Luka 12

Yezu areewula khu bye khukhwikholisa

(Mat 10.26-27)

1 # Mat 16.6; Mrk 8.15 Nga bili biryo, babaandu bakali babusana, nga bayindana busa. Yezu warakikha khukanikha, khunyoowa isi baleekelwa beewe, nga abaloma ari, “Ni mwiliinde kamamela ke Bafarisaayo, niko khukhwikholisa khwawe. 2#Mrk 4.22; Luk 8.17Lwekhuba mbaawo shishabiimbibwakho shishikhalibonesebwa ta, namwe shishabisibwa shikhalimanyikha ta. 3Ni lwe lomo yino, shoosi sheesi muba nga mwakaanikhiile mu shilima, balishiwulilila mu lubuula; ni sheesi muba mwakaanikhiile mu shifwo shishikisile, mu shiseenge, balishiwulilila khu shisuli khu ngaaki khwe ntsu.

Naanu isi khwakha khuurya

(Mat 10.28-31)

4“Lundi mbaboolela inywe basaale baase ndi, mukharya babaandu babeera kumubili busa, ne lwanyuma baalekha khubakho ni shishiindi sheesi banyala bakhola ta. 5Ne kane imbokese uyo isi muli ni khuryaatsaka: Ni murye Wele, lwekhuba niye n'amala khukhwiira, ali ni bunyala bwe khutuuma mu mulilo kukukhasima ta. Ii, ilala mbaloma ndi, ni mumurye niye. 6Banamundyoole baraano, si bakulisibwamo kamaŋooti kabili? Ne mbaawo na mutweela khu nibo, isi Wele ebilila ta. 7Ilala ikhaba litsuune lye khu murwe kwoowo lyoosi lyabaliwa. Nashiryo mukharya ta, lwekhuba inywe muminyisa bulayi binywiinywi bikali bibyeene.

Khubuula ni khukhwikaana Kristu

(Mat 10.32-33; 12.32; 10.19-20)

8“Nalundi mbaboolela ndi buli mundu yeesi uwibuula ari ali uwase mu moni tse babaandu, Umwaana w'Omuundu naye alimubuula isi bamalayika ba Wele. 9Ni nooyo uwuntsikaanila mu moni tse baandu, naye aryo alikaanibwa mu moni tse bamalayika ba Wele. 10#Mat 12.32; Mrk 3.29Na buli mundu yeesi uloma ilomo imbi khu Mwana w'Omuundu anyala weyakhilwa. Ne uyo ufwotsola Umwoyo Umukhosefu, si bali mwiyashila bibyoonako byeewe ta.

11 # Mat 10.19,20; Mrk 13.11; Luk 21.14,15 “Ne ni babareera mu ntsu tsye khukhwisaayilamo, namwe isi babakhala kimisaango, n'isi bawuli be bunyala boosi, mukheyembelela isaambo iye khukhwiwotsamo ta, namwe she khukhwiilamo ta. 12Lwekhuba mu mbuka nyeneyo, Umwoyo Umukhosefu, kane abaleekele sheesi mwakha mwaloma.”

Lusimo lwo muyindifu umusilu

13Mutweela khuubo baaba mwituuli lye babaandu waloma Yezu ari, “Inomele wandaayase khukabanane bye busikha bwa paapa.”

14Yezu wamwiilamo ari, “Musaaniwe, naanu uwamba ise bunyaala bwe khubakaya namwe bwe khubakabananisa inywe bibiindu byeenywe?” 15Aryo Yezu weloosela khubaloma boosi bababawo ari, “Ni mube meeso, mwiliinde mwabeene, nga simwinjila mu muluungo kwa buli saambo ta. Lwekhuba bulamu bw'omundu bwelala, sibuli mu biindu byaali nabyo ta, akhaba nga ali muyindifu arye!”

16Shikila lwanyuma Yezu wababoolela lusimo luno ari, “Abawo umusaani umuyindifu mutweela, uwaba ni liiswa lyeewe, lyaama biilyo bulayi. 17Weyambaasa mu mwoyo kweewe ari, ‘Kane ikhole ndyeena? Lwekhuba siindi ni ekhubiikha biilyo byase ta.’ 18Lwanyuma waloma ari, ‘Kane ikhole ndi: Kane ifuniake biirara byase byoosi, nombakhe bibindi biboofu khufuurisakho, imbikhemo biilyo byase, ni bibiindu byase bibiindi bilayi. 19#Sir 11.19Lwanyuma ise nilomele mu mwoyo ndi; nga uli ni bibiindu bilayi bikali byeesi wibikhiile, bye khumala kimiiko mikali. Ari yikhala uwole, ulye, unywe, wikhoye!’ 20Ne Wele waloma ari, ‘Iwe umusilu, shiilo shino, bulamu bwoowo butsya khukhurusibwakho, ari naanu wuutsya khukhwiila khu biindu bino byoosi byeesi wetikiya wamweene?’ ”

21Nashiryo Yezu wamalilisa nga aloma ari, “Kane shibe shiryo isi buli mutweela uwibiikhila umweene buyiindifu bwe shiibala, ne nga s'ali umuyindifu mu moni tsa Wele ta.”

