San Lucas 13

Ya'shesh ti tajulhey ca chintatvaych'aclajesh pa vatjunash

1Lhech t'aplhuqu'e ti namey papi napu' ti tfacjanem pa Jesús ti yiclôn pa Pilato papi napu' Galilea lhavos, chiyicshenjatesh pava lhavoyey papin chiyiclôn pava lhavoyey pava yaquisites ti vatcufayjateshjop. 2Pa yit'esha pa Jesús:

—¿Lhaychavalhtajelhey avaatsheelh capuque Galilea lhavos ca na'sheshc'oya pap'elh lhchifas pa lhsasch'e? 3Jayeetshelh'a ti am jayu; taj ti ca niatatvaych'aclajtajeeshelh pa ajunashelh, pa alhacôm'aelh jayu shta ca avafelhsha'ne. 4¿Pa lheclôjeshelh jayu avaatsheelh capu lhech dieciocho ti yivômjat pa jpôyich ti nat'apee yiey ja Siloé, ca natmenlhavatsha'ne ca na'sheshc'oya pap'elh yiey ja Jerusalén? 5Jayeetshelh'a ti am jayu; taj ti ca niatatvaych'aclajtajeeshelh pa ajunashelh, pa alhacôm'aelh jayu shta ca avafelhsha'ne.

Chiyovalheyjop lhpa higoyuc nintaay

6Pa lhechesh pa yit'esh ti yovalheyjop atesha pa Jesús:

“Caaj pa ve'lha nivacle yicôvjiyan'e pa lhcootsjat lhpa higoyuc, pa yitajeshey lhpa ca lhaa, taj ti ninvan.*xm* 7Pa yit'esha pa vatcôvjiyanjavat lhavo': ‘A'va, nôqueesh pu'jana java nincôpes ti janatajeshey anôque higoyuc lhpa ca lhaa, taj nive'lhaaesh ca yi'van. At'ovôslha; ¿ta lhayaash ti cha'lheesh ti yie' atesha na cotsjaat?’ 8Pa lhechesh pa yicuulh pa vatcôvjiyanjat lhavo' pa yit'esh: ‘Lhcaanvacle, yaajlhee cum nôque nincôôp; vooy ca jatiishtajch'e lhavôôj pa jafosch'etsham shta pava suyshemshi. 9Pa lhecheesh jayu pa nitaay; ca nintaytaja, pa lhechesh pa chint'ovôôs.' ” #13.6-9 Is 5.1-7;Jer 2.21; 8.13.

Yilhjensha'ne pa Jesús pa nalhu ti chit'ichayshi lhpa nivacche cupjam

10Yeyjatsjan'ôcji pa Jesús pa vatvanqu'eyjatsjanjavat pa nalhu ti chit'ichayshi: 11Pa lhech yie' lhpa ve'lha nivacche ti dieciocho pava lhnincôpes ti yi'shi' pa tsich'e' pa yicupinatshem ti t'ôtaaytaj, pa sasemjop ca nivôôntsôtjat. 12C'oya ti yi'van pa Jesús pa tôney pa yit'esh:

—Nivacche, vôm'ash nôqueesh na ayyasha.

13Pa lhechesh pa yan'apee pava lhpôcôtôy, pa lhech t'aplhuqu'e ti vantsôôtjat lhpa nivacche, pa lhechesh pa yôclôj pa Dios. 14Taj ti vooy pa lhcaanvacleesh pa vatvanqu'eyjatsjanjavat pa vanutem pa Jesús, lhayaash ti yivatsjanchatshi pa nalhu ti chit'ichayshi, pa yit'esha papi nivacle:

—Ve'lhayama pava nalhus ca chinatcuumjiin; pa tajulhey ca anachelhey ca chinafetatsiyanelh pava lhech nalhus, pa ya aj na pa nalhu ti chit'ichayshi.#13.14 Ex 20.9-10; Dt 5.13-14.

15Pa lhechesh pa yicuulh pa Lhcaanvacle:

—Ajôts'ôclônjanjaselh, ¿tanca ajalh ca anuqueeshelh pa acloelh vacô ja't'ajesha ca lhecha pa cuvôyutaj ca amtajelha pa nalhu ti chit'ichayshi pa clet'ey ca ayôjayanelh jayu? 16Anôque vatôse tô'lha ca Abraham dieciocho pava lhnincôpes ti yôcfeesh ja Satanás ja lh'aôyteyash, ¿nintajulhey t'e ca chinuqueeshi na t'aôyteyash na nalhu ti chit'ichayshi?

17Pa lhechesh pa yit'esh cavôque pa vapenvatsham'in lhacôm'a papi nilhc'utsfasa; taj ti vooy pap'elh nishamesh ti yi'van pava yisnatesh'in pa Jesús.

Chiyovalheyjop atesha lhpa lhtôsej lhpa mostazayuc

(Mt 13.31-32; Mr 4.30-32)

18Pa lhechesh ti yit'esha cavôque:

—¿She t'e pa ca shtajôney ca lhjunashajulh ja Dios lhanvacleyash, naô t'e shta pa ca shtavoyjatjulh? 19Jan lhjunash lhpa mostaza lhtôsej ti yicôvjiyanshi pa nivacle pa lhcac'ovat, pa tôlhshi' pa vat'ichisham pa yameylhac'o' ti lhjunashjulh ti aacjiyuqu'esh, pa vooy pava ajôclôs yifôyôey pa yamey pa tupiyshi.

