Hch 3
3
Pedro en yemegue ñe'me jiyaĝaua jo'ne ja t'añegue
1'Uo jo'me nolo', Pedro nataq'aen Juan yec'adeta ga'me tamenaĝaiqui let'adaic da'me yovita da'me laloqo' nale gaa'me tamenaĝaco nale javit. 2Ca'li yovideta ga'me, 'uo ñe'me jiyaĝaua jo'ne ja t'añegue chiyoqo'teguet ga'me yemta niyiñe. Yemeda gaa'me noloqo'ote qoyaneta'ña lae ga'me tamenaĝaiqui najom lenaĝat Onaĝaic, qaedi nale yenoĝoneuo ga'me jiyaĝadipi qama'le dajelaĝataque nachetaqate. 3Ca'li ñe'me choĝolaĝaic yauana ñe'me Pedro nataq'aen Juan da'me yamta'le tadoue ga'me tamenaĝaiqui, qama'le yajela'y ñe'me. 4Chane'eja Pedro nataq'aen Juan yelochidegue ca'li ga'me qama'le Pedro enaac:
—Qo'mi auec'ate'n.
5Qama'le ñe'me jiyaĝaua yataqachiñe naquiaĝañi, yepetapega da'me 'uo ga'me yate'm. 6Qalaĝaja Pedro enaac:
—Qaga'te ñaicaua, qalaĝaja ga'me jo'ne jayem ue'tajop am janem. Ñe'me Jesucristo 'me Nazaret le'ec joote jayem yanem da'me lañoqotaĝanaĝac qaedi am jenapega nayi: ¡oñijeguem nataq'aen auapiyeñi!
7Nenaĝategue dojo', Pedro yacona ga'me louaq yayaten qama'le yañijeguem, chane'eja paja'a yachimadidiñe gaa'me lapia'te nataq'aen gaa'me liquiyoquenal. 8Joñe'me choĝolaĝaic nenodijeguem ca'li ñijeguem qama'le paja'a yeuotac; yem qama'le nach'e ena'am yenoĝoneuo ñe'me ja t'añegue da'me tadoue ga'me tamenaĝaiqui, yeuotapiye't, uenotetac nataq'aen 'nonaĝachigui ñe'me Dios. 9Qama'le ena'uaque gaa'me yauata da'me yeuotac nataq'aen 'nonaĝachigui ñe'me Dios, 10yataqachiñe najaqachiguilo da'me yoqochetedapeguem nataq'aen t'oidapega ga'me 'uo ca'li jo'ne yauata, queda'me yateto'n ñe'me jiyaĝaua nataq'aen yayate'n queda'me nach'eñe ñichiñe nale ue'ta ga'me tamenaĝaiqui ga'me jom 'me lenaĝat Onaĝaic qaedi dajelaĝataque nachetaqate.
Pedro yapaĝague'n ga'me jiyaĝadipi jo'ne uetedaue ga'me tamenaĝaiqui let'adaic
11Joñe'me choĝolaĝaic jo'ne qoyen yemegue ja yaĝanegue ñe'me Pedro nataq'aen Juan. Ena'uaque ga'me jiyaĝadipi yoqocheja'am qama'le naqalegoqo'tague ga'me chalataqa' 'me lenaĝat Salomón, jo'ne ueteda'a gaa'me. 12Pedro ca'li yauana da'me dojo' qama'le enaac: “Ami Israel c'oqo'tepi, ¿toqoch'e auoqochetapeguem da'me dojo'? ¿Toqoch'e qo'mi auelochiguilo? Qa'a ja mach'e qo'mi da'me jenaĝa yemegue jenjo' jiyaĝaua; ja jaqanatetaq ta'le je'etaĝac da'me male yeuotac da'me jedoĝolegue ga'me mach'e qadañoqotaĝanaĝac uotaĝa ga'me qadepi'iyaĝac.
