LUKE 17
17
Jesu Thugen Khenkhatte
(Matt. 18.6-7,21-22; Mk. 9.42)
1Huan Jesu’n a nungzuite kiang ah, “Puknate omlou thei a hi kei; himahleh puknate omsakpa tung a gik hi: 2Hiai mi neute lak a khat leng hihpuk sang in, a hihpuk ding ngawng ah buhgawina suang oksak in, tuipi ah kipai leh, amah ading in a hoihzaw ding hi. 3Pilvang un, na unau in thil a hihkhelh leh taihilh in; a kisik leh, ngaidam in. 4Ni khat in na tung ah sagihvei thil hihkhial in sagihvei, ka kisik, chi a nang lam a a hong kiheinawn leh na ngaidam ding ahi” a chi hi.
Ginna
5Huan sawltakte’n Toupa kiang ah, “Ka ginna uh khangsak in” a chi uhi.
6Toupa’n, “Ankam tangkhat bang ginna na neih uleh, hiai singtheimi kung kiang ah, na kibotkhia inla, tuipi ah na kisuan in, na chi ding ua, na thu uh a mangmai ding hi.
Sikha mohpuakna
7“Himahleh nou lak ah kuapeuh in leilet hiam, belam ching hiam sikha nei unla, a hong vaipaitakin, an hon umpah aw, kua ahia nou lak a na chi ding? 8‘Ka nekding hon bawlsak inla, puanteng inla, ka nek a ka dawn zoh masiah ka nek bawl in; huaikhit chiang in nang ne in dawn in, na lak ua kua ahia na chi zaw lou ding?’ 9Na thu bang ua a hih ziak in na sikha kiang ah kipah thu na gen ngei ua hia? 10Huchibang in ‘nou leng na kiang ua thupiak tengteng bang a na hih nung un, sikha phatuamlou, ka hih ding him uh ahi ka hih uh,’ chi un,” a chi hi.
Phak Sawm Hihdamna
11Huan hichi ahi a, Jerusalem kholam a a pailai in, Samaria leh Galili gam a tawn hi. 12Huan koi khua hiam a a lut ding in, mi phak ngenta, sawm in a na dawn uhi, huaite’n gamla tak ading in aw ngaihtak in, 13“Jesu Heutupa, ka tung uah zahngai in” a chi uhi.
14Aman amau a muh in, a kiang uah, “siampute kiang ah va kilak un” a chi hi. Hichi ahi a, a pailai un a hong siang chiat uhi. 15Huan a lak ua khat in dam chih a kitheih in, aw ngaihtak a Pathian phatkawm in a kiknawnta hi. 16Huan a khebul ah a khupboh a, a kipahthu a gen hi; huai mi Samari mi ahi. 17Huchi in Jesu’n, “Mi sawm hong siangta hilou na hi umaw? Kuate koi ah?” chi in a dong hi. 18Pathian phat ding a kiknawn, hiai theihlouhmi kia loungal kuamah muh a omlou uhia?” a chi hi. 19A kiang ah, “Thou inla, paita in; na ginna na dampih hi” a chi hi.
Pathian Lalgam Hongtunna
(Matt. 24.23-28,37-41)
20Pharisaite’n Pathian gam hongtun hun ding a dot ziak un, a kiang uah, “Pathian gam muhtheih in a hongtung kei; 21‘En un, hiai ah, hiam, huai ah, hiam, a chi kei ding uh;’ ngai un, Pathian gam na lak uah a om” chi in, a dawng hi.
22Huan nungzuite kiang ah, “Mihing Tapa damlaini ni khat bek na muh nop ni uh a hongom ding a himahleh na mu kei ding uh. 23Na kiang uah, ‘hiai ah en un, hiam pam ah en un, a honchi ding ua; paikhe kei unla, amau leng zuikei un;’ 24van nuai lehlam a khua a phiat a, van nuai lehlam tanpha a a vak zel bang in Mihing Tapa a hongpai ni in a om ding ahi ngal a. 25Himahleh huai ma in thil tamtak a thuak ding a, tulai khangte deihlouh in a om ding hi. 26Noah damlai a thil omdan bang in, Mihing Tapa a hongpai nawn hun chiang in a omsam ding hi. 27Noah long a a lut a, tui a honglet a, avek ua a hihlup khit ni a tun masiah, a ne un a dawn ua, zi leh pasal in a kinei uhi. 28Huchibang in Lot damlai in a hongom a; a ne un a dawn ua, a lei un a zuak ua, a suan un a lam uhi. 29Himahleh Sodom khua a kipan Lot a pawt ni’n van a kipan mei leh kat a zu a, avek un a hihlumta hi. 30Huchibang in Mihing Tapa a hong kilak ni in a om ding hi.
31Huai ni’n kuamah a van insung a om, amah inn tung a om, vala ding in kum kei heh; lou a om leng paikei hen. 32Lot zi theigige un. 33Kuapeuh a hinna humbit sawm in a mansuah ding a kuapeuh a hinna tan in a humbit ding hi. 34K’on hilh ahi, huai zan in lupna khat ah mi nih a lum ding ua, khat lak in a om ding a, khat nutsiat in a om ding hi; 35Numei nih buhgawizan in a om ding ua, khat lak in a om dia, khat nutsiat in a om ding hi. 36Pasal nih lou ah a om ding ua; khat lak in a om dia; khat nutsiat in a om ding, a chi hi.
37Amau a kiang ah, “Toupa, koi ah eita?” a chi ua, a dong uhi. Aman a kiang uah, “Saluang omna peuh ah musane leng a kikhawm ding uh” a chi hi.
Pilihan Saat Ini:
LUKE 17: PAITBSI
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