Khukhwiyikina Wele

(Mat 6.25-34)

22Lwanyuma Yezu walomela baleekelwa beewe ari, “Mukheyembelela khu bulamu bweenywe byeesi kane mulye ta, namwe lwe kimibili kyeenywe muri kane mukwaare shiina ta. 23Lwekhuba bulamu buli bukhulu naabi bufuurisa biilyo, ni kumubili kuli mukhulu khufuurisa bikwaaro. 24Ni mwambaase khu binywiinywi bibilaangibwa khoolo. Nibyo sibimiitsa bimiitswa, namwe sibikyesa ta, sibili ni biirara namwe esi bibuunga ta, ne Wele abiliisa. Inywe simufuurira aleeyi binywiinywi ta? 25Naanu khusiinywe unyala khukhwilooselakho kimiiko kikiindi lwe khukhwiyembelela? 26Noola simunyala akhaba shishiindu shikyeekhe busa nga shino ta, lwashiina mwiyembelela lwe bibiindu bibiramile?

27 # 1 Bay 10.4-7; 2 Kim 9.3-6 “Ni mwambaase isaambo isi bimuli bye mwirome bitsowamo, sibiraamba namwe sibikholela bikwaaro ta, ne mbaboolela ndi, ni Solomoni uwaba ni shiriifwa shibiririfu, s'akwaarakho bikwaaro bilayi nga bimuli bino ta. 28Ne oba nga Wele niye ukwarisa bimuli bino bye mwirome, bibibawo shaleelo, ne kumukaamba byaaba byomile, byatuumibwa mu mulilo, singene anyalise khubakwaarisa inywe, inywe babaali ni khufukiilila khukyeekhe?

29“Ni nashiryo mukhemalila kimyoyo kyeenywe khu byeesi kane mulye, namwe byeesi kane munywe ta, mukheyembelela khu lweebyo ta. 30Lwekhuba babaandu boosi be mu shiibala bakhamanya Wele, beemalila khu biindu nga bino, ni Paapa weenywe wamanya ari bibiindu bino mubikana. 31Ne ni munyoowe muweentse Buyiinga bwa Wele, ni bibiindu bino bibiramileyo kane abibalooselekho.

Buyindifu Mwikulu

(Mat 6.19-21)

32“Mukharya ta, inywe lituuli lye babaandu likyeekhe, lwekhuba Paapa weenywe musangaafu khubawa inywe buyiinga. 33Ni mukulise bibiindu byeenywe, mukabile bataambi tsinusu, ni mwinabile mwabeene busawu bwe tsinusu bukhakora ta, mwibikhile buyiindifu bweenywe mwikulu, isi bukhanyala khuwawo ta. Lwekhuba umwiifwi s'olayo ta, namwe isi tsisilili tsikhanyala tsonakisila ta. 34Lwekhuba isi buyiindifu bwoowo buba, ibweeneyo niyo yeesi kumwoyo kwoowo nakwo kuba.”

Babakaanisi babaali meeso

(Mat 24.45-51)

35 # Mat 25.1-13 Yezu weloosela nga aloma ari: “Ni mukwaare mwirekekhe, nga mwebowele kumukhandaala mu shikuute, ni tsitaala tseenywe nga tsaburukha. 36#Mrk 13.34-36Ni mube nga babaandu babaaliindilila umukoosi waabwe khukobola nga ama khu mayiiya ke bukhwaale, nio nga wakoboole, wakhonyakile khu lwiitsi, bamwikulilawo khaangukho. 37Nga bali ni khabi, babakaanisi ibo beesi umukoosi waabwe anyoola nga bali meeso! Ilala mbaboolela ndi alikwaara bikwaaro bye bubwakaanisi, abasosomolele bekhale balye, niye etse abakaanise. 38Kane shibe she kumwikhoyo isi babakaanisi ibo beesi umukoosi waabwe anyoola nga bali berekefu, akhaba shiilo khukari, namwe nga tsingokho tsikholookha. 39#Mat 24.43,44Ne ni mumanye shino muri, umweene ntsu aba umanya imbuka isi umwiifwi kane etsilemo, si yandifukiilisile umwiifwi khufuna intsu yeewe ta. 40Ni nanywe muryo mwakhiile khuuba berekefu, lwekhuba Umwaana w'Omuundu alitsila mu mbuka yeesi mukhamwambaasilisilamo ta.”

