Лука 11
11
Глава 11
Иисус Христос хупкуттыӈэлби нэӈнэдэт хупкуттэн
1Өмнэкэн Иисус нэӈэддэй хотаранду илрин. Иисус нэӈэддий оддакан, өмэн хупкуттыӈэн Ноӈман гасчирин:
– Хупкучимӈэ, муну-дэ нэӈдэкун хупкули, Иоанн мэн хупкуттыӈэлбий хупкутчэгчинни.
2Иисус ноӈартакитан гөнин:
– Нэӈгэрэлрэ эчин: Аманти, няниндула биси, Хин Гэрбэс төр мудаклин идэн, Хин Бинис эмдэн, төр мудаклин Хин аявригчинси бидэн, няниндула бисигчинни бидэн. 3Инэӈтэн мун индэкун килебэӈгэкун бөгрэли, 4Мун төнӈэкичун эди гэинкил, бу-дэ ӈив-дэ эсу гэсэнноттэ. Учиктук муну дысутли, дявалдук-та муну бэлли.
5Иисус ноӈартакитан гөнни:
– Тек эчин бидэн: ӈи-вул хундук харакалкан бисни, тарбач долба характакивур ӈэнэс, гөникэн: «Харак-е, илам килебу онули, 6мин хараку тэгэдук эмрэн, яӈуда ачча тогиннэгэку». 7Тарак, дюлай биси, барагдин: «Эди мину бурдэӈиткил. Уркэву нипкуттэн, хурэлби укал хуклэсэмкэнив, тек илӈа, килебэӈгэс бөӈэ барам». 8Би теми хунтэки гөнэм, харакан-да гасчири бими этэнун илра, килебэӈгэн-дэ характи эсэкэн бөр, гасчири, касагнун бими, гасчидин, барив илукандин, касагач килебу бөвкэндин. 9Теми би хунтэки гөнэм, гасчилра – ху бакчис, гэлэтлилрэ – ху бакчис, көӈкэлрэ – хуну аӈадир. 10Бумӈэди көнкэри – уркэв аӈӈавоттан, бумӈэди гасчири – бөввөттэн, бумӈэди гэлэтты – баккоттан. 11Хундук ирэк аман нярудди дӫлу бөдин, тарак нярудин килебу ноӈандулан килебтыдэй гасчиракан? 12Ирэк аман нярудди магдилив бөдин, умтыдай тарак гасчиракан? 13Тарбач, иррөчин-дэ кэнэли ху бисэкэсэн, нян мэн хурэлдур аю бөвэчис, Няниндула Биси Амансан Хиргэбэм Хирам гасчиракасан бөдин.
Иисус Христос, эв Веельзевул-гу?
14Өмнэкэн Иисус ариӈкав нёвкандиддин, тарак ач төрэнэл бэил ариӈкаӈатан бисин, тарбач ариӈка нёрэкэн, ач төрэнэ бичэ бэй төрэлрил. Чэлэн бичэл бэил мянитан. 15Хан-нян гөнитэн:
– Ариӈкал каганкантан Веельзевул тарак эӈидин ариӈкалбу Ноӈан бэилдук нёвкэнни.
