LUKE 18
18
Thukhen Midiktatlou Gentehna
1Huan lunglellou a thum gige ding ahi chih theihna ding in a kiang uah gentehna a gen hi. 2“Koilai khua hiam ah thukhenmi khat a om a, huai min Pathian a lau kei a, mihing leng khawk a sa kei hi; 3Huai khua ah meithai khat a om a; aman, ka melma tung ah phu hon laksak in, chi in, a kiang ah a hoh zihzeh hi. 4Huan amah sawtkhop a utkei a; himahleh a nung in a lungsim in ‘Pathian laulou in mihing khawksa keimah leng; 5Hiai meithainu’n hon hihbuai ziak in a phu ka laksak mai ding, huchilou in zaw, a hong zihzeh leh a hon hihgim kha ding,’ a chi hi.
6Huan Toupa mah in, thukhen midiktatlou thugen za un. 7‘A tung uah dohzou tadih mah leh leng a mitel, a sun a zan a amah samte phu Pathian in a laksak kei dia hia?’ 8K’on hilh ahi, a phu uh a laksak pah ding. Himahleh Mihing Tapa a hongpai chiang in leitung ah huaibang ginna a honmu diam?” a chi hi.
Pharisai Leh Siahkhonmi Thumna
9Huan midiktat hih kigingta a, midang tengteng musit kuate hiam kiang ah hiai gentehna leng a gen hi: 10“Mi nih Pathian biakin ah thum ding in a hohtou ua; khat Pharisai ahi a, khat siahkhonmi ahi.
11Pharisai ading a, amah kia in hichibang in a thum hi: ‘Pathian, midang, negute, dikloute, angkawmte bang ka hihlouh ziak leh, hiai siahkhonmi bang leng ka hihlouh ziak in na tung ah ka kipak hi.’ 12Nipikal teng in nihvei an ka ngawl zel; ka neih teng sawm a khat ka pe zel, a chi hi.
13Siahkhonmi’n bel gamla tak ading in, vanlam leng a dak ngamkei a, ‘Pathian, kei mikhial, ka tung ah zahngai in,’ chi in, a awm a kitum hi. 14K’on hilh ahi, amasa sang in huai mipen siamtang in a inn ah a paikikta hi. Kingaithupi peuh a niam ding ua, kingainiam pahtawi in a om ding” a chi hi.
Jesu’n Naupangneute A Vualzawl
(Matt. 19.13-15; Mk. 10.13-16)
15Huan a khoih ding in a kiang ah a naungekte uh a honpi ua; nungzuite’n huai a muhtak un a na tai uhi. 16Himahleh Jesu’n amau a sam a, “Naupang neute ka kiang ah hon paisak unla, kham kei un, Pathian gam huchibang mite a ahi ngal a. 17Chihtaktak in k’on hilh ahi, kuapeuh Pathian gam naupang neu in a kipahpih bang a kipahpihlou asung ah a lut kei hial ding” a chi hi.
Hauhna In Lam A Khak
(Matt. 19.16-30; Mk. 10.17-31)
18Vaihawmmi kuahiam in, a kiang ah, “Sinsakpa hoih, tangtawn hinna tanna ding in bang ka hihdia?” chi in, a dong hi.
19Jesu’n a kiang ah, “Bangdia hoih honchi? Mi khat kia ngallou kuamah hoih a omkei, huai tuh Pathian ahi. 20Thupiakte, Angkawm ken, Tualthat ken, Gu ken, Hek ken, Na nu leh pa zahtak in, chihte, na thei vele” a chi hi.
21Aman, “Huai tengteng ka tuailai chila kipan ka zui zel” a chi hi.
22Huan Jesu’n huai a zaktak in a kiang ah, “Tuin thil khat na sam hi; na neih tengteng zuak inla, gentheite kiang ah hawm in, huchi in van ah gou na nei ding; huan hongpai inla, honzui in” a chi hi. 23Amah bel, huai thute a zak in a lungkham mahmah a, a hauh mahmah ziak in.
24Huchi in Jesu’n amah a en a, “Mihaute Pathian gam lut haksa na e! 25Mi hausa Pathian gam a lut sang in sangawngsau phimbil a lutsuak a baihlam zaw hi” a chi hi.
26Huai thu zate’n, “Huchi a hih in kua hotdam in a omthei dia?” a chi uhi.
27Aman, “Mihing hih vuallouh Pathian hihtheih ahi” a chi hi.
28Peter in, “Ngai in, kou bangkim nusia in k’on zui uh” a chi hi.
29Aman a kiang uah, “Chihtaktak in k’on hilh ahi, Kuapeuh Pathian gam ziak a, inn hiam, zi hiam, unaute hiam, nu le pa hiam, tate hiam paisan photphot, 30Tu damsung mahmah in a sang a tamzaw mulou ding kuamah a omkei, hunhong tunglai ding a tangtawn hinna toh” a chi hi.
Jesu’n A Sihna Ding Gelkholh Thumveina
(Matt. 20.17-19; Mk. 10.17-31)
31Huan sawmlehnihte a kiang ah a pituam a, a kiang uah, “Ngai un, Jerusalem khua a hohtou ding i hi ua; zawlneite thugelh tengteng Mihing Tapa tung ah a tung ding hi. 32Jentelte kiang ah piak in a om ding a, nuihzabawlna in a zang ding uh, zumhuaitakin a bawl ding ua, a chilphih ding uhi. 33Huan a vaw ding ua, a that ding uh; ni thum ni’n a thou nawn ding” a chi hi. 34Huai thute a theisiam kei ua, a thugen a lak uah sel in a om a, bang gen ahia chih leng a theikei uhi.
Mittaw Hihdamna
(Matt. 20.29-34; Mk. 10.46-52)
35Huan hichi ahi a, Jeriko khua a tunkuan in, mittaw kuahiam lamgei ah khutdoh in a na tu hi; 36Huai min mipi paiging a za a, bangchi thu ahia chih a dong hi.
37Amau, “Nazaret Jesu a pai ahi” chih a hilh uhi. 38Huchi in, “Jesu, David Tapa, hon hehpih in” chi in, a kikou hi. 39A masate’n dai ding in a tai ua, himahleh, “David Tapa, hon hehpih in” chi in, a kinak kou semsem hi.
40Huchi in Jesu ading a, a kiang a honpi ding in thu a pia hi. 41A kiang a hongtun in, “Na tung ah bangchi a ka hih ahia na deih?” a chi a, a na dong hi. Aman “Toupa, muhtheih ka ut” a chi hi.
42Jesu’n a kiang ah, “Mutheita in, na ginna dampih na hi” a chi hi.
43Huan thakhat in a muthei pahta a, Pathian phatkawm zel in amah a zuita hi; huan mi tengteng in huai a muh un, Pathian a phat uhi.
Pilihan Saat Ini:
LUKE 18: PAITBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
