San Lucas 14

Pa Jesús yivatsjanchat pa nivacle lhayyashaesh pa vatcap'ofitaj

1Ve'lha pa nalhu ti chit'ichayshi pa yichey pa Jesús pa lhajpôyich pa lhanvacle papi fariseos pa tsaccunelh, pa yiclôvalhesh ts'ivee pap'elh fariseos. 2Pa lhech yie' shta pa ve'lha nivacle lhayyashaesh pa vatcap'ofitaj. 3Pa lhechesh pa niyôsesh pa Jesús papi vanqu'eyjatsjanesh pava lhfanishlhavach shi' papi fariseos:

—¿Tajulhey t'e ca chinalhjenshi papu pa nalhu ti chit'ichayshi, ja't'ajesha ca ama?

4Taj ti ninculhesh ts'ivee. Pa lhechesh pa t'acum'e pa aôytej'in pa yilhjen pa yiyôjaa ca nôc. 5Pa yit'esha papi fariseos:

—¿Naô pa nôv'e' avaatsheelh papi nach'e pa t'itsech pa lhclô cuvôyutaj, ja't'ajesha ca vacôa, pa tanca t'e ca anclaneelhshi tatsha ca nivoyjatajesh pa nalhu ti chit'ichayshi?#14.5 Mt 12.11.

6Pa ampa ca niteeshjulh ts'ivee.

Papi chit'alheyjop pa vatajayayash

7Yiclôvalhesh pa Jesús pa lhanfanash pava vatc'oovtes ti chiyanch'e lhavôôjc'oya pa vattsaccunjavat papi chit'a'lhey, pa lhechesh pa yit'eshem cavôque yovalheyjop atesha:

8—Ca nicaajtaj papu ca nit'aalhtaj'ay'ajop pa vatajayayash, pa ya aj ca vee' pava vatc'oovtes chivenchat, nam jayu pap'elh ti chiyashjat'ac'oya ti chiyen: 9Lhayaash pa lhech ti nanpuntelh ti t'a'lhelh'ay pa nam'ay jayu pa niteesh'a: ‘Ay'ec'oya naelh na ac'o'vat.’ Pa lhecheesh pa avapen'in pa vee' pava yicuvan vatc'oovtes. 10Meelh ca chint'aalhtajesh'a, pa vee' pava yicuvan vatc'oovtes; jaspa nam'a jayu papin t'alh'a vitsha pa yit'esh'a jayu: ‘Yic'utsfa ac'uych'e nava chivenchat vatc'oovtes.’ Pa lhecheesh pa chinôclôjesh jayu ca navantajesh papi lhôvelhch'e lhavôôj pa vattsaccunjavat.*xt* 11Papu ca nunataj pa lhecha pa chinachajshicham, vooy papi vanits'aclayan pa lhecha ca chinashjatchisham.#14.8-10 Pr 25.6-7.,#14.11 Pr 29.23; Mt 23.12; Lc 18.14.

12Pa yit'esha shta pan t'a'lha:

— Ca asnatajesh pa vatôc ja't'ajesha ca lhecha pa nuutey, ya aj ca ayôjiajop papi ac'utsfas, nilhecha papi acheclavot, nilhecha papi avelhavot, nilhecha papi achifas acôsshiin, lhayaash ti yiyôjiaajop jayu vitsha pa cat'eelhtajeesh pa ajônshelhvatich'e jayu. 13Vooy ca asnatajesh pa vatc'usiyash'in pa ayôjaajop papi ts'aclaaysha'ne, shi' papi t'ucjisha'ne, shi' papi ancojoy shi' papi taclujuy; 14pa lhanshamesh jayu, lhayaash ti tanca nijônesh'ach'e; taj ti lhavan jayu shta pan lhjôneshch'e ca ninetajchisham papi yivo'yeshch'e.

Chiyovalheyjop pa uj vattsaccunjayash

(Mt 22.1-10)

15Pa yipe'yach'e cavôque pa ve'lha papi yich'elhavôôj pa vattsaccunjavat, pa yit'esha pa Jesús:

—Nishamesh papi tuj lhpa yucuve yiey pa Dios lhanvacleyash.

