Luka 13
13
Khalawo khurura mu byonako byoowo
1Mu mbuka iyo, batweela khu baandu bababawo, baboolela Yezu khu biwamba khu baandu be Galilaaya beesi Pilato eera, ni kamafuki kaawe, wakatubaasa ni tsisaayilo tseesi bawayo isi Wele.
2Yezu welamo ari, “Mwambaasa muri ba Galilaaya ibo baaba baboonaki naabi khufuura ba Galilaaya babaramile, lwekhuba bataambisibwa musaambo yino? 3Mbaboolela indi taawe! Ne ni mulilekha khukhwibiiyisa, nanywe mulihela mweesi musaambo iyo. 4Namwe ibo liikhumi na shinaane beesi intsu yakwakho i Siloamu yabiira. Mwambaasa muri nibo baaba baboonaki naabi khufuurisa babaandu babaramile boosi, babaaba mu Yerusalemu? 5Mbaboolela ndi taawe! Ne nanywe ni mulilekha khukhwibiiyisa, mulihela mweesi musaambo iyo.”
Khuweentsa bibyaamo khu kusaala ku figi
6Aryo Yezu wababoolela lusimo luno ari: “Abawo umusaani uwaba ni kusaala kweewe kukwaana bibyaamo kweesi balaanga bari ku figi, abe kweesi abyaala mu mukuunda kweewe. Lwanyuma watsya waweentsakho bibyaano, ne walekha khunyoolakho ta. 7Kila aloma umuraambi we mu mukuunda kweewe ari, ‘Bona, mu miiko kitaru mbeele niitsa ano, khuweentsa bibyaano khu kusaala kuno ku figi, ne nalekha khunyoolakho ta. Kureme ukukwiise asi. Lwashiina kwonakisa busa liiloba?’
8“Umuraambi welamo ari, ‘Musakhulu, kusaala kuno n'ukulekhekho kumwiiko kuundi mutweela kwonyene, nase kane ingwakilile, inguremo kamasisye. 9Ne noola kumwiiko kukwiitsa kuba kwamile bibyaano, shilayi. Ne noola ta, lwanyuma ulikurema.’ ”
Yezu awonesa umukhasi uwalemala khu Sabato
10Khu shifukhu sha Sabato shitweela, Yezu aba aleekela mu ntsu iye khukhwisaayilamo. 11Ne mwabamo umukhasi uwalemala khumala kimiiko liikhumi na shinaane, nga shisaambwa shiibi shamutorwasa. Umukhasi yuno aba wayifuumba, nga s'anyala weema wekolola na khafwiiti khoosi ta. 12Ne Yezu n'amubona, wamulaanga, wamuloma ari, “Mukhas'iwe, wakangululiwile khukhwaama mu bulwaale bwoowo.” 13Wamurakho kamakhono keewe, lubaluba, umukhasi wakwalasibwa, aryo kila waruuya Wele.
14 #
Luky 20.9,10; Maka 5.13,14 Ne lwekhuba umuraangilisi wentsu ye khukhwisaayilamo shamukhalasa naabi, lwa Yezu khuwonesela khu shifukhu Sabato, waloma babaandu ari, “Iliwo bifukhu bisesaba byeesi khwakhila khuraambilakho kimilimo, nashiryo ni mwiitse khu bifukhu byeen'ebyo nio muwonesewe, ne akhuba khu shifukhu sha Sabato ta.”
15Umukasya wamwiilamo ari, “Inywe babemiliisa khu ngaaki busa! Buli mutweela khwiinywe s'anyala khukangulula iyeeyi yeewe, namwe ipunda yeewe khu Sabato, khukhwaama isi iliila, wakiyila khukinyweesa kameetsi? 16Ne sishakhila umukhasi yuno, umukhaana wa Ibulayimu, isi Sitaani abe amenyesele nga umubowe khumala kimiiko kino liikhumi na shinaane, khukangululibwa mu bubowe ubwo khu Sabato?” 17Yezu n'amala khuloma aryo, basiku beewe kamaŋaanyu kabawamba busa, ne babaandu boosi bekhoya lw'ebyo bye kamakaanga byeesi Yezu akhola.
Lusimo lwe khamiitso Kaladaali
(Mat 13.31-32; Mrk 4.30-32)
18Lwanyuma Yezu wabareeba ari, “Buyiinga bwa Wele bufwanana na shiina? Kane imbufwananise na shiina? 19Bufwana nga khamiitso kaladaali,#13.19 Kaladaali: Kaladaali nikho khamiitso kheesi Yezu akanikhakho nga nikho khakhafuurayo bufwiiti mu shiibala. kheesi umuundu abukula wabyaala mu mukuunda kweewe, kharyo khatsowa, khekyela kusaala, ni binywiinywi bye mu ngaaki byombekhamwo biiswi khu sakya tsakwo.”
