Лука 10
10
Глава 10
Иисус Христос 72 хупкуттыӈэлби мэтутэттэн хөрукэнни
1Тадук Хунӈит унэт хөнтэлбу-дэ наданмяр дӫрбу хупкуттыӈэлгэй хинмарин, нян Мэн дюлдэлэй ноӈарбутан дӫтэлтэн эйдулин городалдули, билэкэлдули, илэ-ккэ Мэнкэн ӈэндэй мулгарин, тали ӈэндэтэн хөрукэнин. 2Ноӈан ноӈартакитан гөнин:
– Эгден ирчэв аталадяк#10:2 Ирчэв аталадяк – здесь: жатва. одни, гургэвчимӈэл-нян абал. Ирчэв аталадяк Хунӈиван гасчилра, унэт гургэвчимӈэлбу аталадяктаки эмукэндэн. 3Ӈэннилрэ! Би хуну хөнӈачарбу некригчин делгэнкэл долатан хөрукэнэм. 4Хэлэкэлбур, орамилбур, унталбур-да эмэкэн гад, ӈинюн-да хотаранду эмэкэн доровматта. 5Илэвул дюла игрэдис, дюллэ-кэнэ гөӈэсэн: «Эрэк дю аймулдаӈан бидэн!» 6Тарбач тала аймулдан хутэн инэттэкэн, хун аймулдансан ноӈандун эмэбдин, тарбач таррөчин эсэкэн бис, хунтэки гөнчэсэн мучубдин. 7Таду дюду эмэбӈэсэн, дебӈэсэн, колӈасан яӈатан-ка тала бидин – гургэвчимӈэ эрэгэр тамӈай баккотан. Эмэкэн дютанна нулгэр. 8Илэ-ккэ городла ху ӈэндис, тала-да хуну алимдир, яв-ка хунду бодир, эйду дебӈэсэн, 9бутэнрилбутэн-дэ бэгдэтьӈэсэн, гөникэн: «Хэвки Тэгэмэрэдекэн укал далиласан бисни!» 10Тарбач илэ-ккэ городла ӈэндис, тала хуну этэр алимра, толлитэн гиркаватьӈасан, эчин гөникэн: 11«Хун городласан гиркаваттакун бодэллэвун-дэ булэв хорчав, бу бодэлдукур давсаридюр хунду мучувкану. Тарбач хаграӈасан-да: Хэвки Тэгэмэрэдекэн укал далила бисни». 12Хунтэки гөнэм, Итудяк Инэӈэӈэн одакан Содом усанни эрэк город усандукун эюмкудьмэр бигрэдин.
13Хоразин, хилӈанри! Хилус хинду бидэн, Вифсаида! Тирла, Сидондулэ-дэ хундулэ некригчин ичучэл ичумчил, тарбач ноӈартан отэл-тэ укал тэкэкул биникэсэл-дэ, хултэнду-дэ тэгэтникэсэл, укал төнӈэкичур некчэвур илрамкамчал бимчил. 14Теми-дэ Итудяк инэӈэӈэн одакан, городал Тир, Сидон-да усалтан хун усалдукасан эюмкудьмэр бигрэдир. 15Хи-дэ, город Капернаум, няникла огэрэпчэ, дюлэски төр долан табдас дулакандулан тиккэрэдинри! 16Ӈи хуну долдари бисни, тарак Мину-дэ долдан, ӈи хуну эрэсси бисни, тарак Мину-дэ эрэссэн.
Наданмяр дӫр мучудякатан
17Наданмяр дӫр хупкуттыӈэлни, өрэлдэникэн, мучуритан.
– Хунӈит, – ноӈартан болганаритан, – ариӈкал-да муну долдаритан, Хин Гэрбэвус гөнэкун, муну долчиватта.
18Иисус ноӈартакитан гөнин:
– Би коерив, хайтан няниндук агдыри хутапкиннигчинни тыкривэн. 19Тек Би хун эӈигэсэн тарав дявуттасан бөрэм, магдилилдула, дябдалдула-да, булэр-дэ эӈилэтэн тогрэдэсэн, таракам як-та хуну этэн хоиткарар. 20Тарбач ариӈкал хуну долдаривутан, тарав эмэкэн хокаӈчиграр, хун гэрбэлсэн няниндула дукуттывутан – тарав хокаӈчилра.
21Тармадит Иисус Хиргэбэнь Хиранду өрэлдэлрин, тадук-нян гөнин:
– Эскэрэм Хину, Нянин, төр-дэ Хунӈиван, Хин эрэв мулгачирилдук, мэргэчилдук-тэ хумэтчэвус, нян куӈалду бөдэй аӈачалис. Айдит, Аманты! Эррөчин Хин ай некэнмэйси бисин.
