Tatanigaina 41
41
Zosepu Ne Va Fafahakari Ira Epu Baghunai Ka Ia Mane Ginitaukela
1Ka leghuna dike to fuluduro palu kamotodi komuhu, ia mane ginitaukela neke fini kaike epu baghunai: Manei neke tetu ka gheremena ia Ketuhu Naele, 2neke finiri ghu vitu bulumakau ghasedi ta busi motongo la kave mehadira ka ketuhu leghaha ani dike la tatanigai mahai ghu ka ira sesehu. 3Leghuna iahi manei neke finiri keha vitu bulumakau ghasedi ta gagao mumuko la kave mehadira, dike la tetu ghu ka gheremedi ira keha bulumakau ghasedi ta au ari ka gheremena ketuhu leghahana. 4Ira vitu bulumakau ghasedi ta gagao mumuko dike la ghaniri ira vitu bulumakau ghasedi ta busi motongo. Ka fafata iahi lama neke to baghunu ghu ia mane ginitaukela.
5Manei neke epu leghuni neke finini ghu kaike va paluna epu baghunai. Ghatunaina mu manei neke fini laori vitu heludi witi ta pigha omihi ka kaike vununa mo. 6Ianimu tuna ghe neke finini nga manei keha hekena witinani ta kodolo vona keha vitu heludi witi ta sosologorudi nia tato leleme ka dangavana dafe fateona ta ufu meha ka ia malau koroghana ta karango. 7Ira heludi witi ta sosologorudi dike la gomuri ira vitu heludi witi ta pigha omihi. Baghunu vona tuna ge ngana avohi ghu neke epu baghunaina taghonai neke ghua ia mane ginitaukela.
8Ka ia fufughona manei neke puina age anga ghena neke kudori ghu ira leghu hiama ta boka va fafahakari ira ghila nia ira mane avoavohodi Izipi e ghua. Ne va kahe vanadi ghu manei ira epu baghunai ka taghonai, e deo hei ka maneri neke boka va fafahaka vananina.
9Ianimu tuna ghe neke kahe ghua lao nga iahi ka ia mane ginitaukela ia manefaana kopui waeni, “Mane ginitaukela agho, ravata iahi ne toraina va ngana ghinagu leghu kaike va zezea ka ara. 10Agho noke haligho ka ia manefaana rivai bereti nia ka ara e ghua, noke nakai haghele ghai ghu ka pipiliga ka ia sugana ia mane faadi ira mane magara ta kopu ka agho. 11Kaike redu, ghai palu nake sopai fini epu baghunai ta sopai ira fafahakadi. 12Kaike Hiburu ta mane foforu mala varituhu ka ia manefaadi ira mane magara mala kopu neke au taremehamaina ghai ka pipiliga. Ghai palu nake va kahe vanani ira nomai epu baghunai neke va kahe vanamai ghu manei ira sopai fafahakadi. 13Taghe heve neke kaheriro lama manei neke age auna ghu: agho noke nakai leghuau ara ka ia nogu papala riva, nga ia manefaana rivai bereti mu agho noke atungu va lemei noke va reketi ghu ia tinina ka kaike heke.”
14Ia mane ginitaukela magali ma neke varituhu ghu mala la hio mehaina Zosepu, dike magali la hio kave mehai ghu maneri ka ia malau pipiliga. Ka leghuna neke to sesengeno nia holara pokono Zosepu, manei neke haghele la tetu ka kenuna ia mane ginitaukela.
15Ia mane ginitaukela neke kahe ghua iahi ka manei, “Ara nake fini kaike epu baghunai, ghe e deo hei neke boka va kahe vanaguna ia fafahakana. Ghe ara dike va kahe ghinagu ta boka va fafahaka epu baghunaina agho.”
16“Ara e deo bokaguna mane ginitaukela agho,” neke ghua Zosepu. “Nga God mo mu ta boka va kahe ghinighona heve fafahakadira ira epu baghunai ta kuhana ghidi agho.”
17Ianimu tuna ghe neke kahe ghua nga iahi ia mane ginitaukela, “Ka ia epu baghunaigu, ara nake tetu ka gheremena ia Ketuhu Naele, 18nake finiri ghu vitu bulumakau ghasedi ta busi motongo la kave vona mehadira ka ketuhu leghaha ani dike la tatanigai mahai ghu ka sesehu ari. 19Ianimu tuna ghe dike la vona mehani nga leghudi maneri keha vitu bulumakau ghasedi ta gagao mumuko ghedi. Maneri lama mu bulumakau ghasedi ta toraina mumuko ghedira ka kamotona Izipi nato finirira ara. 20Ira bulumakau ghasedi ta gagao mumuko ghedi dike la ghani kamotori ira vitu bulumakau ghasedi ta busi motongo dike kusu vona meharo. 21Ghe geta ghua ghu ka leghuna ia ghani va noghari maneri ghe, e deo hei neke boka kaheina dike ghaniri mamu maneri ta ghuana, vununa dike varifata ma dike au ghu fifini gagao mumukodira. Baghunu vona tuna nake ghua ara.
