Лука 17
17
Глава 17
Эевкэчир, хэлэн, тэден, некэбуннэ-дэ
1Мэн хупкуттыӈэлтэкий Иисус гөнин:
– Эевкэчир бэю төнӈэкичу овкаӈчирил, эрэгэр бигрэдир, нян тарал бэил хилдир, тарав төнӈэкичу некэннэл. 2Тарду бэйду аидьмар бимчи, никандулан бурдуку чилкамдыв онерэкэтэн, нян намна улэрэкэтэн, эдлэн өмэм-дэ кучукэм хоибукан. 3Мэнур коеткэрэлрэ! Хин аканси явул төнӈэкичу некрэкэн, нэигрэӈэнри, нян хину долдаракан, хэлэгрэӈэнри. 4Тарбач нян өмэндулэ инэӈнэ хину дэпки надаракан төнӈэкичу овканакан, ноӈан надаракан хинтэки мучудин, тарав төнӈэкичу овканчай тэлэӈдэй, тарак аталабдан, таракам-да хи ноӈман хэлэгрэӈэнри.
5Нян апостолал Хунӈиӈатки гөнитэн:
– Хоялтали мун тэдемун.
6Хунӈит гөнин:
– Тарбач хун тэденсэн хякита няӈтан-да дын бисэкэн, таракам эртэки смоковницатки гөӈэсэн: «Мэни ӈиӈтэлкэм чуптарли, тадук намна тэгукэли!» – таракам смоковница хуну долдадин.
7Ӈи хундук бисилдук кэлмэй косчиддыв, төру-гэл улэддыв, бевчидектук мучуракан, ноӈантакин гөндин: «Хинмач ӈэнни, дебэдеклэ дебдэй тэгли»? 8Айдит бидин, эчин-мэе гөнэкэн: «Дебдэку олэтли, дебэдеклэ тэвли, тарав мин дебдэку колдаку-да бөчидли, тадук-нян мин отчалав мэнкэн дебдинри, колдинри». 9Як-аси ноӈан кэлмэй эскэдилдин, мэн гөнчэй некчэлин? Эсэм Би тачин мулгатта. 10Ху-дэ, тачин хунтэки гөнчэвутэн некми, эчин гөндис: «Бу кэлмэл ач эрилэр бису, теми, тачин некэннэл бими, некривун».
Мям хурбатач энэкэч бутэнрилбу бэгдэчидек
11Иерусалимтаки ӈэнэдми, Иисус Самария, Галилея-да элгэлитэн ӈэнэддин. 12Нян өмэндулэ билэклэ исаддакан, Ноӈман мян бэил, хурбатач энэкэч бутэнрил, арчанитан, тэгэлэ илаттитан, 13тарбач дылгурач дылгань иркаритан:
– Иисус, Хупкучимӈэ, хэлэли муну.
14Ноӈарбутан иттыди, Иисус ноӈартакитан гөнин:
– Ӈэнэлрэ, хиргэмӈэлтэки попалтаки мэнур ичукэнэлрэ.
Тарбач ун ӈэнэдми, тарал тэсэптитэн, аил одытан. 15Ноӈардукутан өмэн бэй, ай одый мэни итми, мучурин, дылгурач дылгань Хэвкив эскэникэн, 16Иисус бодэллон дэпки мэн хэнӈэнди тикрин, Ноӈман эскэдилрин, бачибадилрин. Тарак бэй самариянкан бисин. 17Таракам Иисус гөнин:
– Эв эчилтэн мян бэил тэсэптэ, ай од? Илэ-ккэ хан уюн? 18Он таралдук өмэн-дэ эч мучур, Хэвкив эскэдэй, эрэк-тэкэн хөнтэ төр бэиӈэн эмрин?
19Нян Иисус самариянкантаки гөнин:
– Илли, ӈэнни, хин тэденси хину айчирин.
Хэвки Тэгэмэрэдекэн эмэдекэн
20Фарисеил Иисусу улгэмритэн, ок-та Хэвки Тэгэмэрэдекэн оннаван. Иисус ноӈартакитан барагрин:
– Хэвки Тэгэмэрэдекэн этэн мэдэбгэнь эмрэ. 21Этэр-дэ гөн: «Эр, тарак элэ бисни», нян «Эр, тала». Тарбач Хэвки Тэгэмэрэдекэн хун эмдэсэн долан бисни.
22Унэт хупкуттыӈэлтэкий гөнин:
– Инэӈэл одир, ок-ка ху Бэй Хутэн Очав өмэм-дэ инэӈэӈӈон ичимэлдис, тарбач этэс-тэ иттэ. 23Хунтэки-дэ гөнэкэтэн: «Эр, элэ бисни», нян «Эр тала бисни» – эмэкэн ӈэнрэ, эмэкэн иттэвур хөлуттэ. 24Он-ка агды нянин өмэн кирандукун гякла киракла хутапкиӈчиваттан, тачинта-тта Бэй Хутэн Оча эмэдэкэн инэӈэӈэн бигрэдин. 25Тарбач дюллэ Ноӈан энтэкэе хилгарадин, нян эрэл бэил Ноӈман этэр-дэ хамса. 26Он-ка Ной инэӈэӈнэн бисин, тачинта-тта Бэй Хутэн Оча инэӈэӈнэн бигрэдин. 27Бэил дебэддытэн, коладдытан, олдаддытан, мерэндиддитэн – тачин таракла инэӈэклэ бисин, ок-ка Ной момила ойчирин, тадук-нян эгден тылка один, тарбач таду эйдучэндюр көкэритэн. 28Тачинта-тта Лот инэӈэӈнэн бисин: бэил дебэддытэн, колоддытан, унииддытэн, яв-да тэвуддытэн, яв-да оддытан. 29Тарбач тала инэӈнэ, ок-ка Лот Содомдук хөррин, няниндук тогалкан, нютэлкэн удан удалрин, эйдувэн бэилбу тарак удан марин. 30Тачинта-тта Бэй Хутэн Оча инэӈэӈнэн оградин. 31Ӈи тала инэӈнэ дю хэелэн биддин, нян абдулни дю долан бидир, тарак абдулби гадай эдэн эврир. Ӈи авландула биддин, эдэн амаски мучуграр. 32Лот атыкаӈӈон дёӈчиграӈасан. 33Ӈи мэн иний айсачидилдин, тарак мэн аччаду овкандин, ӈи-ккэ аччаду овкандин, тарак иний арукандин. 34Хунтэки гөнэм, тарав долбану дӫр өмэнду харанду хуклэддир – өмэн гавдин, гя-нян эмэбдин. 35Дӫр асал бурдук няӈтаван өмэтту чилкаддыр – өмэн гавдин, гя-нян эмэбдин. 36Дӫр авландула биддир, өмэн гавдин, гя – эмэбдин.
37Таракам хупкуттыӈэлни Иисусу улгэмритэн:
– Хунӈит, илэ тачин оградин?
Иисус барагрин:
– Илэ-ккэ көкэчэ бисни, тала-да гусэтэл чакабдир.
Pilihan Saat Ini:
Лука 17: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
