Mariko 16
16
Yezu alamukha khukhwaama mu bafu
(Mat 28.1-8; Luk 24.1-12; Yoh 20.1-10)
1Shifukhu sha Sabato ni shaba nga shaweele, Mariya Magadalena, Salume, ni Mariya maayi uwa Yakobo, bakula bye khukhwihakha bibiwunya bulayi, bari batsye bawakhe kumulaambo kwa Yezu. 2Khu Sabiti kumutikhinyi, nga inyaanga yamalile khurura, baatsya khu ŋani. 3Ni baaba nga batsya bareebana bonyene bari, “Ne naanu ukane akhupilingisile libaale khukhwaama khu ŋani?” 4Bari balola bari, babona nga libaale lyamalile khupilingisibwa khukhwaama khu ŋani. Lyaba libaale liboofu naabi.
5Ni benjila mu ŋani, babona umusoleeli mutweela nga wakwaarire tsingubo tsiwaanga, nga wekhaale khu mukhono kumulayi. Shino shabareerera khuurya.
6Wabalomela ari, “Mukharya ta. Namanyile indi mulikho muweentsa Yezu uwe i Nazareti, yeesi batsaangilila khu musalaba. Walamukhile khukhwaama mu bafu, s'ali ano ta; ni mu bone shifwo sheesi baamusiikhamo. 7#Mat 26.32; Mrk 14.28Ne ni mutsye muboolele baleekelwa beewe, ne khufuurisa Petero, muri Yezu wabenyooyile ibweeni watsiile i Galilaaya. Nga n'abalomela amataayi, ibweene iyo niyo isi mulimubonela.”
8Bakhasi ni baama khu ŋani, baatsya butima, ilala abe khuurya ni khunikina byabawambile. Khulwe khuurya khukali, balekha khuboolelakho umuundu yeesitsana ta.
Yezu abonekhela Mariya Magadalena
(Mat 28.9-10; Yoh 20.11-18)
9Yezu n'alamukha kumutikhinyi kumweene khu Sabiti, wanyoowa khubonekhela Mariya Magadalena. Makiboole abe Yezu wanyoowa khuwoona kimisaambwa kimibi musaafu khukhwaama mu Mariya yuno. 10Umweene uyu watsya khuboolela abo babaabatsaka ni Yezu, baaba abe balikho balila nalundi nga bewunamiile. 11Ikhaba nga ni bawulila bari Yezu ari ali umulamu, nalundi bari wabonekheele Mariya Magadalena, balekha khufukiilila ta.
Yezu abonekhela baleekelwa babili
(Luk 24.13-35)
12Lwanyuma lwa bino, Yezu wabonekhela babili khu baleekelwa beewe, musaambo ikiindi. Bano baaba balikho bakyeenda nga baama mu shiriimba batsya mu shaalo. 13Bano belayo baboolela baleekelwa babaramile, ne balekha khufukiilila byeesi bababoolela ta.
Yezu abonekhela baleekelwa liikhumi na mutweela
(Mat 28.16-20; Luk 24.36-49; Yoh 20.19-23; Bur 1.6-8)
14Lwanyuma Yezu wabonekhela baleekelwa beewe liikhumi na mutweela nga balikho balya biilyo. Kila ababiiyisa khulwe khulekha khufukiilila ta, ni khuuba ni kimyoyo kimihandalafu, isaambo isi bakhafukiilila byeesi abo bababona Yezu bababoolela ta. 15#Bur 1.8Wabalomela ari, “Ni mutsye mu shiibala shoosi, mukukuule isi babaandu boosi Kamakhuuwa Kamalayi. 16Umuundu ukane afukiilile Kamakhuuwa kano abatisibwe, alifuna buwonesi; ne uyo ukhafukiilila ta, kumusaango kulimufuura. 17Abo babafukiilila muusi ise, bakhakholatsake bibiyaangisa. Ni baliraambisatsaka lisiina lyase, baliwoona kimisaambwa kimibi, nalundi balikanikha tsinimi tsimbya. 18Baliwamba tsindemu mu makhono kabwe, nalundi abe bakhalinywa shishiindu shishiira, seshilibakholakho buubi bwoosi ta. Ni baliloombela balwaale nga babarakho kamakhono, balwaale abo baliwona.”
Yezu aniina mwikulu
(Luk 24.50-53; Bur 1.9-11)
19 #
Bur 1.9-11
Lwanyuma nga Yezu wamalile khukanikha ni baleekelwa beewe, waniinisibwa mwikulu, wekhala asi khu lubeka lwe kumukhono kumulayi kwa Wele. 20Baleekelwa ni baama awo baatsya bakukuula Kamakhuuwa Kamalayi buli andu osi. Umukasya waraambatsakila mu nibo, nga aŋaŋasa burume bwaabwe khubirira mu bubonelo bweesi bakholatsaka.
Pilihan Saat Ini:
Mariko 16: LCE
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
