Tatanigaina 42
42
Ira Tahinamane Zosepu Di La Tabara Witi Ani Izipi
1Ne nomohi ghu Zekopu ta au witina ani Izipi, manei neke kahe ghua iahi ka ira tuunamane, “Oka nohe varimamato ma go au ghu,” neke ghua ghidi. 2“Ara nake nomohi ne au witi ani Izipi ta ghuana. O lao aianimu o la tabara va tehi vanada witi ghu, mala daka age leme la ghu ka lemei mahai.”
3Tazo ka ira tahinamane Zosepu dike lao ghu mala la tabara witina ani Izipi, 4nga Benizemeni ia tahinamane Zosepu ta torai kaike busaka maneri palu mu, e deo geke va malumi ghu Zekopu ta lao taremehadina, vununa manei neke maughena ta la dufu fatarina Benizemeni keha leghutau ta boka leme ghidi. 5Ira tuunamane Zekopu dike la sabara ghu Izipi taremehadira keha tehi nonirani mala la tabara witina, vununa ia songe neke au molamo ka ia kava Kenani.
6Ka fafata ianimu Zosepu neke mane gavanana ka ia kava, ia neke tatabarai lao witi no ka ira leghu noni nga. Ka ia la sabaradi ira tahinamane Zosepu, maneri dike la rorogho maimanihi hinae ka kenuna manei, dufuna ka kavaoni ira hihilidi. 7Ne fini laori ghu Zosepu ira tahinamane, manei neke fini avohori, ghe taghe ta deo ge avohori ghu neke ghua manei. Manei neke notoho rarautu lao ghu ka maneri, “?Hae noke la sipa mehana mu ghau? neke ghua ghidi.
“Sipamai meha Kenani mala tabara ghano nake ghua” dike ghua ungene tughuna.
8Geta neke fini avohori mo Zosepu ira tahinamane ghe, maneri deo gedi ke fini avohi ghu manei. 9Ianimu tuna ghe neke ngana laori nga manei ira epu baghunai ka taghona ghidi maneri, neke kahe ghua ghu iahi, “!Ghau mu mane sigho poika! Ghau no meha mala hadu kavei ma ka ghaghahena heve mo na paekena ghai o mala boka magara ghai ghu no ghua.”
10“Manefaa agho, ghai mu eka mane sigho poika ghu,” dike ghua ungene tughuna. “Ghai mu na meha taghe nou noniriva ma agho, na meha mala tabara ghano ghu. 11Ghai haroharo mu tatahina ma, aka mane sesebomai la ghu.”
12“!Deo!” neke ghua ghidi. “Ghau mu no meha mala hadu kavei ka ghaghahena heve mo na paekena ghai.”
13Ghe maneri dike kahe ghua iahi, “Manefaa agho ghai nou noniriva mu tazoi palu tatahinamane varigharamaina, a tuunamane ghu kaike mane ka ia kava Kenani. Kaike tahimaimane mu to leme, nia ia tahimaimane ta rekahana ge au taremehana ghu nomai mama ghatunaina, e ghua.”
14Ghe Zosepu neke kahe ghuani iahi, “Taghe nake va kahe ghini ghauno lama ara: !Ghau mu mane sigho poika! 15Taghe iahi e ghua mala age hadu kave ghauna no turi hohoghomu mamu ta ghuana: Ara a va bebereana ka ia babaolona ia mane ginitaukela ta toraina deo kalasukaina go ghahe ghu ghau, e vuhai meha ghu aiahi ia tahimumane ta ite. 16Kaikeu ka ghau o toraina ke leghu lao o la hio mehai ghu ia tahimumane ta ite. Ghau haroharo mu a nakai ghau ka malau pipiliga ini, a hadu kavei ghu no turi hohoghomu ba deo, ta ghuana. Ara a va bebereana ka ia mana ia mane ginitaukelana Izipi, neto deo la ge au ghu kaike tahimumane ta rekahana, ianimu ara a age avohi ghatu ta mane sigho poikana mu ghau.” 17Zosepu neke nakai hagheleri haroharo ghu maneri ka pipiliga lito ravata.
18Ka ia va litona ravata Zosepu neke kahe ghua iahi ka maneri, “Ara mu kaike mane ta va vonavonai God, o riva ghini ghau taghe ta va kahe ghini ghau ini ara, o age doli ghu. 19Mala avohina ta hohoghomuna ghau mu, kaikeu ka ghau e au hinae ka pipiliga ini, nia ghau haroharo go hio leghu laori ghu witi noke tabarari nira ka ira fototatamana ghau ta nodi liha, e ghua. 20Ghe ghau o toraina ke la hio mehai ka ara ia tahimumane ta ite. Iahi lamu ta age va podolina no turi hohoghomu mamu ghau ta ghuana ta deona ghu ghau go age leme ghu.” Maneri dike age veha vanadi mo ka iahi.
21Maneri dike kahe ghua ghu iahi ka vari taghodi, “Uve, iahi tuna age va vavahagala ghidira ghita heve dake va riva ghinio ia tahidamane. Ghita dake finini mo neke hangapuahana manei ka ia papada ghita mala toka ghinina, ghe ghita deo gada ke nomohi ghu. Ne ghua mamu ghe ne dufu ghita nga ghatunaina mamarutana irahi.”