Chiyovalheyjop atesha pa yicap'ofinatshi

(Mt 13.33)

20Pa ve'lheesh yit'esh shta pa Jesús:

—“¿She t'e pa ca shtavoyjatjulh ja Dios lhanvacleyash? 21Nan lhjunash lhpa ve'lha nivacche ti pu'janaesh ti yueyshi pava t'ajuya pa climshi pa nivaychaclajeshi pa tanayeshchisham.

Pa lhashi tsuysham

(Mt 7.13-14, 21-23)

22Yichey pa Jesús ja Jerusalén, pa yuyeyshisha'ne pav'elh us'e yitsates shi' pava niuseey ti vanqu'eyjatsjan'e. 23Pa ve'lha pa niyôs ti yit'esh:

—Lhcaanvacle, ¿naacloja t'e papu ti chiyilhjen?

Pa lhechesh pa yicuulh:

24—Aniyitey ca uytajey pa tsuysham lhashi; lhech jayeesh'a, lhayaash ti acloj papi yic'alhtantajesh ca nuyey, taj ti sasemjop. 25“Ca nivaclhitajesh pan lhajpôyich pa nineeychisham pa nip'oey pa lhashi, vooy avaatsheelh veelhfach'ee, apôcôjelhey pa lhashi pa at'eshelh jayu: ‘Lhcaanvacle, ancat'eelhyic'oya.’ Pa yicuulh jayu jô lhech pa niteesh: ‘ninôstôyelh'a pan lhtôlhelhshi.’ 26Pa lhecheesh pa at'eshelha: ‘Jatatvoelh'ach'e ca shtatsaccunelh shi' ca shtiyô'elh, avaatsha lhts'eyjatsjanelh yiey java yivtsateselh.’ 27Taj ti nacuulhshelh jayu: ‘Apis ti jayeetshelh'a ninôstôyelh'a pan lhtôlhelhshi. Vena veeelhshiyic'oya alhacôm'aelh ti lhasnatshelh pa niysa'.”*xñ* 28Pa lhech veeelhshi ca apelh'in pa at'ôyitelh nava atsevteyelh ca avantajelh ca Abraham shi' ca Isaac shi' ca Jacob shi' jant'ajôôj capi chiytôyjata pava ti vaclan japin yielh'e ja lhanvacleyash ja Dios, pa vooy avaatsheelh amônlhaaelhfach'ee.*xo* 29Lhayaash ti nam jayu papi nivacle tôlhey na lhum'ôcjinuc shi' na nuutch'e, tôlhey shta na fchenaj shi' na fiyat, pa lhecheesh pa nôvelhch'e lhavôôj pa lhtsaccunjavat yiey ja Dios lhanvacleyash.*xp* 30Vooy papi nijôôylha nôqueesh pa nivatjutsa' jayu. Pa vooy papi vatjutsa' nôqueesh pa nanjôôylha jayu.*xq* #13.27 Sal 6.8.,#13.28 Mt 22.13; 25.30.,#13.28-29 Mt 8.11-12.,#13.30 Mt 19.30; 20.16; Mr 10.31.

Pa Jesús yip'ein pa Jerusalén

(Mt 23.37-39)

31Lhechesh jô lhech nalhu ti yamey papi napu' fariseos pa yit'esha ts'ivee:

—Ay'e tatsha nôque, lhayaash ti naclôn jayu lhôn ja Herodes.

32Pa tatsha ti yicuulh:

—Meelhey ca anfaclelhem jô lhech yô'nis pa at'eshelha: ‘A'va, nôqueesh shi' shta lhum'ashi jasaasfach'ee jayu java tsich'es pa c'alhjen jayu papi aôytes'in, vooy shipalhum'ashi pa javaclhitesh jayu na yicumjayash.’ 33Taj ti jôc jayu shta nôqueesh shi' shta lhum'ashi, shipalhum'ashi shta, lhayaash ti nintajulhey ca yalha nivafch'ec'oyaan ja Jerusalén papi chiytôyjata pava ti vaclan.

34¡Jerusalén, Jerusalén, lhclôn avaatsha capi chiytôyjata pava ti vaclan, pa t'ôôtjatesh'in pava utes capi lhcasinôclesh ja Dios ti nichenelh'ay! ¡Naô t'e ja t'ajô'jesh ti jayeetajesh ca nayjatva'ne napi tsitenas'atshi, nan lhjunashesh lhpa votôjôj pava lhcles ti yan'ôcji pava lhafas, taj ti naat'eshelh! 35A'va avaatsheelh, niyijôa ca amônlhaaelh'ôcji nava ajpôyjeyelh; lhech jayeetshelh'a, lhayaash ti tanca asvaneelh jayu ca namtajeyjop pa nalhu ti lhteetshelh jayu: ¡Chiyisiyan pa lhech ti namjem pa lhey pa Lhcaanvacle!#13.35 Sal 118.26.

Pilihan Saat Ini:

San Lucas 13: NIVA

Sorotan

Berbagi

Salin