Umwakaanisi ukhali umwiyikinwa ta

(Mat 24.45-51)

41Kila Petero areeba ari, “Umukasya, ulikho ukanikha lusimo luno, isi ifwe, namwe isi buli mundu?”

42Umukasya welamo ari, “Naanu niye umwakaanisi umwiyikinwa lundi umukyesi, isi umukoosi weewe akalusa khuuba umuloleleli we babakaanisi beewe babaandi, nga abawa kumukabo kwe biilyo byaawe mu mbuka inyene? 43Nga ali ni khabi umwakaanisi uyo, isi umukoosi weewe alikobola anyoole nga akhola aryo! 44Ilala mbaboolela ndi, umukoosi weewe alimukalusa khuuba umuloleleli we bibiindu byeewe byoosi. 45Ne singa umwakaanisi uyo elomela mu mwoyo kweewe ari, ‘Umukoosi wase wekhaaleyo khukhwiitsa,’ aryo warakikha khukhupa babakaanisi baashe basaani atweela ni bakhasi, weela ni mu khulya, ni khuunywa, ni khumeela. 46Umukoosi w'omwakaanisi uyo kane akobole, khu shifukhu sheesi umwakaanisi uyo akhamwambaasilamo ta, ni khu mbuka yeesi akhamanya ta. Umukoosi uyo alimuwa shitaambiso, amuwele atweela kumukabo ni bakhafukiilila ta.

47“Ne umwakaanisi uyo umanya byeesi umukoosi weewe akana, ne walekha khwiŋoonaŋoona khubikhola ta, namwe walekha khukhola byeesi umukoosi weewe akana bibyeene ta, alikhupiwa tsimiimbo tsingali. 48Ne umwakaanisi ukhamanyile byeesi umukoosi weewe akana ta, ne wakhola bibiindu bibimwakhila khuweebwa shitaambiso, alikhupiwa tsimiimbo njeekhe, lwekhuba buli mundu uweebwa bikali alikanibwakho bikali, ni nooyo uwabikhisibwa bikali ni babaandu, balimureeba khureera bikali.

Yezu areera khukhwawukhanamo

(Mat 10.34-36)

49“Ise neetsa khureera kumulilo khu shiibala, shandibeele shilayi abe kuba kukurakikhile khukhwaburukha! 50#Mrk 10.38Ise indiyo ni khubatisibwa khweesi iniindiliile khubatisibwa, ne nga ndi ni kumutaambo mukali khukhwoolesa ni shilyoolelela. 51Mwambaasa muri ise neetsa khureera lukoosi khu shiibala? Taawe! Mbaboolela ndi, ise neetsa khureerera babaandu khukhwawukhanamo. 52Lwekhuba khukhwaama shaleelo, mungo mumubamo babaandu baraano, kane mwawukhanemo; bataru nga bakhabisa babili, ni babili nga bakhabisa bataru. 53#Miik 7.6Bano balyawukhanamo: paapa awukhane n'umwaana weewe umusiinde, n'umwaana musiinde awukhane ni paapawe. Maayi awukhane n'umukhaana weewe, n'umukhaana awukhane ni maayiwe. Ni maayi w'omuseetsa awukhane ni mukho mwana weewe.”

Khumanya imbuka

(Mat 16.2-3)

54Yezu wakanikha lundi isi babaandu ari, “Nga mwaboone kamafuumbi kaniina khukhwaama ibukwa nyaanga, abweene ni abweene muloma muri, ‘Ifula kane ikwe.’ Iryo yakhupa. 55Lundi ni muwulila imbewo iyaama imwaalo we shiibala muloma muri, ‘Kane bukhafu bubewo,’ ate shaaba shiryo. 56Inywe babeeyi, mwamanya khukhwimenielesa shiibala ni likulu nga ni bifwaana, mwaboola nga bubwiile ni kane bube. Lwashiina mukhamanya khuboola kamakhulu ke bisiintsa bino?”

Tubaana n'umusiku woowo

(Mat 5.25-26)

57“Ne lwashiina mwabeene mukhekhalilawo shishiindu shituufu she khukhola? 58Ne n'uba nga uli khuutsya w'omukayi n'umusiku woowo, khakakho khuŋoona bibiindu byeenywe nga mushiili mu ntsila, nio alekhe khukhukhwekhwesa khukhuyila mu moni tsy'omukayi; nio umukayi alekhe khukhuwanayo isi umusilikhale, khukhura mu mapuusu ta. 59Ikhukakasa ndi, s'ulinyala khururayo ta, khukhwoolesa n'ulimala khuwanda inusu iyakamayo iye likobi.”

Pilihan Saat Ini:

Luka 12: LCE

Sorotan

Berbagi

Salin