Lc 14
14
Jesús en yemegue ñe'me leuaĝaic jo'ne yajediye ga'me lo'oc
1Ua'edi 'uo jo'me nolo' jo'ne niyamaqatac, Jesús yec'ata ga'me 'lachaqa' ñe'me lejaliaĝane'j gaa'me fariseopi qaedi deque'e, qama'le gaa'me fariseopi yelochidegue ca'li. 2Nach'e ena'am ue'tedi, dajo'taguet joñe'me, ñe'me leuaĝaic jo'ne yajediye ga'me lo'oc. 3Qama'le Jesús yenatouelo jogaa'me paĝaguenataĝanaĝayaqa daa'me Dios lamaĝajoĝonaĝaco nataq'aen jogaa'me fariseopi:
—¿Qo'li qodajenataĝatem da'me qoyen yemegue ga'me leuaĝaic qom nolo' jo'ne niyamaqatac, uotaĝa ja naq'aeta?
4Qalaĝaja jogaa'me 'nemaĝadela'ajalo. Chane'eja Jesús en ñijeguem ga'me leuaĝaic qama'le en yemegue nataq'aen enapega queda'me 'noota ta'le ec. 5Yem qama'le yitaĝa yenatouelo jogaa'me fariseopi:
—Jega: qom 'uo ga'me ac'oĝot uotaĝa alo uaca ta'ñgui jaga'me limaĝañi, qama'le paja'a anaqadijeguem jaĝa'te, mate mane'e nolo' jo'ne niyamaqatac. ¿Qo'li ja naq'aeta?
6Qama'le jogaa'me ja yaqanate't ta'le 'yadeteguet.
Jogaa'me nepodae's da'me yec'adeta ga'me neualaĝayaĝac
(Mt 22.1-10)
7Jesús yauana queda'me jogaa'me nepodae's 'yatelo'te gaa'me je'onaĝaiqui' jo'ne 'uo da'me li'yoĝodi'j dajoyedalegue ga'me niqui'yaĝala'. Chane'eja ya'uo da'me dojo' loqotenaĝanaĝac:
8—Qom am qonepoda ta'le auec'ata ga'me neualaĝayaĝac, ena'te ona'ña ga'me laeñi 'me di'yaĝa, qa'a uotaĝa novi' ga'me nepodaejec laqaya jo'ne p'ajaye am napacalegue; 9qama'le ñe'me jo'ne ami nepoda'y yaqanatet da'me am nec'ata qama'le enaac: «Auanem jana'me onetañgui jena'me jenjo' jiyaĝaua.» Chane'eja degueja da'me adepocoĝoc da'me oñijeguem qama'le auec'ata jaga'me je'onaĝaiqui jo'ne p'ategue. 10Qama'le 'noota qom ja naq'aeta ga'me aua'uo: qom am qonepoda, 'noota qom ona'ña ga'me p'ategue qonapi'ña, qaedi qom novi' ñe'me jo'ne am nepoda qama'le am enapega: «Am yaqaya, anec'ate'uo jenjo' qonapi'ña jo'ne 'uo da'me 'yoĝodac.» Nach'eda naq'aeta da'me 'uo joda'me ani'yoĝodenataguec, qama'le ena'uaque jogaa'me dajotedalegue ga'me niqui'yaĝala' yauata da'me dojo'. 11Qa'a ga'me jo'ne mach'ega da'me ni'yoĝodela't, nach'ega qamqa'me qaya'te ni'yoĝodenataguec qom'te; nataq'aen ga'me jo'ne ja ni'yoĝodela't, nach'ega jo'ne Dios yi'yoĝoden qom'te.
12Nach'e ena'am dojapegue' ñe'me jiyaĝaua jo'ne nepoda:
—Qom aua'uo da'me niqui'yaĝac ga'me nolo' uotaĝa nale pi'yaq, ena'te anepoda'y gaa'me mach'e anaigaĝa'u, uotaĝa gaa'me adaqayadejoda, uotaĝa gaa'me lael da'me adaqayayaĝac, uotaĝa gaa'me adeje'gue jo'ne neuoyaĝadi; qa'a ua'edi jogaa'me am 'yiyelaĝatedelegue da'me am nepodatedac, qama'le nach'eda male am ua'ajop da'me anejetenaguec. 13'Noota qom ja naq'aeta, dite da'me qom aua'uo da'me adiqui'yaĝanataĝanaĝac, anepoda'y jogaa'me choĝodache, jogaa'me choĝolaĝayaqa, nataq'aen jogaa'me uayodaĝayaqa nataq'aen jogaa'me qana'mi. 14Qama'le qomle yataqachiñe 'uo da'me adamaic, qa'a mate mane'e jogaa'me ja yaqanate't ta'le am yejete'n, qalaĝaja 'uo qomle da'me anejetenaguec ga'me nolo' qomle 'niyelaĝadijeguem dia'me yataqatelo'te.
15Ca'li qodomachiya da'me dojo', 'uo ga'me jo'ne netauelo gaa'me qayoĝode' dojapegue' ñe'me Jesús:
—¡Yataqata 'uo da'me lamaic gamachaqaega jo'ne uetaue da'me lejaliaĝa ñe'me Dios da'me deque'e qomle!