22Rubeni neke kahe ghua iahi, “Ara nake va kahe ghini ghau taka ngovalina ghu ia rekaha mane, ghe ghau e deo goke nonomoho ghu. Ghatunaina ghita da hio ghini lilifu ghu ia leme ka manei.”
23Zosepu neke va fafahakari mo heve dike kaheriro maneri, ghe maneri deo gedi ke avohi ghu, vununa maneri dike turi lao ka manei ka kaike mane mala va kakadolo ngengene.
24Zosepu neke ghahe kairi maneri neke la tataniga nakele ghu. Ka ia take boka ngengene leghu manei, manei neke leghu lao, neke la hioi ghu Simoni nia va kahe ghidi tuna ira nona noniriva ta piligaina ka toraina kenudi maneri ghe dike hio ghahei nga.
25Zosepu neke va kahe ghidi ira nona maneriva ta va foudu ghidi witira ira baiki ka maneri, nia take sopai nai leghu vanadira ira nodi rongo ka ira nodi baiki e ghua, nia va beori haro tuna ka ghaghahe ani maneri, ta ghuana. Leghuna riva va hokoto vanadi leghutau iranimu, 26maneri dike va hagheri ira baiki witi ka ira nodi dongiki ghe dike ghahe nga.
27Ka ia malau dike la nodo mala va fuludino maneri ia redu, kaikeu ka maneri ne tobehi ghu ia nona baiki mala hio valihai witina ia nona dongiki, manei neke finini ia rongo ka taghona fate laona ka baiki ani. 28“Ia rongo ka ara neto ke va leghu vanagu,” neke ghua kudo laona ka ira keha tahinamane. “Iahi la ka giliona baikina ara.”
Maneri dike age nanazara taremehana maughedi vari mamatodira nia vari nonotoho tuna dike ghua, “!God toraina neto riva ghinina iahi ka ghita!”
29Di leghu la dufu ghu ka nodi mama ani Kenani, maneri dike la va kahe ghini ira leghu dike to dufuro nga ka taghodi: 30“Ia mane gavanana Izipi neke ngengene rarautu ghini ghai, nia taghe ghai mu nake la sigho poika ka soloso ani manei neke ghua ghini ghai. 31Ghe ghai nake va kahe ghini, ‘Ghai mu a mane hohoghomai, ghai mu eka mane ta sigho poika ghu. 32Ghai mu tazoi palu tatahina mane ka kaike nomai mama mo. Kaike tahimaimane mu neke to leme nia ia ta ite mu ne au mo ani Kenani taremehana nomai mama, e ghua,’ nake ghua ghini.
33“Kahe ghua tuna iahi ka ghai neke ghua ia mane gavanana Izipi, ‘E ghua iahi mala hadu kaveina ara noto mane hohoghomu la ghau: Kaikeu ka ghau o au hinae taremehagu ara, nia ghau haroharo go hio leghu laori ghu ka ira fototatamana ghau ta lemei mahai, witi noke tabarari iramu, e ghua. 34Ghe oke la hio mehai ia tahimumane ta ite a mala age avohi ghu ara ta deona ghau go mane sigho poika ghu, nga ta mane hohoghomuna. Ianimu tuna ghe gake age vanamu leghu nga ara ia tahimumane nia boka rivai bisinisi mo tuna ghau ka malau ini, e ghua, neke ghua ghini ghai.’ ”
35Ka ia tatanigai oranga va kato hinaeri ira nodi baiki, maneri haroharo dike finiri ira sopai nodi mogoha rongo ka giliodi ari. Di finiri ghu maneri rongo ari, maneri nia Zekopu ia nodi mama e ghua dike maughedi. 36Neke kahe ghua ghu iahi nodi mama, “Ghau noto kabai hio ghahe tagu leghu nogu rekaha nga. Zosepu to ghahe, Simoni to ghahe, nia ghatunaina go kabai hio ghahei ghu Benizemeni ta ghua ini. !Ara mo na vavahagalana, vununa ka leghu ta dufu irahi nga!”
37Kahe ghua tuna iahi ka nona mama neke ghua Rubeni, “Nato deo la ara ke hio leghu mehaina Benizemeni ka agho, agho o boka atunguri mo palu tuugumane idi ara. Nakai mehai manei ka kamegu ini ara, ake age hio leghu mehai ghu ara ghatu,” neke ghua ghini.
38Ghe Zekopu neke kahe ghua iahi, “Tuugumane ini ara e deo boka ghahe taremehamuna ghau. Ia tahinamane manei to leme nia manei lama ka ira tuuna Reseli ta auna. E ghua mo, e age dufu ghu ka manei keha leghutaura ka ghahe ta lao nia ghu. Neto age dufui la ghu manei keha leghutau ta boka leme ghidi ka hangana ani, ara a age boka leme mo ka muko hihingo sugha vona ghu ka tato mamanekusu ini ara.”
Արդեն Ընտրված.
Tatanigaina 42: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.