, ni mumenye mubweene umwo khukhwolisa ni mulirura mu shisiintsa isho. 11#Bur 13.51#Luk 10.4-11Ni mwola mu shifo ne balekha khubakaanila namwe balekha khukhwakaanila burume bwenywe ta, nga mururayo musisakula lufuumbi#6.11 Khusisakula lufuumbi mu bikyele khali khabonelo khakhokesanisa khali umuundu uyo waboone ari bamubirisile buubi. luluuli mu bikyele byenywe.” 12Ni nashiryo baatsya baboolela babaandu bari bali ni khukhwibiiyisa bibyonako byabwe, bakobole isi Wele. 13#Yak 5.14Batimisa kimisaambwa kimibi kimikali khukhwaama mu baandu, nalundi bawonesa batsiina bakali, nga babahakha kamafura.#6.13 Bayudaaya abe baraambisa kamafura ke kusaala kwesi balaanga bari ku Oliva, khuwakha babaandu balwaale ni bawona.
Khuufwa khwa Yohana Umubatisa
(Mat 14.1-12; Luk 9.7-9)
14 #
Mat 16.14; Mrk 8.28; Luk 9.19 Yezu n'afuma lukali khu shaalo, n'umuyiinga Herode#6.14 Herode abe niye umuyiinga uwula shisiintsa isho mu mbuka iyo. naye wola khuwulila bibimuwambakho. Kila babaandu balala baloma bari, “Yohana Umubatisa walamukhile khukhwaama mu bafu. Shino nisho shishikila anyalisa khukhola bye kamakaanga bino byoosi.” 15Ne babaandi baaloma bari, “Uyuno ali Eliya.”#6.15 Eliya: Eliya aba umuŋoosi abe uwafwa khaale, ne abe babaandu basuubila bari alikobola khu shiibala. Babandi baaloma bari, “Yuno ali umuŋoosi nga mutweela khu baŋoosi be khaale.” 16Ne Herode n'awulila bibiwaamba khu Yezu kila aloma ari, “Yuno ali ni khuuba Yohana Umubatisa! Ise nalakila baamukhalakho kumurwe, ne ari walamushile khukhwaama mu bafu.”
17-18 #
Luk 3.19,20 Makiboole Herode abukula nalundi wayila Herodiya khuuba nga umukhasi weewe. Herodiya yuno aba umukhasi uwa Filipo, wandaaye uwa Herode. Yohana Umubatisa walomela Herode ari, “Shifuniaka likaambila iwe khubukula umukhasi uwa wandayo, wamwikesa umukhasi uwoowo.” Ne khulwe khukana khusangaasa Herodiya, Herode alakila bawamba Yohana Umubatisa bamubowa mu mapuusu. 19Shino shakila Herodiya wahambila Yohana Umubatisa libuba, nga akana amwiire, ne nga s'anyala ta, 20khulwekhuba abe Herode arya Yohana Umubatisa, nashiryo wamuliinda buulayi. Herode amanya ari Yohana Umubatisa ali umuundu umulayi nalundi umukhosefu. Akhaba bibiindu bikali byeesi Yohana Umubatisa alomatsaka abe biyaangisa Herode, ne akana naabi khurekeeresa Yohana mweene.
21Ne Herodiya ikhabi yamuwamba khu shifukhu shitweela nga Herode wakholeele bakyeni beewe kamayiiya, nga ashebulilakho shifukhu she kamasaalikha keewe. Abe walaangile babaandu baarye khukhwaama mu buyiinga bweewe, ni baraangilisi be basilikhale, ni babaandu be angaaki khukhwaama mu Galilaaya. 22Ne umwaana umukhaana uwa Herodiya n'etsa isi baaba washina, wekhoyesa Herode naabi ni bakyeni beewe. Kila umuyiinga Herode alomela umukhaana ari, “Loomba shishiindu shoosi sheesi ukana, kane ishikhuwe.” 23Wetsuba nga aloma ari, “Sheesi uloomba shoosi kane ishikhuwe, abe wakhaloomba uri ikhukhalilekho shisiintsa she buyiinga bwase.”
24Umukhaana warura ibulafu watsya wareeba maayi weewe ari, “Inoombe indi ambe shiina?” Maayi weewe wamwilamo ari, “Loomba akhuwe kumurwe kwa Yohana Umubatisa.” 25Umukhaana tsana wakobola wangu isi umuyiinga, waloomba nga aloma ari, “Ingana wumbe aluno ari kumurwe kwa Yohana Umubatisa nga kuli khu lwelo.” 26Umuyiinga wesonisa naabi khulwe byo byeesi aba wamalile khuloma. Ne walekha khukana khufuniaka shishitsubo isho abe sheesi amalile khukhwitsubila umukhaana mu moni tsye bakyeni beewe ta. 27Ni abweene awo, umuyiinga walakila umusilikhale khuutsya khureera kumurwe kwa Yohana Umubatisa. Umusilikhale watsya mu mapuusu wakhalakho kumurwe kwa Yohana, 28wakureera nga kuli khu lwelo, wakuwa umukhaana; umukhaana naye wakuwa maayi weewe.
29Baleekelwa ba Yohana Umubatisa ni bawulila bari beerire Yohana, baatsya basuta kumulaambo, baatsya bamusiikha.