Lusimo lwe kamamela
(Mat 13.33)
20Lundi Yezu wareeba ari, “Buyiinga bwa Wele mbufwananisa na shiina? 21Bufwana nga kamamela keesi umukhasi abukula watubaasa mu ndubi tsitaru tse buufu bwe ŋaano, khukhwoolesa bwoosi ni bwasiila.”
Kumulyaango Kumunyelele
(Mat 7.13-14,21-23)
22Yezu n'aba nga atsya i Yerusalemu, wabira mu biriimba ni mu byaalo nga aleekela. 23Umuundu mutweela wamureeba ari, “Umukasya babaandu bakyeekhe bari babakane bawonesebwe?”
Yezu welamo ari, 24“Ni mukhakekho naabi nga esi munyala khukhwinjilila mu mulyaango kumunyelele. Lwekhuba mbaboolela ndi bakali balikhakako khukhwinjila ne sebalinyala ta. 25Khukhwaama umweene intsu n'alimala khukhwinyukha khukhwikalawo lulwiitsi, mulimikha ibulafu mukhonyake, nga mwikontselela muri, ‘Musakhulu n'ukhwikulilewo.’ Ne naye alibelamo ari, ‘Ise simanya esi mwama ta.’
26“Ulwo nanywe mulimwiilamo muri, ‘Ifwe khwaliilatsakila lundi khwanywelatsakila atweela ni nawe, lundi iwe waleekelelatsakila mu mikhoosi kyeweefwe.’
27 #
Zab 6.8
“Naye umweene intsu indi abelemo ari, ‘Ise simanya esi mwama ta! Ni mundurewo, inywe mweesi mumukhola bye bubwonaki.’
28 #
Mat 22.13; 25.30 #
Mat 8.11,12 “Iyo iliiba khulila ni khukhwilumaka kameeno, ni mulibona Ibulayimu ni Isaaka, ni Yakobo, ni baŋoosi boosi, nga bali mu Buyiinga bwa Wele, ne inywe mwabeene nga mwatuumiwile ibulafu. 29Ni babaandu baliitsa nga baama ibwama nyaanga, ni bukwa nyaanga, imwaalo we shiibala, ni ngaaki we shiibala, baryo bekhale khu mwikhoyo mu Buyiinga bwa Wele. 30#Mat 19.30; 20.16; Mrk 10.31Baryo ibo babaali bamalilisayo, baliba babanyoowa, ni naabo babanyoowa, baliba babamalilisayo.”
Yezu kumutaambo kumuwambila Yerusalemu
(Mat 23.37-39)
31Mu mbuka nyeneyo batweela khu Bafarisaayo biitsa isi Yezu bamuloma bari, “Rura mu shifwo shino utsye ahandi, lwekhuba Herode alikhukana khukhwiira.”
32Yezu wabelamo ari, “Ni mutsye muboolele ishipwe iyo muri, ‘Bona ise imboona kimisaambwa kimibi, lundi imbonesa babaandu shaleelo ni kumukaamba, ne khu shifukhu she khataru, indyoolelesa kumulimo kwase.’ 33Ne shitweela busa, ndikhukhwiloosela shaleelo ni kumukaamba, ni shifukhu shishilakho, lwekhuba sishinyalikha Umuŋoosi khukhwiribwila ahandi ta, khurusakho mu Yerusalemu.
34 #
2 Esid 1.30
“O Yerusalemu! Yerusalemu! Iwe uwiira baŋoosi, wakhupa kamabaale ibo babarumaniwa is'uli. Tsifuunda tseenga tseesi ise nakanila khubusanisa babaandu boowo, nga ingokho ni busanisa bunywiinywi bwayo mu ndaha tsayo n'enga iwe siwafukiilila ta! 35#Zab 118.26Bona, intsu yoowo yalekhewele nga likubili busa. Ikhukakasa ndi s'ulimbonakho lundi ta, khukhwoolesa n'uli loma uri, ‘Ali ni khabi uyo uwiitsila mu lisiina ly'Omukasya.’ ”
Pilihan Saat Ini:
Luka 13: LCE
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Lumasaaba Catholic Bible © The Bible Society of Uganda, 2017.