16Хөнтэл-эси, Ноӈман яруттавур, нянин хамуммон ичукэндэн гасчиритан. 17Нян Иисус, мулгамутан хами, ноӈартакитан гөнин:
– Кубэтчи тэгэмэрэдек, мэн долай дэлкэлчэ оми, энтэрэн оваттан, дю-да, мэн долай калтарриди, тыкэбботэн. 18Тарбач хайтан-да мэнкэн мэн эмдэи долан дэлкэрэптыди, таракам ноӈан тэгэмэрэдекэн он илутчин? Ху-си нян гөнэс, Мин Веельзевул эӈидин ариӈкалбу нёвканидив. 19Мин Веельзевул эӈидин ариӈкалбу нёвкэнэку, хун-нян нярудилсан ӈи эӈидин ариӈкалбу нёвкэвэттэ? Таракам ноӈартан хун итумӈалсан бидэтэн. 20Би-нян Хэвки уникандин ариӈкалбу нёвкэнэку, тарбач таракам Хэвки Тэгэмэрэдекэн укал хундулэ иссан. 21Ок эӈи бэй пэктэрэвулкэн мэн дюги этувэттэн, таракам ноӈан абдун аич нэкчибботтэн. 22Ок-ка ноӈандук эӈидьмэр бэй ноӈантакин хочудин, нян ноӈман дабдукандин, таракам эйдуӈӈон эетчэвэн пэктэрэвулбэн тедин, нян тарав течэй боритчин. 23Ӈи Миннюн эсни бис, тарак Мину дэпки бисни. Ӈи Миннюн эсни чакаччотта, тарак манаддан-такан. 24Ариӈка, бэй эмдэдукун нёриди, ач мөлэли төрли гиркаваччөттан, билэккэй бактай, нян бакӈа туркуриди, гөвэттэн: «Дюла, нёчэдукий мучудаку», 25нян мучуми, тэсчэв айчичав тарав битлэй дюв баккотан. 26Таракам хөрротэн, унэт хөнтэлбу, мэндуки хэӈунидьмэрэлбу ариӈкалбу мэннюми эмувэттэн, нян, дю долан иридюр, таду бидиллоттэ. Тарак-нян бэй бичэдукий унэт энтэкэедьмэрэч хилаллоттан.
27Тарав Иисус төрэддэкэн, өмэн аси бэил додукутан дылгурач Ноӈантакин гөнин:
– Тарак аси нисэлкэн, ӈи урэн Хину иргэттин, ӈи өкэнди Хину өкуттин!
28Иисус барагрин:
– Хэвки төрэмэн долчиваттыл, гөнчэгчинни неккэрэрил, тарал несэлкэсэл.
Мэтумӈэ Ионна хамунни
29Унэт хоял бэил Иисус анчиндун чакаптитан. Ноӈан ноӈартакитан гөнин:
– Эрэк ӈунмин кэнели оча! Хамам ичукэвкэттэ, тарбач тарав хамам этэр хамалкар, мэтумӈэ-ткэн Иона хамаммон хаградир; 30Он-ка Иона Ниневиянкар хамантан бисин, тачин-та Бэй Хутэн Оча эрэк ӈунмин хаманни бидин. 31Намгида төр тэгэмэрэн аси усалтадякту эрэк ӈунмин бэилбэн дэпки илгарадин, нян ноӈарбутан усалтадин; ноӈан төр мудакандукун Соломон мэргэччон долчидай эмчэ бими; тарбач элэ-нян Соломондук эгдедьмэр бисни. 32Ниневиянкар усалтадякту эрэк ӈунмин бэилбэн дэпки илгарадир, нян ноӈарбутан усалтадир, ноӈартан төнӈэкичу некчэвур аталабувканитан Иона хупкугрэдеккон долчиридюр. Тарбач элэ-нян Ионадук эгдедьмэр бисни.
Дурри нейкэв тэлэӈ
33Ӈи-дэ, нейкэв дуруриди, тарав дяючакла эсни тэвоттэ, алик-та кумтэркинчэ хэрдэлэн эсни тэввоттэ, тарбач нейкэруклэ тэвдин, ирил ӈэрим иткэрэдэтэн. 34Ясалал – бэй нейкэрукэн. Ясалал-си абгарал бидир, чэлэн бэйди-дэ ӈэриӈчидинри, тарбач ясалал-си кэнелил бидир, чэлэн бэйди-дэ химӈэӈчидинри. 35Тарбач, коеӈэнри, ӈэрин, хиндулэ биси, эсни химӈэӈчир? 36Тарбач хин чэлэн булгисас ӈэрилкэн бисэкэн, нян хиндулэ як-та өмэндэ химӈэн ачча бисэкэн, таракам хи чэлэди ӈэриӈчидинри, он-ка нейкэ хину чэлэнь мэн хуталанди ӈэрилукэмчи.