13“Ñe'me Nedios di'me Abraham, di'me Isaac, di'me Jacob, ñe'me Nedios dia'me jachiyojoĝogueta 'me qadet'al, nach'eñe yanem da'me yataqachiñe p'ajaye li'yoĝodic ñe'me lalemaĝajet Jesús. Nach'eñe jo'ne auemiñeyouelo gaa'me jaliaĝanaqa nataq'aen nach'eñe jo'ne a'uotañetac nataq'aen anemañetapec ca'li jetaque yejoye ñe'me Pilato. 14Naqaeda toqo' da'me aviyaĝañe'uo da'me qoyejoye ñe'me jo'ne ja 'nalegue nataq'aen chimaqachiñe, qama'te aviyaĝañe'uo da'me qoyejoye ñe'me jo'ne lataĝanaĝaic. 15Qama'le naqaeda da'me aualachi ñe'me jo'ne chiyaqayi da'me yataqachiñe qat'oyaĝac. Qalaĝaja Dios chiyoĝotauelo ga'me napa'lpi, qama'le nach'eda dojo' jechoĝotaqatac. 16Da'me nepe'e 'me chiyaqayi da'me lañoqotaĝanaĝac ñe'me Jesús, nach'eda jo'ne yitaĝa ya'uo 'lañaĝac jenjo' jiyaĝaua jo'ne auañiya nataq'aen auatetoñi. Da'me dojo' nepe'e nach'eda jo'ne chiyaqayi da'me Jesús yataqachiñe en yemegue, nach'eda da'me jo'ne auañetelegue.
17“Eja, ami yaqaya'olqa, joote jayaten queda'me ami nataq'aen gaa'me adejaliaĝanaqadi' aualachi ca'li ñe'me Jesús, auauoyi da'me dojo' qalaĝaja ja auayachiñe ga'me jo'ne a'vichiyec joñe'me. 18Qalaĝaja naq'aeta ga'me qo'yetec qa'a Dios en yepaquichigui ga'me jo'ne joote 'yaĝatetac jo'ne en na'yalo gaa'me 'laqataĝanaĝanaqa: jo'ne 'noota da'me yeleu ñe'me Liquiyac. 19Chane'eja, a'niyelaqaeya ñe'me Qadejaliaĝanec Dios nataq'aen auep'iiya'a ñe'me, qaedi yapalaĝa't jodaa'me adoecodi', 20qama'le ñe'me Jaliaĝanec ami loyaĝanate'tape nataq'aen ami namaĝalo qomle ñe'me Jesús, jo'ne nach'eñe joca'li yemta joote 'yatetelegue queda'me nach'eñe Liquiyac jo'ne ami yanema. 21Mate mane'e nayi Jesucristo cha'li ue'ta di'me piyem chayovida'a qom Dios yiyamaĝate'tape ena'uaque gaa'me uo'oe, nach'e naq'aeta ga'me 'laqatac jo'ne en na'yalo gaa'me 'laqataĝanaĝanaqa jo'ne ja 'nalo'te jo'ne chiyoqoteda'aguet gaa'me noloqo'ote jo'ne 'uaechidiñe.
22“Moisés t'aqataĝatapema dia'me jachiyojoĝogueta: «Joñe'me Qadejaliaĝanec Dios ya'uo qomle ga'me ami chiyaqauelo 'laqataĝanaĝanec ena'am da'me jayem. Auoqochiiya ena'uac ga'me jo'ne ami 'yaĝatema, 23qa'a ga'me ja yoqo'cha ñe'me Dios 'laqataĝanaĝanec qoyijaĝaye qama'le qoyapalaĝat.» 24Qama'le ena'uaque dia'me Dios 'laqataĝanaĝanaqa chiyoqotedelegue di'me Samuel nach'e dajo'tague, nach'e ena'am 'yaĝate'tape gaa'me uo'oe naa'me naajo' noloqo'ote. 25Ga'me jo'ne Dios 'laqataĝanaĝanaqa 'yaĝatetedac ca'li, queda'me jetaque ami 'yetema, nach'ena ami qoyanema; nach'e ena'am ami ua'ajopa da'me jo'ne Dios necoñetegueta dia'me auachiyoĝoita. Qa'a Dios yanem da'me 'laqatac di'me Abraham: «Yema ga'me jiyaĝadipi ñetamelo'te qomle jouaĝat ga'me ac'oqo'tepi.» 26Qama'le ca'li Dios chiyoĝotauelo dia'me napa'lpi ñe'me C'oĝot, 'uaeñe da'me ami namaĝalo qaedi ami netamelo'te, da'me male onolqa'tape aĝañidiñi da'me at'onataqadi' jo'ne ja 'noe'n.”
Արդեն Ընտրված.
Hch 3: TSN
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Nuevo Testament Toba del Oeste © 2010 Sociedad Bíblica Argentina