मरकुस 11
11
एरुसलेम रे ईसु कू आदर इजेत तेडा
(मत्ती 21:1-11; लूका 19:28-40; एहुन्ना 12:12-19)
1ईसु एरुसलेम बँदे जयतुन बुरू रे बयेतफगे, अवुर बयतानियाह गाँविय तयाःतेड दो, अनेज रेनकू चेलाकू मेंडे बा होड़ न घयते कहनी केडकींञ तेय कुलतेड किञाँ, 2“मेना मड़ंग हँडाः गाँव रेबा सेनुऊ, अवुर जेयसे हेना बा तयाः सी, मियाँटंग गदही होपोन बा ञाँमा, अवुर हेंय थरे कनय बेगर घोड़ा बेड़ाआ, अवुर तोलकेडिया कू हेंय लड़ा केते बा अगेयू 3अगर कनय होड़कू, ची लगड बा लड़ा यडिया मेनते कू होंबोर बा रेदो, बा कहनियूँ, ‘परभु लगड नेय राः जरूरत इदाना,’ अवुर नेय तुरेत्ते नेन्डेय एर अग अटुया।” 4हेना वरी हेंकींञ सेनेना, अवुर मियाँटंग गदही होपोन गली रे दुवर बँदे रेकू तोलताडिय घनी कींञ ञँमतेडिया। हेना वरी हेंकींञ गदही होपोन कींञ लड़ा दोहो एनु। 5तहाँ हेना रे चड़ाँ तन हेंकू मेंडे रे कुछ होड़कू होंबोर तेडकिञाँ, “चीबा बनो यडा? नेय गदही होपोन ची लगड बा लड़ा यडिया?” 6हेना वरी जेयसे ईसु हेंकींञ थरेय कहनी तेडा, हेन घयते हेंकींञ हेंकू थरे कींञ कहनी तेडा; हेना वरी हेंकू एने वडिया। 7हेंकींञ गदही होपोन ईसु थरे कींञ अगतेडिया, अवुर हेंकींञ कपड़ा गदही होपोन थरे कींञ लदगो तेडा, अवुर ईसु हेंय थरेय दुड़ूब एना। 8कुछ होड़कू कपड़ा तकू होर तेकू बीले दोहो एनु, अवुर कू खेत वरी सड़ी गेरकेते होर तेकू बिल तेडा। 9ईसु राः तयोम मड़ंग ते से-ने दोहो एनु, हेंकू नआँ घयतेकू कहनिय दोहो एनु,
“होसाना!
परभु राः ञुमू ते मेजुः तन हेनी आसीतिय गिआयू!#सिरिंग 118:25-26
10अले रेनिय खुटी खनदान दाऊद राजा राः राज मेजुः तना; हेना आसीसित गिआ! सरग रे होसाना!”
11ईसु एरुसलेम रे मेजकेन ते, एहूदिकू राः मँडिल तयाः केते, अवुर चारियो खुट हन सींड़ चीज ञेंलकेते अनेज रेनकू बारह झन चेलाकू सुदा बयतानियाह हनतेय चलो यनु, कहेकि अयुब यन दोहो एनु।
मेने जो-आ हेना अंजीर दुबी
(मत्ती 21:18-19)
12हेना ञींदावत हेंकू बयतानियाह वरी कू उडूंग एना, तहाँ ईसु रँगेज तेडिया। 13हेंय सगींञ वरी हरियारा अंजीर दुबीय ञेंल ञँमतेडा, तहाँ हेंय जोओत इदाना मेनते पसींद केतेय सेनेना, लेकिन हेना रे सकमतू छोड़ कनर मेनेय ञँमगाडा, कहेकि हेना तोलोग जोः राः समय मेने दोहो गना। 14तहाँ हेंय दुबीतिय कहनी वडू, “अब वरी अमाः जोओ कनय एरो जोम तेडा।” अवुर चेला कुतय नआँ टेबोः कू अँजोमे दोहो एनु।
मँडिल वरी बेयपारिया कुय उडूंग तेडा
(मत्ती 21:12-17; लूका 19:45-48; एहुन्ना 2:13-22)
15हेना वरी हेंकू एरुसलेम सहर रेकू मेजेना, अवुर ईसु मँडिल रेय सेनेना, हेना रे लेन देनुः हेंकू बहेर हनतेय जोला तेडकुआ, अवुर पेयसा अदला बदलाकू राः टिबुल, अवुर कबूतर कू केकेजाकू राः चवकिय कलथो तेडा। 16अवुर हेंय मँडिल रे कनारा हो सबकेते मेनेय इकम बोल उडूंग वकू दोहो एनु। 17अवुर हेंय होड़कू चेडके कुतेय कहनी तेडा, “धरमग्रंथ रे नआँ बेगर लिखोआ किदो? ईञाआँ ओड़ाः सींड़ जात रेनकू लगड बिनतिआ ओड़ाः कहोआ? लेकिन अपे नआँ लुटेरकू राः अड्डा पे बनो गोत्तेडा।” 18नआँ अँजोम केते बड बडे आजककू, अवुर एहूदी नियम चेचेडकू, हेंय ञेंड गोज लगड मोका कू छपा बेड़ा; लेकिन हेंकू हेंय कू बोरोवय दोहो एनु। कहेकि भीड़ रेनकू सींड़ होड़कू हेंय चेडकू दोहो एनु, हेना अँजोम केतेकू अहचरज जोम दोहो एनु। 19अयूबुः दोहो एनु, हेन तोलोग ईसु अवुर चेला कुतय सहर वरी बहेर हनतेकू चलो यनु।