Yezu aliisa babaandu biikana biraano
(Mat 14.13-21; Luk 9.10-17; Yoh 6.1-14)
30Lwanyuma baarume bakobola isi Yezu, bamuboolela ibyo byoosi byeesi bakhola ni byeesi baleekela. 31Ne Yezu wabaloma ari, “Ni mwiitse khutsye mu shifo shishiikhalimo babaandu ta, muwolekho.” Yezu aloma aryo khulwekhuba abawo babaandu bakali nga beetsa ni batsya, shalekha khunyalisila baleekelwa khuwolakho namwe khuulyakho biilyo ta. 32Benjila mu likhoŋolo baatsya mu shifo abe isi banyala khuuba bonyene. 33Ne bakali khuubo babababona nga batsya, bamanya busa abe shifwo sheesi balikho batsyamo. Nashiryo babaandu khukhwaama mu biriimba batimila busa khu bikyele, benyoowa mu shifwo isho, nga Yezu ni baleekelwa beewe bashiili khukhwoolayo ta.
34 #
Bala 27.17; 1 Bay 22.17; 2 Kim 18.16; Ezek 34.5; Mat 9.36 Yezu n'arura mu likhoŋolo wabona lituuli lye babaandu likali liitsa wabawambila shiisa. Khulwekhuba baaba nga kamasheese kakakhalikho umwaayi ta. Warakikha khubaleekela bibiindu bikali. 35Nga antsye bulikho bwilabula, baleekelwa beewe beetsa is'ali kila bamulomela bari, “Shiifwo shino shayitala busa, nalundi antsye bulikho bwilabula; 36siibula babaandu batsye mu byaalo ni biifwo bibibotokhelele, beweentseleyo she khulya.”
37Ne Yezu wabelamo ari, “Inywe mwabeene ni mubawe she khuulya.” Baleekelwa bamureeba bari, “Iwe s'ubona uri shikoombesa tsi dinari#6.37 Idinari abe yoola kumukheemba kwesi umuundu afuna nga waraambile kimilimo kye shifukhu shibuufu. bitoondo bibili khukula kimikaati kikiimala babaandu bano ta?”
38Yezu wabaloma ari, “Ni mutsye mubone; muli ni kimikaati kyeenga?” Ni baamala khubona nga bakoboole bamuloma bari, “Khuli ni kimikaati kiraano, ni tsinyeeni tsibili.” 39Yezu wabalomela ari balome babaandu bekhaale asi khu bunyaasi, mu matuuli. 40Bekhala asi mu matuuli, buli libira nga lilimo babaandu shitoondo shitweela oba kamakhumi karaano. 41Yezu wabukula kimikaati kiraano ikyo ni tsinyeeni tsibili tsya tsana. Wenyusa tsimoni mu ngaaki wabiloombela ikhabi. Wamenyulakamo kimikaati wakiwa baleekelwa beewe khukikabila babaandu. Musaambo niyo indweela, wamenyulakamo tsinyeeni tsibili tsya tsana, shanyalisila buli mutweela khufunakho.
42Boosi baalya bekura. 43Baleekelwa ba Yezu babusanisa bubuya bwe kimikaati ni tsinyeeni bibyarama, betsusa bibiipo liikhumi na bibili. 44Babaalya biilyo bino baaba boola basaani biikana biraano.
Yezu akyeendela khu meetsi
(Mat 14.22-33; Yoh 6.15-21)
45Khaangukho Yezu walomela baleekelwa beewe khuniina mu likhoŋolo, bakhalise batsye shanjelekha, i Besusaida, nga niye umweene ashisiibula lituuli lye babaandu. 46N'amala khuusibula babaandu, waniina khu lukiingi khuutsya khuloomba.
47Antsye ni bwaba bwilabula, likhoŋolo abe lyatsiile aleeyi abweene, ne Yezu nga ashiili yenyene khu liloba ndulo khwe nyaantsa. 48Yezu wabona nga baleekelwa beewe balikho bakhaka ni kamaani makali khukyendesa likhoŋolo, khulwekhuba abe imbewo ingali ilikho iwuutsa nga ibaama ibweeni. Antsye ni bwaba nga buli ambi bukana khusya, Yezu wetsa isi bali nga alikho akyeendela khu meetsi. Abe akana khu babirakho busa, 49ne ni baamubona nga akyeendela khu meetsi, bambaasa bari shisimu, bahariina.
50Boosi bamubona, baaba ni khuurya khukali naabi. Ne khangu akho wabakanikhayo ari, “Mukharya ta, ise Yezu.” 51Wenjila mu likhoŋolo khutsya ni nabo, ni abweene awo imbewo ingali iyo yakama. Balondeleli beewe shino shabeyangisa naabi, 52khulwekhuba abe bakhaasikhanile khushuusakho kimyoyo kyaabwe, nga si banyala nakhumanya bulayi ilomo iwamba khu mikaati ta, ni kamakhulu kakaaba mu khuliisa babaandu biikana biraano ta.
Yezu awonesa balwaale i Genesareeti
(Mat 14.34-36)
53Nga bamalile khukhalisa inyaantsa boolile khu lwoomu, boola ambi ni shiriimba she Genesareeti, balekha abweene awo likhoŋolo lyabwe nga baliboyile khu shitsaangi. 54Nga barura mu likhoŋolo, khangu akho babaandu bofwaasamo Yezu. 55Babaandu barakikha khutima mu bisiintsa bibibotokhelele khureera balwaale baabwe nga babaalisile khu saamba. Bayilatsaka balwaale mu buli shifo sheesi bawulila bari Yezu alimo. 56Buli osi esi Yezu atsya, oba mu byaalo, namwe mu biriimba, bareera balwaale abulafu, nga bamuloomba bari batiilekho busa khu ngubo yeewe. Abo boosi babatiilakho khu Yezu bawonesebwa.
Pilihan Saat Ini:
Mariko 6: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