Иисус Христос фарисеилбу усалтавканни
37Иисус төрэрий оддакан, өмэн фарисей дебнэдэн ноӈантакин Ноӈман эририн. Иисус ноӈантакин эмрин, дебэдек анчиндун тэгрин. 38Иисус эдлэй дебэдилрэ ӈали этывэн авра, тарав итми, фарисей мянин. 39Тарбач Хунӈит ноӈантакин гөнин:
– Ху, фарисеил, тек колаӈкалбур, аликалбур тэссочис, мэргэнсэн-нян дон хун хавкандисан, чэлкиндисэн-да милтэрэӈчин. 40Ач мэргэнэл! Эрэк баддон овканча, нян дован-да оча, эв эсни таракатта бис? 41Дӫгрилду эрэл аликал довутан бөгрэлрэ – таракам хундулэ эйду гелбэты бигрэдин. 42Хилус хунду, фарисеялду, бидин! Ху өмэм мягивутан гэрбэтэӈдук нёчэдук, хевкэнчэдук ораттук борилисэн, нян Хэвкив аявум, Хэвки-дэ усалтадяклин этывусэн дӫӈчир. Эрэв хун некэннэсэн, хөнтэв-дэ эмэкэн омӈаграр. 43Хилус хунду, фарисеялду, бидин! Ху нэӈэдекэлдулэ дюлдула малдутан тэгэттэвур аявас, чакабакалдула-да хуну эскэдэтэн аявас! 44Фарисеял, Итум-да хупкучимӈэл, хилус хунду бидин, олэкчитэл ху бисэс, ху имапчал алдыл урэчилтэн бисэс, тарал хэелитэн бэил гиркаватчөтта, тарав эникэн хар.
Иисус Христос Итум хупкучимӈэлнюн укчэнрэн
45Тарак өмэн Итум хупкучимӈэ Иисусу дэпки төрэлрин:
– Хупкучимӈэ, Хи эчин төрэми, муну-дэ осэинри!
46Иисус-нян гөнин:
– Хилус хун-дэ, Итум хупкучимӈэлни, бидин! Бэилбу инубгэн инулди этылди бис инугрэрилисэн, мэркэсэл-нян өмэньдэдиттэ униканьдюр ноӈарбутан эсэс бэлэсчивэттэ. 47Хилус хунду бидин, мэтумӈэлду, хун амтылдусан мавчалду, алдылгатан очалисан: 48ху тачин тэдевкэчис хун амтылсан аич некчэтэн бидэн; тарбач ноӈартан мэтумӈэлбу маддитан, ху-нян мавчалду алдылгатан овачис. 49Теми-дэ Хэвки мулганни эррөчин бисин: «Таимкачимӈалбу, мэтумӈэлбу-дэ ноӈартакитан ӈэнукэндим, тарбач ӈэнукэнчэлдукув хаван мадир, хөнтэлбу-нян эрэсчир. 50Эрэк ӈунмин тамам эйдулин мэтумӈэлдули Минду гавдин, бини одяктук хуӈэлэтэн оӈкэлбэчэлин: 51Авель хуӈэлэн оӈкэлбэчэдукун Захария хуӈэлэн оӈкэлбэчэкэн окан, Хэвкиду бөчидек Хэвки-дэ Дюн элгэлэтэн ноӈан мавчалин». Айдит, хунтэки гөнэм, эрэк ӈунмин милэӈэй бакчин. 52Итум хупкучимӈэлни, хилус хунду бидин! Ху хаваил бидэвур ханмай аӈаӈкаван мэрдур гадисан, мэркэр-дэ эчилсэн ир, хөнтэлбу-дэ, исчирилбу эчилсэн ивкэн.
53Иисус тарав ноӈартакитан гөндидэкэн, Итум хупкучимӈэл, фарисеил-да Ноӈантакин хочунь хилгадилритан, гэрбэтэӈу улгэму барагдан, 54яв-ул ноӈандулан касагач кэнелив долдасчиритан, тадук-нян Ноӈман усалтадавур.
Pilihan Saat Ini:
Лука 11: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