बेगर जो-आ अंजीर दुबी
(मत्ती 21:20-22)
20फेर हेंकू ञींदाते कू चलोः दोहो एनु, तहाँ कू ञेंलतेड दो हेना अंजीर दुबी, जड़ीत घलि लोहोड़ यन दोहो एनु। 21तहाँ पतरस हेना टेबोईय उहयर केते ईसुय कहनी वडा, “ए गुरू! ञें-लेमू, अम सराप तेडा, हेना अंजीर दुबी लोहोड़ यना।” 22हेना वरी ईसु हेंकू थरेय कहनी तेडा, “भगवान थरे पे बिसवासे। 23#मत्ती 17:20; 1 कुरि 13:2इंञ अपे थरे सही मेतेंञ कहनी यडा, कनय हो ‘रचाः कोःते समुन्धर रे चलोः’ मेनते नआँ बुरूय कहनी वा अवुर अनेज राः मन रे अलोय संखायू, अवुर जेयसेंञ कहनी यडा हेन घयते होयाआ, मेनतेय बिसवासे रेदो, हेंय लगड हेन घयते होयाआ। 24हेनाते इंञ अपे थरेंञ कहनी यडा, अपे जे-ना बिनती रेपे असियू, बिसवासे पे कि अपे हेना ञँमियाना, अवुर हेना अपे लगड होयाआ। 25#मत्ती 6:14,15जब अपे बिनतीः लगड पे चड़ाँः रेदो, अवुर अपे राः मन रे कनय राः कनारा बिरोध इदान रेदो, हेंय माफिय पे, कहेकि सरग रे इदानिया, हेनी अपापे अपे कसूर केडा, हेना होय माफेआ। 26अगर अपे कनय मेने पे माफ रेदो, सरग रे इदानिया, हेनी अपापे अपे राः पाप हो एरोय माफ तेडा।”
ईसु राः अधिकार राः बारे ते सवाल
(मत्ती 21:23-27; लूका 20:1-8)
27हेना वरी हेंकू फेर एरुसलेम रेकू मेजेना, तहाँ ईसु मँडिल रेय होयोर बेड़ाः दोहो एनु, तहाँ बड बडे आजककू, अवुर एहूदी नियम चेचेडकू, अवुर सपायँड़कू, हेंय थरे कू मेजेना। 28हेना वरी हेंय कू होंबोर तेडिया, “नआँ काम ईया राः हँक तेम करो यडा? अवुर नआँ करोवे लगड हँक ईया ओवाड मिआँ?” 29तहाँ ईसु हेंकू थरेय कहनी तेडा, “इंञ हो अपे मियाँटंग टेबोईंञ होंबोर पेआ, अपे इंञ पे लायवा रेदो, इंञ हो ईया हँक ओवाडिञाँ ते, नआँ कामिंञ करो यडा, हेनांञ लाय वपेआ। 30एहुन्ना बतिस्माय एमतेडा, हेना सरग हनवरी दोहो एना किदो, होड़कू हनवरी दोहो एना? इंञ पे लायवा।” 31हेना वरी अनाकू अनाकू होंबोर ओड़ेंग दोहो एनु, “अबू कहनियूँ, ‘सरग हनवरिय दोहो एना,’ मेंडे रेदोय कहनी वबुआ, ‘फेर अपे हेंय राः ची लगड मेने पे बिसवास गडा’? 32अगर बू कहनियूँ, ‘होड़कू हनवरी दोहो एना,’ मेंडे रेदो होड़कू राः डर इदाना, कहेकि एहुन्ना सही मेते भविस्यवक्ता दोहो एना। मेनाआँ सींड़ कुकू पपाड़िआ।” 33तहाँ हेंकू ईसु कू जबाब वडा, “अले मेने ले पपाड़िआ, हेना करा हनवरी दोहो एना।” हेना वरी ईसु कहनी तेडा, “हेंडे दो इंञ हो एरोंञ लाय तेडा नआँ काम ईया राः हँक तेंञ करो यडा।”
Արդեն Ընտրված.
मरकुस 11: ksz
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Wycliffe India. All rights reserved.