22Нян хупкуттыӈэлтэкий гөнин:
– Мин Амму эйдувэн Минду бөрин. Ӈи-дэ Хутэн бисивэн, Аманниткан хан; ӈи-дэ Аман бисивэн, Хутэнтэкэн тарав хан, унэт ӈи Хуттун хамалкаганна бидин – тарак хадин.
23Нян хупкуттыӈэлтэкий одыди, Иисус ноӈартакитан-такан бэкэл гөнин:
– Талал ясалал, коерил хун коеривусэн. 24Хунтэки гөнэм, хоял тэгэмэрэл, таимкачимӈал-да хун коеривусэн коемситэн, тарбач эчилтэн иттэ; хун долдаривусан долчимситан – тарбач эчилтэн долдар.
Самариянкам илранив тэлэӈ
25Тар бими өмэн бэй Моисей Итуман хупкучимӈэ Иисустэки дагамрин, Ноӈман яруттай улгэмрин:
– Хупкучимӈэ, яв-нян некрэку ай бимчи, ач көкэнэ индэй?
26– Тарбач як-ка Моисей Итундулан дукуттан? – Иисус тачин-та ноӈман улгэмрин, – Он-ка хи тарав таӈӈөчинри?
27Тарак барагрин:
– «Аявли мэн Хунний Хэвкив мявунди чэлэдин, эмдэди-дэ чэлэдин, эӈиди-дэ чэлэдин, мэргэнди-дэ чэлэдин», тарбач унэт дукуттан «Гяи-да аявгарали мэни некригчин».
28– Айдиту гөнэнри, – Иисус ноӈантакин гөнин, – тачин эрэгэр неккэрэли, индинри-дэ.
29Тарбач Моисей Итуман хупкучимӈэ мэни дысутми улгэмрин:
– Ӈич-нян би гялаттам?
30Иисус ноӈантакин барагрин:
– Өмэн бэй Иерусалимдук Иерихонтаки ӈэнэддин. Хотаранду хөнэлду хочиврин, ои теврин, кусивриди-дэ тала-тта хотарандула улэврин, асукут көкэрин. 31Нядасукан тали-тта хотарандули поп ӈэнэддин, тарав кусивчэв бэю иттыди, хотаран бардалин гиркаснин. 32Тачин-та левит некрин, бэю дэсчирив гисирин. 33Эсимэсукэн хиладдытки бэйтэки самариянкан дагамрин. Ноӈан тарав бэю итми, илралрин. 34Самариянкан хиладдытки бэйтэки дагамрин, гуюмчаван спиртач, хэтэч-тэ хэсирин, хэркэрин-дэ. Тадук-нян хилалчав бэю мэн учиклай тэгукэниди, хөлнирил дюлатан ӈэнуриди, таду ноӈман айчидилрин. 35Гяла инэӈнэ самариянкан хөлнирил дювутан хунӈивчиридун дӫрбу мэӈэм бөрин, гөникэн: «Бутэнрив бэю коетӈэсэн, мучуриди, коетчэлисэн унэт тамдин». 36Хөнэлду хилалча бэй ильнидук анчиндулин гиркачалдук бэилдук ӈич гялаттан?
37Моисей Итуман хупкучимӈэ барагрин:
– Ӈи-ккэ ноӈман айрин, бэлрин-дэ, тарич бэич гялаттан.
Таракам Иисус ноӈантакин гөнин:
– Гэ, ӈэнни, хи-дэ тачин неккэрэдэй!
Иисус Христос Марфа, Мария-да дюлатан биддэн
38Хотарандули хупкуттыӈэлнюми гиркадми, Ноӈан өмэндулэ билэклэ ӈэнрин. Өмэн аси, Марфач гэрбэлэтты, мэн дюлай Ноӈман ивкэнин. 39Аси нөн бисин, Марияч гэрбэлэтты, тарак Иисус бодэлэн хатлан тэгрин, нян Ноӈан төрэмэн долчиддин. 40Марфа-нян эгдем тоилдывум олэддин, нян, дагамриди, гөнин:
– Хунӈи! Ями-нян эсэнри авдатта, мин ногу мину өмэккэм некэддэку эмэнчэвэн? Гөли ноӈантакин мину бэлдэн.
41Иисус нян ноӈантакин барагрин:
– Марфа! Марфа! Хи хояв мэргэчинри, хевэнри-дэ, 42нян өмэн-тэкэн бидэн ай: Мария-нян өмэм-тэкэн аидьмару хинмарин, тарбач тараӈӈон ӈи-дэ этэн тер.
Pilihan Saat Ini:
Лука 10: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