22“Ara nake epu baghunai ghidi molamo vitu heludi witi ta pigha omihi tadi kodolo vona ka kaike hekedi mo. 23Ka leghudi maneri keha vitu heludi witi dike sekere vonarani. Ghe vitu heludi witi irahi mu dike sosologoru nia vivighoho ka dangavana dafe ta fofolofo meha fateo mo. 24Ira heludi witi ta sosologoru dike gomu va noghari ira vitu heludi ta pigha omihi. Ara nake va kahe ghidi ira noni ta kururi avoavoho, ghe e deo hei ka maneri dike boka vanaguna ira fafahakadi.”
25Zosepu neke kahe ghua iahi ka ia mane ginitaukela, “Palu epu baghunai iranimu, edi varifata ma fafahakadira. God to va kahe ghinigho heve ta age riva ghinina manei ghatu. 26Ira vitu ghasedi bulumakau ta busi mu vitu komuhu nia ira vitu heludi witi ta pigha omihi mu vitu komuhu haro molamo. Epu baghunai irahi mu edi varifata ma ghu fafahakadira. 27Ira vitu bulumakau ta gagao mumuko ghedi dike vona meharo leghunana nia ira vitu heludi witi ta sosologoru dike vivighohoro ka dangavana dafe ta fofolofo meha fateo mo mu, vitu komuhudi songe.
28“E toraina taghe nake va kahe ghinighono lama ara: God neto va podolo vananigho heve ta age riva ghinina manei ghatu. 29Ka giliodi vitu komuhu, ira nunuma ka ia kava kamoto Izipi edi age toraina kuru ghanodi fuludu. 30Leghuna ianimu, vitu komuhuna songe ta age auna ghatu, edi age nganakairi ghu ira noni ira leghu komuhu dike puina kuru ghanodiro ira nunuma, vununa ia songe e age va mukoi ia kava. 31Ira noni edi toraina age nganakaini ia kamotona fafata neke tehi fuluduro ira ghano, vununa ia songe e age toraina mamaghuana fuludu. 32Noke palu fafata finini nga agho epu baghunai iamu ka agho mu, vununa God to nai va gimai heve ta age riva ghinina ghatu, deona ge age mamahuge ghu manei riva ghinina.
33“Agho geala o faeti ghu kaike mane ta kurui avoavoho ta boka va rivari o vanani mana ghu mala kopu ghinina ia kamotona kava Izipi. 34Agho o nakairi molamo keha manefaa mala are ghidi ta hio kaveina ghu kaikeu ka leleghu va gahana taho ka ira leghu ghano nga ka giliodi ira vitu komuhu ta tehi fuludu ira ghano. 35Maneri edi toraina sene varighara ghidi ira leghu ghano nga ka giliodi ira komuhu ta veha ta la meha, nia vanadi mana mala nai teghidira ghano iranimu ka giliodi ira malau leghaha nia mala kopu ghidira, e ghua. 36Ghano irahi mu e mala papasai vanani ia soloso malana ka ira vitu komuhudi songe ta la meha ghatu ka ia kava Izipi. Ka ghaghahena iahi ta deona gedi boka age lemei mahai ghu ira noni.”
Zosepu Ne Hioi Ia Papala Gavana Ani Izipi
37Ia mane ginitaukela nia ira manefaa ka manei dike finini ta vehana vatovato iahi, 38neke kahe ghua ghu iahi ka maneri ia mane ginitaukela, “Ghita toraina deo kalasukai gada boka age fini ghu kaike mane ta veha fuludu laoina Zosepu, ia mane ta foudi ia Tarunga ka God.”
39Kahe ghua tuna iahi ka Zosepu neke ghua ia mane ginitaukela, “Vununa God neto va podolo vananigho agho leghu irahi nga, to avoavohoana ghu ta deona heini ta kuruina avoavoho ta boka va rivari taghe ta kuruigho iamu agho. 40Ara a nakaigho ghu agho ta mala kopu ghinina nogu tolima ginitau ini, nia ira leghu noni nga ka ara gedi ungene nonomoho ghu ka agho e ghua. Nga vununa ka ta mane ginitaukela ini lama ara mu ta age kuruau mama fuludighona agho mu ara.”