16Pa lhechesh pa yit'esh pa Jesús:

—Ve'lha pa nivacle yisnatesh pa uj vatôc, pa acloj papi t'a'lhey. 17Pa yama pa t'elhesh'in ti tsaccun pa yicheney pa lhcavo pant'ajôôj papi chit'a'lhey pa yit'esh: ‘Ata'lhunelh, lhayaash ti p'alha ti vacalhesh lhacôm'a.’ 18Taj ti lhacôm'a ti tcavoyeshjulh ts'ivee. Yijutseesh pa ve'lha ti yit'esh: ‘Nich'a jum javaclhitesh ti jaycasha'ya ja vatcôvjiyanjavat, pa jajôchiey jayu pa secl'esh ca ja'van; pa ya aj ca aja'shayish jô.’ 19Vooy peelh yit'esh: ‘Apis ti jaycasha'ya java ve'lhanôjesh vacôc vanôôcfavach, pa jôquey jayu ca jac'alhtanesh; jatantsaclanesh'a ca ya aj ca anuteshyam. 20Vooy peelh yit'esh: ‘Nich'a jum jayijayay, nôquenlhyaash tanca voach'e.’ 21C'oya ti vapecley pa lhcavo pa lhanvacle pa nifaclem lhacôm'a pa lhjunashesh papi yi'tajey. Pa lhechesh pa suya pa lhanvacle pa yit'esha pa lhcavo: ‘Alhun ca meey shta pava lhcaavjuc pava yitsates shi' pava nôyishay, pa anchaajnee papi ts'aclaaysha'ne, shi' papi t'ucjisha'ne shi' papi ancojoy shi' papi taclujuy.’ 22Pa yit'esha pa lhcavo: ‘Lhcaanvacle, apis ti jasnatesh'am navan lhteesh'yi, taj ti jôjjeclay amjop jav'elhcha.’ 23Pa lhechesh pa yit'esha pa lhcaanvacle pa lhcavo: ‘Meey shta pava nôyishay shi' pava nashch'e lhavjoy pava jpôyjey, pa ayôjeelha pap'elh jaspa nachey, jaspa tapooj jayu na yijpôyich. 24Lhech jayeetshelh'a ti ampapu ca yijutsjat ca ya'lhey ca nituj jayu na yôc.’

Pa lhavijatayash papi yôfiis pa Cristo

(Mt 10.37-38)

25Acloj papi voqu'e' pa Jesús; pa tatvaych'aclajulh ts'ivee pa yit'eshem:

26“Ca nicaajtaj papu ca nachtajyiy, ca nincônitshitaja pa lhtata shi' lhpa lhamimi, shi' lhpa lhch'acfa, shi' papi lhcles, shi' pap'elh lhavelhavot, shi' papi lhavelhchey, shi' shta pa lhamônlhajayash, pa tanca yeyjatsjanach'eesh.*xv* 27Papi ca ninatcuumtajee pava cacleclem nan yijunashesh lha yicruz, ca nitatvotajyich'e, pa tanca yeyjatsjanach'eesh.*xw* 28Papu ca niteetajesh ca nasnatajesh pa uj jpôyich, ¿pa tan t'e ca naôvja'ne ca natsjulhch'ejop pava pesoc pava tajulhsham jayu ca jaspa nivacalhesh? 29Pa sajop ca nasnatesh tatsha pa jpôyich niameesh ca nintajulhasham pava yi'van, pa nicaaysiyuesh'in jayu papu ca nivantaj ti niujachisham, 30pa yit'esha jayu ts'ivee: ‘Nôque nivacle yeetajesh ca nasnatesh pa jpôyich, taj ti ninvaclhitesh.’ 31Ja't'ajesha ca lhecha pa lhcaanvacle can teesh can vatclônelh paelh lhcaanvacle, ¿pa tan t'e ca nijutsjat ca naôvja'ne ca naychavalhey ca vo'ya ca isaemjop ca nicaajem papi diez mil nivacle, vooy papi t'ajuytajjulh pa veinte mil lhavaatsha? 32Vooy ca nitanapuntajulh, coos ca tôjajulh paelh lhcaanvacle pa nichenjulh papi vatcasinôc pa nit'aalhsha pa lhasclanjayashvatjulh. 33Lhech jayu lhjunash avaatsheelh ca niavôômtajeeshelh lhacôm'a pava lhavanelh, pa sajopyam ca qu'eyjatsjanjaseelh. #14.26 Mt 10.37.,#14.27 Mt 10.38; 16.24; Mr 8.34; Lc 9.23; Jn 12.24.

Ca nivôômji lhôn pa t'acô' pa tsifoni

(Mt 5.13; Mr 9.50)

34“Is pa tsifoni; lhan'e vitsha ca nivôômtajshi pa t'acô' pa tsifoni, ¿pa ta t'e ca lhanfanashtaja ca chinucatiyanshi shta? 35Ninyôych'e pa'na', nilhecha na cotsjaat nilhecha shta pava shtôcley, pa lhechesh pa chinvôm'in atesha. Papi caajem pava lhacfey ti yipe'ya, pa tach'anch'e.

Vatovalhjayasheyjop pa tashinshtaj ti t'astay'in

(Mt 18.10-14)

Pilihan Saat Ini:

San Lucas 14: NIVA

Sorotan

Berbagi

Salin