16Jesús 'yateguet:
—'Uo ñe'me jiyaĝaua jo'ne ya'uo da'me niqui'yaĝac ca'li pi'yaq, qama'le delataĝanaque da'me qaedi qonepoda'tape yema ga'me jiyaĝadipi. 17Ca'li yovita ga'me laloqo' da'me niqui'yaĝac, qama'le yamaq ñe'me lalemaĝajet qaedi t'aqataĝanema gaa'me nepodae's: «Ayalayi, qa'a joote yem da'me qoyiyamaĝatetac da'me niqui'yaĝanataĝanaĝac.» 18Qalaĝaja ena'uaque ma'te nayataĝade'tape. Ga'me 'uaechiñe enaac: «Yemta jecot di'me 'ñaleua qama'le 'noota ta'le jec qaedi jauana. Am ñachoĝodenot qaedi jayem avichoĝoden.» 19Laqaya enaac: «Yemta ñeuodenaqa'te gaa'me diez uacadi, qama'le nayi cha'li japiye'n. Am ñachoĝodenot qaedi jayem avichoĝoden.» 20Nataq'aen laqaya enaac: «Jayem qamqa'me yemta jeuo'on, qama'le ja jaqanatet ta'le jec.» 21Ñe'me nalemaĝajet 'viyelaq qama'le yema 'yaĝatem ñe'me lejaliaĝanec. Chane'eja joñe'me jalcote dalemata, qama'le enapega ñe'me lalemaĝajet: «Yaĝa, aueyalatapiye't da'me auec'atalo gaa'me noqoyaĝaco jo'ne jalco'elo nataq'aen noqoyaĝaco jo'ne ja leca'elo jena'me noic, qama'le anaueta jenjo' gaa'me choĝodache, jogaa'me choĝolaĝayaqa, jogaa'me qana'mi nataq'aen jogaa'me uayodaĝayaqa.» 22Qaale copa'ague, ñe'me nalemaĝajet enaac: «Jaliaĝanec, joote ja'uo da'me jo'ne jayem auamaĝalegue, nataq'aen maliaĝa 'uo ga'me jec'ata laqaya.» 23Chane'eja joñe'me 'yateguet: «Auequeloitapiye't oqueguelo gaa'me naq'aeco nataq'aen gaa'me nanaĝanaqa'te, qama'le auepaquetapegue'to jogaa'me jiyaĝa'u laqaya' qaedi nenoĝodeuo, qaedi nejaqachigui jena'me 'yachaqa'. 24Qa'a ami ja'aĝatema queda'me qaya'te onolec ga'me te'me 'uaediñe qonepoda'tape ta'le yaqanate't uedaue ga'me niqui'yaĝac.»
Da'me laqalaic ta'le qodigue joñe'me Jesús
(Mt 10.37-38)
25Jalcote ga'me jiyaĝadipi quetedapegue' joñe'me Jesús; qama'le joñe'me nejelegueta, nataq'aen enaac: 26“Qom 'uo ga'me jetaque jayem equegue qama'te da'me loqopich'i jo'ne jayem yanem ja napacalegue ga'me let'a nataq'aen lat'e, jaga'me loua, jogaa'me c'oqo'tolqa, nataq'aen jogaa'me mach'e laqaya'olqa, chayovida'a da'me mach'e 'loyaĝac, qama'le ja yaqanatet ta'le yapaĝaguenatac. 27Nataq'aen gamachaqaega jo'ne ja yachitac jaga'me mach'e sodoso qaedi jayem equegue, qama'le ja yaqanatet ta'le yapaĝaguenatac.
28“Qom 'uo gamachaqaega da'me ami jetaque 'noĝojeguem jaga'me vitaĝaiqui jo'ne qayaje'mec, ¿qo'li ja cha'li 'uaeñe da'me ñiyiñe qama'le naloqoten qom nalo'taguet da'me lajo'viyaĝac, qaedi yayaten qom yaqanatet ta'le yomat? 29Qalaĝaja qom ja naq'aeta, qom ye'et ga'me en nalegue qomle qama'te ua'edi ja yaqanatet ta'le yomat, qama'le ena'uaque jogaa'me jo'ne yauata da'me male ye'uetedac joga'me, 30enapega't: «Dojo' jiyaĝaua 'yaeñi da'me 'uo ga'me 'noĝojeguem qalaĝaja ja yaqanatet ta'le yomat.» 31Uotaĝa qom 'uo ga'me najoĝola' jo'ne jaliaĝanec yec'ata ga'me nalada't jo'ne qodelo'ye ga'me najoĝola' laqaya, ¿qo'li ja cha'li 'uaeñe da'me ñiyiñe qama'le naloqoten ga'me diez mil lauegaqataqa qaedi yayaten qom yaqanatet ta'le dajoya'aguet ga'me lauteua jo'ne veinte mil? 32Qama'le qom ja yaqanatet da'me dajoya'aguet, qom ga'me lauteua cha'li maliaĝa qaya'aguet, qama'le ye'uauaĝaneta gaa'me lamaĝa's qaedi yiyaĝadaque da'me 'nemaĝac. 33Naq'aeta da'me dojo', gamachaqaega da'me ami qom ja yema yaĝanegue ga'me jo'ne yauana, qama'le ja yaqanatet ta'le yapaĝaguenatac.
34“Ga'me qa'noua yataqachiñe 'noota; qalaĝaja qom yeguem da'me 'louaĝa, ¿teua'atoqo' yitaĝa qot'onataĝana? 35Ja yitaĝa 'uo ga'me yelo'teguet, uotaĝa ta'le ch'e qoyen lale'gue jena'me aleua, uotaĝa ta'le ch'e qoyen lale'gue ga'me lajoyiñe jo'ne qoyalequeteneguet ga'me nanaĝanaqa', dite da'me ch'e qoyeguem. Gaa'me jo'ne domachita dojo', ¡'noota qom naquiaĝata!”
Արդեն Ընտրված.
Lc 14: TSN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testament Toba del Oeste © 2010 Sociedad Bíblica Argentina