Zosepu Neke Kopu Izipi
41“Ghatunaina ara a nakaigho ghu agho ta mala kopuna ka ia kamotona kavana Izipi.” 42Ia mane ginitaukela neke hio kavei ka kilonao ia ringi ginitaukela neke nai laoi ghu ka ia kilona Zosepu. Manei neke va vona ghini lao kaike poko lineni ta sodu veveha nia va vadihi ghini lao ka ia taniana kaike seni ta golu neke ghua. 43Ia mane ginitaukela neke vanani ia va paluna mala haghe ka taghona ta korohi ka hose, neke haghe ghu manei, ghe gedi kudo ghua nga iahi ira noni, “!Va kalasi, va kalasi!” Ia mane ginitaukela neke va mane gavanai ghu Zosepu ka ia kamotona malau Izipi.
44Kahe ghua tuna iahi ka Zosepu neke ghua ia mane ginitaukela, “Ara mu ia mane ginitaukela, ghe e deo hei ka ia kamotona kavana Izipi ta riva ghinina kaike riva ghu to deo la agho go va kahe ghidi ghu agho ta mala rivana.” 45Ia mane ginitaukela neke vanani Zosepu babaolo Zafenati Panea nia neke vanani kaike ghaseborona babaolonana Asenati ia tuunaghase Potifera ia hiamana ka ia malau leghaha Oni#41:45 Iahi mu Heliopolisi; e au haro ka papaguaina 50., neke ghua. Zosepu neke kopu ghini ghu ia kamotona kavana Izipi.
46Zosepu neke litofulu komuhuna ka ia tatanigai riva vanani manei ia mane ginitaukelana Izipi. Manei neke ghahe kaini ia tolima ginitau neke ghahei ghu ia kamotona kavana Izipi. 47Ka giliodi vitu komuhu, ghano neke tehi fuludu ka ia kava. 48Zosepu neke sene varighara ghidi ira leghu ghano nga ka dike numa ghidiro ka ira vitu komuhu dike tehi fuluduro ira ghano, neke nai teghidi ghu ka ira malau leghaha. Ka leleghu malau leghaha manei neke nakairi ira ghano ta haharui mehari ka ira galahedi kava nunuma ta au lilohi manei. 49Zosepu neke nakai teghi witi va tehi fuludu taghe tehidi garanga ka ia tapuruna tahi ira ta ghua. Manei neke age nodo kangava hinaerira vununa neke age tehi fuludu to deo ghu boka fatarira.
50Ghe geke dufu meha nga ia songe, palu tuunamane Zosepu dike urahara ka Asenati ia tuunaghase Potifera ia hiamana Oni#41:50 Heliopolisi mu keha babaolonana Oni.. 51Zosepu neke vanani babaolo Manase#41:51 Ne nonomoho taghe nganakai ne ghua ia va kenuna tuunamane kahe ghuana iahi, “Ne ghua nga iahi mu vununa God ne va nganakaiau ka ira leghu mamarutana nga ara nia ka ia kamotona fototatamana nogu mama, e ghua.” 52Ka ia va paluna tuunamane mu, Zosepu neke vanani babaolo Eferemu#41:52 Ne nonomoho taghe hugara ne ghua kahe ghuana iahi, “Ne ghua nga iahi mu vununa God neto vanagu rekaha ara aiahi ka ia kavana ira vavahagala ka ara.”
53Ira vitu komuhu neke tehi kakaio ira ghano mu toke age nogha, 54nia ira vitu komuhuna songe geto ke tataniga ghu neke ghua, taghe neke to kaheio lama Zosepu. Ia songe mu neke dufu molamo ka ira keha leghu kava nga, ghe ka ia kamotona kavana Izipi mu neke tehi fuludu mo ia ghano. 55Ka ia tataniga va ghilaghilai ia ponoe ghano ia kamotona Izipi, ira noni dike la fangai ia mane ginitaukela mala vanadi ghanona. Manei neke va kahe ghidi ghu ta laona maneri ka Zosepu ta riva ghinina ghu heve neke va kahe ghidina manei.
56Ia songe neke toraina age muko fuludu neke riraha ghu ka ia kamotona soloso. Zosepu neke tobeheri ghu ira leghu suga mala nanakai nga neke tatabarai witi ghu ka ira nonidi Izipi. 57Ira noni ka ira leghu pelodi nga ka malau kamoto iahi peka dike la meha Izipi mala tabara witina ka Zosepu, vununa ia songe neke toraina muko fuludu hae ghe hae ghu.
Արդեն Ընտրված.
Tatanigaina 41: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.